UNYẸNMHIN NỌN KHẸKE ENE RẸKHAN IJESU

Uwẹ Be Muegbe Nin Uwẹ Rẹ Kuẹlo Da Ẹghe Nin Iẹnlẹn Ha Rẹ Kaka?

Ọ bha han mhan ilo rẹ daghe ebi emhin ne sunu ẹlẹnan rẹ si ọkakale ji ẹbho yẹ bhi otọ agbọn nan rebhe. Bezẹle? Ranmhude ẹghe ọkpẹnlẹn ọsi ọkike ọsi ọne agbọn nan mhan ki da nyẹnlẹn, sẹyẹ, Baibo taman mhan ghe, nin mhan hẹi ha mun ọkhọle ọbhi ẹfe nin mhan mhọnlẹn. (1Ti 6:17; 2Ti 3:1) Be ijiẹmhin ọsi Jehoshafat nin Ojie ha man mhan le rẹji ebi mhan ha rẹ muegbe khẹ ẹghe ọkakale yẹ?

Ẹghe nin eghian Jehoshafat rẹ ha gbe ofẹn ọle bhi ẹkẹ, ọle da mun udu nyan Jehova. (2Ch 20:9-12) Ọle da bọn agbaẹbho nan gbe ogba ga bi eko kẹkẹ nin eyokhọnlẹn nesọle. Ọle lu ene emhin nan nin ọle rẹ mun agbaẹbho nọnsọle egbe khẹ ẹghe ọkakale. (2Ch 17:1, 2, 12, 13) Bii Jehoshafat, ọkhẹke nin mhan mun udu nyan Jehova yẹ muegbe rẹ kuẹlo da ẹghe ọkakale.

BE IMHAN HA LU RẸ MUEGBE KHẸ ẸGHE ỌKAKALE?

Zien ikolu nin uwẹ bi Jehova ko mhọnlẹn: Ji ebi uwẹ mhọn khọn ẹn, uwẹ ha yẹ rẹọbhọ ghe, Jehova mhọn ọne ahu rẹ re ebi uwẹ ha rẹ ha gbẹloghe egbe ẹdẹ-ẹdẹ nin uwẹ. (Mt 6:26; 1Ti 6:8) Hẹi ji ebi uwẹ ha rẹ ha gbẹloghe egbe re uwẹ dọ lu emhin ne bha diẹn mun adia ne ribhi Baibo. (Ro 2:21) Ria ẹmhọn ebi uwẹ ha rẹ ha miẹn ebale oriọn yẹ sade uwẹ bha yẹ miẹn ukpa rẹ chaji foni nọnsẹ la sade intanẹt iyẹ ribhọ. Ha mhọn ebe nesẹmhan nan printi eso, uwẹ ha yẹ danlod ebe eso nesẹmhan ọbhi otọ sade uwẹ sabọ.

Ne emhin eso ya: Dọnmhegbe nin uwẹ hẹi ha lu osa la ha dẹ emhin nin uwẹ igene guanọ ọkuẹsẹ ẹghe ọkakale vae. (Pr 22:7) Ne ebale bi emhin eso nin uwẹ ha rẹ ha gbẹloghe egbe ya. Ẹbho eso kọ emhin ugbo eso nin ele rẹ sabọ te igho.

GHE ỌNE IVIDIO NATIỌLE UWẸ BE MUEGBE KHẸ EMHIN IDUNMHURI NE HA SABỌ SUNU? BHA HA KI GHE ỌLE FO, WANNIẸN ENE INỌNTA NAN:

Ijan ọkpa bhi vidio natiọle “Uwẹ Be Muegbe Khẹ Emhin Idunmhuri Ne Ha Sabọ Sunu?” Ifoto ne ribhi ẹkẹ ọle rẹman Baibo, obhi ẹkpa nan ha sabọ mun rẹkhan egbe, bi ibhio mhan ne bọn uwa oga.

Be imhan ha sabọ lu rẹ muegbe khẹ emhin idunmhuri?

Ewanniẹn nọnsẹ

Ijan ọkpa bhi vidio natiọle “Uwẹ Be Muegbe Khẹ Emhin Idunmhuri Ne Ha Sabọ Sunu?” Ibhio mhan rẹkpa bọn uwa yẹ ne emhin sibhi ẹkẹ moto re bhi eji emhin idunmhuri da sunu.

Be imhan ha rẹ sabọ muegbe ọbhi otọ yẹ rẹ rẹkpa ẹbho nekẹle?

Ewanniẹn nọnsẹ