Mun Ọkhọle Nọnsẹ Egbe Ọbhi Otọ

Ahamiẹn mhan luẹ Baibo, mhan ho nin ebi mhan tie rẹso mhan bhi ọkhọle, la fi unan ọria nin mhan khin denọ. Ẹzra wo re ijiẹmhin esili ọbhi otọ bhi ọne ẹmhọn nan. Ọle da “mun ọkhọle nọnsọle egbe ọbhi otọ, nin ọle rẹ gua otọ uhi nọnsi Jehova.” (Ezra 7:10) Be mhan ha rẹ sabọ ha mun ọkhọle nọnsẹmhan egbe ọbhi otọ yẹ?

Ha nan erọnmhọn. Ha nan erọnmhọn ọkuẹsẹ uwẹ munhẹn ha luẹ Baibo. Bhii Jehova nọn rẹkpa uwẹ rẹ lẹn otọ ebi uwẹ tie, bi nin ọle rẹkpa uwẹ rẹ ha re obọ rẹkhan ọlẹn.—Ps. 119:​18, 34.

Ha mhọn idegbere. Osẹnobulua re ẹmhọanta he nin ẹbho ne i mhọn idegbere, ne wo mun udu nyan ilẹnmhin nọnsele. (Luk 10:21) Hẹi dọ ha luẹ Baibo dinmhin nin uwẹ rẹ dọ ha re egbe man. Degbere rẹ fi iria-eria nọnsẹ denọ sade uwẹ kere ghe ọ bha diẹn mun iho nọnsi Osẹnobulua.

Dọnmhegbe rẹ ha kaehọ illo nesẹmhan. Illo sabọ rẹso mhan ọkhọle, yẹ mun mhan egbe ọbhi otọ khẹ ebi mhan ho nin mhan luẹ. Bhiriọ, mhan ha ka kaehọ illo nesẹmhan ọkuẹsẹ mhan munhẹn ha luẹ emhin, ọ dẹ rẹkpa mhan rẹ mun ọkhọle nọnsẹmhan egbe ọbhi otọ khẹ ebi mhan ha luẹ, beji ọ ha da rẹso mhan.