Ọ be gene ghọn Jehova nin ọle re riọ ẹbho ne yu kpanọ bhi uu? A igbo kie ta ọnin! Ọle wo muegbe nin ọle rẹ lu ọle. Ọle da ji ẹbho eso ne gbẹn Baibo gbẹn ive ọsi ariọkpanọ nin ọle da lu bhi ẹghe odalo ọbhi otọ. (Isa. 26:19; Arẹm. 20:​11-13) Jehova ha ve ive, a igbo miẹn ọle bha mun ọlẹn sẹ. (Josh. 23:14) Bhi ọsi ẹmhọanta, ọ wo ghọn Jehova rẹ riọ ẹbho ne yu kpanọ. Ria ẹmhọn ọta nin Jobu tale. Ọle rẹọbhọ ghe ọle ha yu, ọ dẹ wo ha ghọn Jehova rẹ riọ ọle kpanọ. (Job 14:​14, 15) Ọ wo ghọn Jehova rẹ riọ eguọmhandia nesọle ne yu kpanọ. Jehova wo guanọ nin ele riọ kpanọ dọ ha mhọn egbe nọn daanlẹn, yẹ ha ghọnghọn. Be ki da sunu ji ẹbho ne bunbun ne bha miẹn ọne isẹhoa rẹ luẹ ẹmhọn Jehova ọkuẹsẹ ele yu? Osẹnobulua nọnsẹmhan yẹ wo guanọ nin ọle riọ ele kpanọ. (Iwẹn. 24:15) Ọle guanọ nin ọle re ọne isẹhoa nin ele rẹ dọ kiẹn imọẹ ọle, yẹ nyẹnlẹn bhi ọne otọ nan rẹsẹbhi ighegheghe.—Jọn. 3:16. w23.04 9 ¶5-6

Be uwẹ ha rẹ sabọ ha ziẹn ikhuaẹloghe nin uwẹ mhọnlẹn yẹ? Bhi ọsi ijiẹmhin, ahamiẹn nin uwẹ rẹ nyẹn bhi ọne otọ nan bhi ighegheghe hi ikhuaẹloghe nin uwẹ mhọn, ha tie Baibo ne tẹmhọn ebi agbọn ọfubhegbe da diayẹ, uwẹ ha yẹ ha ria eria nyan ọlẹn. (Isa. 25:8; 32:​16-18) Ha ria eria nyan ebi iẹnlẹn da diayẹ bhi agbọn ọsọgbọn. Ha re ọkhọle munọ ọlẹn ghe uwẹ ribhi enin. Ahamiẹn mhan dọnmhegbe ha ria eria nyan ebi agbọn ọsọgbọn da diayẹ ẹghe rẹbhe, ọkakale nin mhan kuẹlo da ki diabe “ọsi obhi ẹghe khere . . . [nọn] bha yẹ kaka gbe.” (2 Kọr. 4:17) Ikhuaẹloghe nin Jehova re nin uwẹ dẹ rẹkpa uwẹ rẹ sabọ ziẹngbe ọkakale kẹkẹ. Jehova wo ne emhin kẹkẹ nin mhan ne ha rẹkpa mhan rẹ sabọ miẹn ahu bhi obọ ọle. Bhiriọ, ahamiẹn uwẹ guanọ urẹkpa rẹ sabọ miẹnsọn nan mun nin uwẹ bhi agbotu, rẹ sabọ ziẹngbe ọkakale, la rẹ sabọ wo ha ghọnghọn, bu Jehova bhi erọnmhọn, uwẹ ha yẹ guanọ adia bhi iluẹmhin Baibo nọnsẹ. Miẹn urẹkpa ọsi ibhio ẹ nin bha ko ga ọbhi egbe. Re ẹghe ọbhi otọ rẹ ha ria eria nyan ikhuaẹloghe ọsi agbọn ọsọgbọn. Ẹghenin, Osẹnobulua ‘nọn manman mhọn ahu bi uyi ki mun uwẹ ziẹn, beji uwẹ ha da sabọ ziẹngbe emhin rebhe, yẹ re eghọnghọn ha khẹ ọle.’—Kol. 1:11. w23.10 17 ¶19-20

Emhin ne bunbun ribhọ ne ha re mhan ha khuẹnmhẹn Jehova bhi erọnmhọn. Mhan sabọ rẹ khuẹnmhẹn ọlẹn bhi emhin esili nọn hi ki rẹ khin nin mhan mhọn; bhi ọsi ẹmhọanta, emhin ne mhẹn rebhe, obọ ọle ele na vae. (Jem. 1:17) Bhi ọsi ijiẹmhin, mhan sabọ rẹ khuẹnmhẹn ọlẹn bhi emhin kikẹ ne ribhi ọne otọ nan ne re ọle mhọn-ose a, bi ene emhin ọhan-ilo kẹkẹ nin ọle man. Mhan sabọ yẹ rẹ khuẹnmhẹn ọlẹn bhi iẹnlẹn nin ọle re nin mhan, azagba-uwa nin ọle re nin mhan, imọẹ mhan, bi ikhuaẹloghe nin ọle re nin mhan. Mhan yẹ ho nin mhan khuẹnmhẹn Jehova bhi ọne isẹhoa nin ọle re nin mhan rẹ deba ọle ha mhọn ikolu. Ọ dẹ ha mhẹn sade mhan dọnmhegbe rẹ ha ria eria nyan emhin esili kẹkẹ nin Jehova lu nin mhan yẹ ha khuẹnmhẹn ọlẹn bhi erọnmhọn. Agbọn nin ẹbho ida mhọn unun ekhuẹnmhẹn mhan da nyẹnlẹn. Ebi eria ha rẹ sabọ ha mhọn ebi ele guanọ yẹ, ọle ọkpa emhin nọn manman rẹtẹ ele; ele bhọ izẹwẹ rẹman ghe emhin nin ele mhọn ti ele bhọ. Ahamiẹn mhan ji uwedẹ nọn sẹnian da rẹso mhan, ẹmhọn emhin nin mhan guanọ ọkpa mhan da wo ha nan bhi erọnmhọn. Nin mhan da sabọ rẹban ọkhọle nọn sẹnian, ọkhẹke nin mhan dọnmhegbe ha mhọn unun ekhuẹnmhẹn, yẹ wo ha rẹman Jehova ghe emhin nin ọle lu nin mhan ti mhan bhọ.—Luk 6:45. w23.05 4 ¶8-9