Ebi Mhan Rẹ Miẹn Elele Yẹ Bhi Uwedẹ Nin Jehova Rẹ Rẹhunmhan

1. Bezẹle nọn da nọghọ nan rẹ sabọ lẹn otọ uwedẹ nin eria rẹ rẹhunmhan?

ỌKHỌLE nọnsẹmhan manman wo dere sade ọria taman mhan yọle, “imẹn rẹhunmhan uwẹ,” manman nọn sade mhan lẹn sẹ ghe emhin nin mhan lu, la ọta nin mhan ta wo ba ọne ọria bhi egbe. Ọkpakinọn, be ene ẹmhọn, “mẹn rẹhunmhan uwẹ” gene mundia nan? Ọne ọria nin uwẹ rahiẹ be tale nin ọle rẹ rẹman uwẹ ghe bha dẹ yẹ sabọ ha yi imọẹ? La ọle be tale beji a ha da miẹn ghe ibha bha yẹ kie dọ ha tẹmhọn ọne emhin nọn sunu? Ọ nọghọ nan rẹ lẹn otọ uwedẹ nin eria rẹ gene rẹhunmhan.

2. Be Baibo sẹ rẹ tẹmhọn uwedẹ nin Jehova rẹ rẹhunmhan yẹ? (Yẹ fẹ ebi a gbẹn ọbhi otọle ghe.)

² Uwedẹ nin Jehova rẹ rẹhunmhan wo manman dikẹ bhi uwedẹ nin eria rẹ rẹhunmhan. Ọria i ribhọ nọn ha sabọ rẹhunmhan bhi uwedẹ nin Jehova rẹ rẹhunmhan. Ọkpa bhi eria ne gbẹn ebe ọsi psalm da ta ọnan rẹji Jehova. Ọle da yọle: “Uwẹ hi ọnọn re ẹkẹata rẹhunmhan, ranmhude ọnan, ẹbho dẹ sabọ ha mun ekpẹn nọn dinmhin nin uwẹ.”a (Ps. 130:4) Bhi ọsi ẹmhọanta, Jehova ha rẹhunmhan, “ẹkẹata” ọle rẹ lu iriọ. Ọle wo re ijiẹmhin nọn gbale ọbhi otọ nin mhan rẹji ebe ọkhẹke nin mhan rẹ ha rẹhunmhan yẹ. Ẹmhọn eso ribhi Baibo nan noo rẹ talọ ji uwedẹ nin Jehova rẹ rẹhunmhan, sokpan a bha noo ọle rẹ talọ je uwedẹ nin eria rẹ rẹhunmhan.

3. Be uwedẹ nin Jehova rẹ rẹhunmhan rẹ dikẹ yẹ bhi ọsẹmhan? (Isaiah 55:​6, 7)

³ Jehova ha rẹhunmhan ọria, ọle ki re ọne emhin nin ọne ọria lu sibhi ọkhọle re sẹsẹsẹ. Ọne ọria ki yẹ kie sabọ deba Jehova ha mhọn ikolu. Ọ wo ti mhan bhọ ghe Jehova wo re ọkhọle rebhe rẹ rẹhunmhan, sẹyẹ, ọle wo lu iriọ igba ne bunbun.—Tie Isaiah 55:​6, 7.

4. Be Jehova rẹ rẹkpa mhan yẹ rẹ sabọ lẹn otọ uwedẹ nin ọle rẹ rẹhunmhan?

⁴ Beji a miẹn uwedẹ nin Jehova rẹ rẹhunmhan dikẹ bhi uwedẹ nin mhan ne eria nọn bha gba nan rẹ rẹhunmhan, be mhan ha rẹ sabọ lẹn otọ ebi Jehova rẹ rẹhunmhan yẹ? Jehova da noo arẹkhọkhọ kẹkẹ bhi Baibo beji mhan ha da sabọ lẹn otọ uwedẹ nin ọle rẹ rẹhunmhan. Mhan dẹ zilo nyan eso bhọ bhi ọne uhọnmhọn-ọta nan. Ene arẹkhọkhọ dẹ rẹkpa mhan rẹ daghe ebi Jehova rẹ gbo emhin ebe nesẹmhan kie yẹ, bi ebi ọle rẹ rẹkpa mhan yẹ rẹ kie sabọ deba ọle ha mhọn ikolu, nin emhin ebe nin mhan lu rẹ ka riia. Beji mhan ha rẹ ha zilo nyan ene arẹkhọkhọ, ẹmhọn Aba mhan nọn mhọn ẹkẹ-jẹjẹ, nọn yẹ rẹhunmhan bhi uwedẹ kẹkẹ ki wo manman ha ti mhan bhọ.

JEHOVA RE OLUKHỌ NESẸMHAN KIE

5. Be sunu sade Jehova gbe olukhọ nesẹmhan kua nin mhan?

⁵ Bhi Baibo, a kẹ wo re olukhọ rẹ khọkhọ udede ihẹ nọn deyẹnyẹn ọria. Inian Devid nin ojie rẹ tẹmhọn emhin ebe nesọle, ọle da yọle: “Emhin ebe nesẹmhẹn vuọn mẹn uhọnmhọn; bọsi udede ihẹ, ele kpọnọ gbe nin mẹn.” (Ps. 38:4) Ọkpakinọn, Jehova rẹhunmhan ẹbho ne gene fidenọ. (Ps. 25:18; 32:5) Ukpọta Hibru nan zedu ọle diọbhi rẹhunmhan bhi ọne ulọnlẹn nan mundia nin nan rẹ “mun emhin.” Bhiriọ, ahamiẹn Jehova rẹhunmhan mhan, inian ọ diabe ghe, ọle ne mhan mun udede ihẹ nọn khua mhan fia.

6. Be Jehova mun emhin ebe nesẹmhan fia sẹ yẹ?

⁶ Arẹkhọkhọ ọbhebhe nan noo bhi Baibo da rẹman ebi Jehova re olukhọ nesẹmhan kie sẹ yẹ. Psalm 103:12 da ji mhan lẹn ghe: “Beji eji oẹnlẹn da hẹnre rẹ manman ree bhi eji ọ da defia, iriọ ọle rẹ manman si olukhọ nọnsẹmhan ree sibhi eji mhan ye re.” Eji oẹnlẹn da hẹnre wo manman ree bhi eji oẹnlẹn da defia, sẹyẹ ẹghe nin oẹnlẹn rẹ hẹnre dikẹ bhi ẹghe nin ọ rẹ defia. Ọnan rẹman ghe Jehova bhọ re emhin ebe nesẹmhan sibhi eji ọle ye re gbera beji mhan mhọn bhi ọkhọle. Uwedẹ nọn mhẹn wo khọnan nan rẹ tẹmhọn ebi Jehova rẹ rẹhunmhan yẹ.

7. Be Baibo rẹ tẹmhọn ebi Jehova lu olukhọ nesẹmhan yẹ? (Micah 7:​18, 19)

⁷ Arẹmiẹn ghe Jehova wo manman re emhin ebe nesẹmhan sibhi eji ọle ye re, ọle be yẹ kie dọ ha ria ẹmhọn ele? Eye. Hẹzẹkaya nin ojie da ta ọnan rẹji Jehova, ọle da yọle: “Uwẹ da fikekegbe emhin ebe nesẹmhẹn.” (Isa. 38:​9, 17.) Ọne arẹkhọkhọ nan rẹman ghe Jehova ha mun olukhọ ọsi ọria nọn fidenọ fia, ọle ki fikekegbe ọle sẹsẹsẹ. A dẹ yẹ sabọ re inian ta ọne ẹmhọn nan: “Uwẹ re ẹlo gbera emhin ebe nesẹmhẹn bọsi ghe mẹn bha zẹwẹ ka lu ele khẹ.” Jehova da wo kie manman re otọ ọne arẹkhọkhọ nan man bhi ebe ọsi Micah 7:​18, 19. (Tie ọle.) Ene ulọnlẹn nan bhi Baibo yọle ghe, Jehova mun emhin ebe nesẹmhan fiọbhi odotọ ukpẹdẹ. Bhi ẹghe ẹdẹlẹ, ọ i da lẹkhẹ nin ọria rẹ sabọ dọ mun emhin nan mun fi fiọbhi odotọ ukpẹdẹ sibhọre.

8. Be mhan sẹ luẹ bhi ọne uhọnmhọn-ọta nan?

⁸ Beji ene arẹkhọkhọ nin mhan zilo ọle rẹman, mhan dọ kere ghe Jehova ha rẹhunmhan mhan, ọle wo lu iriọ sẹsẹsẹ, bhiriọ, ọkhọle i yẹ dọ ha gbe mhan asan. Bhi ọsi ẹmhọanta, beji Devid tale, “eghọnghọn hi ọsi ene eria nin Osẹnobulua rẹhunmhan emhin ebe nọnsele, yẹ gbe olukhọ nọnsele kua. Eghọnghọn hi ọsi ọne ọria nin Jehova ida tie ọle ẹzọ bhi olukhọ nin ọle lu.” (Rom 4:​7, 8) Ọnan hi ebi a re ọle ta nan rẹ re ẹkẹata rẹ rẹhunmhan.

JEHOVA GBO OLUKHỌ NESẸMHAN AN

9. Be Baibo rẹ rẹkpa mhan rẹ lẹn yẹ ghe Jehova wo rẹhunmhan sẹsẹsẹ?

⁹ Jehova yẹ wo noo arẹkhọkhọ ebhebhe rẹ rẹkpa mhan rẹ lẹn ebi ọle rẹ noo izọese nọnsi Jesu rẹ gbo olukhọ ọsi eria ne fidenọ a yẹ. Bhi Baibo, a da tẹmhọn Jehova bii ọria nọn kpe yẹ najẹ emhin ebe kua. Ọne emhin nan nin Jehova lu re ọria ebe kpe khia. (Ps. 51:7; Isa. 4:4; Jer. 33:8) Jehova tobọle tẹmhọn ebe nabhọre sade ọle re inian kpe eria khia fo. Ọle da yọle: “Aharẹmiẹn olukhọ nọnsẹbha diabe emhin nọn gian, a dẹ re ọle kiẹn emhin nọn manman fua; aharẹmiẹn ọ diabe ukpọn nọn gian, ọ dẹ ha fua bọsi olu.” (Isa. 1:18) Ahamiẹn emhin nọn gian lo ọbhi ukpọn, ọ i zẹwẹ lẹkhẹ nan rẹ re sibhọre. Ọrẹyiriọ, Jehova da noo ọne arẹkhọkhọ nan rẹ rẹman ghe, ọle dẹ sabọ kpe emhin ebe nesẹmhan kua rẹ sẹbhọ ghe a bhọ i yẹ da ha daghe ọle.

10. Arẹkhọkhọ ọbhebhe nela Jehova noo nin ọle rẹ rẹkpa mhan rẹ lẹn otọ ebi ọle rẹ manman rẹhunmhan yẹ?

¹⁰ Beji mhan ka zilo ọle bhi uhọnmhọn-ọta nọn gbera, a da re emhin ebe rẹ khọkhọ osa. (Mat. 18:​32-35) Bhiriọ, ẹghe nọn hi ki rẹ khin nin mhan rẹ lu emhin ebe, inian diabe ghe mhan wo kie manman de ọbhi osa. Osa nin mhan mhọn Jehova le i ye obhiọ khere! Ọkpakinọn, ahamiẹn Jehova rẹhunmhan mhan, ọ ki diabe ghe ọle gbe ọne osa nọn rẹ khẹke nin mhan ha ọle le kua. Ọle i yẹ yọle nin mhan dọ haosa olukhọ nin ọle rẹhunmhan fo. Beji mhan rẹ ghọnghọn sade ọria gbe osa nin mhan mhọn ọle le kua, iriọ mhan yẹ rẹ ghọnghọn sade Jehova gbe olukhọ nesẹmhan kua.

11. Be Baibo rẹ ọle ta beji ọ yọle ghe a kpe olukhọ nesẹmhan kua? (Iwẹnna 3:19)

¹¹ Jehova i wo gheghe gbo osa la olukhọ nin mhan lu ọle le a, sokpan ọle kpe ọle kua sẹsẹsẹ. (Tie Iwẹnna 3:19.) Nin mhan rẹ re ijiẹmhin ọbhọ, ahamiẹn mhan mhọn ọria osa, nin ọne ọria da ho nin ọle gbo ọle a bhi ebe nin ọle gbẹn ọlẹn i, ọle ki viẹn udede ughu nyan ọlẹn. Ọrẹyiriọ, a dẹ yẹ sabọ ha daghe emhin eso nin ọle gbẹn ọbhi ọne ebe nin ọne ughu bha gue nọnsẹn. Ọkpakinọn nan rẹ kpe emhin kua wo dikẹ bhi ọnan. Nin mhan rẹ sabọ lẹn otọ ọne arẹkhọkhọ nan, ọkhẹke nin mhan yere ghe, ebi a kẹ wo sabọ re amẹn kpe kua, ọle a noo rẹ gbẹn ebe bhi ẹghe ẹdẹlẹ. Ọria dẹ sabọ re amẹn ọbhi ihiẹn rẹ kpe ebi a gbẹn ọbhi ebe kua. Bhiriọ, ahamiẹn a kpe osa nan gbẹn ọbhi ebe kua, a i yẹ daghe ọle hiehie. Ọria i da yẹ sabọ daghe ọne osa nan rẹ ka gbẹn ọbhi otọ, ọ ki dọ diabe ghe a bha ka lu ọne osa khẹ hiehie. Ọ manman wo re mhan ghọnghọn rẹ lẹn ghe Jehova i wo gheghe gbe olukhọ nesẹmhan kua, sokpan ọle kpe ele kua sẹsẹsẹ!—Ps. 51:9.

12. Be mhan miẹn luẹ bhi ọne arẹkhọkhọ ọsi udede adudu amẹn nan noo bhi Baibo?

¹² Jehova yẹ noo arẹkhọkhọ nọn dia inian rẹ tẹmhọn ebi ọle rẹ rẹhunmhan mhan yẹ sẹsẹsẹ. Ọle da yọle: “Mẹn dẹ gue emhin ebe nesẹbha bọsi ghe mẹn re adudu amẹn rẹ gue ọle, sẹyẹ mẹn dẹ re udede adudu amẹn gue olukhọ nẹsẹbha.” (Isa. 44:22) Ahamiẹn Jehova rẹhunmhan mhan, inian ọ diabe ọle noo udede adudu amẹn rẹ gue ọne olukhọ beji a ha da miẹn ghe ọle bha yẹ ha daghe ọle, sẹyẹ mhan bha yẹ ha daghe ọle.

13. Be egbe dia mhan yẹ sade Jehova rẹhunmhan mhan bhi emhin ebe nesẹmhan?

¹³ Be imhan miẹn luẹ bhi ene arẹkhọkhọ nan? Ahamiẹn Jehova re emhin ebe nesẹmhan rẹhunmhan mhan, ọ bha khẹke nin mhan yẹ ji ọle ha kpokpo mhan bhi ọkhọle. Jehova noo izọese nọnsi Jesu rẹ gbo olukhọ nesẹmhan kua sẹsẹsẹ. Ahamiẹn Jehova re olukhọ nọnsẹmhan rẹhunmhan mhan, ọ ki dọ diabe ghe mhan bhọ bha sẹ ka lu ọne olukhọ khẹ. Inian Jehova rẹ rẹhunmhan mhan sade mhan gene fidenọ bhi emhin ebe nesẹmhan.

JEHOVA KIE MIẸN MHAN ỌBHI EGBE BỌSI IMỌẸ

14. Bezẹle nin mhan ha da sabọ rẹọbhọ ghe Jehova dẹ rẹhunmhan mhan sẹsẹsẹ? (Yẹ fẹ ene ifoto ghe.)

¹⁴ Jehova ha rẹhunmhan mhan, mhan dẹ sabọ ha mhọnlẹn bhi ọkhọle ghe mhan dẹ kie sabọ ha yi imọẹ ọle. Ranmhude ọnan, ọkhọle i yẹ dọ ha gbe mhan asan. Mhan i yẹ dọ ha mun ofẹn ghe Jehova sẹyẹ re ọne ẹmhọn bhi ọkhọle, ghe, ọle yẹ guanọ uwedẹ nin ọle ha rẹ re oya nin mhan. Ẹghe i ribhọ nin ọle ha rẹ lu ebe dia iriọ. Bezẹle nin mhan ha da sabọ rẹọbhọ ghe Jehova gene rẹhunmhan mhan sade ọle lu iriọ fo? Jehova da taman Jerimaya nin akhasẹ yọle: “Imẹn dẹ re emhin ebe nesele rẹ rẹhunmhan ele, sẹyẹ imẹn ida yẹ ye olukhọ nọnsele re.” (Jer. 31:34) Ene ẹmhọn nan Pọl nin odibo yẹ ha talọ je bhi ẹghe nin ọle rẹ yọle: “Mẹn iyẹ da ye olukhọ nọnsele re.” (Hib. 8:12) Be a gene re ọnan ta?

15. Uwedẹ nela Jehova i da yẹ rẹ ye olukhọ nesẹmhan re?

¹⁵ Bhi Baibo, ọ i yi ẹghe rebhe a rẹ noo ọne ukpọta “yere” rẹ tẹmhọn nan rẹ ye emhin re, la nan rẹ ha ria ẹmhọn emhin, sokpan ọ de sabọ mundia nin, nin ọria rẹ lu emhin. Ọne oyi nan khan ọbhi oran sikẹ Jesu da bhii Jesu yọle: “Jesu, ye imẹn re bhi Agbejele nọnsẹ.” (Luk 23:​42, 43) Ebi ọle ha ta hi, nin Jesu lu emhin nanlẹn. Ewanniẹn nin Jesu re nanlẹn rẹman ghe, ọle dẹ lu emhin nanlẹn, ọnin hi, nin ọle rẹ riọ ọle kpanọ. Bhiriọ, ebi Jehova ha mhọn bhi ọkhọle bhi ẹghe nin ọle rẹ yọle ọle i da yẹ ye emhin ebe nesẹmhan re hi, ọle i da yẹ mun mhan mhọn bhi ọne emhin ebe nin mhan lu. Ọle i da yẹ kie re oya nin mhan bhi ẹghe odalo bhi emhin ebe nin ọle da rẹhunmhan mhan fo.

16. Be Baibo rẹ tẹmhọn ebi egbe rẹ fu mhan re yẹ sade Osẹnobulua rẹhunmhan mhan?

¹⁶ Jehova ha rẹhunmhan mhan, egbe ki wo fu mhan re. Baibo yẹ noo arẹkhọkhọ ọbhebhe rẹ rẹkpa mhan rẹ lẹn otọ ọnan. Ranmhude ọ bha gba nin mhan, inian mhan diabe “igbọn nesi olukhọ.” Ọkpakinọn, ranmhude uwedẹ nin Jehova rẹ rẹhunmhan mhan, inian mhan ki dọ diabe igbọn nan ‘fan fia bhi obọ olukhọ.’ (Rom 6:​17, 18; Arẹm.1:5) Bhi ọsi ẹmhọanta, mhan ha lẹn sẹbhọ ghe Jehova rẹhunmhan mhan, mhan ki ha ghọnghọn beji igbọn nin ebeanlẹn ọlẹn fan fia rẹ ghọnghọn.

17. Jehova ha rẹhunmhan mhan, be ọ rẹ re egbe dan mhan yẹ? (Isaiah 53:5)

¹⁷ Tie Isaiah 53:5. Arẹkhọkhọ nin mhan ha noo kike da re mhan khọkhọ eria ne mhọn emianmhẹn ọhanabẹ. Ọkpakinọn, ranmhude izọese nin Osẹnobulua re Ọmọn nọnsọle lu, inian mhan ki dọ diabe ẹbho nan re egbe dan. (1 Pita 2:24) Ẹghe-ẹghe nọn hi ki rẹ khin nin mhan rẹ lu olukhọ da Jehova, inian ọ diabe ghe mhan khọnmhọn bhi uwedẹ oriọn, sẹyẹ, ọne emhin nin mhan lu ki riia ikolu nin mhan bi ọle ko mhọnlẹn an. Ọkpakinọn, ranmhude izọese nọnsi Jesu ọle ki rẹhunmhan mhan, sẹyẹ mhan ki sabọ kie deba ọle ha mhọn ikolu nọn mhẹn. Beji ọria rẹ manman ghọnghọn sade egbe dan ọlẹn bhi emianmhẹn ọhanabẹ nin ọle khọnmhọn, iriọ mhan yẹ rẹ ghọnghọn sade Jehova rẹhunmhan mhan bhi emhin ebe nin mhan lu nọn rẹ re mhan ha khọnmhọn bhi uwedẹ ọriọn, sẹyẹ mhan ki sabọ dọ kiẹn imọẹ ọle.

ELELE NIN MHAN MIẸN BHI UWEDẸ NIN JEHOVA RẸ RẸHUNMHAN

18. Be mhan sẹ luẹ nin mhan rẹ zilo nyan ene arẹkhọkhọ kẹkẹ nan noo bhi Baibo nan rẹ tẹmhọn uwedẹ nin Jehova rẹ rẹhunmhan? (Fẹ ọne ẹkpẹti ghe nọn yọle “Ebi Jehova Rẹ Rẹhunmhan Mhan Yẹ.”)

¹⁸ Be mhan sẹ luẹ bhi ene arẹkhọkhọ kẹkẹ nan noo bhi Baibo nan rẹ tẹmhọn uwedẹ nin Jehova rẹ rẹhunmhan? Jehova ha rẹhunmhan mhan, ọle wo lu iriọ sotọ sẹsẹsẹ, sẹyẹ ọle i da kie dọ re oya nin mhan bhi ẹghe odalo ranmhude emhin ebe nin mhan lu. Ọ rẹkpa mhan rẹ sabọ deba Aba mhan nọn ribhi okhun ha mhọn ikolu nọn mhẹn. Ọrẹyiriọ, ọkhẹke nin mhan yere ghe, ẹsele Jehova lu nin mhan nin ọle rẹ re inian rẹhunmhan mhan. Oyẹẹ bi itohan nin ọle mhọn da mhan zẹle nin ọle da rẹhunmhan mhan, ọ i yi ranmhude ọkhẹke mhan zẹle.—Rom 3:24.

19. (a) Emhin nela ọkhẹke nin mhan ji ọ ha ti mhan bhọ? (Rom 4:8) (b) Be mhan ha zilo nyan bhi uhọnmhọn-ọta nọn ki sẹ ọle bhi egbe?

¹⁹ Tie Rom 4:8. Ọ wo ti mhan bhọ rẹ lẹn ghe, Jehova wo re “ẹkẹata rẹhunmhan” ọdeọde bhi ẹwẹ mhan! (Ps. 130:4) Ọkpakinọn, emhin kpataki ribhọ nọn khẹke nin mhan lu sade mhan ho nin Jehova ha rẹhunmhan mhan. Mhan fẹ ebi Jesu tale, ọle da yọle: “ahamiẹn ibha bha rẹhunmhan ẹbho ne lu bha khọlọ, Aba bha nọn ribhi okhun ida rẹhunmhan bha.” (Mat. 6:​14, 15) Bhiriọ, ọ wo manman lu uhọnmhọn emhin nin mhan rẹ re egbe khọkhọ Jehova bhi uwedẹ nin ọle rẹ rẹhunmhan. Ọkpakinọn, be mhan ha rẹ sabọ lu iriọ yẹ? Ọnin mhan ha ki zilo nyan bhi uhọnmhọn-ọta nọn ki sẹ ọle bhi egbe.