Mhan Dẹ Sabọ Nyẹnlẹn bhi Ighegheghe

1. Be ọ ha rẹ rẹso mhan yẹ sade mhan ria eria nyan iẹnlẹn ọsi ighegheghe nin Jehova ve nin mhan?

JEHOVA ve nin mhan ghe, mhan dẹ nyẹnlẹn bhi ighegheghe. (Rom. 6:23) Ahamiẹn mhan ria eria nyan ọne ive nan nin Jehova ve nin mhan, oyẹẹ nin mhan mhọn da ọle ki ha ziẹn ọbhọ. Ria ẹmhọn ọnan ghe: Aba mhan nọn ribhi okhun manman hoẹmhọn mhan sẹbhọ ghe, ọle ida zẹ mhan obọ ghẹdẹ.

2. Be ive ọsi iẹnlẹn ighegheghe rẹ rẹkpa mhan yẹ?

² Ive ọsi iẹnlẹn ighegheghe nin Osẹnobulua ve nin mhan rẹkpa mhan rẹ ha ziẹngbe ọnọghọ kẹkẹ nin mhan kuẹlo da nian. Mhan ida zobọ bhọ rẹ ha ga Jehova a ha bhọ rẹ miẹn eghian mhan yọle ele dẹ gbono mhan an. Bezẹle? Emhin ọkpa nọn zẹle hi, mhan lẹnmhin ghe, ahamiẹn mhan sun rẹkhan Jehova sẹbhi ukpẹdẹ uu, ọle dẹ riọ mhan kpanọ bhi uu. Sẹyẹ, mhan ida yẹ yu ghẹdẹ. (John 5:28, 29; 1 Cor. 15:55-58; Heb. 2:15) Bezẹle nin mhan ha da sabọ rẹọbhọ ghe mhan dẹ sabọ nyẹnlẹn bhi ighegheghe? Bha ji mhan fẹ ene emhin nan ghe.

JEHOVA NYẸNLẸN RẸ SẸBHI IGHEGHEGHE

3. Be re imhan rẹọbhọ ghe, Jehova dẹ sabọ lu ọle nin mhan nyẹnlẹn rẹ sẹbhi ighegheghe? (Psalm 102:12, 24, 27)

³ Mhan lẹnmhin ghe Jehova dẹ sabọ lu ọle nin mhan nyẹnlẹn bhi ighegheghe ranmhude obọ ọle iẹnlẹn na vae. Sẹyẹ, ọle yẹ nyẹnlẹn rẹ sẹbhi ighegheghe. (Ps. 36:9) Bha ji mhan fẹ ije eso bhi Baibo ne rẹman ghe Jehova wo ha nyẹnlẹn rẹ ha vade, yẹ wo ha nyẹnlẹn khian. Psalm 90:2 yọle ghe, Jehova ribhọ rẹ na bhi “ẹdẹdẹmhẹndẹ rẹ sẹbhi ẹdẹdẹmhẹndẹ.” Psalm 102 da yẹ ta emhin nọn khọ ọnan. (Tie Psalm 102:12, 24, 27.) Sẹyẹ, Habakọk nin akhasẹ da yẹ gbẹn rẹji Aba mhan nọn ribhi okhun yọle: “Eo Jehova, ọi be yi ighegheghe uwẹ na vae? Osẹnobulua nọnsẹmhẹn, Ọnọn Khiale nọnsẹmhẹn, uwẹ isabọ yu.”—Hab. 1:12.

4. Ọ be khẹke nin mhan ha kpokpo egbe sade mhan bha sabọ lẹn ebi Jehova rẹ wo ha nyẹnlẹn yẹ? Gbotọle fanọn an.

⁴ Ọ be nọghọ uwẹ rẹ rẹọbhọ ghe Jehova nyẹnlẹn bhi “itẹbitẹ”? (Isa. 40:28) Ọ yẹ nọghọ ẹbhọ ne bunbun rẹ rẹọbhọ ọnan. Ẹlaihu da ta ọnan rẹji Osẹnobulua yọle: “Mhan ida sabọ lẹn eka ikpe nin ọle khin.” (Job 36:26) Ọkpakinọn, ranmhude mhan bha lẹn otọ emhin bha rẹman ghe ọne emhin iyi ẹmhọanta. Bhi ọsi ijiẹmhin, arẹmiẹn mhan bha manman lẹn otọ ebi ukpa ọsi ẹlẹtriki rẹ wẹnna yẹ, ọnan be rẹman ghe ukpa iribhọ? Hiehie! Iriọ yẹ nọn. Iriọ a ha da miẹn imhan ne eria ida sabọ lẹn otọ ebi Jehova wo rẹ ha nyẹnlẹn yẹ, yẹ sẹyẹ wo ha nyẹnlẹn khian. Sokpan ọnan bha rẹman ghe Osẹnobulua inyẹnlẹn rẹ sẹbhi ighegheghe. Ọ iyi ebi mhan lẹn otọ ọle, la ebi mhan bha lẹn otọ ọle ha re ẹmhọanta rẹji Aman nọn man mhan man. (Rom. 11:33-36) Sẹyẹ, ọle wo ha nyẹnlẹn ọkuẹsẹ a man emhin rebhe ne ribhi otọ bi okhun rẹ deba ovuẹn bi ene ahiẹnhiẹn. Jehova ji mhan lẹn ghe, ọle hi ọnọn re ahu nọnsele rẹ man ọne otọ nan. Sẹyẹ, ọle ki ka ha nyẹnlẹn fo ọkuẹsẹ ọle man emhin ne ribhi okhun. (Jer. 51:15; Acts 17:24) Emhin ọbhebhe nela re imhan rẹọbhọ ghe mhan dẹ sabọ nyẹnlẹn rẹ sẹbhi ighegheghe?

JEHOVA MAN MHAN NIN MHAN NYẸNLẸN BHI IGHEGHEGHE

5. Iruduba nela Adamu bi Ivi ha mhọnlẹn?

⁵ Eria ọkpa Jehova manlẹn nin ele nyẹnlẹn rẹ sẹbhi ighegheghe. Ọle bha man emhin ne nyẹnlẹn nekẹke nin ele nyẹnlẹn rẹ sẹbhi ighegheghe. Ọrẹyiriọ, Jehova da taman Adamu yọle: “Ọne oran ọsi ilẹnmhin ọsi emhin nọn mhẹn bi emhin nọn imhẹn, hẹi le bhọ, ranmhude, ukpẹdẹ nin uwẹ ha le bhọ, uwẹ dẹ gene yu.” (Gen. 2:17) Sade Adamu bi Ivi hẹnmhọn nin Jehova nọn, ele irẹ yu. Mhan dẹ sabọ rẹọbhọ ghe, Jehova ha rẹ re ọne isẹhoa nin ele rẹ le bhi ọne “ikpẹ-eran ọsi iẹnlẹn” sade a ki zẹbue. Ọnan ha wo rẹ rẹman ghe, Jehova ha wo rẹ ji ele da ha nyẹnlẹn khian.”b—Gen. 3:22.

6-7. (a) Emhin ọbhebhe nela rẹman ghe Jehova bha man eria nin ele ha yu? (b) Emhin nela ha yẹẹ uwẹ rẹ lu bhi agbọn ọsọgbọn? (Fẹ ene ifoto ghe.)

⁶ Ekhẹn azemhinre miẹn emhin nọn rẹman ghe mhan dẹ sabọ ne emhin ne bunbun ya bhi ẹrere nọnsẹmhan gbera ọne imhan ne ọbhọ bhi ẹghe nin mhan rẹ ha nyẹnlẹn. Emhin ọhan-ilo ọnan wo khin. Bhi ukpe 2010, ebe ọkpa natiọle Scientific American Mind da yọle ghe, ẹrere nọnsẹmhan dẹ sabọ mun ividio nan ha re ebe sẹbhi ikpe iyisẹn ea ghe. A sabọ bhọ miẹn ghe ẹrere nọnsẹmhan dẹ sabọ ne emhin ne gbera ọnin ya. Ọnan rẹman ghe Jehova man ẹrere nọnsẹmhan beji ọ ha da sabọ manman ha ne emhin ya gbera ọne imhan ne ya bhọ bhi ikpe 70 la 80 nin mhan nyẹnlẹn.—Ps. 90:10.

⁷ Jehova yẹ man mhan bhi uwedẹ nin mhan rẹ ha mhọn ọne ọkhọle rẹ ha nyẹnlẹn khian. Baibo yọle ghe Osẹnobulua “re ẹdẹdẹmhẹndẹ ọbhi ọkhọle” nọnsi eria. (Eccl. 3:11) Ọnan hi emhin ọkpa nọn zẹle nin mhan da ghe uu bii oghian mhan. (1 Cor. 15:26) Ahamiẹn mhan manman ha khọnmhọn, mhan be wo gbobọ bhi egbe ha khẹ nin mhan yu? Eye. Mhan kẹ wo bu idọkitọ. Sẹyẹ ẹgheso, mhan ne ikpẹ-ikhunmhun le beji egbe ha da dan mhan. Bhi ọsi ẹmhọanta, mhan dọnmhegbe rẹ lu emhin rebhe nin mhan ha sabọ lu rẹ gbega egbe nin mhan hẹi yu. Sẹyẹ, ahamiẹn ọria nin mhan hoẹmhọnlẹn yu, aharẹmiẹn ọwanlẹn la obhokhan nọn, ọ manman ba mhan bhi egbe rẹ na ẹghe nọn tanlẹn. (John 11:32, 33) Mhan dẹ sabọ ha luẹ emhin yẹ ha mhọn ọne ọkhọle rẹ nyẹnlẹn rẹ sẹbhi ighegheghe, ranmhude iriọ Aman nọn man mhan rẹ man mhan. Gene-gene, ọle dẹ sabọ lu ọle nin mhan da nyẹnlẹn rẹ sẹbhi ighegheghe. Sokpan, emhin ne bunbun yẹ ribhọ ne ha re imhan rẹọbhọ ghe mhan dẹ sabọ nyẹnlẹn bhi ighegheghe. Bha ji mhan zilo nyan emhin eso nin Jehova lu bhi ẹghe nọn gbera, bi bhi ọne ẹghe nan ne rẹman ghe iho nin ọle mhọn rẹji eria bha sẹ fidenọ.

IHO NỌNSI JEHOVA BHA SẸ FIDENỌ

8. Be Isaiah 55:11 taman mhan rẹji iho nọnsi Jehova rẹji mhan?

⁸ Arẹmiẹn Adamu bi Ivi si uu ji imọn nesele ranmhude olukhọ nin ele lu, Jehova bha fi ọkhọle nọnsọle denọ rẹji iho nin ọle mhọn rẹji eria. (Tie Isaiah 55:11.) Iho nọnsọle hi, nin ọle rẹ sẹyẹ re ọne isẹhoa nin mhan rẹ ha nyẹnlẹn rẹ sẹbhi ighegheghe. Mhan lẹn ọnan ranmhude emhin nin Jehova tale, yẹ lu beji iho nọnsọle ha da munsẹ.

9. Ive nela Osẹnobulua ve? (Daniel 12:2, 13)

⁹ Jehova ve ghe ọle dẹ riọ ẹbho ne yu kpanọ, yẹ re ọne isẹhoa nin ele rẹ nyẹnlẹn bhi ighegheghe. (Acts 24:15; Titus 1:1, 2) Jobu da rẹọbhọ ghe Jehova gene guanọ nin ọle riọ ẹbho ne yu kpanọ. (Job 14:14, 15) Daniẹl nin akhasẹ lẹnmhin ghe a dẹ riọ ẹbho ne yu kpanọ, yẹ re ọne isẹhoa nin ele rẹ nyẹnlẹn rẹ sẹbhi ighegheghe. (Ps. 37:29; tie Daniel 12:2, 13.) Ibhokhan iJu bhi ẹghe nọnsi Jesu yẹ lẹnmhin ghe, Jehova dẹ re iẹnlẹn ighegheghe nin eguọmhandia nesọle ne sun rẹkhan ọlẹn. (Luke 10:25; 18:18) Jesu da wo sounun bhi ọne ive nan bhi igba ne bunbun. Sẹyẹ, Aba ọle da yẹ riọ ọle kpanọ bhi uu.—Matt. 19:29; 22:31, 32; Luke 18:30; John 11:25.

10. Be ariọkpanọ ne sunu bhi ẹghe nọn gbera rẹman? (Fẹ ifoto ghe.)

¹⁰ Jehova re iẹnlẹn nin ọria. Bhiriọ, ọle mhọn ọne ahu nin ọle rẹ riọ ẹbho ne yu fikie vae bhi agbọn. Ọle da re ahu nin Ẹlaija nin akhasẹ nin ọle rẹ riọ ọmọn okpea ọsi okhuo nọn iyẹ mhọn ọdọ nọn na bhi Zarẹfat vae kpanọ bhi uu. (1 Ki. 17:21-23) Akizẹbue, Osẹnobulua da rẹkpa Ẹlaisha rẹ sabọ riọ ọmọn okpea ọsi okhuo ọkpa nọn na bhi Shunẹm vae kpanọ bhi uu. (2 Ki. 4:18-20, 34-37) Ene ẹbho nan riọkpanọ nan, bi ẹbho nekẹle nan riọkpanọ rẹman ghe, Jehova mhọn ọne ahu nin ọle rẹ riọ ẹbho ne yu kpanọ bhi uu. Ẹghe nin Jesu rẹ ha ribhi ọne otọ nan, ọle da rẹman ghe Aba ọle re ọne ahu nanlẹn rẹ riọ ẹbho ne yu kpanọ. (John 11:23-25, 43, 44) Bhi ejayenan nian, Jesu ribhi okhun. Sẹyẹ, ‘a re ahu rebhe nanlẹn bhi otọ bi okhun.’ Bhiriọ, ọle dẹ sabọ mun ọne ive sẹ nan rẹ riọ “ọrebhe ne ribhi idin ọsi ayere” kpanọ bhi uu vae bhi ọne agbọn nan, beji ele ha da ha nyẹnlẹn rẹ sẹbhi ighegheghe.—Matt. 28:18; John 5:25-29.

11. Be izọese ọsi Jesu rẹ lu ọle yẹ beji mhan ha da sabọ ha nyẹnlẹn bhi ighegheghe?

¹¹ Bezẹle nin Jehova da ji Ọmọn nọnsọle nin ọle manman hoẹmhọnlẹn da yu uyumhin oya? Jesu da re ebezẹle man ẹghe nin ọle rẹ yọle: “Osẹnobulua manman hoẹmhọn agbọn sẹ, ọle da re ukpọ Ọmọn ọkpa sẹsẹ nọnsọle nin ele. Bhiriọ, ọrebhe ne mhọn urẹọbhọ da ọne Ọmọn, a ida fuẹn ele a, ele ki ha mhọn iẹnlẹn ọsi ighegheghe.” (John 3:16) Nin Osẹnobulua rẹ je Ọmọn nọnsọle re nin ọle dọ yu ọbhi olukhọ nesẹmhan, ọle da lu ọle beji mhan ha da sabọ ha mhọn iẹnlẹn ighegheghe. (Matt. 20:28) Pọl nin odibo da gbotọ ọne obọ kpataki nan bhi iho nọnsi Osẹnobulua fanọn an ẹghe nin ọle rẹ yọle: “Ranmhude rẹ na bhi obọ okpea ọkpa, ọle uu na vae, iriọ ariọkpanọ ọsi ene yu yẹ rẹ na bhi obọ okpea ọkpa vae. Beji ọrebhe rẹ ha yuno ranmhude Adam, iriọ a ha yẹ rẹ re ọrebhe ha nyẹnlẹn ranmhude iKristi.”—1 Cor. 15:21, 22.

12. Be Jehova ha rẹ mun iho nọnsọle sẹ yẹ?

¹² Jesu da taman ene rẹkhan ọlẹn nin ele ha bhii nin Agbejele nọnsi Osẹnobulua vae, ghe nin iho nọnsọle yẹ ha sunu bhi ọne otọ nan. (Matt. 6:9, 10) Ọkpa bhi iho nọnsi Osẹnobulua hi nin ẹbho rẹ nyẹnlẹn bhi ọne otọ nan rẹ sẹbhi ighegheghe. Nin Jehova rẹ sabọ lu ọnan, ọle da zẹ Ọmọn nọnsọle nin ọle ha yi Ojie ọsi Agbejele nọnsọle. Sẹyẹ, Osẹnobulua wo ha zẹ ẹbho bhi ọne otọ nan, ne ha deba usun ọsi 144,000 ne da deba Jesu wẹnna rẹ mun iho nọnsi Osẹnobulua sẹ.—Rev. 5:9, 10.

13. Be Jehova lu nian? Be ọkhẹke nin uwẹ lu?

¹³ Jehova wo ha si usun ẹbho ne bunbun koko nian, yẹ man ele ebi ele ha rẹ sabọ nyẹnlẹn bhi Agbejele nọnsọle yẹ. (Rev. 7:9, 10; Jas. 2:8) Arẹmiẹn iwa-egbe ribhi ẹwẹ ẹbho ne bunbun ẹlẹnan ranmhude ihegbe bi okhọnlẹn, ẹbho ne ribhi ọne usun nọn bunbun wo ha wẹnna kaka beji a ha da miẹn ghe, ele bha he ọria soso. Ele rẹman bhi uwedẹ nin ele rẹ lu emhin ghe, ele re agbada nọnsele rẹ kiẹn emhin nan rẹ gua. (Mic. 4:3) Ele ideba bhi okhọn nan khọn bhi ọne agbọn nan nin ẹbho da yuno. Sokpan, ele rẹkpa ẹbho rẹ miẹn “iẹnlẹn ọsaje,” beji ele rẹ ha man ele ẹmhọn Osẹ ọsi ẹmhọanta bi iho nesọle. (1 Tim. 6:19) Ẹbho bhi azagba-uwa nesele sabọ rẹ ha kpokpo ele, la asabọmiẹn ele ida ha mhọn igho ranmhude nin ele rẹ re obọ ba Agbejele nọnsi Osẹnobulua. Ọkpakinọn, Jehova lu ọle beji a ha da miẹn ghe ele ki ha mhọn emhin nin ele guanọ. (Matt. 6:25, 30-33; Luke 18:29, 30) Ene emhin nan rẹkpa mhan rẹ lẹn ghe, Agbejele nọnsi Osẹnobulua gene ribhọ. Sẹyẹ, ọ dẹ wo ha mun iho nọnsi Osẹnobulua sẹ.

IẸNLẸN NỌN MHẸN AN RIBHI ODALO

14-15. Be Jehova ha rẹ mun ive nin ọle rẹ re ọkpẹnlẹn ọbhi uu sẹ yẹ?

¹⁴ Jesu kiẹn Ojie ọsi Agbejele nọnsi Osẹnobulua nọn ribhi okhun. Sẹyẹ, ọle dẹ mun ive rebhe nin Jehova ve sẹ. (2 Cor. 1:20) Rẹ na bhi ukpe 1914 ha vade, Jesu wo ha khọn eghian nesọle miotọ. (Ps. 110:1, 2) Jesu bi ene ha deba ọle gbẹloghe dẹ kẹ dọ fuẹn ẹbho ne imhẹn rebhe a ne ribhi ọne otọ nan.—Rev. 6:2.

¹⁵ Bhi ẹghe Ikpe Uli nin Jesu ha rẹ gbẹloghe, ọle dẹ riọ ẹbho ne yu kpanọ bhi uu, yẹ rẹkpa ọrebhe ne hẹnmhọn nin Jehova rẹ kiẹn eria ne gbale. Edọnmhẹn nọn kike ha ki gbera, ẹbho nin Jehova bhohiẹn ele bii ẹbho ne khiale “dẹ nyẹnlẹn bhi ọne otọ nan, ele dẹ nyẹnlẹn bhọ bhi ighegheghe.” (Ps 37:10, 11, 29) “A dẹ re uu nin oghian” mhan “nọn kike kiẹn ihoho.” Ọnan dẹ wo re imhan ha ghọnghọn.—1 Cor. 15:26.

16. Be bhọ emhin kpataki nọn zẹle nin mhan ha da ha ga Jehova?

¹⁶ Mhan luẹ bhi ọne uhọnmhọn-ọta nan ghe, Baibo mhan da miẹn ikhuaẹloghe nin mhan mhọn nin mhan rẹ nyẹnlẹn bhi ighegheghe. Ọne ikhuaẹloghe nan dẹ sabọ rẹkpa mhan rẹ sun rẹkhan Osẹnobulua bhi ene ẹghe ọkike nin mhan da ha nyẹnlẹn nan. Ọkpakinọn, ọ iyi ranmhude mhan ho nin mhan nyẹnlẹn rẹ sẹbhi ighegheghe ọkpa ha re imhan ha lu emhin ne ha ti Jehova bhọ. Emhin kpataki nọn zẹle nin mhan da sun rẹkhan Jehova bi Jesu hi, ranmhude mhan manman hoẹmhọn ele. (2 Cor. 5:14, 15) Ọnan re imhan mhọn ọne ọhubhudu rẹ ha re egbe khọkhọ ele, yẹ re ọyaya ha taman ẹbho ẹmhọn iruduba nin mhan mhọn. (Rom. 10:13-15) Ahamiẹn mhan ikhu ọsi egbe mhan ọkpa, yẹ zẹ emhin bhi obọ, Jehova ki ha guanọ nin ọle kiẹn ọmọẹ mhan rẹ sẹbhi ighegheghe.—Heb. 13:16.

17. Be ọkhẹke nin ọdeọde bhi ẹwẹ mhan lu? (Matthew 7:13, 14)

¹⁷ Mhan dẹ be deba ẹbho ne ha nyẹnlẹn bhi ighegheghe? Jehova re ọne isẹhoa nin mhan. Ọkpakinọn, mhan ha tobọmhan zẹ si mhan dẹ ha ribhi ọne uwedẹ nọn ha re imhan miẹn iẹnlẹn. (Tie Matthew 7:13, 14.) Be iẹnlẹn ha diayẹ sade mhan nyẹnlẹn bhi ighegheghe? Mhan dẹ re ewanniẹn ọbhi ọne inọnta nan bhi uhọnmhọn-ọta nọn ki sẹ ọle bhi egbe.