Ahamiẹn aba la inẹn uwẹ khin, rẹkpa imọn nesẹ rẹ muegbe ewanniẹn ọbhi otọ beji ele sẹ. Ẹgheso a zilo nyan ẹmhọn ne kakale eso bhi ikolo oga, bọsi, ẹmhọn ne rẹtẹ okhuo bi ọdọ, la ẹmhọn oghẹ. Ọkpakinọn, asabọmiẹn uduọle ọkpa la eva dẹ ha ribhọ nin ene ibhokhan ha da sabọ re ewanniẹn ọbhi inọnta. Sẹyẹ, rẹkpa imọn nesẹ rẹ lẹn ebi ha sabọ zẹ a bha tie ele ẹghe-ẹghẹ nin ele ha rẹ khua obọ okhun. Ọnan dẹ rẹkpa ele beji a ha da miẹn ẹkẹ bha ha khọ ele sade a bha tie ele nin ele re ewanniẹn ọbhi inọnta. (1 Tim. 6:18) Mhan rebhe dẹ sabọ muegbe ewanniẹn ọbhi otọ nọn ha re ogẹn ji Jehova, yẹ ziẹn ibhio mhan nin mhan ko ga udu. (Prov. 25:11) Ẹmhọanta nọn ghe, ẹgheso mhan dẹ sabọ tẹmhọn isẹlobhemhin nọnsẹmhan sade mhan re ewanniẹn ọbhi inọnta, ọrẹyiriọ, ọ bha khẹke nin mhan wo ha tẹmhọn egbe mhan gbe. (Prov. 27:2; 2 Kọr. 10:18) Ọkpakinọn, mhan dọnmhegbe rẹ ji ewanniẹn nọnsẹmhan ha yi ebe rẹtẹ Jehova, Ọta nọnsọle, bi ẹbho nesọle.—Arẹm. 4:11. w23.04 24-25 ¶17-18

Ọ wo khẹke nin mhan ha mhọn oyẹẹ beji mhan da sabọ ha babegbe, yẹ rẹ re ẹwanlẹn lu ha emhin. (Mat. 22:​37-39) Oyẹẹ nin mhan mhọn da Osẹnobulua dẹ rẹkpa mhan rẹ ha tẹmhọn ọlẹn man ẹbho aharẹmiẹn ọ dẹ sabọ si ọkakale ji mhan. (2 Tim. 1:​7, 8) Ranmhude mhan yẹ hoẹmhọn ẹbho ne iga Jehova, mhan wo dọnmhegbe rẹ ha guanọ ẹbho nin mhan ha tẹmhọn Osẹnobulua man. Mhan bhọ re ifoni bi lẹta rẹ lu ọle. Mhan mhọnlẹn bhi ọkhọle ghe, ẹdọkpa, ene ẹbho nan dẹ fidenọ yẹ dọ ha lu emhin ne mhẹn. (Ezek. 18:​27, 28) Mhan yẹ hoẹmhọn ibhio mhan nin mhan ko ga. Mhan rẹman ghe mhan hoẹmhọn ele sade mhan “re izebhudu nin egbe, yẹ ha bọn egbe okhun.” (1 Tẹsẹ. 5:11) Bọsi eyokhọnlẹn ne ko ribhi ibo ọkpa bhi okhọnlẹn, mhan re izebhudu nin egbe. Mhan ida wo taan ẹlo a lu emhin nọn ha ba ibhio mhan nin mhan ko ga bhi egbe, la lu haosa sade ele lu mhan khọ. (1 Tẹsẹ. 5:​13, 15) Mhan yẹ rẹman ghe mhan hoẹmhọn ewanlẹn ne gbẹloghe agbotu sade mhan mun ekpẹn nin ele.—1 Tẹsẹ. 5:12. w23.06 10 ¶6; 11 ¶10-11

Uwedẹ ọkpa nin mhan ha rẹ sabọ ziẹn urẹọbhọ nọnsẹmhan hi, nin mhan rẹ ha ria eria nyan izọese nọnsi Jesu. Izọese nọnsi Jesu rẹkpa mhan rẹ lẹn ghe ive rebhe nin Jehova vele dẹ gene munsẹ. Ahamiẹn mhan manman ria eria nyan ebezẹle nin Jehova da je Jesu re nin ọle dọ yu nin mhan, bi ebi ọ re Jehova le rẹ lu ọle, ọ ki ziẹn urẹọbhọ nin mhan mhọn da ive nin Jehova vele nin mhan rẹ nyẹnlẹn bhi ighegheghe bhi agbọn ọfubhegbe. Bezẹle nin mhan ha da sabọ ta iriọ? Be ọ re Jehova le rẹ je Jesu nin ọle dọ yu nin mhan? Jehova da ji Ọmọn nọnsọle nin ọle manman hoẹmhọnlẹn nẹ, nọn yẹ sikẹ ọle nẹ da sibhi okhun re, nan dọ biẹ ọle bhi ọne otọ nan. Beji Jesu ha ribhi ọne otọ nan, ọle wo ziẹngbe ọkakale kẹkẹ. Ọle da loya yẹ yu uyumhin oya. Udede emhin wo khọnan nin Jehova lu. Jehova irẹ ji Ọmọn nọnsọle da loya yẹ yu sade nin mhan rẹ gheghe ha mhọn iẹnlẹn nọn mhẹn bhi obhi ẹghe khere nọn. (Jọn. 3:16; 1 Pita 1:​18, 19) Ranmhude Jehova re Ọmọn nọnsọle nin ọle manman hoẹmhọnlẹn rẹ zọese nin mhan, ọle dẹ lu ọle nin mhan sabọ nyẹnlẹn bhi ighegheghe bhi agbọn ọsọgbọn. w23.04 27 ¶8-9