Ijie Eva Ne Ne Egbe Suan bhi Ẹghe Ọkike ọsi Ọne Agbọn Nan

Ẹghe ọkpa akhasẹ ẹso ne ribhi ọne ẹkpẹti nan rẹ sunu. Ele rebhe wo rẹman ghe ẹghe ọkike mhan ki da nyẹnlẹn.—Dan. 12:4.

Ẹkpẹti nọn rẹman akhasẹ bhi Baibo ne tẹmhọn ugbẹloghe ne ribhi ihe ọsi ojie ọsi north bi ojie ọsi south rẹ na bhi ukpe 1870 rẹ dọ sẹbhi ẹlẹnan.

Baibo nọn ta ọta akhasẹ Rev. 11:7; 12:13, 17; 13:1-8, 12

Ọta akhasẹ Ọne elanmhẹn ẹwẹ wo re ebe gbera ikpe 3,000 ha gbẹloghe agbaẹbho kẹkẹ bhi ọne otọ nan. Bhi ẹghe ọkike ọsi ọne agbọn nan, a da kuan uhọnmhọn nọnzi ihinlọn nọnsọle. Akizẹbue ọne uhọnmhọn da nin. Bhiriọ, agbaẹbho rebhe ne ribhi ọne otọ nan da rẹkhan ọne elanmhẹn ẹwẹ. Esu noo ọne elanmhẹn rẹ ne enanzẹle ne kẹre bhi ọne otọ nan khọnlẹn.

Ebi ọne ọta akhasẹ rẹ munsẹ yẹ Okpamẹn ki fuẹn ẹbho a fo bhi ẹghe iNoah, ugbẹloghe nin Osẹnobulua bha re obọ ọi da munhẹn. Ikpe ne manman bunbun ki gbera, ẹghe nan rẹ ha khọn okhọn nin ọhẹnhẹn bhi ọne otọ agbọn nan rebhe, ugbẹloghe ọsi Britain bha yẹ manman ha mhọn ahu. Ọkpakinọn, ẹghe nin United States ki rẹ deba ọle, ọ da gbọ kie ziẹn. Esu wo noo ugbẹloghe ne re ọle bhi atata obọ rẹ kpokpo ẹbho nesi Osẹnobulua, manman nọn bhi ọne ẹghe ọkike nan.
Baibo nọn ta ọta akhasẹ Dan. 11:25-45

Ọta akhasẹ Bhi ẹghe ọkike, ojie ọsi north bi ojie ọsi south ki wo ha ne egbe khọnlẹn.

Ebi ọne ọta akhasẹ rẹ munsẹ yẹ Germany wo ha ne Britain bi United States khọnlẹn. Bhi 1945, Soviet Union bi agbaẹbho ne ribhi ibo nọnsọle da kiẹn ojie ọsi north. Bhi 1991, a da kpẹn Soviet Union. Akizẹbue, Russia bi agbaẹbho ne ribhi ibo nọnsọle da kiẹn ojie ọsi north.
Baibo nọn ta ọta akhasẹ Isa. 61:1; Mal. 3:1; Luke 4:18

Ọta akhasẹ Jehova da je ukọ nọnsọle nin ọle dọ hẹnhẹn uwedẹ khẹ Agbejele nọnsọle. Ọne ukọ nan da wo ha wewe ẹmhọn Osẹnobulua man ẹbho.

Ebi ọne ọta akhasẹ rẹ munsẹ yẹ Bhi 1870, C. T. Russell bi ibo ọle da munhẹn ha guanọ otọ ẹmhọanta ne ribhi Baibo. Ukpe 1881 ki sẹ, ele da dọ kere ghe emhin kpataki nọn nin ene ga Osẹnobulua rẹ ha tẹmhọn ọlẹn man ẹbho. Ele da gbẹn uhọnmhọn-ọta kẹkẹ dagbare bii, “Wanted 1,000 Preachers” bi “Anointed to Preach.”
Baibo nọn ta ọta akhasẹ Matt. 13:24-30, 36-43

Ọta akhasẹ Okpea ki kọ emhin ọbhi ugbo fo, oghian ọlẹn da vae dọ kọ ilunmhun ọbhi ọne ugbo. Ene ilunmhun da wanre sun ruru ene emhin nan kọle. Ẹghe nan rẹ khuan emhin bhi ugbo ki sẹ, a da hanọ ene ilunmhun sibhi ẹwẹ ene emhin nan kọle re.

Ebi ọne ọta akhasẹ rẹ munsẹ yẹ Rẹ munhẹn bhi 1870, ikẹkẹ nọn ribhi ẹwẹ iKristiẹn ọsajie bi Kristiẹn ohoghe da ha gbanọn an. Ẹghe ọkike ọsi ọne agbọn nan ki munhẹn, Osẹnobulua da ne ene Kristiẹn ọsi ẹmhọanta nabhi agbotu nọnsọle.
Baibo nọn ta ọta akhasẹ Dan. 2:31-33, 41-43

Ọta akhasẹ Amanzẹ nan re ẹlọnmhọn kẹkẹ man, ọle nyan ọne oẹ nan re ẹlọnmhọn bi ekẹn rẹ man.

Ebi ọne ọta akhasẹ rẹ munsẹ yẹ Ẹbho nin Britain bi United States gbẹloghe, ne sọtẹ da ọne ugbẹloghe, ele ọne ekẹn mundia nan. Ranmhude ene ẹbho nan, ele isabọ manman noo ahu nọnsele.
Baibo nọn ta ọta akhasẹ Matt. 13:30; 24:14, 45; 28:19, 20

Ọta akhasẹ a da koko ene emhin nan kọle ọbhi eji a da ne emhin ya. A da yẹ re “ọguọmhandia nọn mhọn ẹwanlẹn nan gba ẹkẹ ọle” mundia nin ọle ha gbẹloghe emhin nesi Osẹnobulua. A da munhẹn ha tẹmhọn Osẹnobulua na bhi ije kẹkẹ bhi ọne otọ nan.

Ebi ọne ọta akhasẹ rẹ munsẹ yẹ Bhi ukpe 1919, a da re ọne ọguọmhandia mundia nin ọle ha gbẹloghe ẹbho nesi Osẹnobulua. Rẹ na bhi ẹghenin ha vade, ekhẹn iBible Student da wo kie ha re ọyaya rẹ tẹmhọn Osẹnobulua. Ẹlẹnan nian, Esali Jehova tẹmhọn Osẹnobulua bhi agbaẹbho ne bun gbera 200. Ele yẹ gbẹn ebe nesẹmhan dagbare bhi urolo ne bun gbera 1,000.
Baibo nọn ta ọta akhasẹ Dan. 12:11; Rev. 13:11, 14, 15

Ọta akhasẹ Elanmhẹn ẹwẹ nọn mhọn ikhuan eva da taman ẹbho ne ribhi ọne otọ nan nin ele man amanzẹ nin ọne elanmhẹn ẹwẹ. Ọne elanmhẹn ẹwẹ nọn mhọn ikhuan eva da re ahu nin ọne elanmhẹn ẹwẹ.

Ebi ọne ọta akhasẹ rẹ munsẹ yẹ Britain bi United States, ele ene mun ọkalo nan rẹ mun agbotu natiọle League of Nations gbọ. Agbaẹbho nekẹle da re obọ ọbhi ọne emhanmhan nan. Rẹ nabhi 1926 rẹ sẹbhi 1933, ojie ọsi north da deba ibo ọsi ọne agbotu nan. Beji ẹbho ka rẹ rẹọbhọ ghe League of Nations dẹ sabọ mun ọfure gbọ, iriọ ele yẹ rẹ rẹọbhọ ghe United Nations (UN) dẹ sabọ mun ọfure re. Ọkpakinọn, agbotu soso iribhọ nọn ha sabọ mun ọfure gbọ gbera Agbejele nọnsi Osẹnobulua!
Baibo nọn ta ọta akhasẹ Dan. 8:23, 24

Ọta akhasẹ Ojie nọn gboriri da manman ria emhin an.

Ebi ọne ọta akhasẹ rẹ munsẹ yẹ Britain bi United States wo manman gbono ẹbho ne bunbun yẹ manman ria emhin ne bunbun an. Bhi ọsi ijiẹmhin, United States da fi bọmb ọbhi agbaẹbho nọn yi oghian ele bi Britain. Bọmb bha sẹ ka re iriọ ria emhin an bhi agbaẹbho soso khẹ.
Baibo nọn ta ọta akhasẹ Dan. 11:31; Rev. 17:3, 7-11

Ọta akhasẹ Ọne elanmhẹn ẹwẹ nọn gian nọn mhọn ikhuan igbe, nọn na bhi abyss dagbare, ọle hi ojie nọnzi elẹnlẹn. Ọne elanmhẹn ẹwẹ nan, ọle ebe nọnsi Daniel tiọle emhin nọn sọnọn nọn si ugbekhuelo.

Ebi ọne ọta akhasẹ rẹ munsẹ yẹ Ẹghe nan rẹ ha khọn okhọn iHitler, League of Nations da gbẹlo. A ki khọn ọne okhọn fo, a da mun UN gbọ. Beji ẹbho ka rẹ ha re ogẹn nọn khẹke Agbejele nọnsi Osẹnobulua nin League of Nations, iriọ ẹbho yẹ rẹ ha gẹn UN. UN dẹ mun okhọn bu oga kẹkẹ.
Baibo nọn ta ọta akhasẹ 1 Thess. 5:3; Rev. 17:16

Ọta akhasẹ Ene agbaẹbho dẹ wo ha wewe ọle yọle ghe, ele mun ọfure bi ugbega re. Ene ikhuan igbe bi ọne elanmhẹn ẹwẹ dẹ gbe ọne agbilẹ khuelo. Ọnan ha ki gbera, a ki yẹ gbe ene agbaẹbho khuelo.

Ebi ọne ọta akhasẹ ha rẹ munsẹ yẹ Ene agbaẹbho dẹ ha yọle ghe ele mun ọfure bi ugbega re bhi ọne otọ agbọn nan. Agbaẹbho ne ribhi ibo ọsi UN dẹ gbe oga ohoghe khuelo. Ọne ẹghe nan ekpokpo nọn khua ha rẹ munhẹn. Ẹghe nin Armageddon ha rẹ dọ gbe ọne agbọn Esu nan khuelo, ọle ekpokpo nọn khua ha rẹ kpẹn.
Baibo nọn ta ọta akhasẹ Ezek. 38:11, 14-17; Matt. 24:31

Ọta akhasẹ Gog dẹ mun okhọn bu ẹbho nesi Jehova. Ọne ẹghe nan, ẹhi ki si enanzẹle koko.

Ebi ọne ọta akhasẹ ha rẹ munsẹ yẹ Ojie ọsi north bi ene gbẹloghe nekẹle bhi ọne otọ nan dẹ mun okhọn bu ẹbho nesi Jehova. Ele ha ki mun okhọn bu ele fo, a ki koko enanzẹle ne kẹre bhi ọne otọ nan ha khian okhun.
Baibo nọn ta ọta akhasẹ Ezek. 38:18-23; Dan. 2:34, 35, 44, 45; Rev. 6:2; 16:14, 16; 17:14; 19:20

Ọta akhasẹ Ọnọn debhi okokhun akasi nọn fua a, dẹ khọn miotọ ẹghe nin ọle ha rẹ gbe Gog bi eyokhọnlẹn nesọle khuelo. A da mun ọne elanmhẹn ẹwẹ fi ọbhi ẹkẹ odighi-eranlẹn. A da yẹ dunmhun ọne amanzẹ a kiẹn ẹbubu.

Ebi ọne ọta akhasẹ ha rẹ munsẹ yẹ Jesu nin ojie ọsi Agbejele nọnsi Osẹnobulua, dẹ dọ hinmhin ene ga Osẹnobulua. Ọle, ẹhi nesọle, bi ene itue 144,000 ne ha deba ọle gbẹloghe dẹ fuẹn Esu bi Agbọn nọnsọle a.