Ahamiẹn Nan Rẹ Ha Ghe Ifoto la Ividio Ọsi Ẹbho Ne Banọan Ki Guẹ Mẹn Egbe Ki?

Ebi uwẹ ha sabọ lu

Lẹn ebi ọ gene khin nan rẹ ha ghe ifoto ọsi ẹbho ne banọan.

Nan rẹ ha ghe ifoto la ividio ọsi ẹbho ne banọan, ebi ọ khin hi, nan rẹ re emhin nin Jehova manlẹn nan ha mun ekpẹn nan, kiẹn emhin nan rẹ zọ ojiẹ. Mhan ha re inian lẹn otọ ebi ọ khin nan rẹ ha ghe ifoto la ividio ọsi ẹbho ne banọan, ọ ki rẹkpa mhan rẹ “he emhin ebe.”—Psalm 97:10.

Ria ebe nabhọre sade ọria ghe ifoto la ividio ọsi ẹbho ne banọan. Ẹbho nan rẹman bhọ, ọ re ekpẹn si ele bhi egbe re. Ẹbho ne ghe ọle, ọ yẹ re ekpẹn si ele bhi egbe re. Ọnan zẹle nin Baibo da yọle: “Ọria nọn wanlan ha daghe emhin nọn ha si ikuan-egbe re, ọle ki nẹko.”—Proverbs 22:3.

Ve ive nin egbe ẹ. Job da yọle: “Mẹn ve akovẹn nin ẹlo nọnsẹmhẹn. Bhiriọ, bezẹle nin mẹn ha ki da wo ku ẹlo da ọmanmhẹn ha ghe ọle bhi uwedẹ nọn bha gba?” (Job 31:1) Eso bhi ive nin uwẹ ha sabọ ve nin egbe ẹ, ele khẹnan:

• Ọhẹnhẹn. Imẹn ida ha noo intanẹt ahamiẹn imẹn ọkpa ribhi uwa.

• Ọzeva. Ahamiẹn imẹn noo intaneti, emhin nọn imhẹn da zegbere bhọ, mẹn ki jẹje sibhọre.

• Ọzea. Ahamiẹn imẹn kie fikie dọ ha ghe ọle, imẹn ki taman ọmọẹ imẹn nọn wanre.

Ta ọne ẹmhọn man Osẹnobulua bhi erọnmhọn. Ọnọn gbẹn Psalm 119:37 da bhii Jehova yọle: “Denọ ẹlo nọnsẹmhẹn sibhi emhin ne bha kiọnlẹn re.” (Psalm 119:37) Osẹnobulua guanọ nin uwẹ khọn miotọ. Uwẹ ha bhii ọle nin ọle rẹkpa uwẹ, ọle dẹ re ọne ahu nin uwẹ nin uwẹ rẹ sabọ lu ebe gbale!—Philippians 4:13.

Nin ọria zilo. Ha mhọn ọria nin uwẹ gba ẹkẹ ọle nin uwẹ ne zilo. Ranmhude, ọ dẹ rẹkpa uwẹ rẹ sabọ khọn ọne okhọn nan miotọ.—Proverbs 17:17.

Yee ọnan re: Ẹghe-ẹghe nin uwẹ rẹ rẹban nin uwẹ rẹ ha ghe ifoto la ividio ọsi ẹbho ne banọan, udede okhọnlẹn uwẹ khọn miotọ. Taman iJehova ọne okhọnlẹn nan nin uwẹ khọn miotọ. Uwẹ ha yẹ khuẹnmhẹn ọlẹn bhi ahu nin ọle re nin uwẹ. Ahamiẹn uwẹ bha yẹ ha ghe ifoto la vidio ọsi ẹbho ne banọan, uwẹ ki re ọkhọle nọnsi Osẹnobulua ha ghọnghọn!—Proverbs 27:11.