Rẹkpa Ene Uwẹ Man Ele Baibo Rẹ Sabọ Zẹ Rẹ Ha Ga Jehova

1-2. (a) Bezẹle nin ene mhan man ele Baibo da siegbe re ikeke rẹ mianmẹn? (b) Be mhan ha zilo nyan bhi ọne uhọnmhọn-ọta nan?

UWẸ be ka ha siegbe re ikeke khẹ rẹ kiẹn ọkpa bhi Esali Jehova? Asabọmiẹn ofẹn da ha mun uwẹ ghe ene ibha ko yo iwẹnna, imọẹ ẹ, la eria bhi azagba-uwa nọnsẹ i da yẹ hoẹmhọn ẹ. La asabọmiẹn uwẹ da ha riale ghe, uwẹ i da sabọ re obọ rẹkhan uhi nesi Osẹnobulua. Ahamiẹn iriọ nọn, uwẹ dẹ sabọ lẹn ebezẹle nin ẹbho eso nan man ele Baibo da siegbe re ikeke rẹ mianmẹn.

² Jesu lẹnmhin ghe ofẹnmunmhin nọn sẹriọ dẹ sabọ re ọria miẹn ghe ọle bha ha ga Jehova. (Mat. 13:​20-22) Ọkpakinọn, ọle bha fikekegbe eria ne ha siegbe re ikeke rẹ rẹkhan ọlẹn. Ọle da man edibo nesọle ebi ele ha rẹ sabọ rẹkpa eria ne sẹriọ rẹ (1) lẹn ebe re ele siegbe re ikeke, (2) ziẹn oyẹẹ nin ele mhọn da Jehova (3) fi emhanmhan nọnsele denọ, bi (4) ebi ele ha rẹ sabọ rẹkpa ele rẹ khọn ọnọghọ nọnsele yẹ. Be mhan ha rẹ sabọ re obọ rẹkhan ebi Jesu taman edibo nesọle yẹ, beji mhan rẹ noo ebe natiọle Sọnyẹnmhẹn bhi Ighegheghe! rẹ man ọria Baibo, beji ọle ha da sabọ dọ ha ga Jehova?

RẸKPA ỌNE UWẸ MAN ỌLE BAIBO RẸ LẸN EBE RE ỌLE SIEGBE RE IKEKE RẸ GA JEHOVA

3. Be ha sabọ re Nikodemọs ha siegbe re ikeke rẹ kiẹn ọkpa bhi edibo nesi Jesu?

³ Ọkpa bhi ẹwẹ eria ne ha gbẹloghe ibhokhan Ju Nikodemọs ha khin. Okpọria ọle wo ha khin. Ọkpakinọn, ọ da wo ha nọghọ ọle rẹ kiẹn odibo nọnsi Jesu. Ọ ki ribhi uki ehan nin Jesu munhẹn ha lu iwẹnna itẹmhọn Osẹnobulua, Nikodemọs da wo dọ lẹn ghe ọria nin Jehova je re Jesu khin. (Jọni 3:​1, 2) Ọrẹyiriọ, ọle da ha bu Jesu re bhi ẹkhokho, ranmhude “ofẹn ene ibhokhan Ju” nọn ha mun ọlẹn. (Jọni 7:13; 12:42) Asabọmiẹn ghe ọle da ha mun ofẹn ghe, a dẹ re ọle sotọ bhi ihe nin ọle ye sade ọle dọ kiẹn ọkpa bhi edibo nesi Jesu.a

4. Be Jesu rẹ rẹkpa Nikodemọs yẹ rẹ lẹn ebi Jehova guanọ bhi obọ ọle?

⁴ Nikodemọs lẹn uhi nin Jehova na bhi obọ Mozis gbe nin ibhokhan Izrẹl. Ọkpakinọn, ọle da ha guanọ ọria nọn ha rẹkpa ọle lẹn ebi Jehova guanọ bhi obọ ọle. Be Jesu rẹ rẹkpa ọle yẹ? Jesu da wo muegbe nin ọle rẹ rẹkpa Nikodemọs, arẹmiẹn ọsasọn Nikodemọs rẹ ha bu ọle re. Jesu da wo taman Nikodemọs ebi ọkhẹke nin ọle lu beji ọle ha da sabọ kiẹn ọkpa bhi edibo nesọle. Ọle da taman ọlẹn nin ọle fidenọ bhi olukhọ nọnsọle, ọle ha dọ mianmẹn yẹ ha mhọn urẹọbhọ da Ọmọn nọnsi Osẹnobulua.—Jọni 3:​5, 14-21.

5. Be uwẹ ha rẹ sabọ rẹkpa ọne uwẹ man ọlẹn Baibo rẹ lẹn ebe mun ọle mhọn rẹ lu re alo?

⁵ Aharẹmiẹn ọne mhan man ọle Baibo manman wo lẹn otọ Baibo nọnsẹn, ọkhẹke nin mhan rẹkpa ọle rẹ lẹn ebe mun ọlẹn mhọn rẹ lu re alo. Iwẹnna nin ọle lu la ekpokpo nin ọle miẹn bhi obọ azagba-uwa nọnsọle sabọ re ọle miẹn ghe, ọle bha lu re alo. Bhiriọ, dọnmhegbe nin uwẹ rẹ ha rẹkpa ọne uwẹ man ọlẹn Baibo. Mhan sabọ rẹ tie ọle vae bhi uwa nọnsẹmhan nin ọle dọ deba mhan le ebale, la deba mhan yo okhian. Bhi ọne ẹghe nan, asabọmiẹn mhan dẹ sabọ rẹkpa ọle rẹ taman mhan ọkakale nin ọle kuẹlo da. Bhiriọ, rẹkpa ọne uwẹ man ọlẹn Baibo rẹ fi emhin ne khẹke denọ bhi iẹnlẹn. Ọ i yi nin ọle rẹ re uwẹ ha ghọnghọn zẹle nin ọle ha da lu ọnan, sokpan, ranmhude ọle hoẹmhọn Jehova.

6. Be uwẹ ha rẹ sabọ rẹkpa ọne uwẹ man ọle Baibo yẹ, beji ọle ha da sabọ ha re obọ rẹkhan ebi ọle luẹ? (1 Kọrint 16:13)

⁶ Ahamiẹn ọne uwẹ man ọlẹn Baibo rẹọbhọ ghe Jehova dẹ rẹkpa ọle, beji ọle ha da sabọ re obọ rẹkhan adia ne ribhi Baibo, ọle ki ha mhọn ọne ọhubhudu rẹ ha re obọ rẹkhan ebi ọle luẹ. (Tie 1 Kọrint 16:13.) Ahamiẹn ọria nọn man ọria Baibo uwẹ khin, inian uwẹ yẹ diabe ọman-emhin bhi isiku. Ria ẹmhọn ẹghe nin uwẹ rẹ ha ribhi isiku. Ọman-emhin nela uwẹ manman hoẹmhọnlẹn nẹ? Asabọmiẹn ọne ọman-emhin nọn wo ha rẹkpa uwẹ rẹ lu ebe khẹke nin uwẹ lu, ọle uwẹ hoẹmhọn ọlẹn nẹ. Iriọ yẹ nọn, ọria nọn sabọ man Baibo nọnsẹn, i da wo gheghe ha man ọne ọle man ọlẹn Baibo ebi Jehova guanọ nin ọle lu, sokpan, ọle dẹ yẹ ji ọle lẹn ghe Jehova dẹ rẹkpa ọle rẹ fi emhin nọn khẹke denọ bhi iẹnlẹn. Be uwẹ ha rẹ sabọ ha yi ọman-emhin nọn sẹriọ yẹ?

RẸKPA ỌNE UWẸ MAN ỌLE BAIBO BEJI ỌLE HA DA MANMAN HOẸMHỌN JEHOVA

7. Be Jesu rẹ rẹkpa ene ka ọle ehọ yẹ, beji ele ha da manman hoẹmhọn Jehova?

⁷ Jesu lẹnmhin ghe oyẹẹ nin edibo nesọle mhọn da Osẹnobulua dẹ re ele re obọ rẹkhan ebi ele luẹ. Ẹghe-ẹghe ọle rẹ wo ha man edibo nesọle emhin nọn ha rẹkpa ele rẹ manman hoẹmhọn Aba ele nọn ribhi okhun. Bhi ọsi ijiẹmhin, ọle da re Jehova khọkhọ okpea nọn wo ha lu emhin esili nin imọn nesọle. (Mat. 7:​9-11) Asabọmiẹn eso ne ha ka Jesu ehọ, bha ha mhọn aba nọn re iriọ hoẹmhọn ele. Riale ebi ọ ha dia ele bhi egbe yẹ, ẹghe nin Jesu rẹ gbe okha ọsi aba ọkpa, nọn re oyẹẹ miẹn ọmọn nọnsọle ọbhi egbe, nọn ka rẹ wo ha lu emhin ebe ne bunbun. Jesu da rẹkpa ele rẹ daghe ebi Jehova rẹ hoẹmhọn imọn nesọle yẹ ne ribhi ọne otọ nan.—Luk 15:​20-24.

8. Be uwẹ ha rẹ sabọ rẹkpa ọne uwẹ man ọle Baibo yẹ, rẹ manman hoẹmhọn Jehova?

⁸ Uwẹ dẹ yẹ sabọ rẹkpa ọne uwẹ man ọle Baibo rẹ manman hoẹmhọn Jehova, sade uwẹ sounun ọbhi ikpẹ esili kẹkẹ nin Jehova mhọn bhi ẹghe nin bha rẹ luẹ Baibo. Bhi ọne ẹghe nan, rẹkpa ọle rẹ lẹn ebi oyẹẹ nọnsi Jehova rẹ diẹn mun ebi ọle luẹ yẹ. Ahamiẹn ibha zilo nyan ẹmhọn izọese nọnsi Jesu, ji ọle lẹn ebi ọ rẹ rẹtẹ ọle yẹ. (Rom 5:8; 1 Jọni 4:10) Ọne uwẹ man ọlẹn Baibo dẹ sabọ zẹ nin ọle rẹ ga Jehova sade ọle ria eria nyan ebi Jehova rẹ hoẹmhọn ọle tobọle yẹ.—Gal. 2:20.

9. Be rẹkpa Michael rẹ fi iẹnlẹn nọnsọle denọ?

⁹ Bha ji mhan fẹ ijiẹmhin ọsi Michael ghe, nọn nyẹnlẹn bhi Indonesia. Ọle da ha luẹ Baibo beji ọle rẹ wanre, ọkpakinọn, ọle bha mianmẹn. Ẹghe nin ọle rẹ ha ribhi ikpe 18, ọle da diọbhi agbaẹbho ọbhebhe dọ ha wẹnna. Udede moto (Trailer) ọle ha hẹn. Akizẹbue, ọle da fikie diọbhi Indonesia dọ re okhuo, yẹ biẹ ọmọn-okhuo. Ọkpakinọn, ọle da zẹ ele obọ diọbhi agbaẹbho ọbhebhe dọ ha wẹnna. Bhi ọne ẹghe nan, okhuo ọle bi ọmọn-okhuo nọnsọle da munhẹn ha luẹ Baibo, yẹ re obọ rẹkhan ebi ele luẹ. Ẹghe nin inẹn ọlẹn rẹ yu, Michael da zẹ nin ọle rẹ fikie diọbhi uwa dọ ha gbẹloghe aba ọle, ọle da yẹ ka nin ọle rẹ ha luẹ Baibo. Ẹghe nin Micheal bi ọnọn man ọle Baibo ki rẹ ha luẹ obọ natiọle “Manman Lẹn Otọle Nọnsẹn” bhi iluẹmhin nọnzi 27 bhi ebe natiọle Sọnyẹnmhẹn bhi Ighegheghe!, ebi Micheal luẹ bhi enin da wo manman rẹso ọle. Ọle ki ria eria nyan ebi ọ ba Jehova bhi egbe sẹ yẹ bhi ẹghe nin ọle rẹ daghe ọmọn nọnsọle loya, Michael da wo ha viẹ. Ọle da wo ji izọese nọnsi Jesu da manman rẹso ọle bhi ọkhọle rẹ sẹbhọ ghe, ọle da fi uwedẹ iẹnlẹn nọnsọle denọ, yẹ mianmẹn.

RẸKPA ỌNE UWẸ MAN ỌLE BAIBO RẸ MUN JEHOVA KALO BHI IẸNLẸN

10. Be Jesu rẹ rẹkpa edibo nesọle yẹ rẹ mun iwẹnna itẹmhọn Osẹnobulua kalo bhi iẹnlẹn? (Luk 5:​5-11) (Yẹ fẹ ifoto ghe.)

¹⁰ Ẹjẹje ene edibo bhi ore nin ọhẹnhẹn rẹ wo lẹn ghe Jesu hi ọne Mezaya. Ọkpakinọn, ele da ha guanọ ọnọn ha rẹkpa ele beji ele ha da sabọ mun iwẹnna itẹmhọn Osẹnobulua kalo bhi iẹnlẹn. Pita bi Andru bhọ yi edibo fo ọkuẹsẹ Jesu tie ele nin ele dọ ha re ẹghe rebhe rẹkhan ọlẹn. (Mat. 4:​18, 19) Ehẹn Pita, Andru, Jemis bi Jọni ha gbe, sẹyẹ, ele wo ha khuan igho bhi ọne iwẹnna nan. (Mak 1:​16-20) Ẹghe nin Pita bi Andru rẹ “zẹ ọgan nọnsele obọ,” asabọmiẹn ele wo ha mhọn emhanmhan bhi otọ rẹji ebi ele ha rẹ ha gbẹloghe azagba-uwa nọnsele yẹ, beji ele rẹkhan Jesu. Bezẹle nin ele da sabọ zẹ ẹki nọnsele obọ? Ebe ọsi Luk taman mhan ghe, Jesu da lu emhin ọhan-ilo nọn rẹkpa ele rẹ rẹọbhọ ghe, Jehova dẹ sabọ gbẹloghe ele.—Tie Luk 5:​5-11.

11. Be mhan ha rẹ sabọ re isẹlobhemhin nọnsẹmhan rẹ ziẹn urẹọbhọ ọsi ene mhan man ele Baibo yẹ?

¹¹ Mhan i da sabọ lu emhin ọhan-ilo ẹlẹnan beji Jesu lu. Ọkpakinọn, mhan dẹ sabọ taman ene mhan man ele Baibo ebi Jehova rẹ rẹkpa ẹbho ne mun ọlẹn kalo bhi iẹnlẹn yẹ. Bhi ọsi ijiẹmhin, uwẹ yẹ yere ebi Jehova rẹ rẹkpa uwẹ yẹ bhi ẹghe nin uwẹ rẹ munhẹn ha yo ikolo oga? Asabọmiẹn bhi ọne ẹghe nan, uwẹ da bu ọria nin uwẹ wẹnna nan dọ taman ọlẹn ghe, uwẹ i yẹ da sabọ ha wẹnna gbera ẹghe nọn khẹke nin uwẹ wẹnna sẹ, beji uwẹ ha da sabọ ha yo ikolo oga. Beji uwẹ ha rẹ ha taman ene uwẹ man ele Baibo isẹlobhemhin kẹkẹ nin uwẹ miẹn bhi iẹnlẹn, rẹkpa ele rẹ lẹn ebi ọ rẹ ziẹn urẹọbhọ nọnsẹ yẹ, beji uwẹ daghe ebi Jehova rẹ ha rẹkpa uwẹ yẹ nin uwẹ rẹ zẹ rẹ mun ọlẹn kalo bhi iẹnlẹn.

12. (a) Bezẹle nọn da yi emhin nọn mhẹn nin mhan rẹ ha ne ibhio mhan kẹkẹ rẹkhan egbe, sade mhan khian dọ man ẹbho Baibo? (b) Be uwẹ ha rẹ sabọ noo ividio yẹ, rẹ man ene uwẹ man ele Baibo emhin nọnsẹn? Re ijiẹmhin ọbhọ.

¹² Ene uwẹ man ele Baibo dẹ wo manman miẹn elele sade uwẹ taman ele ebi ibhio mhan sẹ lu, beji ele ha da sabọ mun ẹmhọn Jehova kalo bhi iẹnlẹn. Bhiriọ, ha ne ibhio mhan kẹkẹ rẹkhan egbe sade uwẹ khian dọ man ẹbho Baibo. Bhi enin, nọọn ele ebi ele rẹ dọ luẹ ẹmhọanta yẹ. Uwẹ ha yẹ nọọn ele emhin kẹkẹ nin ele lu beji ele ha da sabọ mun oga nọnsi Jehova kalo bhi iẹnlẹn. Rẹ deba ọnin, deba ọria nin uwẹ man ọle Baibo ghe ividio kẹkẹ, ne ribhi obọle natiọle “Manman Lẹn Otọle Nọnsẹn” la “Fẹ Ene Emhin Nan Ghe” bhi ebe natiọle Sọnyẹnmhẹn bhi Ighegheghe! Bhi ọsi ijiẹmhin, ahamiẹn ibha zilo nyan iluẹmhin nọnzi 37, deba ọne uwẹ man ọle Baibo zilo nyan ebi bha miẹn luẹ bhi ọne ividio nọn yọle, Jehova Dẹ Re Ebe Imhan Guanọ Nin Mhan.

RẸKPA ỌNE UWẸ MAN ỌLẸN BAIBO RẸ SABỌ KHỌN ỌNỌGHỌ NỌNSỌLE MIOTỌ

13. Be Jesu rẹ rẹkpa edibo nesọle yẹ rẹ muegbe ọbhi otọ khẹ ekpokpo?

¹³ Ẹghe-ẹghe Jesu rẹ ha taman edibo nesọle ghe ele dẹ kuẹlo da ekpokpo bhi obọ ẹbho, rẹ dọ sẹbhi ene ribhi azagba-uwa nọnsele. (Mat. 5:11; 10:​22, 36) Ọ ki kẹ khere nin Jesu rẹ lu iwẹnna itẹmhọn Osẹnobulua fo bhi ọne otọ nan, ọle da ji edibo nesọle lẹn ghe, a dẹ sabọ gbe ele a ranmhude nin ele rẹ ga Jehova. (Mat. 24:9; Jọni 15:20; 16:2) Ranmhude ọnan, ọle da taman edibo nesọle nin ele ha babegbe bhi iwẹnna itẹmhọn Osẹnobulua nin ele lu. Ọle da taman ele ghe nin ele hẹi ne ẹbho ne kpokpo ele ha gbugan, sẹyẹ, nin ele mhọn ẹwanlẹn bhi ebi ele ta bi ebi ele lu, beji ele ha da yẹ sabọ ha lu iwẹnna itẹmhọn Osẹnobulua khian.

14. Be mhan ha rẹ sabọ rẹkpa ọne mhan man ọlẹn Baibo yẹ rẹ muegbe ọbhi otọ khẹ ekpokpo? (2 Timoti 3:12)

¹⁴ Beji Jesu lu, mhan dẹ sabọ rẹkpa ọne mhan man ọlẹn Baibo rẹ muegbe ọbhi otọ khẹ ekpokpo, sade mhan taman ọle ebi ene ele ko wẹnna, imọẹ ọle, bi ẹbho bhi azagba-uwa nọnsọle ha sabọ taman ọle ranmhude nin ọle rẹ luẹ Baibo. (Tie 2 Timoti 3:12.) Eria eso nin ele ko wẹnna sabọ rẹ ha jẹ ọle ranmhude uwedẹ ọgbọn nin ọle ki rẹ nyẹnlẹn. Sẹyẹ, ẹbho nekẹle rẹ dọ sẹbhi ene ribhi azagba-uwa nọnsọle sabọ rẹ miẹn ghe ele bha rẹọbhi ebi ọle rẹọ i. Ahamiẹn mhan kẹ rẹkpa ene mhan man ele Baibo rẹ muegbe ọbhi otọ khẹ ekpokpo, ọ ki rẹkpa ele rẹ lẹn ebi ele ha lu yẹ sade ele kuẹlo da ekpokpo.

15. Be ha sabọ rẹkpa ọria nan man ọle Baibo rẹ sabọ ziẹngbe ekpokpo nin ọle miẹn bhi obọ azagba-uwa nọnsọle?

¹⁵ Rẹkpa ọne uwẹ man ọlẹn Baibo rẹ ria eria nyan ebezẹle nin azagba-uwa nọnsọle ha da sabọ ha khọẹkẹ ọle, ranmhude nin ọle rẹ luẹ Baibo. Asabọmiẹn ebezẹle nin ele da khọẹkẹ ọle hi, ranmhude ele riale ghe emhin nọn bha gba a man ọle le, la ranmhude ele bha hoẹmhọn Esali Jehova hiehie. Emhin nọn sẹnian bhọ yẹ sunu ji Jesu bhi azagba-uwa nọnsọle. (Mak 3:21; Jọni 7:5) Taman ene uwẹ man ele Baibo nin ele ha mhọn iziẹngbe sade a kpokpo ele, ele ha yẹ re ẹwanlẹn ha ne ẹbho talọ, rẹ dọ sẹbhi eria ne ribhi azagba-uwa nọnsele.

16. Be mhan ha rẹ sabọ rẹkpa ọria nin mhan man ọle Baibo ye, rẹ re ẹwanlẹn tẹmhọn Osẹnobulua man ene ribhi azagba-uwa nọnsọle?

¹⁶ Ahamiẹn ẹbho ne ribhi azagba-uwa ọsi eria nin mhan man ele Baibo guanọ nin ele lẹn otọ ebi mhan rẹọ i, ọ dẹ ha yi emhin ẹwanlẹn sade ọria nin mhan man ọle Baibo bha wo re osukpa gbe otọ emhin rebhe nin ọle rẹọ i man ele. Ranmhude ọle ha lu iriọ, ọ dẹ sabọ re egbe lọ ele rẹ sẹbhọ ghe, ele i da yẹ ho nin ele kaehọ ẹdẹ ọbhebhe. Bhiriọ, taman ọne uwẹ man ọlẹn Baibo nin ọle ne azagba-uwa nọnsọle talọ bhi uwedẹ nọn ha yẹẹ ele rẹ kie kaehọ ẹdẹ ọbhebhe. (Kol. 4:6) Ọle bhọ sabọ rẹ taman ẹbho ne ribhi azagba-uwa nọnsọle nin ele dọ fẹ jw.org ghe. Ọnan bhọ dẹ rẹkpa ele rẹ tobọle luẹ ẹmhọn ebi Esali Jehova rẹọ i.

17. Be uwẹ ha rẹ sabọ rẹkpa ọria nin uwẹ man ọlẹn Baibo yẹ, rẹ muegbe ọbhi otọ khẹ inọnta nin ẹbho ha nọọn ọle le rẹji ebi Esali Jehova rẹọ i? (Yẹ fẹ ifoto ghe.)

¹⁷ Uwẹ sabọ noo “Inọnta Nin Ẹbho Kẹ Nọọn” nọn ribhi jw.org, rẹ rẹkpa ọne uwẹ man ọlẹn Baibo rẹ muegbe ọbhi otọ khẹ, inọnta nọn hi ki rẹ khin nin eria bhi azagba-uwa nọnsọle la ene ko wẹnna ha sabọ nọọn ọlẹn le. (2 Tim. 2:​24, 25) Ẹghe-ẹghe nin bha rẹ luẹ iluẹmhin ọkpa sotọ, bha zilo nyan obọle nọn yọle, “Ẹbho Eso Sabọ Yọle” bhi ọne ebe natiọle Sọnyẹnmhẹn bhi Ighegheghe! Taman ọne uwẹ man ọlẹn Baibo nin ọle muegbe ewanniẹn nin ọle ha re nin ẹbho ọbhi otọ. Rẹkpa ọle rẹ lẹn uwedẹ nọn mhẹn nẹ nin ọle ha rẹ sabọ gbotọ ebi ọle rẹọ i fanọn an man ẹbho yẹ. Ahamiẹn uwẹ rẹkpa ọne uwẹ man ọle Baibo rẹ ha muegbe ebi ọle ha rẹ wanniẹn ẹbho yẹ ọbhi otọ, ọ ki rẹkpa ọle rẹ sabọ re izebhudu ha gbotọ ebi ọle rẹọ i fanọn an man ẹbho.

18. Be uwẹ ha rẹ sabọ rẹkpa ọne uwẹ man ọle Baibo yẹ, beji ọle ha da sabọ ha lu iwẹnna itẹmhọn Osẹnobulua? (Matiu 10:27)

¹⁸ Jesu da taman edibo nesọle nin ele ha wewe ọne ọta nọn mhẹn man ẹbho. (Tie Matiu 10:27.) Ahamiẹn ọria nin uwẹ man ọle Baibo munhẹn ha tẹmhọn Osẹnobulua man ẹbho, ọ ki rẹkpa ọle rẹ ha mun udu nyan Jehova. Be uwẹ ha rẹ sabọ rẹkpa ọria nin uwẹ man ọlẹn Baibo yẹ, beji ọle ha da sabọ ha tẹmhọn Osẹnobulua man ẹbho? Ahamiẹn a mhanmhanlẹn nin agbotu rẹ dagbare dọ tẹmhọn Osẹnobulua, rẹkpa ọne uwẹ man ọlẹn Baibo rẹ lẹn ebi ọle ha lu yẹ, beji ọle ha da sẹ ọria nọn ha deba agbotu ha tẹmhọn Osẹnobulua. Ji ọle lẹn ghe, ọ i yi emhin nọn nọghọ nan rẹ deba agbotu dọ ha tẹmhọn Osẹnobulua. Emhin ọbhebhe nọn ha yẹ rẹkpa ọle hi, sade ọle khu ọbhọ nin ọle rẹ sẹ ọria nọn ha sabọ ha re ọta man bhi ikolo nan do bhi ẹkẹ uzana. Ahamiẹn ọle lu ene emhin nan rebhe nin mhan sẹ zilo ọle, ọle ki sabọ re izebhudu ha ta ebi ọle rẹọ i man ẹbho.

RẸMAN UWẸ RẸỌBHỌ GHE ENE UWẸ MAN ỌLẸN BAIBO GENE GUANỌ NIN ELE GA JEHOVA

19. Be Jesu rẹ rẹman yẹ ghe, ọle gene rẹọbhọ edibo nesọle dẹ lu ebe ti Jehova bhọ? Be mhan ha rẹ sabọ re egbe khọkhọ ọle yẹ?

¹⁹ Ọkuẹsẹ Jesu kpanọ ha khian okhun, ọle da taman edibo nesọle ghe ele dẹ kie miẹn egbe ẹdọkpa. Ele bha lẹn ghe okhun nin ele ha diọ i Jesu ha tẹmhọnlẹn. Arẹmiẹn edibo nesi Jesu bha lẹn otọ ebi Jesu tale, Jesu lẹnmhin ghe ele ho nin lu ebe ti Jehova bhọ. (Jọni 14:​1-5, 8) Ọle lẹnmhin ghe, ọ dẹ re ẹghe ọkuẹsẹ ele lẹn otọ emhin eso, bọsi ọne ikhuaẹloghe nin ele mhọn nin ele rẹ diọbhi okhun. (Jọni 16:12) Imhan bhọ tobọmhan dẹ sabọ ha mhọn ọne urẹọbhọ ghe, ene mhan man ele Baibo guanọ nin ele lu ebe ti Jehova bhọ.

20. Be obhio mhan nin okhuo nọn nyẹnlẹn bhi Malawi rẹ rẹman yẹ ghe, ọle rẹọbhọ ghe ọne ọle man ọle Baibo dẹ lu ebe gbale?

²⁰ Ọkhẹke nin mhan rẹọbhọ ghe ene imhan man ele Baibo dẹ lu ebe gbale. Ọnan hi ebi obhio mhan nin okhuo natiọle Chifundo lu, nọn nyẹnlẹn bhi Malawi. Ọle da re ebe natiọle Sọnyẹnmhẹn bhi Ighegheghe! rẹ ha man okhuo ọkpa natiọle Alinafe Baibo. Otuẹ Catholic ọne okhuo yo. Ele ki luẹ iluẹmhin nọnzi 14 fo, Chifundo da nọọn Alinafe ebi ọle ghe ọle yẹ sade ọria noo amanzẹ rẹ ga Osẹnobulua. Ẹkẹ da wo khọ Alinafe, ọle da wanniẹn yọle, “Imẹn ha tobọmẹn zẹ ebi mẹn ha rẹ ga Osẹnobulua yẹ.” Ebi ọle tale nan da wo re Chifundo ha riale ghe, ọle i yẹ da kie luẹ Baibo. Ọkpakinọn, Chifundo da yẹ wo re iziẹngbe ha luẹ Alinafe Baibo, yẹ rẹọbhọ ghe ẹdọkpa, ẹmhọanta nọn ribhi Baibo dẹ mun ọle ẹlo kore. Uki eso ki gbera, Chifundo da nọọn Alinafe inọnta nọn ribhi iluẹmhin nọnzi 34 nọn yọle: “Elele nela uwẹ sẹ miẹn bhọ nin uwẹ rẹ munhẹn ha luẹ ẹmhọn iJehova bhi ẹkẹ iBaibo?” Alinafe ki ha wanniẹn ọne inọnta nin, ọle da ta emhin ne bunbun nin ọle luẹle. Ọkpa bhi ene emhin nin ọle luẹle hi, “Esali Jehova i ne obọ ọbhi emhin nin Baibo yole ghe ọ bha gba.” Ọ bha bue gbe, Alinafe da zobọ bhọ rẹ ha noo amanzẹ rẹ ga Osẹnobulua, sẹyẹ, ọle da dọ mianmẹn.

21. Be mhan ha rẹ sabọ rẹkpa ene mhan man ele Baibo yẹ, beji ele ha da sabọ ha ga Jehova?

²¹ Ẹmhọanta nọn ghe Jehova hi ọne rẹkpa ene mhan man ele Baibo rẹ sabọ dọ ga ọle, ọrẹyiriọ, mhan yẹ wo mhọn ọne mhan ha sabọ lu rẹ rẹkpa ele. (1 Kọr. 3:7) Ọ i yi ebi Jehova guanọ bhi obọ ele ọkpa ọkhẹke nin mhan ha man ele le, ọ yẹ khẹke nin mhan rẹkpa ele rẹ manman hoẹmhọn Jehova. Ọkhẹke nin mhan rẹkpa ele rẹ lẹn ebi ọkhẹke nin ele mun kalo bhi iẹnlẹn, nin ele rẹ rẹman ghe ele hoẹmhọn Jehova. Sẹyẹ, ọkhẹke nin mhan rẹkpa ele rẹ ha mun udu nyan Jehova sade ele kuẹlo da ọkakale. Ahamiẹn mhan ji ene mhan man ele Baibo lẹn ghe ele dẹ sabọ lu ebe ti Osẹnobulua bhọ, ọ ki rẹkpa ele rẹ rẹọbhọ ghe, ele dẹ sabọ re obọ rẹkhan adia nesi Jehova, yẹ ha ga ọle.