UNYẸNMHIN NỌN KHẸKE ENE RẸKHAN IJESU
Guanọ Otọ Ebi Jehova Ghe Emhin Yẹ
Mhan guanọ nin mhan ha lu emhin ne yẹẹ Jehova bhi emhin rebhe nin mhan lu. (Pr 27:11) Nin mhan rẹ sabọ lu iriọ, ọkhẹke nin mhan ria ẹmhọn ebi Jehova ghe emhin yẹ sade mhan ho nin mhan zẹ ebi mhan ha lu aharẹmiẹn uhi iribhọ nan gbe rẹji ọne emhin. Be ha sabọ rẹkpa mhan rẹ lu iriọ?
Ha luẹ Baibo ẹghe-ẹghe. Ahamiẹn mhan tie Baibo, ọ ki diabe ghe mhan deba Jehova gbẹghe. Mhan dẹ sabọ lẹn ebi Jehova rẹ ghe emhin yẹ sade mhan luẹ uwedẹ nin ọle rẹ ne ẹbho nesọle lu emhin yẹ bhi ẹghe nọn gbera, bi sade mhan tie ijiẹmhin ọsi ẹbho ne lu emhin ebe bi ene lu emhin esili bhi ẹlo nọnsọle. Ẹlinmhin nọn khiale dẹ ye mhan egbe re adia bi emhin kẹkẹ nin mhan luẹle bhi Ọta nọnsi Osẹnobulua sade mhan khian zẹ ebi mhan ha lu.—Joh 14:26.
Ha guanọ otọ emhin fẹghe. Ahamiẹn emhin ribhọ nin uwẹ ho nin uwẹ lu, nọọn egbe uwẹ ọne inọnta nan, ‘Ijela bhi Baibo la okha nela bhi Baibo ha sabọ rẹkpa mẹn lẹn otọ ebi Jehova ghe ọne ẹmhọn nan yẹ?’ Bhii Jehova nin ọle rẹkpa uwẹ, uwẹ ha noo emhin kẹkẹ nin agbotu zẹ ọle egbe dagbare bhi urolo nọnsẹ ne ha sabọ rẹkpa uwẹ guanọ otọ ebi Baibo tale rẹji ọne ẹmhọn bi ebi uwẹ ha rẹ sabọ re obọ rẹkhan ọlẹn yẹ.—Ps 25:4.
GHE ỌNE IVIDIO NATIỌLE IZIẸNGBE MHAN DA RẸ RE UNẸ—HA LE EBALE ESILI. BHA HA KI GHE ỌLE FO, WANNIẸN ENE INỌNTA NAN:
Edọnmhẹn nela ọne obhio mhan nin okhuo bhi ọne vidio kuẹlo da?
Be uwẹ ha rẹ sabọ noo emhin kẹkẹ nin agbotu zẹ ọle egbe dagbare rẹ khọn edọnmhẹn ne sẹriọ yẹ?
Elele nela mhan ha miẹn sade mhan re ẹghe ọbhi otọ rẹ guanọ otọ ẹmhọn fẹghe yẹ tobọmhan luẹ emhin bhi Baibo ne ha rẹkpa mhan rẹ zẹ emhin nin mhan ha lu?—Heb 5:13, 14