Ene Usẹn Ikpea—Bha Lu Re Alo Dọ Kiẹn Kristiẹn Ne Deziẹn Bhi Oga

1. Be ọkhẹke nin ikpea ne ga Osẹnobulua lu beji emhin ha da kiọnlẹn nin ele?

DEVID nin Ojie da taman Solomọn yọle: “Deziẹn, uwẹ ha yẹ rẹman ghe okpea uwẹ khin.” (1 Ki. 2:1-3) Ọ wo khẹke nin ikpea rebhe ne ga Jehova ẹlẹnan re obọ rẹkhan ọne adia nan. Nin ele rẹ sabọ lu ọnan, ọkhẹke nin ele luẹ rẹ ha re obọ rẹkhan uhi nesi Osẹnobulua, yẹ ha re obọ rẹkhan adia ne ribhi Baibo bhi emhin rebhe nin ele lu. (Luke 2:52) Bezẹle nọn da manman lu uhọnmhọn emhin nin usẹn ikpea lu re alo dọ kiẹn Kristiẹn ne manman deziẹn bhi oga?

2-3. Bezẹle nọn da lu uhọnmhọn emhin nin ene usẹn ikpea lu re alo dọ kiẹn Kristiẹn ne deziẹn bhi oga?

² Ikpea wo mhọn ẹsọn kpataki kẹkẹ nin ele miẹn bhi azagba-uwa bi bhi agbotu. Edandan iribhọ ghe ibha nin usẹn ikpea ria ẹmhọn ẹsọn kẹkẹ nin bha ha sabọ miẹn bhi ẹghe odalo. Uwẹ sabọ rẹ ha mhọn ọlẹn bhi ọkhọle nin uwẹ rẹ kiẹn ọkanẹfan ọsi ẹghe rebhe, ha ga bhi ihe ọsi ene zẹ sikẹ ene ewanlẹn, yẹ dọ kiẹn ọkpa bhi ene ewanlẹn sade a ki zẹbue. Asabọmiẹn ọ yẹ ri uwẹ bhi ọkhọle nin uwẹ rẹ re okhuo yẹ ha mhọn imọn. (Eph. 6:4; 1 Tim. 3:1) Nin uwẹ rẹ sabọ mun ọne emhanmhan nan sẹ, bi nin emhin rẹ kiọnlẹn nin uwẹ, ọkhẹke nin uwẹ lu re alo dọ kiẹn Kristiẹn nọn deziẹn bhi oga.b

³ Be ha rẹkpa uwẹ rẹ sabọ dọ ha yi Kristiẹn nọn deziẹn bhi oga? Emhin kpataki eso ribhọ ne khẹke nin uwẹ luẹ. Be uwẹ ha lu nian rẹ muegbe ọbhi otọ khẹ ẹsọn nọn hi ki rẹ khin nọn ha zegbere bhi ẹghe odalo, yẹ miẹn ọlẹn nọnsẹn?

EMHIN NE HA RẸKPA UWẸ RẸ DỌ KIẸN KRISTIẸN NỌN DEZIẸN BHI OGA

4. Ijela uwẹ ha da miẹn ijiẹmhin esili nin uwẹ ha sabọ re egbe khọkhọ?(Yẹ fẹ ifoto ghe.)

⁴ Zẹ eria ne lu nọnsẹn nin uwẹ ha sabọ re egbe khọkhọ. Ijiẹmhin esili ne bunbun wo ribhi Baibo nin ene usẹn ikpea ha sabọ re egbe khọkhọ. Ene ikpea nan nin Baibo tẹmhọnlẹn wo hoẹmhọn Osẹnobulua, yẹ gbega ẹbho nesọle bhi uwedẹ kẹkẹ. Uwẹ dẹ yẹ miẹn ikpea ne deziẹn bhi oga nin uwẹ ha sabọ re egbe khọkhọ bhi azagba-uwa nọnsẹ bi bhi agbotu nin uwẹ ye. (Heb. 13:7) Rẹ deba ọnin, uwẹ dẹ sabọ rẹ egbe khọkhọ ijiẹmhin nọn gbale nọnsi Jesu. (1 Pet. 2:21) Beji uwẹ ha rẹ ha luẹ ẹmhọn ijiẹmhin ọsi ene ikpea nan, gbẹlokotọ bhi ikpẹ nin ele mhọn ne manman ti uwẹ bhọ. (Heb. 12:1, 2) Uwẹ ha ki lu iriọ fo, uwẹ ha zẹ ebi uwẹ ha rẹ sabọ re egbe khọkhọ ele yẹ.

5. Be uwẹ ha rẹ sabọ luẹ ebi a rẹ ria eria nọnsẹn yẹ? Bezẹle nin ọnan da lu uhọnmhọn emhin? (Psalm 119:9)

⁵ Dọnmhegbe ha ria eria nọnsẹn. (Prov. 3:21) Okpea nọn ria eria nọnsẹn iwo re ẹjẹje lu emhin, sokpan ọle ria eria nọnsẹn fo ọkuẹsẹ ọle zẹ ebi ọle ha lu. Bhiriọ, dọnmhegbe ha ria eria nọnsẹn, uwẹ ha yẹ ha lu iriọ ẹghe rebhe. Bezẹle? Ranmhude ẹlẹnan nian, ebi emhin dia usun ikpea ne bunbun bhi egbe yẹ, bi ebi ele ghe emhin yẹ ele noo rẹ zẹ ebi ele ha lu. (Prov. 7:7; 29:11) Sẹyẹ, emhin kẹkẹ nan rẹman bhi itanẹt bi tẹlẹvisiọn dẹ sabọ rẹso uwedẹ nin uwẹ rẹ ria eria bi uwedẹ nin uwẹ rẹ lu emhin. Ọkpakinọn, be uwẹ ha rẹ sabọ ha ria eria nọnsẹn yẹ? Ọhẹnhẹn, ha luẹ ẹmhọn adia kẹkẹ ne ribhi Baibo, yẹ ha ria eria nyan ebezẹle nọn da khẹke nin uwẹ re obọ rẹkhan ele. Uwẹ ha lu iriọ fo, noo ene adia rẹ zẹ emhin ne da ti Jehova bhọ. (Tie Psalm 119:9.) Ahamiẹn uwẹ dọnmhegbe luẹ ebi a rẹ ria eria nọnsẹn yẹ, ọ dẹ manman rẹkpa uwẹ rẹ dọ kiẹn Kristiẹn nọn deziẹn bhi oga. (Prov. 2:11, 12; Heb. 5:14) Bha ji mhan fẹ ebi nan rẹ ha ria eria nọnsẹn ha rẹ rẹkpa uwẹ yẹ bhi ene idia eva nan: (1) uwedẹ nin uwẹ rẹ ne ibhio mhan nin ikhuo lu emhin bi (2) uwedẹ nin uwẹ rẹ muegbe.

6. Be nan rẹ ha ria eria nọnsẹn ha rẹ rẹkpa usẹn okpea rẹ ha mun ekpẹn nin ibhio mhan nin ikhuo yẹ?

⁶ Ahamiẹn uwẹ ria eria nọnsẹn, ọ dẹ sabọ rẹkpa uwẹ rẹ ha mun ekpẹn nin ikhuo. Ọ iyi emhin ọbe nin ẹmhọn obhio mhan nin okhuo rẹ ha ti usẹn okpea bhọ, yẹ ha guanọ nin ele ko ha yi imọẹ. Ọrẹyiriọ, usẹn okpea nọn ria eria nọnsẹn ida ta ọta, gbẹn ebe, la lu emhin ọbhebhe nọn ha re obhio mhan nin okhuo ha riale ghe ọle ho nin ọle zẹ ọle bhi ọshọ, ahamiẹn ọ iri ọle bhi ọkhọle rẹ re ọle bhi amhẹn. (1 Tim. 5:1, 2) Ahamiẹn ọle bi obhio mhan nin okhuo ko mhọn ikolu nin ele ye, ọle ida ka nin ọle bi ọle ọkpa rẹ ko ha ribhi ije fi ahiẹ a.—1 Cor. 6:18.

7. Ahamiẹn usẹn okpea ria eria nọnsẹn, be ọ ha rẹ rẹkpa ọle yẹ sade ọle zẹ unan ukpọn nin ọle ha yọ, bi eto nin ọle ha mun?

⁷ Uwedẹ ọbhebhe nin usẹn okpea ha rẹ rẹman ghe ọle ria eria nọnsẹn hi, sade ọle gbẹlokotọ bhi unan ikpọn nin ọle yọ bi eto nin ọle mun. Ẹbho ne lu unan ukpọn ne izẹwẹ mhẹn ne dagbare ẹlẹnan, bi ẹbho ne yọ ele, ẹbho ne imun ekpẹn nin Jehova, ne yẹ nyẹn iẹnlẹn esankan ele khin. Mhan wo daghe ọnan bhi ukpọn ne dia piẹn-piẹn-piẹn nin ele yọ, ukpọn nin okpea ha yọ, ọ re ọle diabe okhuo. Usẹn okpea nọn lu re alo da ha guanọ nin ọle zẹ ukpọn nin ọle ha yọ, ọle ki ji adia ne ribhi Baibo bi ijiẹmhin ọsi eria ne lu nọnsẹn bhi agbotu ha dia ọle. Ọle sabọ rẹ nọọn egbe ọle ene inọnta nan: ‘Ukpọn nin mẹn yọ be rẹman ghe mẹn ria eria nọnsẹn, sẹyẹ ọ be rẹman ghe mẹn mun ekpẹn nin ẹbho nekẹle? Uwedẹ nin mẹn rẹ muegbe be re ọle lẹkhẹ nin ẹbho rẹ rẹọbhọ ghe ọguọmhandia nọnsi Osẹnobulua mẹn khin?’ (1 Cor. 10:31-33; Titus 2:6) Ibhio mhan bhi agbotu dẹ wo ha mun ekpẹn nin usẹn okpea nọn ria eria nọnsẹn, sẹyẹ, Jehova dẹ wo ha re ẹlo esili ghe ọle.

8. Be usẹn okpea ha lu beji a ha da sabọ gbaẹkẹ ọle?

⁸ Ha yi ọria nan sabọ gbaẹkẹ ọle. Usẹn okpea da ha miẹnsọn nan mun nanlẹn nọnsẹn, ọle ki rẹman ghe, ọria nan ha sabọ gbaẹkẹ ọle ọle khin. (Luke 16:10) Bha ji mhan fẹ ijiẹmhin nọn gbale ọsi Jesu ghe. Ẹghe bha ha ribhọ nin ọle rẹ re iwẹnna nan mun nanlẹn ha khiẹn. Ọle da wo miẹnsọn rebhe nin Jehova mun nanlẹn, arẹmiẹn ọ bha lẹkhẹ nanlẹn rẹ lu iriọ ẹgheso. Ọle wo hoẹmhọn ẹbho, manman nọn edibo nesọle. Sẹyẹ, ọle da re iẹnlẹn nọnsọle rẹ zoẹse nin ele. (John 13:1) Bọsi Jesu, manman dọnmhegbe rẹ ha miẹnsọn nọn hi ki rẹ khin nan mun nin uwẹ. Ahamiẹn uwẹ bha lẹn ebi uwẹ ha rẹ lu ọle yẹ, degbere dọ guanọ urẹkpa bhi obọ ibhio mhan ne wanre. Hẹi ha re egbe nẹ nin ẹsọn. (Rom. 12:11) Ọkpakinọn, dọnmhegbe miẹnsọn nan mun nin uwẹ sotọ. Ha lu ọle “bọsi ghe Jehova [uwẹ] lu ọle nan, ọ iyi eria.” (Col. 3:23) Bhi ọsi ẹmhọanta, ọ bha gba nin uwẹ, bhiriọ ha mhọn idegbere, uwẹ ha yẹ miẹnkue sade uwẹ dobọ.—Prov. 11:2.

LUẸ EMHIN ESO NE KHẸKE

9. Bezẹle nọn da yi emhin nọn mhẹn nin usẹn ikpea rẹ luẹ emhin eso ne khẹke?

⁹ Nin uwẹ rẹ sabọ dọ kiẹn Kristiẹn nọn deziẹn bhi oga, ọkhẹke nin uwẹ luẹ emhin eso ne khẹke. Ọnan ki rẹkpa uwẹ rẹ sabọ miẹnsọn kẹkẹ nan ha mun nin uwẹ bhi agbotu. Ọnan ki re uwẹ miẹn iwẹnna nọn ha rẹkpa uwẹ rẹ ha gbẹloghe egbe, la azagba-uwa nọnsẹ, yẹ rẹ sabọ deba ẹbho ha mhọn ikolu nọn mhẹn. Mhan fẹ eso ghe bhi ene emhin ne khẹke nin uwẹ luẹ.

10-11. Be usẹn okpea bi ibhio mhan bhi agbotu ha rẹ sabọ miẹn elele bhọ yẹ sade ọle luẹ ebi a rẹ tie ebe, bi ebi a rẹ gbẹn ebe yẹ? (Psalm 1:1-3) (Yẹ fẹ ifoto ghe.)

¹⁰ Luẹ ebi a rẹ tie ebe, bi ebi a rẹ gbẹn ebe yẹ nọnsẹn. Baibo yọle ghe, emhin dẹ kiọnlẹn nin okpea nọn tie Ọta nọnsi Osẹnobulua ukpẹdẹ-ukpẹdẹ yẹ ria eria nyan ọlẹn. (Tie Psalm 1:1-3.) Okpea nọn sẹ inian ki dọ lẹn ebi Jehova rẹ ria eria yẹ. Ọnan ki rẹkpa ọle rẹ lẹn ebi ọle ha rẹ ha re obọ rẹkhan ebi ọle tie bhi Baibo. (Prov. 1:3, 4) Mhan wo guanọ ikpea ne sẹ inian bhi agbotu nọnsi Jehova. Bezẹle?

¹¹ Ibhio mhan bhi agbotu guanọ urẹkpa ọsi ikpea ne sabọ man emhin nọnsẹn, ne yẹ sabọ re Baibo re adia nin ọria. (Titus 1:9) Ahamiẹn uwẹ sabọ tie ebe, yẹ gbẹn ebe nọnsẹn, ọ dẹ rẹkpa uwẹ rẹ sabọ muegbe ọta, la muegbe ewanniẹn nọn ha sabọ re izebhudu nin ibhio mhan. Ọ dẹ yẹ rẹkpa uwẹ rẹ sabọ ha gbẹn emhin eso ọbhi otọ beji uwẹ rẹ luẹ emhin, kaehọ ọta bhi ikolo oga, la bhi usikoko nesẹmhan. Ene emhin nin uwẹ gbẹn ọbhi otọ dẹ yẹ sabọ rẹkpa uwẹ rẹ ha ziẹn urẹọbhọ nọnsẹ, yẹ rẹ re izebhudu nin ẹbho.

12. Be ha rẹkpa uwẹ rẹ sabọ guẹ ebi a rẹ ne ẹbho zilo yẹ nọnsẹn?

¹² Luẹ ebi a rẹ ne ẹbho zilo yẹ nọnsẹn. Ọkhẹke nin okpea nọn ga Osẹnobulua luẹ ebi a rẹ ne ẹbho zilo yẹ nọnsẹn. Ọnan rẹman ghe, ọle dẹ ha ka ẹbho ehọ, yẹ dọnmhegbe rẹ lẹn ebi ele ria bhi ọkhọle bi ebi emhin dia ele yẹ bhi egbe. (Prov. 20:5) Nin ọle rẹ sabọ lu ọnan, ọle ki gbẹlokotọ bhi uwedẹ nin ẹbho rẹ talọ bi ebi ele lu ẹlo bi egbe yẹ. Uwẹ ida sabọ lu ọnan sade uwẹ ideba ẹbho gbẹghe. Ahamiẹn ifoni uwẹ kẹ noo rẹ ne ẹbho zilo ẹghe rebhe, la ebe uwẹ gbẹn ji ele, ọnan sabọ re ọle ha nọghọ uwẹ rẹ ne ẹbho zilo ghe mẹn ghe uwẹ. Bhiriọ, gaunọ isẹhoa nin uwẹ rẹ ha ne ẹbho zilo, ọ iyi nin uwẹ rẹ ha noo ifoni ọkpa.—2 John 12.

13. Emhin ọbhebhe nela ọkhẹke nin usẹn okpea luẹ? (1 Timothy 5:8) (Yẹ fẹ ifoto ghe.)

¹³ Luẹ ebi uwẹ ha rẹ sabọ tobuwẹ ha gbẹloghe egbe yẹ. Ọkhẹke nin okpea nọn deziẹn bhi oga sabọ ha gbẹloghe egbe ọle bi azagba-uwa nọnsọle. (Tie 1 Timothy 5:8.) Bhi agbaẹbho eso, ene usẹn ikpea sabọ rẹ luẹ iwẹnna-obọ bhi obọ aba ele, la bhi obọ ọria bhi azagba-uwa nọnsele. Bhi agbaẹbho eso ebhebhe, usẹn okpea sabọ rẹ luẹ ebi a rẹ lu iwẹnna eso yẹ bhi isiku nin ọle yo. Ọnọn hi ki rẹ khin bhọ, ọkhẹke nin ene usẹn ikpea ha mhọn emhin nin ele guẹ nọn ha rẹkpa ele rẹ miẹn ebi ele ha rẹ ha gbẹloghe egbe. (Acts 18:2, 3; 20:34; Eph. 4:28) Ji ẹbho lẹn uwẹ ọbhi ọria nọn manman wẹnna kaka, bi ọria nọn ilu iwẹnna ukhiọnmhẹn. Ahamiẹn uwẹ lu iriọ, asabọmiẹn ọnan dẹ rẹkpa uwẹ rẹ miẹn iwẹnna. Ene ikpẹ bi emhin eso ne khẹke nin usẹn okpea luẹ nin mhan tẹmhọnlẹn bhi ọne uhọnmhọn-ọta nan, dẹ yẹ rẹkpa ọle rẹ miẹnsọn ne da zegbere bhi ẹghe odalo. Bha ji mhan zilo nyan eso bhi ene ẹsọn.

MUEGBE ỌBHI OTỌ KHẸ ẸSỌN NE HA ZEGBERE BHI ẸGHE ODALO

14. Be usẹn okpea ha lu rẹ muegbe ọbhi otọ, beji ọle ha da sabọ ha lu iwẹnna oga ọsi ẹghe rebhe?

¹⁴ Iwẹnna oga ọsi ẹghe rebhe. Egbe obhokhan ikpea ne bunbun ne deziẹn bhi oga rẹ munhẹn ha lu iwẹnna oga ọsi ẹghe rebhe. Iwẹnna ọkanẹfan rẹkpa usẹn okpea rẹ lẹn ebi ọle ha rẹ sabọ ha ne unan ẹbho kẹkẹ lu emhin yẹ. Ọ yẹ rẹkpa ọle rẹ fẹkẹ ha noo igho nin ọle mhọn, beji a ha da miẹn ọle bha dọ ha de emhin nin obọ ọle bha sẹ. (Phil. 4:11-13) Uwedẹ nọn mhẹn an nin ọria ha rẹ sabọ munhẹn ha lu iwẹnna oga ọsi ẹghe rebhe hi, nin ọle rẹ ka munhẹn ha lu iwẹnna ọkanẹfan ọsi ẹghe eso. Usẹn ikpea ne bunbun ka wo re ẹghe nọnsele rẹ lu iwẹnna ọkanẹfan ọsi ẹghe eso. Ọnan da rẹkpa ele rẹ munhẹn ha lu iwẹnna ọkanẹfan ọsi ẹghe rebhe. Iwẹnna ọkanẹfan ọsi ẹghe rebhe dẹ sabọ re ọne isẹhoa nin uwẹ rẹ deba ha lu iwẹnna oga ọsi ẹghe rebhe, bọsi nan rẹ ha ga bhi Bẹtẹ la ha rẹkpa bọn uwa oga nesẹmhan.

15-16. Be usẹn okpea ha lu beji ọle ha da sẹ ọria nan ha re ọbhi ihe ọsi ene zẹ sikẹ ene ewanlẹn la ọwanlẹn?

¹⁵ Ene zẹ sikẹ ene ewanlẹn la ọwanlẹn. Ọkhẹke nin ibhio mhan nin ikpea ha mhọn ọlẹn bhi emhanmhan nin ele rẹ lu re alo sẹ ọria nan ha sabọ re ọbhi ihe ọsi ọwanlẹn bhi agbotu. Baibo yọle ghe, okpea nọn zegbere nin ọle rẹ sabọ ha ga bhi ọne ihe nan, “iwẹnna esili ọle guanọ.” (1 Tim. 3:1) Ọkuẹsẹ ọria sabọ dọ ha ga bhi ihe ọsi ọwanlẹn, ọle dẹ ka ga bhi ihe ọsi ene zẹ sikẹ ene ewanlẹn. Ene zẹ sikẹ ene ewanlẹn wo rẹkpa ene ewanlẹn bhi uwedẹ kẹkẹ. Ene ewanlẹn bi ene zẹ sikẹ ele wo re iyobọ nin ibhio ele bhi agbotu, yẹ zegbere bhi iwẹnna itẹmhọn Osẹnobulua. A dẹ sabọ rẹ usẹn okpea nọn ribhi ikpe 17 rẹ sẹbhi 19 ọbhi ihe ọsi ene zẹ sikẹ ene ewanlẹn. A dẹ yẹ sabọ re obhio mhan nọn lu nọnsẹn bhi ihe ọsi ene zẹ sikẹ ene ewanlẹn kiẹn ọwanlẹn, aharẹmiẹn ikpe 20 ọle ye.

¹⁶ Be uwẹ ha lu nin uwẹ da sabọ sẹ ọria nọn da ha ga bhi ene ihe nan? Uwedẹ ọhan-ilo iribhọ nan rẹ lu ọle. Ọkpakinọn, Baibo tẹmhọn ikpẹ ne khẹke nin ọria ha mhọnlẹn. Sẹyẹ ọkhẹke nin ọne ọria hoẹmhọn Jehova, azagba-uwa nọnsọle, bi ibhio mhan bhi agbotu. (1 Tim. 3:1-13; Titus 1:6-9; 1 Pet. 5:2, 3) Dọnmhegbe lẹn otọ ọdeọde bhi ene ikpẹ nan, uwẹ ha yẹ bhii Jehova nin ọle rẹkpa uwẹ rẹ ha mhọn ele.c

17. Be usẹn okpea ha rẹ sabọ muegbe ọbhi otọ yẹ rẹ dọ kiẹn ọdọ bi ọdafẹn uwa? (Yẹ fẹ ifoto ghe.)

¹⁷ Ọdọ bi ọdafẹn uwa. Beji Jesu tale, ikpea eso ne deziẹn bhi oga sabọ rẹ zẹ ghe ele ida re okhuo. (Matt. 19:12) Ọkpakinọn, ahamiẹn uwẹ zẹ nin uwẹ rẹ re okhuo, uwẹ ki dọ ha miẹnsọn nọn khẹke ọdọ bi ọdafẹn uwa. (1 Cor. 11:3) Jehova guanọ nin ọdọ hoẹmhọn okhuo ọle, ha gbẹloghe ọle, ha yi ọmọẹ ọsaje rẹji ọle, yẹ ha rẹkpa ọle rẹ sabọ sikẹ Jehova. (Eph. 5:28, 29) Ene ikpẹ bi ene emhin eso ne khẹke nin uwẹ luẹ nin mhan ka tẹmhọnlẹn bhi ọne uhọnmhọn-ọta nan, dẹ rẹkpa uwẹ rẹ sabọ ha yi ọdọ esili. Eso bhi ene emhin nin mhan tẹmhọnlẹn hi, nin uwẹ rẹ luẹ ebi a rẹ ria eria nọnsẹn yẹ, ha mun ekpẹn nin ikhuo, bi nin uwẹ rẹ dọnmhegbe ha yi ọria nan sabọ gbaẹkẹ ọle. Ahamiẹn uwẹ luẹ ene emhin nan, ọ dẹ rẹkpa uwẹ rẹ miẹnsọn ọsi ọdọ bi ọsi ọdafẹn uwa sade ọne ẹghe sẹ.

18. Be usẹn okpea ha rẹ sabọ muegbe ọbhi otọ yẹ rẹ dọ kiẹn aba?

¹⁸ Aba. Uwẹ ha re okhuo fo, uwẹ sabọ rẹ dọ kiẹn aba ẹdọkpa. Be uwẹ ha sabọ miẹn luẹ bhi obọ Jehova rẹji nan rẹ ha yi aba nọn mhẹn? Emhin ne bunbun wo ribhọ nin uwẹ ha sabọ luẹ. (Eph. 6:4) Jehova wo tale dagbare man Ọmọn nọnsọle nin Jesu ghe, ọle hoẹmhọn ọlẹn, sẹyẹ, ọle re obọ bhi emhin nin ọle lu. (Matt. 3:17) Ahamiẹn uwẹ dọ kiẹn aba, dọnmhegbe ha taman imọn nesẹ ẹghe rebhe ghe, uwẹ hoẹmhọn ele. Ha gẹn ele bhi emhin nọn mhẹn nin ele lu. Aba nọn re egbe khọkhọ Jehova, dẹ sabọ rẹkpa imọn nesọle rẹ dọ kiẹn Kristiẹn ne deziẹn bhi oga. Uwẹ dẹ sabọ muegbe ọbhi otọ khẹ ọne ẹsọn nan, sade uwẹ re oyẹẹ nin ẹbho ne ribhi azagba-uwa nọnsẹ lu emhin bi bhi agbotu, bi sade uwẹ ji ele lẹn ghe uwẹ hoẹmhọn ele, sẹyẹ ẹmhọn ele ti uwẹ bhọ. (John 15:9) Ọnan dẹ sabọ rẹkpa uwẹ rẹ ha yi ọdọ bi aba nọn mhẹn bhi ẹghe odalo. Bhi ejayenan nian, uwẹ ki wo manman ghan bhi ẹlo nọnsi Jehova, yẹ ha yi udede urẹkpa rẹji azagba-uwa nọnsẹ bi agbotu.

BE UWẸ KI DA LU YẸ NIAN?

19-20. Be ha rẹkpa ene usẹn ikpea rẹ sabọ dọ kiẹn Kristiẹn ne deziẹn bhi oga? (Fẹ adudu nọn ribhi odalo ọle ghe.)

¹⁹ Ene usẹn ikpea, bha dẹ miẹnsọn bhọ nin bha rẹ sabọ dọ kiẹn Kristiẹn ne deziẹn bhi oga. Ọkhẹke nin bha zẹ ijiẹmhin esili nin bha ha re egbe khọkhọ, luẹ ebi a rẹ ria eria nọnsẹn yẹ, ha yi ọria nan sabọ gbaẹkẹ ọle, luẹ emhin eso ne khẹke, yẹ muegbe ọbhi otọ khẹ ẹsọn ne ha sabọ zegbere bhi ẹghe odalo.

²⁰ Egbe sabọ rẹ lọ uwẹ ẹgheso, sade uwẹ ria eria nyan ene ẹsọn kẹkẹ ne khẹ uwẹ bhi ẹghe odalo. Ọkpakinọn, uwẹ dẹ sabọ lu ọle. Yere ghe, Jehova wo muegbe nin ọle rẹ rẹkpa uwẹ. (Isa. 41:10, 13) Sẹyẹ, ibhio mhan nin ikpea bi ikhuo bhi agbotu muegbe nin ele rẹ rẹkpa uwẹ. Ẹghe nin uwẹ ha ki rẹ kiẹn okpea nin Osẹnobulua guanọ nin uwẹ ha khin, iẹnlẹn nọnsẹ ki wo mhẹn an. Mhan wo hoẹmhọn bha, ibha nin usẹn ikpea. Mhan bhii nin Jehova manman nan erọnmhọn nin bha beji bha rẹ dọnmhegbe rẹ kiẹn Kristiẹn ne manman deziẹn bhi oga.—Prov. 22:4.