Emhin Ne Ha Sabọ Re Erọnmhọn Nọnsẹmhan Manman Ha Mhẹn Ọbhọ

1. Be Jehova guanọ nin ene ga ọle lu? (Yẹ fẹ ifoto ghe.)

HỌLA mhan ha sabọ bu sade mhan guanọ ikoudure bi adia? Mhan lẹn ewanniẹn rẹji ọne inọnta nan. Mhan dẹ sabọ bu Jehova bhi erọnmhọn. Jehova guanọ nin mhan lu iriọ. Ọle ho nin mhan “ha nan erọnmhọn ẹghe rebhe.” (1 Thess. 5:17) Mhan dẹ sabọ bu Jehova bhi erọnmhọn yẹ bhii ọle nin ọle re adia nin mhan ne ha sabọ rẹkpa mhan bhi emhin rebhe nin mhan lu bhi iẹnlẹn. (Prov. 3:5, 6) Ranmhude Osẹ nọn isiakhan Jehova khin, ọle bha re ẹghe ọbhọ, la eka igba nin mhan ha sabọ nan erọnmhọn ji ọle.

2. Be imhan ha zilo nyan bhi ọne uhọnmhọn-ọta nan?

² Isẹhoa nin Jehova re nin mhan rẹ ha nan erọnmhọn ji ọle manman wo ti mhan bhọ. Ọkpakinọn ranmhude emhin ne bunbun nin mhan mhọn bhi obọ, ọ sabọ rẹ ha nọghọ mhan rẹ miẹn ẹghe rẹ ha nan erọnmhọn. Mhan sabọ yẹ rẹ ha guanọ nin erọnmhọn nọnsẹmhan manman ha deọbhọ gbera ọnikhẹ. Ọ ti mhan bhọ ghe mhan dẹ sabọ miẹn izebhudu bi adia ne ha rẹkpa mhan bhi Baibo. Bhi ọne uhọnmhọn-ọta nan, mhan dẹ zilo nyan ebi mhan ha sabọ miẹn luẹ bhi obọ Jesu rẹji ebi mhan ha rẹ ha re ẹghe ọbhi otọ yẹ rẹ nan erọnmhọn. Sẹyẹ, mhan dẹ zilo nyan emhin isẹn kpataki nin mhan ha sabọ ne ba erọnmhọn nọnsẹmhan beji ọ ha da manman ha mhẹn ọbhọ.

JESU RE ẸGHE ỌBHI OTỌ RẸ HA NAN ERỌNMHỌN

3. Be Jesu lẹn rẹji erọnmhọn?

³ Jesu lẹnmhin ghe erọnmhọn manman lu uhọnmhọn emhin rẹji Jehova. Ọkuẹsẹ ọle vae bhi ọne otọ nan, ọle daghe uwedẹ nin Aba ọle rẹ re ewanniẹn ọbhi erọnmhọn ọsi ikpea bi ikhuo ne ga ọle. Bhi ọsi ijiẹmhin, eji Aba ọle ye ọle ha ye ẹghe nin Aba ọle rẹ re ewanniẹn ọbhi erọnmhọn ọsi Hana, Devid, Ẹlaija, bi ọsi ẹbho ebhebhe ne ga ọle. (1 Sam. 1:10, 11, 20; 1 Ki. 19:4-6; Ps. 32:5) Ọnan zẹle nin Jesu da taman edibo nesọle nin ele ha bhii ẹghe rebhe, yẹ ha mhọn ọne izebhudu ghe, Jehova dẹ ka ele ehọ!—Matt. 7:7-11.

4. Be imhan miẹn luẹ bhi uwedẹ nin Jesu rẹ ha nan erọnmhọn?

⁴ Jesu da re uwedẹ nin ọle rẹ nan erọnmhọn rẹ re ijiẹmhin ọbhi otọ nin edibo nesọle. Ọle wo nan erọnmhọn ji Jehova igba ne bunbun ẹghe nin ọle rẹ ha lu iwẹnna oga bhi ọne otọ nan. Ranmhude Jesu wo ha mhọn emhin ne bunbun nin ọle ha lu bhi obọ, sẹyẹ ẹbho ne bunbun yẹ wo ha bu ọle re, ọle da mhanmhan ẹghe nin ọle ha rẹ ha nan erọnmhọn. (Mark 6:31, 45, 46) Ọle da riọkpanọ ọsewewiẹ bhibhi beji ọle ha da miẹn ẹghe rẹ ha ribhi ọsọle nin ọle rẹ nan erọnmhọn. (Mark 1:35) Ẹghe ọkpa ribhọ nin Jesu rẹ re asọn rebhe rẹ nan erọnmhọn beji ọle ha ho nin ọle zẹ emhin kpataki nin ọle ho nin ọle lu. (Luke 6:12, 13) Ọne ukpasọn ọkuẹsẹ Jesu yu, ọle da manman nan erọnmhọn igba ne bunbun ranmhude ọle lẹnmhin ghe, ọne ọkakale nin ọle ki da kuẹlo da ida lẹkhẹ hiehie.—Matt. 26:39, 42, 44.

5. Be imhan ha rẹ sabọ re egbe khọkhọ Jesu yẹ?

⁵ Ijiẹmhin ọsi Jesu man mhan le ghe, aharẹmiẹn mhan mhọn emhin ne bunbun nin mhan lu bhi obọ, ọkhẹke nin mhan re ẹghe ọbhi otọ rẹ ha nan erọnmhọn. Bọsi Jesu, mhan sabọ rẹ mhanmhan ẹghe nin mhan ha rẹ ha nan erọnmhọn—ọ sabọ rẹ ha yi nin mhan rẹ riọ re ọsewewiẹ nan erọnmhọn, la lu ọle ọsemuan. Mhan da ha lu iriọ, mhan ki rẹman Jehova ghe ọne isẹhoa nin ọle re nin mhan rẹ ha nan erọnmhọn ji ọle ti mhan bhọ. Obhio mhan nin okhuo natiọle Lynne yẹ wo yere ebi ọ dia ọle bhi egbe yẹ ẹghe ọhẹnhẹn nin ọle rẹ lẹn ghe mhan dẹ sabọ ha nan erọnmhọn ji Jehova. Ọle da yọle, “Ẹghe nin mẹn rẹ lẹn kere ghe mẹn dẹ sabọ ha nan erọnmhọn ji Jehova bhi ẹghe nọn hi ki rẹ khin, ọ da rẹkpa mẹn rẹ ha ghe ọle bii ọmọẹ nin mẹn ha sabọ sikẹ, yẹ re mẹn ha guanọ nin mẹn lu emhin ne ha re erọnmhọn nesẹmhẹn manman ha deọbhọ.” Asabọmiẹn inian emhin yẹ dia ene bunbun bhi egbe beji ọ dia ọne obhio mhan le. Bhiriọ, bha ji mhan zilo nyan emhin isẹn kpataki nin mhan ha sabọ ne ba erọnmhọn nesẹmhan.

EMHIN ISẸN KPATAKI NIN MHAN HA SABỌ NE BA ERỌNMHỌN NỌNSẸMHAN

6. Beji Revelation 4:10, 11 rẹman, emhin nela khẹke Jehova?

⁶ Ha gẹn Jehova. Bhi imian-ilo nin Jọni nin odibo miẹn, ọle da daghe ewanlẹn 24 bhi okhun ga Jehova. Ele da ha gẹn Osẹnobulua yẹ yọle ghe, ọle hi ọnọn khẹke nọn miẹn “ọne uyi, ọghọ bi ahu.” (Tie Revelation 4:10, 11.) Ẹhi nesi Jehova bhi okhun yẹ wo mhọn emhin ne bunbun nọn ha re ele ha gẹn Jehova, yẹ mun ekpẹn nanlẹn. Ene ẹhi nan deba Jehova ribhi okhun, sẹyẹ, ele manman lẹn ọlẹn nọnsẹn. Ele daghe ikpẹ nesọle bhi emhin nin ọle lu. Beji ele ha rẹ ha daghe uwedẹ nin Jehova rẹ lu emhin, ele ki ha gẹn ọlẹn.—Job 38:4-7.

7. Emhin nela mhan ha sabọ gẹn Jehova nan?

⁷ Ọ yẹ wo khẹke nin mhan ha gẹn Jehova bhi erọnmhọn yẹ taman ọlẹn emhin nin mhan hoẹmhọnlẹn bhi egbe ọle, bi emhin nin ọle lu ne manman ti mhan bhọ. Ahamiẹn uwẹ tie Baibo, dọnmhegbe gbẹlokotọ bhi ikpẹ nesi Jehova ne manman ti uwẹ bhọ bhi eji uwẹ tie. (Job 37:23; Rom. 11:33) Ha taman Jehova ebi ene ikpẹ nesọle dia uwẹ bhi egbe yẹ. Mhan sabọ yẹ rẹ khuẹnmhẹn ọlẹn bhi emhin nin ọle lu nin mhan, bi emhin nin ọle lu nin ibhio mhan nin mhan ko ga. Ẹghe rebhe ọle rẹ gbẹloghe mhan yẹ gbega mhan.—1 Sam. 1:27; 2:1, 2.

8. Emhin eso nela mhan ha khuẹnmhẹn Jehova nan? (1 Thessalonians 5:18)

⁸ Ha khuẹnmhẹn Jehova. Emhin ne bunbun ribhọ ne ha re mhan ha khuẹnmhẹn Jehova bhi erọnmhọn. (Tie 1 Thessalonians 5:18.) Mhan sabọ rẹ khuẹnmhẹn ọlẹn bhi emhin esili nọn hi ki rẹ khin nin mhan mhọn; bhi ọsi ẹmhọanta, emhin ne mhẹn rebhe, obọ ọle ele na vae. (Jas. 1:17) Bhi ọsi ijiẹmhin, mhan sabọ rẹ khuẹnmhẹn ọlẹn bhi emhin kikẹ ne ribhi ọne otọ nan ne re ọle mhọn-ose a, bi ene emhin ọhan-ilo kẹkẹ nin ọle man. Mhan sabọ yẹ rẹ khuẹnmhẹn ọlẹn bhi iẹnlẹn nin ọle re nin mhan, azagba-uwa nin ọle re nin mhan, imọẹ mhan, bi ikhuaẹloghe nin ọle re nin mhan. Mhan yẹ ho nin mhan khuẹnmhẹn Jehova bhi ọne isẹhoa nin ọle re nin mhan rẹ deba ọle ha mhọn ikolu.

9. Bezẹle nọn da khẹke nin mhan dọnmhegbe ha khuẹnmhẹn Jehova bhi emhin nin ọle lu nin mhan?

⁹ Ọ dẹ ha mhẹn sade mhan dọnmhegbe rẹ ha ria eria nyan emhin esili kẹkẹ nin Jehova lu nin mhan yẹ ha khuẹnmhẹn ọlẹn bhi erọnmhọn. Agbọn nin ẹbho ida mhọn unun ekhuẹnmhẹn mhan da nyẹnlẹn. Ebi eria ha rẹ sabọ ha mhọn ebi ele guanọ yẹ, ọle ọkpa emhin nọn manman rẹtẹ ele; ele bhọ izẹwẹ rẹman ghe emhin nin ele mhọn ti ele bhọ. Ahamiẹn mhan ji uwedẹ nọn sẹnian da rẹso mhan, ẹmhọn emhin nin mhan guanọ ọkpa mhan da wo ha nan bhi erọnmhọn. Nin mhan da sabọ rẹban ọkhọle nọn sẹnian, ọkhẹke nin mhan dọnmhegbe ha mhọn unun ekhuẹnmhẹn, yẹ wo ha rẹman Jehova ghe emhin nin ọle lu nin mhan ti mhan bhọ.—Luke 6:45.

10. Be unun ekhuẹnmhẹn nin obhio mhan nin okhuo ha mhọnlẹn rẹ rẹkpa ọle rẹ sabọ ziẹngbe ọkakale yẹ? (Yẹ fẹ ifoto ghe.)

¹⁰ Ahamiẹn mhan mhọn unun ekhuẹnmhẹn, ọ dẹ rẹkpa mhan rẹ sabọ ziẹngbe ọkakale. Bha ji mhan fẹ okha ọsi obhio mhan nin Kyung-sook ghe, nan tẹmhọnlẹn bhi Watchtower ọsi Jẹnuare 15, 2015. Ọne obhio mhan nan da ha khọnmhọn emianmhẹn kansa nọn manman kaka. Ọle da yọle: “Ọne emianmhẹn nan da wo re egbe lọ mẹn. Ọ da dia mẹn ghe emhin rebhe yulu mẹn, sẹyẹ, ofẹn da wo manman ha mun mẹn.” Be rẹkpa ọle rẹ ziẹngbe? Ọle da yọle ghe, ukpẹdẹ-ukpẹdẹ ọkuẹse ọle dọ nowẹ ọsasọn, ọle ki nan erọnmhọn rẹ khuẹnmhẹn Jehova bhi emhin isẹn nin ọle lu nanlẹn bhi ọne ukpẹdẹ nin ne manman ti ọle bhọ. Ọnan da rẹkpa ọle rẹ de ọkhọle re, yẹ rẹkpa ọle rẹ taman Jehova ghe ọle manman hoẹmhọn ọlẹn. Ọle da dọ tobọle daghe ebi Jehova rẹ rẹkpa eguọmhandia nesọle yẹ sade ele kuẹlo da ọkakale. Ọle da yẹ dọ kere ghe emhin esili kẹkẹ nin mhan miẹn bhi iẹnlẹn bhọ bun nẹ ọkakale nin mhan kuẹlo da. Bọsi obhio mhan nin Kyung-sook, aharẹmiẹn ẹkẹ ọkakale mhan ye, mhan yẹ wo mhọn emhin ne bunbun nin mhan ha sabọ khuẹnmhẹn Jehova nan. Mhan da ha khuẹnmhẹn Jehova bhi erọnmhọn, ọ dẹ rẹkpa mhan rẹ sabọ ziẹngbe ọkakale yẹ ha ghọnghọn.

11. Bezẹle nọn da khẹke nin edibo nesi Jesu ha mhọn izebhudu beji Jesu kpanọ ha khian okhun fo?

¹¹ Bhii Jehova nin ọle re izebhudu nin uwẹ sade uwẹ ribhi inẹbho. Ọkuẹsẹ Jesu kpanọ ha khian okhun, ọle da ye edibo nesọle re iwẹnna nin ọle mun nin ele, nin ele rẹ tẹmhọn ọlẹn “bhi Jerusalẹm, bhi Judia rebhe bi Sameria, rẹ sẹbhi eje ree nẹ bhi ọne otọ nan.” (Acts 1:8; Luke 24:46-48) Ọ bha ree gbe, ene mun ọkalo bhi oga ọsi ibhokhan Ju da mun Pita bi Jọni nin odibo re bhi Sanhẹdrin. Ele da yọle ghe nin ele zobọ bhọ rẹ ha tẹmhọn Osẹnobulua, ele bhọ da yẹ ha gbe ofẹn ele bhi ẹkẹ. (Acts 4:18, 21) Be Pita bi Jọni ki lu yẹ?

12. Beji Acts 4:29, 31 rẹman, be ene edibo lu?

¹² Pita bi Jọni da taman ene ẹbho ne mun ọkalo bhi oga ọsi ibhokhan Ju yọle: “Sade emhin nọn mhẹn nọn bhi ẹlo nọnsẹbha nin mhan rẹ ka ibha ehọ, yẹ mhọn akan-ehọ da Osẹnobulua, bha tobọbha bhohiẹn ọlẹn. Sokpan, bhi ọsẹmhan, mhan ida sabọ miẹn ghe mhan bha yẹ tẹmhọn emhin nin ẹlo mhan miẹn bi emhin nin mhan họn.” (Acts 4:19, 20) Ẹghe nan ki rẹ fan Pita bi Jọni fia, ele da nan erọnmhọn ji Jehova rẹ taman ọlẹn ghe nin ọle rẹkpa ele rẹ ha lu iho nọnsọle. Ele da bhii yọle: “Re ahu nin eguọmhandia nesẹ rẹ ha re izebhudu tẹmhọn nọnsẹ.” Jehova wo wanniẹn erọnmhọn nọnsele.—Tie Acts 4:29, 31.

13. Be imhan miẹn luẹ bhi ijiẹmhin ọsi Jin-hyuk?

¹³ Mhan dẹ sabọ re egbe khọkhọ ene edibo sade mhan bha zobọ bhọ rẹ ha tẹmhọn Osẹnobulua aharẹmiẹn ene gbẹloghe yọle nin mhan lu iriọ. Bha ji mhan fẹ ijiẹmhin ọsi obhio mhan nin Jin-hyuk ghe, nan mun khue ranmhude ọle bha ka deba eyokhọnlẹn. Beji ọle ha ribhi ighan, a da yọle nin ọle ha muno ebale bi emhin ebhebhe ji onighan eso nan muno ọbhi ighan nan da manman re oya nin ẹbho. Ọkpakinọn, ele da yọle ghe emhin nọn rẹtẹ ọne iwẹnna ọkpa ọle ha nin ele ha zilo ọle, ghe nin ọle hẹi nin ele zilo ẹmhọn Baibo. Ọle da bhii Jehova nin ọle re izebhudu nanlẹn yẹ re ẹwanlẹn nanlẹn re sabọ tẹmhọn ọlẹn sade idia zegbere nin ọle ha da lu iriọ. (Acts 5:29) Ọle da yọle: “Jehova da wanniẹn erọnmhọn nọnsẹmhẹn. Ọle da re izebhudu bi ẹwanlẹn nin mẹn rẹ sabọ re ebe sẹbhi ihuẹnlo isẹn rẹ ha man ene bunbun Baibo bhi unuro ọsi ene ighan. Bhi ọsasọn, mẹn ki gbẹn ilẹta nin mẹn ha ne nin ene onighan sade ẹdẹ we.” Mhan dẹ yẹ sabọ ha mhọn ọne izebhudu ghe Jehova dẹ rẹkpa mhan rẹ lu iwẹnna nin ọle mun nin mhan. Bọsi Jin-hyuk, mhan dẹ sabọ bhii Jehova nin ọle re izebhudu bi ẹwanlẹn nin mhan.

14. Be ha sabọ rẹkpa mhan sade mhan kuẹlo da ọnọghọ? (Psalm 37:3, 5)

¹⁴ Bhii Jehova nin ọle rẹkpa uwẹ rẹ sabọ ziẹngbe ọnọghọ. Ene bunbun bhi ẹwẹ mhan wo mhọn emianmhẹn nin ele ne daan, la mhan sabọ rẹ ha mhọn emhin ebhebhe ne kpokpo mhan bhi ọkhọle. Ọria nin mhan hoẹmhọnlẹn sabọ rẹ yu, mhan sabọ rẹ ha mhọn ọnọghọ bhi azagba-uwa nọnsẹmhan, a sabọ rẹ ha kpokpo mhan, la kuẹlo da ọkakale ebhebhe. Emianmhẹn kẹkẹ ne zegbere bi okhọnlẹn sabọ rẹ kie re ene ọnọghọ nan manman ha nyọn mhan bhi egbe. Taman Jehova ebi emhin dia uwẹ yẹ bhi egbe tee. Tẹmhọn idia nin uwẹ ye man ọlẹn beji uwẹ ha rẹ taman ọmọẹ ẹ nọn manman sikẹ uwẹ. Ha mhọnlẹn bhi ọkhọle ghe Jehova dẹ “rẹkpa uwẹ.”—Tie Psalm 37:3, 5.

15. Be erọnmhọn rẹ rẹkpa mhan yẹ rẹ sabọ “ziẹngbe edọnmhẹn”? Re ijiẹmhin ọbhọ.

¹⁵ Mhan da ha nan erọnmhọn ẹghe rebhe, ọ dẹ rẹkpa mhan rẹ “ziẹngbe edọnmhẹn.” (Rom. 12:12) Jehova lẹn emhin nin ene ga ọle kuẹlo da—ọle “họn usomhin nọnsele.” (Ps. 145:18, 19) Obhio mhan nin Kristie nọn ribhi ikpe 29, nọn yẹ lu iwẹnna ọkanẹfan dọ kere ghe ẹmhọanta ọnan wo khin. Ọle da wo re osukpa munhẹn ha khọnmhọn emianmhẹn nọn manman kaka. Ranmhude ọnan, egbe iẹnlẹn da wo manman lọ ọle. Akizẹbue, olẹ da dọ lẹn kere ghe inẹn ọlẹn khọnmhọn emianmhẹn nọn manman kaka nọn ha sabọ gbe ọle. Kristie da yọle: “Mẹn da manman bhii Jehova nin ọle re ahu nọn khẹke nin mẹn rẹ sabọ ha ziẹngbe ukpẹdẹ-ukpẹdẹ. Mẹn da dọnmhẹngbe rẹ re obọ rẹkhan emhanmhan nin mẹn rẹ lu iwẹnna oga, bọsi nin mẹn rẹ ha yo ikolo oga yẹ lu iluẹmhin Baibo nọnsẹmhẹn.” Ọle da yẹ yọle: “Erọnmhọn ebe rẹkpa mẹn rẹ sabọ ziẹngbe ene ọnọghọ nan. Mẹn lẹn sẹ ghe Jehova ida zẹ mẹn obọ ghẹdẹ, ọnan da wo rẹkpa mẹn rẹ de ọkhọle re. Arẹmiẹn emianmhẹn nin mẹn ha khọnmhọn bha wo re osukpa fo, Jehova da wanniẹn erọnmhọn nọnsẹmhẹn, ọle da rẹkpa mẹn rẹ ha mhọn ọfure bi ọkhọle nọn lọre.” Mhan hẹi yelea ghe “Jehova lẹn ebi ọle ha rẹ hinmhin ẹbho ne re ẹkẹ-ata ha ga ọle sibhi ẹkẹ edọnmhẹn re yẹ.”—2 Pet. 2:9.

16. Bezẹle nin mhan da guanọ urẹkpa nọnsi Jehova?

¹⁶ Bhii Jehova nin ọle rẹkpa uwẹ rẹ sabọ re egbe nẹ bhi edọnmhẹn. Ranmhude ọ bha gba nin mhan, ọkhẹke nin mhan wo ha khọn ọne ọkhọle nan rẹ lu emhin nọn bha gba. Esu wo ha dọnmhegbe nin ọle rẹ lu emhin ne ha re ọle nọghọ mhan rẹ khọn edọnmhẹn. Emhin ọkpa nin ọle noo nin ọle rẹ riia mhan ọkhọle a hi, ire-egbe re ahoho ne bha gba. Ire-egbe re ahoho ne sẹnian dẹ sabọ re imhan ha ria ẹmhọn emhin ne sankan an—iria eria ne sẹnian dẹ sabọ rẹ mhan kiẹn ẹbho ne bha khia bhi ẹlo nọnsi Jehova, yẹ rẹ mhan lu emhin ebe ne kaka.—Mark 7:21-23; Jas. 1:14, 15.

17. Be ọkhẹke nin mhan lu beji mhan bhii Jehova nin ọle rẹkpa mhan rẹ sabọ nẹ bhi edọnmhẹn? (Yẹ fẹ ifoto ghe.)

¹⁷ Mhan guanọ urẹkpa nọnsi Jehova nin mhan da sabọ khọn edọnmhẹn nin mhan rẹ lu emhin nọn bha gba. Jesu da ta ene ẹmhọn nan bhi erọnmhọn nin ọle man edibo nesọle le. Ọle da yọle: “Hẹi mun mhan fiọ bhi edọnmhẹn, ọkpakinọn, hinmhin mhan bhi obọ ọsi ọne ọria ọbe.” (Matt. 6:13) Jehova muegbe nin ọle rẹ rẹkpa mhan, ọkpakinọn, ọkhẹke nin mhan bhii ọle nin ọle rẹkpa mhan. Ọ sẹyẹ khẹke nin mhan lu rẹkhan erọnmhọn nọnsẹmhan. Ọkhẹke nin mhan dọnmhegbe rẹ rẹban uwedẹ nọn bha gba nin ẹbho bhi ọne agbọn nan rẹ ria eria, bi uwedẹ nin ele rẹ lu emhin. (Ps. 97:10) Ọkhẹke nin mhan ha tie Baibo, beji mhan ha da ha mhọn emhin esili bhi ọkhọle nin mhan ha ria eria nyan. Mhan da ha yo ikolo oga ẹghe rebhe yẹ dagbare bhi inẹbho, ọ dẹ yẹ rẹkpa mhan rẹ sabọ gbega iria-eria nọnsẹmhan. Jehova ve ghe, ọle ida ji mhan miẹn ọkakale nin mhan ida sabọ ziẹngbe ọle.—1 Cor. 10:12, 13.

18. Bhi ẹmhọn erọnmhọn, be ọkhẹke nin mhan rebhe ha lu?

¹⁸ Ọkhẹke nin ọdeọde bhi ẹwẹ mhan manman ha nan erọnmhọn ji Jehova gbera ọnikhẹ, beji mhan ha da sabọ sun rẹkhan ọlẹn bhi ọne ẹghe ọkike nan nin emhin bha da lẹkhẹ. Ha mhọn ẹghe nin uwẹ ha rẹ ha nan erọnmhọn ji Jehova ukpẹdẹ-ukpẹdẹ. Jehova guanọ nin mhan ‘taan ọkhọle a man ọlẹn’ bhi erọnmhọn. (Ps. 62:8) Ha re ogẹn ji Jehova yẹ khuẹnmhẹn ọlẹn bhi emhin rebhe nin ọle lu. Taman ọlẹn nin ọle re izebhudu nin uwẹ rẹ sabọ ha tẹmhọn ọlẹn. Bhii ọle nin ọle rẹkpa uwẹ rẹ sabọ ziẹngbe ọkakale nin ọ hi ki rẹ khin nin uwẹ ye nian. Yẹ bhii ọle nin ọle rẹkpa uwẹ rẹ sabọ ziẹngbe edọnmhẹn nọn hi ki rẹ khin nin uwẹ kuẹlo da. Hẹi ji emhin soso la ọria soso re uwẹ zobọ bhọ rẹ ha nan erọnmhọn ji Jehova ẹghe rebhe. Ọkpakinọn, be Jehova rẹ wanniẹn erọnmhọn nọnsẹmhan yẹ? Mhan dẹ zilo nyan ọne inọnta kpataki nan bhi uhọnmhọn-ọta nọn ki sẹ ọle bhi egbe.