Ebi Mhan Ha Rẹ Robọkpa Yẹ Sade Emhin Idumhunri Sunu Fo

Emhin idumhunri kẹkẹ ki wo sunu ẹlẹnan gbera ọnikhẹ. Emhin idumhunri ha sunu, agbotu ki mhanmhan urẹkpa nan ha re ji ibhio mhan bhi uwedẹ nọn ha rẹ sẹ ọrebhe obọ. Ranmhude ọnan, Otu Nọn Sun Oga da mun dipatmẹnt gbọ bhi Bẹtẹ kẹkẹ ne ha re urẹkpa nin ibhio mhan nin emhin idumhunri sunu je.

Ene ibhio mhan ne ribhi ọne dipatmẹnt ha họn ghe emhin idumhunri sunu, ele ki jẹje nọọn ewanlẹn ne ribhi enin urẹkpa nin ibhio mhan nin ọne emhin sunu je guanọ. Ahakimiẹn ọne emhin idumhunri wo khọ sẹbhọ ghe, ọ nẹ obọ ọsi ene ibhio mhan, Bẹtẹ ki je ene ewanlẹn ne mhọn obọ bhi urẹkpa nan re nin ibhio mhan nin emhin idumhunri sunu je ji ele. Ene ibhio mhan nan dẹ sabọ guanọ ẹbho ne ha zegbere dọ rẹkpa bhi ọne ẹsọn nan la taman ibhio mhan nin ele ne emhin eso re, la ele ki tobele dẹ ene emhin yẹ gha ele nin ene ibhio mhan ne ribhi ọne ọnọghọ.

Elele ne bunbun ribhọ sade a re emhin khian bhi uwedẹ nọn sẹnian. A ha re inian ha lu ọle, a ida ha miẹnsọn kua, ozughu ida ha ribhọ, sẹyẹ agbotu ki sabọ ha te igho bi emhin nin ibhio mhan re re. Enin zẹle nọn ida mhẹn nin mhan tobọmhan ha re urẹkpa nin ibhio mhan nin emhin idumhunri sunu je.

Ene ibhio mhan nin Bẹtẹ je re, ele tare eka igho nan ha noo bi eka ẹbho nan ha noo rẹ lu ọne iwẹnna nan. Ele dẹ sabọ ne ene wẹnna nin gọvamẹnt talọ ne ha sabọ rẹkpa mhan rẹ re ẹjẹje re urẹkpa nin ene ibhio mhan. Bhiriọ, bha wowo, bha hẹi dọ ha tobọbha koko igho, gha emhin nẹga, la ha khian eji emhin idumhunri da sunu sade a bha taman bha nin bha lu iriọ.

Emhin idumhunri ha sunu, mhan ki ha guanọ nin mhan rẹkpa ibhio mhan ranmhude mhan hoẹmhọn ele. (Heb 13:16) Sokpan, be ọkhẹke nin mhan lu yẹ? Mhan dẹ sabọ ha nan erọnmhọn nin ene ibhio mhan bi ene re urẹkpa nin ele. Mhan dẹ sabọ re igho ọbhi ẹkpẹti nan rẹ robọkpa bhi iwẹnna nan lu bhi otọ agbọn rebhe. Beji Otu Nọn Sun Oga taman ele nin ele lu, Bẹtẹ kẹkẹ ha tare ebi a ha rẹ sabọ noo ọne igho nan yẹ. Sẹyẹ, ahamiẹn ọria guanọ nin ọle robọkpa bhi ọne iwẹnna, ọle dẹ sabọ gbẹn vuọn ebe natiọle Local Design/Construction Volunteer Application (DC-50).

GHE ỌNE IVIDIO NATIỌLE OKPAMẸN NỌN RIIA EMHIN A BHI BRAZIL. BHA HA KI GHE ỌLE FO, WANNIẸN ỌNE INỌNTA NAN:

Be manman ti uwẹ bhọ bhi uwedẹ nin Esali Jehova rẹ rẹkpa ẹghe nin ọkpamẹn rẹ riia emhin a fo bhi Brazil bhi ukpe 2020?