Ria Eria Nyan Emhin Kpataki Nin Uwẹ Luẹle

Ọ be sẹ ka sunu ji uwẹ khẹ ghe, uwẹ luẹ emhin fo, sokpan uwẹ bha yẹ sabọ ye ebi uwẹ luẹ re? Ọnan kẹ wo sunu ji mhan rebhe. Ọkpakinọn, be bhọ ha sabọ rẹkpa mhan? Ọle hi, nin mhan rẹ ha ria eria nyan emhin kpataki nin mhan luẹle.

Ahamiẹn uwẹ luẹ Baibo, ọ dẹ ha mhẹn nin uwẹ rẹ ha mundia khere rẹ ria eria nyan emhin kpataki nin uwẹ sẹ luẹ. Ọnan hi ebi Pọl nin odibo taman ibhio ọle nin ele ko ga ha lu sade ele tie ilẹta nin ọle gbẹn ji ele. Ọle da yọle: “Ọnan hi ebi mhan bhọ tẹmhọn ọlẹn.” (Hib. 8:1) Ọle da re ene ikpọta nan rẹ rẹkpa ene ka ọle ehọ rẹ lẹn otọ ebi ọle tẹmhọnlẹn, bi ebi emhin nin ọle ta rebhe rẹ diẹn kugbe yẹ.

Ahamiẹn uwẹ luẹ emhin fo, uwẹ sabọ rẹ re ihuẹnlo eso, la ihuẹnlo igbe rẹ ria eria nyan ene emhin kpataki nin uwẹ luẹle. Ahamiẹn uwẹ bha sabọ ye ele re, uwẹ sabọ rẹ kie dọ fẹ ene uhọnmhọn-ọta kẹkẹ ne ribhi eji uwẹ tie ghe, la tie obọle nin ọhẹnhẹn ne ribhi ene uduọle nin uwẹ rẹ yere. Ahamiẹn uwẹ luẹ emhin ọgbọn, dọnmhegbe rẹ noo ọta nọnsẹ rẹ tobuwẹ gbotọ ọle fanọn an. Ahamiẹn uwẹ ria eria nyan ebi uwẹ luẹle, ọ dẹ rẹkpa uwẹ rẹ ye ele re, yẹ rẹkpa uwẹ rẹ lẹn ebi uwẹ ha rẹ lu rẹkhan ọlẹn yẹ bhi iẹnlẹn.