UNYẸNMHIN NỌN KHẸKE ENE RẸKHAN IJESU

Rẹkpa Ẹbho Nin Ẹmhọn Osẹnobulua Iti Ele Bhọ Rẹ Lẹn Aman Nọn Man Ele

Ẹghe be ribhọ nin uwẹ rẹ ha si egbe re ikeke rẹ tẹmhọn Osẹnobulua man ẹbho nin ẹmhọn oga iyẹẹ, ranmhude uwẹ riale ghe ele ida ka uwẹ ehọ? Ahamiẹn iriọ, hẹi yele a ghe, ẹbho eso nin ẹmhọn oga iyẹẹ, rẹ sẹbhi ene bha rẹọbhọ ghe a miẹn Osẹnobulua, bhọ dọ kiẹn Esali Jehova. Ebe rẹkpa ẹbho ne dia iriọ hi, nan rẹ rẹman ele ghe, Osẹnobulua gene ribhọ.—Ro 1:20; 10:14.

GHE ỌNE IVIDIO NATIỌLE YERE GHE—ẸBHO NE IMHỌN URẸỌBHỌ DẸ SABỌ DỌ HA MHỌN URẸỌBHỌ—ẸBHO NIN ẸMHỌN OSẸNOBULUA ITI ELE BHỌ. BHA HA KI GHE ỌLE FO, WANNIẸN ỌNE INỌNTA NAN:

Be uwẹ miẹn luẹ bhi okha ọsi Tommaso rẹji ẹlo nọn khẹke nin uwẹ rẹ ha ghe ẹmhọn Osẹnobulua nan ta man ẹbho nin ẹmhọn Osẹnobulua iti ele bhọ?

Ewanniẹn nọnsẹ

Ebi a rẹ lu ọle yẹ

Ahamiẹn ọria yọle ghe ọle bha rẹọbhọ ghe Osẹnobulua ribhọ, re ẹwanlẹn bi ekpẹn nanlẹn talọ. Dọnmhegbe lẹn ebezẹle nin ọle da ta iriọ. (2Ti 2:24) Zilo nyan uhọnmhọn-ọta nin uwẹ lẹn ghe ọ dẹ yẹẹ ọle rẹ họn. Ahamiẹn ghe ọ dẹ yẹẹ ọle rẹ lẹn ebezẹle nin ẹbho ne bunbun da rẹọbhọ ghe Aman ribhọ nọn man emhin rebhe, noo ebe bi vidio ne zilo nyan ọne ẹmhọn. A ne brokiọ natiọle Was Life Created? bi The Origin of Life—Five Questions Worth Asking ba Emhin Kpataki Nin Mhan Rẹ Lu Iwẹnna Itẹmhọn Osẹnobulua, beji a ha da miẹn ghe, ọ ki lẹkhẹ nin mhan rẹ ha miẹn ele noo bhi iwẹnna itẹmhọn Osẹnobulua.

Asabọmiẹn ọ nọghọ uwẹ bhi ọsi ọhẹnhẹn rẹ ne ọria nọn bha rẹọbhi Osẹnobulua zilo ẹmhọn Baibo. Ahamiẹn iriọ nọn, taman obhio mhan nọn manman guẹ ebi a rẹ tẹmhọn Osẹnobulua yẹ nọn rẹkpa uwẹ. Yere ghe, Jehova dẹ sabọ rẹkpa mhan rẹ sabọ tẹmhọn nọnsọle man ọria nọn muegbe rẹ kaehọ bhi uwedẹ nọn ha rẹ sẹ otọ ọkhọle nọnsọle, aharẹmiẹn ghe ọle bha rẹ ka rẹọbhọ ghe Osẹnobulua ribhọ.—Ac 13:48.