Urẹkpa Nan Re Nin Ibhio Mhan bhi Otọ Agbọn Rebhe bhi Ẹghe Corona Virus

Bhi March 2020, otu nọn mhọn obọ bhi ebi a rẹ khọn emianmhẹn yẹ bhi otọ agbọn rebhe natiọle, World Health Organization da yọle ghe, emianmhẹn ọsọgbọn dagbare natiọle, corona virus. Ọkpakinọn, ẹbho ne bunbun bha rẹ riale ghe ọne emianmhẹn dẹ gbera ukpe ọkpa. Ẹbho ne bunbun, rẹ sẹbhi Esali Jehova, wo miẹn ọkakale kẹkẹ bhi egbe ranmhude ọne emianmhẹn nan. Be Esali Jehova ki rẹ rẹkpa ibhio ele yẹ bhi ọne ẹghe nan?

Urẹkpa Nan Re Nin Ibhio Mhan Ne Ribhi Ọnọghọ

Otu Nọn Sun Oga da mhanmhan ibhio mhan eso ọbhi usun ne gbera 950, nin ele ha yi Usun Ne Mhanmhan Urẹkpa Nan Re Ji Ene Emhin Idunmhuri Sunu Je, beji a ha da miẹn ghe, ele ki ha rẹkpa ibhio mhan bhi otọ agbọn rebhe bhi ẹghe ọne corona virus nan. Ene usun nan sẹ wo rẹkpa ibhio mhan ne ribhi agbaẹbho nin ele ye. Sẹyẹ, ibhio mhan eso miẹn urẹkpa bhi obọ gọvamẹnt bhi agbaẹbho nin ele ye. Ọne usun nan nin agbotu nọnsi Jehova mhanmhanlẹn wo manman re urẹkpa nin ibhio mhan bhi uwedẹ ne bunbun.

Bhi ọsi ijiẹmhin, bhi Paraguay, ebe iniuz ọkpa da yọle ghe, ranmhude ọne emianmhẹn corona virus nan, ohanmhẹn wo gbe ẹbho ne bunbun bhi Paraguay bhi ẹkẹ uwa nọnsele. Sokpan, ene usun nan nin agbotu mhanmhanlẹn ne ribhi Paraguay, munhẹn ha ne emhin bọsi ebale, ikpọn, bi emhin kẹkẹ nan rẹ gbẹloghe egbe nin azagba-uwa kẹkẹ. Ene emhin nan dẹ sẹ itue enẹn bhi azagba-uwa noo bhi ẹkẹ uzana eva. Ene emhin nan ne nin azagba-uwa kẹkẹ dẹ ghan sẹ N12,300.00 ($30 U.S.).

Be ene usun ibhio mhan nan rẹ gbega egbe ele yẹ nin ele hẹi mun ọne emianmhẹn corona virus la mun nin ẹbho nekẹle? Ele yọ ebi a rẹ gue ihue yẹ si egbe sibhi eji ẹbho ye re. Ele gbẹlokotọ beji a ha da miẹn ghe, eji ele ha da dẹ ebale nin ele ha gha nin ibhio mhan manman khia, sẹyẹ ẹbho ne khiẹn ene ebale gbega egbe nọnsẹn. Ọnan rẹman ghe ene ha ne emhin nin ele dẹ, dẹ ha yọ emhin rẹ gbega egbe, re emhin gbo imoto nọnsele a, sẹyẹ, eji ele ha da ne ene emhin ya, ele ki ha gbo ọle a. Ene ha gha ene emhin nin ibhio mhan ki ha si egbe nin ele.

Uwedẹ Nan Rẹ Ha Noo Ẹwanlẹn Rẹ Noo Igho ọsi Agbotu

Rẹ na ẹghe nin corona virus rẹ munhẹn rẹ dọ sẹbhi January 2021, Otu Nọn Sun Oga sẹ noo ebe gbera 25 million dollars (U.S.) rẹ rẹkpa ibhio mhan bhi ọne ẹghe nan. Bẹtẹ bhi agbaẹbho kẹkẹ bi ene usun ibhio mhan ne rẹkpa, wo dọnmhegbe rẹ te ene igho nan nin bha re re nọnsẹn. Ele yẹ guanọ eji emhin da lo nẹ nin ele ha da dẹ. Bhi ọsi ijiẹmhin, bhi Chile, ene usun ibhio mhan nan da ha guanọ nin ele dẹ ebale natiọle lentil, nọn bun sẹbhi ẹkpa-izẹ 15. Ọkpakinọn, bhi ẹkẹ uki ọkpa, eka nan rẹ dẹ ọne lentil da wo tin okhun sẹ igba eva ọsi igho nan rẹ dẹ ọle khẹ. Uri-agogo eva ki gbera nin ene ibhio mhan rẹ ka ghe ele dẹ dẹ ọne ebale bhi eka nan rẹ khiẹn ọlẹn, ọnọn khiẹn ọlẹn da taman ele ghe, ọria nọn ka rẹ dẹ fo, mun fikie re. Bhiriọ, ọne ilentil nin ọne ọria mun fikie re, ọle da khiẹn ọlẹn nin ele bhi eka nan rẹ ka ha khiẹn ọlẹn bhi uki nọn gbera, ọle bha yẹ khiẹn ọlẹn nin ele bhi ọne igho nọn ghanlẹn nin ọle rẹ ka ta.

Ọkpakinọn, ẹghe nin ibhio mhan rẹ dọ mun ọne lentil, ọnọn khiẹn ọlẹn da he ghe ọle ida yẹ khiẹn nin ele. Ọle da taman ene ibhio mhan ghe, eku ele rẹ gha ebale beji ẹbho nekẹle yẹ lu. Obhio mhan ọkpa bhi ẹwẹ ele ki jẹje nan erọnmhọn fo, ọle da taman ọlẹn ghe, ọkuẹsẹ ele gha ebale nin ibhio mhan bhi agbotu, ele ki ka fẹghe ọnọn khẹke nan gha ene ebale nan. Ọne obhio mhan da yẹ taman ọlẹn ghe, ranmhude emhin kẹkẹ azagba-uwa kẹkẹ guanọ, mhan ki ha ne emhin ne ele, ne ha yẹẹ ele rẹ noo. Ele da yẹ taman ọne ọria ghe, igho nin Esali Jehova noo rẹ rẹkpa ibhio ele, ọkhọle nọnsele ele rẹ re re, sẹyẹ, ọsọhẹ ele rẹ lu ọne iwẹnna rẹ rẹkpa ibhio ele. Ọne ẹmhọn da wo ti ọne ọria bhọ. Bhiriọ, ọle da yọle ghe, ọle dẹ khiẹn ọne ebale nin ene ibhio mhan beji ọle ka rẹ yọle ghe ọle dẹ rẹ mun nin ele. Sẹyẹ, ọle da mun lentil nọn bun sẹbhi ẹkpa-izẹ 8 nin ele ọsọhẹ ẹdẹ ọbhebhe nin ele kie dọ dẹ.

“Oyẹẹ Ọsaje Ọnan Rẹman”

Obhio mhan nin okhuo natiọle Lusu nọn nyẹnlẹn bhi Liberia, ọle bi itue isẹn bhi azagba-uwa nọnsọle ko nyẹnlẹn. Ọdọman ọle khin, sẹyẹ, ọle iyẹ mhọn ọdọ. Ẹdẹ ọkpa, ẹghe nin ele rẹ ha le ebale ọsewewiẹ yẹ tie ebe ukpẹdẹ, eyẹẹ nọnsọle nin okpea, nọn ki wanre sẹbhi ikpe ihinlọn ki daghe ghe ebale fo bhi uwa, ọle da yọle: “Be imhan ha ki le?” Lusu da taman ọlẹn ghe, ọle nan erọnmhọn rẹ bhii Jehova fo nin Ọle rẹkpa ele, sẹyẹ ọle rẹọbhọ ghe Jehova dẹ họn ọne erọnmhọn. Ọsodanmhẹn bhi ọne ukpẹdẹ nin, ewanlẹn bhi agbotu nọnsele da tie Lusu bhi foni nin ọle vae dọ ne ebale. Lusu da yọle: “Eyẹẹ nọnsẹmhẹn yọle ghe, ọle ki daghe ọle nian ghe Jehova sabọ họn erọnmhọn ranmhude Ọle họn erọnmhọn nin mẹn nanlẹn.”

Okhuo ọkpa nọn ribhi Democratic Republic of Congo da ha yi idiake ọsi azagba-uwa ọkpa ne yi Esali Jehova. Ọle ki daghe ebi ene Esali Jehova rẹ miẹn urẹkpa bhi ọbọ ibhio ele yẹ, ọle da yọle, “Ọne emianmhẹn nan ha fo, mhan dẹ kiẹn Esali Jehova ranmhude, ele wo gbẹloghe ibhio ele bhi ọne ẹghe ọkakale nan.” Ọdọ ọle da nọọnlẹn yọle, “Uwẹ dẹ be kiẹn Esali Jehova ranmhude ẹkpa-izẹ khọnkhan?” Sokpan ọne okhuo da wanniẹn ọdọ ọle yọle, “Hiehie, ọkpakinọn, ọne ẹkpa-izẹ nan wo rẹman oyẹẹ ọsaje nọn ribhi ẹwẹ ele.”

Esali Jehova wo sẹ sabọ re ẹjẹje re urẹkpa nin ibhio ele kẹkẹ bhi ẹghe ọne emianmhẹn nan, ranmhude igho nin ibha re ọkhọle nọnsẹbha rebhe re re. Mhan yi ibha obulu nin bha rẹ noo ene uwedẹ kẹkẹ nan tẹmhọnlẹn bhi donate.jw.org rẹ re igho re.