Ebi Jehova Rẹ Ji Mhan Lẹn Yẹ Ghe Ọle Dẹ Re Ọne Otọ Nan Kiẹn Otọ Ọfubhegbe

1. Be bhọ uhọnmhunje nin Ẹzaya nin akhasẹ wewe man ibhokhan Izrẹl?

ẸZAYA nin akhasẹ da yọle ghe “Osẹnobulua ọsi ẹmhọanta” Jehova khin. Ọne ukpọta nan zedu ọle diọbhi “ẹmhọanta” mundia nin “isẹ.” (Isa. 65:16) Ebi a re “isẹ” ta hi, nin emhin rebhe nan tale sunu beji a rẹ tale tee. Ahamiẹn a noo “isẹ” bhi Baibo rẹ tẹmhọn Jehova la Jesu, ọ rẹman ghe emhin nan tẹmhọnlẹn ẹmhọanta wo nọn. Bhiriọ, ebi Ẹzaya ha taman ene ibhokhan Izrẹl hi, emhin nọn hi ki rẹ khin nin Jehova tale dẹ gene munsẹ. Jehova rẹman ghe ẹmhọanta ọnan gene khin beji ọle rẹ ha mun ive nesọle sẹ.

2. Bezẹle nin mhan ha da sabọ mun udu nyan ene ive nin Jehova ve rẹji ẹghe odalo nọnsẹmhan? Inọnta nela mhan ha zilo nyan bhi ọne uhọnmhọn-ọta nan?

² Mhan dẹ sabọ ha mhọn izebhudu nọn sẹ nian da ive nin Jehova ve rẹji ẹghe odalo? Beji ọ ha bu ikpe 800 nin Ẹzaya nin akhasẹ yu, Pọl nin odibo da ta emhin nọn re mhan rẹọbhọ ghe, Osẹnobulua dẹ wo mun ive nesọle sẹ. Ọle da yọle: “Osẹnobulua ida sabọ bha ohoghe.” (Heb. 6:18) Beji amẹn nan wọn bi amẹn nan iwọn irẹ sabọ na bhi ijian ọkpa dagbare, iriọ a irẹ miẹn ohoghe bhi unun ọsi Jehova nin Osẹnobulua ọsi ẹmhọanta. Bhiriọ, mhan dẹ sabọ mun udu nyan emhin rebhe nin Jehova tale, rẹ dọ sẹbhi ene ive nin ọle vele rẹji ẹghe odalo nọnsẹmhan. Bhi ọne uhọnmhọn-ọta nan, mhan dẹ zilo nyan ene inọnta nan: Be Jehova ve ghe ọle dẹ lu nin mhan bhi ẹghe odalo? Be Jehova rẹ rẹkpa mhan rẹ lẹn yẹ ghe ene ive dẹ gene munsẹ?

IVE NELA JEHOVA VE NIN MHAN?

3. (a) Ive nela manman ti eguọmhandia nesi Osẹnobulua bhọ? (Revelation 21:​3, 4) (b) Be ẹbho eso tayẹ sade mhan tẹmhọn ọne ive man ele?

³ Ive nin Jehova ve nọn manman ti eguọmhandia nesọle bhọ mhan da zilo nyan nian. (Tie Revelation 21:​3, 4.) Jehova ve ghe, ẹghe vade nan ha rẹ miẹn “uu iyẹ da ha ribhọ, ọbalọ iyẹ da ha ribhọ, a iyẹ da ha lu akhiẹ, a iyẹ da ha họn ukpurulu eviẹ.” Ene bunbun bhi ẹwẹ mhan noo ọne Baibo nan nọn tẹmhọn ebi Agbọn Ọfubhegbe ha diayẹ sade ele tẹmhọn Osẹnobulua man ẹbho. Be ẹbho eso tayẹ sade mhan tẹmhọn ọne ive nan man ele? Eso ki yọle, “Ọne ive wo mhẹn bhi ehọ a, sokpan mẹn bha rẹọbhọ ghe ọ dẹ sunu.”

4. (a) Be Jehova lẹn ọ dẹ sunu bhi ẹghe nọnsẹmhan beji ọle ve ive ọsi agbọn ọsọgbọn? (b) Gbera ene ive nin Jehova ve, emhin ọbhebhe nela ọle lu?

⁴ Ẹghe nin Jehova rẹ noo ẹlinmhin nọn khiale rẹ rẹkpa Jọni nin odibo rẹ gbẹn ẹmhọn ive ọsi agbọn ọsọgbọn ọbhi otọ, ọle lẹnmhin ghe mhan dẹ tẹmhọn ele man ẹbho sade mhan tẹmhọn Agbejele. Jehova yẹ lẹn ghe ọ dẹ nọghọ ẹbho ne bunbun rẹ rẹọbhọ ghe, ene ufidenọ nan dẹ gene sunu bhi ẹghe odalo. (Isa. 42:9; 60:2; 2 Cor. 4:​3, 4) Bhiriọ, be imhan ha rẹ sabọ rẹkpa ẹbho rẹ rẹọbhọ ghe, ene ive nan tẹmhọnlẹn bhi ebe ọsi Revelation 21:​3, 4 dẹ gene munsẹ? Sẹyẹ, be imhan ha rẹ sabọ ziẹn urẹọbhọ nin mhan mhọn da Jehova bi ive nesọle yẹ? Ọ iyi ene ive nan ne mhẹn bhi ehọ ọkpa Jehova ve, ọle yẹ zẹ emhin kẹkẹ egbe dagbare ne ha rẹkpa mhan rẹ mun udu nyan ene ive. Be bhọ hi ene emhin?

JEHOVA JI MHAN LẸN GHE ỌLE DẸ MUN IVE NIN ỌLE VE SẸ

5. Emhin nela ha rẹkpa mhan rẹ mun udu nyan ive ọsi agbọn ọsọgbọn nin Osẹnobulua vele? Ijela mhan ha da miẹn ele?

⁵ Emhin ne ha sabọ rẹkpa mhan rẹ mun udu nyan ive ọsi agbọn ọsọgbọn nin Jehova vele ribhi ulọnlẹn ne rẹkhan ọne ulọnlẹn nin ọle da ve ọne ive. Bhi enin mhan da tie yọle: “Ọnọn dotua bhi uke okhun ọne ojukhuo da yọle: ‘Ghọle! Mẹn re emhin rebhe kiẹn ọsọgbọn.’ Ọle da yẹ yọle: ‘Gbẹn ọnan bhi otọ, ranmhude, ẹmhọanta nọn.’ Ọle da taman imẹn yọle: ‘Ene emhin nan munsẹ! Imẹn hi ọne Afa bi ọne Omẹga. Imẹn hi umunhẹn bi ọkpẹnlẹn.’”—Rev. 21:​5, 6a.

6. Bezẹle nin ẹmhọn ne ribhi Revelation 21:​5, 6 da ziẹn urẹọbhọ nin mhan mhọn da ive nọnsi Osẹnobulua?

⁶ Bezẹle nin ọne Baibo nan ha da sabọ ziẹn urẹọbhọ nin mhan mhọn da ive nọnsi Osẹnobulua? Mhan dẹ sabọ re ebi Jehova tale bhi ene ulọnlẹn nan rẹ khọkhọ uwedẹ nin ọria rẹ re obọ bhi ebe, nin ọle rẹ rẹman ghe ọle dẹ mun ebi ọle ta sẹ. Ene ive nin Osẹnobulua ve ribhi Revelation 21:​3, 4. Ọkpakinọn, beji ulọnlẹn nọnzi 5 bi ọnọnzi 6 rẹman, inian ọ diabe Jehova re obọ ọbhi ive nin ọle ve, nin ọle rẹ rẹman ghe, ọle dẹ mun ele sẹ. Bha ji mhan fẹ ebi Jehova rẹ rẹman yẹ ghe, mhan dẹ sabọ mun udu nyan ọlẹn.

7. Họla munhẹn ha talọ bhi Revelation 21:5? Bezẹle nin ọnan da manman lu uhọnmhọn emhin?

⁷ Inian ulọnlẹn nọnzi 5 rẹ munhẹn: “Ọnọn dotua bhi uke okhun ọne ojukhuo da yọle.” (Rev. 21:5a) Ene ọta nan wo manman lu uhọnmhọn emhin, ranmhude ọnan hi ẹghe ọhẹnhẹn bhi ene igba ea nin Jehova tobọle talọ bhi ebe ọsi Revelation. Bhiriọ, ọ iyi Jesu la ene ẹhi ta emhin ne rẹ mhan rẹbhọ ene ive, sokpan Jehova tobọle tale. Ọnan rẹman ghe, mhan dẹ sabọ mun udu nyan ẹmhọn nin Jehova tale bhi obọ nọnzi eva bhi Revelation 21:5. Bezẹle? Ranmhude Jehova “isabọ bha ohoghe.” (Titus 1:2) Ene ọta nan rẹkpa mhan rẹ manman mun udu nyan ẹmhọn ne ribhi Revelation 21:​5, 6.

“GHỌLE! MẸN RE EMHIN REBHE KIẸN ỌSỌGBỌN”

8. Be Jehova ta nin ọle rẹ rẹman ghe ọle dẹ mun ive nesọle sẹ? (Isaiah 46:10)

⁸ Bha ji mhan zilo nyan ebi Jehova kie ta. Ọle da yọle, “Ghọle!” (Rev. 21:5) A wo noo ọne ukpọta nan zedu ọle diọbhi “ghọle!” igba ne bunbun bhi ebe ọsi Revelation. Ebe ọkpa da yọle ghe, a noo ọne ukpọta nan, “nan rẹ ji ọria nọn tie ebe lẹn ghe, nin ọle gbẹlokotọ bhi ẹmhọn nan ki da ta.” Be Osẹnobulua tayẹ beji ọle yọle “ghọle” fo? Ọle da yọle: “Mẹn re emhin rebhe kiẹn ọsọgbọn.” Bhi ọsi ẹmhọanta, emhin ne da sunu bhi ẹghe odalo ọle tẹmhọnlẹn. Ọkpakinọn, ranmhude ọle lẹnmhin ghe emhin iribhọ nọn ha mun ọlẹn mhọn rẹ mun ene ive sẹ, ọle da tale bọsi ghe, ọle bhọ mun ele sẹ fo.—Tie Isaiah 46:10.

9. (a) Emhin eva nela Jehova rẹ ene ẹmhọn, “mẹn re emhin rebhe kiẹn ọsọgbọn” talọ je? (b) Be ha sunu ji “okhun” bi “otọ” nọn ribhọ ẹlẹnan?

⁹ Bhi ejayenan nian, bha ji mhan zilo nyan ọne ẹmhọn nọn ribhi Revelation 21:​5, nọn yọle: “Mẹn re emhin rebhe kiẹn ọsọgbọn.” Emhin eva nin Jehova ha lu, ele ene ẹmhọn nan bhi Baibo tẹmhọnlẹn. Ene emhin hi, nin ọle rẹ ne emhin eso kie, yẹ re eso kiẹn ọsọgbọn. Ọhẹnhẹn, be Jehova ha ne kie? Revelation 21:1 ji mhan lẹn ghe, “okhun nọn ka ha ribhọ khẹ, bi otọ nọn ka ha ribhọ khẹ da siegbe kie.” “Okhun nọn ka ha ribhọ khẹ” mundia nin ugbẹloghe ne ribhọ ẹlẹnan, nin Esu bi ẹhi nesọle rẹ khian. (Matt. 4:​8, 9; 1 John 5:19) Beji a rẹ noo ọne ukpọta “otọ” bhi Baibo, ọ dẹ sabọ mundia nin eria ne nyẹnlẹn bhọ. (Gen. 11:1; Ps. 96:1) Bhiriọ, “otọ nọn ka ha ribhọ khẹ” mundia nin eria ne imhẹn ne ribhi ọne otọ nan ẹlẹnan. Ọ iyi uhẹnhẹnmhin Jehova ha hẹnhẹn ọne “otọ” bi ọne “okhun” nọn ribhọ ẹlẹnan, sokpan ọle dẹ dunmhun ele a sẹsẹsẹ. Ọle ki re “okhun ọsọgbọn bi otọ ọsọgbọn” ọbhi ihe nọnsele. Ọne “okhun ọsọgbọn” mundia nin ugbẹloghe ọsọgbọn. Ọne “otọ ọsọgbọn” mundia nin ẹbho ne khiale ne lu ebi ti Osẹnobulua bhọ.

10. Be Jehova ha rẹ kiẹn ọsọgbọn?

¹⁰ Bhi Revelation 21:​5, mhan da tie ebi Jehova tale rẹji ene emhin nin ọle ha rẹ kiẹn ọsọgbọn. Gbẹlokotọ ghe Jehova bha yọle, “mẹn dẹ man emhin ọgbọn,” sokpan ọle da yọle, “mẹn re emhin rebhe kiẹn ọsọgbọn.” Jehova dẹ re ọne otọ nan bi eria kiẹn ọsọgbọn. Beji Ẹzaya nin akhasẹ tale, Jehova dẹ re ọne otọ nan rebhe kiẹn otọ ọfubhegbe beji ogba ọsi Idẹn ka dia. Jehova dẹ yẹ re mhan nin eria kiẹn ọsọgbọn, bhi uwedẹ nin ọle ha rẹ re egbe nọn danlẹn nin mhan. Ọle ki re egbe dan ene akhun, ene yehọ bi ene ruẹlo. Sẹyẹ ọle ki riọ ene yu kpanọ.—Isa. 25:8; 35:​1-7.

“ẸMHỌN NAN HA SABỌ MUN UDU NYAN ELE KHIN. . . . ENE EMHIN NAN MUNSẸ!”

11. Be Jehova taman Jọni nin ọle lu? Bezẹle?

¹¹ Emhin ọbhebhe nela Jehova tale nọn ha re mhan mun udu nyan ọlẹn? Jehova da taman Jọni nọn gbẹn yọle: “Gbẹn ọnan bhi otọ, ranmhude, ẹmhọanta nọn, sẹyẹ, ẹmhọn nan ha sabọ mun udu nyan ele khin.” (Rev. 21:5) Ọ iyi nin Jọni gbẹn ebe ọbhi otọ ọkpa emhin nin Jehova tale, ọle da yẹ tẹmhọn ebezẹle ọkhẹke nin ọle lu iriọ. Ọle da yọle, “ẹmhọanta nọn, sẹyẹ, ẹmhọn nan ha sabọ mun udu nyan ele khin.” Ọnan rẹman ghe, ọta nan ha sabọ mun udu nyan ọta nọnsi Osẹnobulua khin. Ọ wo ti mhan bhọ ghe, Jọni gbẹn ebi Osẹnobulua taman ọlẹn nin ọle gbẹn ọbhi otọ. Ranmhude ọnan, mhan dẹ sabọ tie ẹmhọn ive ọsi agbọn ọsọgbọn nin Jehova ve, yẹ ria eria nyan erọnmhọn kẹkẹ nin mhan da miẹn bhi ẹghe odalo.

12. Bezẹle nin Jehova da yọle: “Ene emhin nan munsẹ!”

¹² Be Osẹnobulua ta beji ọle ta ọnan fo? Ọle da yọle, “Ene emhin nan munsẹ!” (Rev. 21:6) Bezẹle nin Jehova da yọle ghe, ọle mun ene ive nan sẹ fo? Ranmhude emhin soso iribhọ nọn ha mun ọlẹn mhọn rẹ mun ive nesọle sẹ. Beji Jehova ta ọnan fo, ọle da ta emhin ọbhebhe nọn re mhan rẹọbhọ ghe, ọle dẹ gene mun ive nesọle sẹ. Be bhọ ọne emhin?

“IMẸN HI ỌNE AFA BI ỌNE OMẸGA”

13. Bezẹle nin Jehova da yọle: “Imẹn hi ọne Afa bi ọne Omẹga?”

¹³ Beji mhan ka tẹmhọnlẹn, igba ea Jehova tobọle talọ bhi imianlo nin ọle rẹman Jọni. (Rev. 1:8; 21:​5, 6; 22:13) Bhi ene igba ea, Jehova da ta ọta nọn sẹnian: “Imẹn hi ọne Afa bi ọne Omẹga.” Ọne ukpọta afa, ọle a rẹ mun ikpebe ọsi ibhokhan Grik ke. Ọne ukpọta omẹga, ọle a rẹ kpẹn ọlẹn. Nin Jehova rẹ yọle ghe ọle hi “ọne Afa bi ọne Omẹga,” ọ rẹman ghe, ọle ha mun emhin ke, ọle re ọle sotọ.

14. (a) Sounun bhi ẹghe nọn rẹ diabe Jehova yọle “Afa,” bi ẹghe nọn ha rẹ diabe ọle yọle “Omẹga.” (b) Izebhudu nela ẹmhọn nọn ribhi Genesis 2:​1-3 re nin mhan?

¹⁴ Beji Jehova man Adamu bi Ivi fo, ọle da taman ele ebi iho nọnsọle rẹji eria bi ọne otọ nan khin. Baibo da yọle: “Osẹnobulua da nan erọnmhọn nin ele yẹ taman ele yọle: ‘Bha ha biẹ nin bha bunbun, nin bha vuọn ọne otọ nan yẹ ha gbẹloghe ọle.’” (Gen. 1:28) Bhi ọne ẹghe nan nin Jehova rẹ tẹmhọn iho nọnsọle, inian ọ diabe ọle yọle “Afa.” Ẹghe vade nin imọn ọsi Adamu nọn gba nan, ne hẹnmhọn nin Osẹnobulua ha rẹ biẹ vuọn ọne otọ nan, yẹ re ọle kiẹn otọ ọfubhegbe. Ẹghe nin Jehova ha rẹ mun ọne iho nan sẹ bhi ẹghe odalo, ọ ki diabe ghe ọle yọle, “Omẹga.” Ẹghe nin Jehova rẹ man otọ, okhun bi emhin rebhe ne ribhọ fo, ọle da tẹmhọn nọn rẹman ghe, iho nọnsọle dẹ gene munsẹ. Ọne ẹmhọn nin ọle ta ribhi Genesis 2:​1-3. (Tie ọle.) Jehova da yọle ghe ukpẹdẹ nọn khiale, ọle ọne ukpẹdẹ nọnzi ihinlọn khin. Be ọnin rẹman? Ọ rẹman ghe Jehova dẹ mun iho nọnsọle rẹji eria bi ọne otọ nan sẹ sẹsẹsẹ sade ọne ukpẹdẹ nọnzi ihinlọn sotọ.

15. Bezẹle nin Esu ha da sabọ ha riale ghe, ọle mun Jehova mhọn rẹ mun iho nọnsọle sẹ?

¹⁵ Beji Adamu bi Ivi sọtẹ da Jehova fo, ele da kiẹn eria olukhọ, yẹ si emhin ebe bi uu ji imọn nesele. (Rom. 5:12) Ranmhude ọnan, ọ da diabe ghe ọ iyẹ da sabọ sunu nin eria nọn gba nan, ne yẹ hẹnmhọn nin Jehova rẹ sabọ vuọn ọne otọ nan. Ọkpakinọn, Esu be gene sabọ mun Jehova mhọnlẹn nọn hẹi mun iho nọnsọle sẹ? Esu sabọ rẹ ha riale ghe Jehova ida yẹ sabọ mun ive nọnsọle sẹ. Asabọmiẹn ọle da ha riale ghe, Osẹnobulua dẹ gbe Adamu bi Ivi a, sẹyẹ ọle dẹ man okpea bi okhuo ọbhebhe nọn gba nan, nin ọle rẹ sabọ mun iho nọnsọle sẹ. Sade Osẹnobulua lu iriọ nọn, Esu ha rẹ yọle ọbhahoghe ọle khin. Bezẹle? Ranmhude beji a gbẹn ọbhi Genesis 1:​28, Jehova ki ka taman Adamu bi Ivi fo ghe, imọn nesele dẹ vuọn ọne otọ nan.

16. Emhin nela ha rẹ sabọ re Esu ha riale ghe Jehova bha sabọ mun iho nọnsọle sẹ?

¹⁶ Emhin ọbhebhe nela Esu ha sabọ ha mhọn bhi ọkhọle ghe Osẹnobulua dẹ lu? Asabọmiẹn ọle da ha riale ghe, Jehova dẹ re otọ nin Adamu bi Ivi rẹ biẹ imọn nọn ida gba nan ghe. (Eccl. 7:20; Rom. 3:23) Ọ ha yi iriọ, Esu ki ha ghe Jehova bii ọria nọn bha sabọ lu ebi ọle mhọn bhi ọkhọle. Bezẹle? Ranmhude ọnan ida mun iho nọnsi Osẹnobulua sẹ, nọn yi, nin imọn ọsi Adamu nọn gba nan rẹ vuọn agbọn ọsọgbọn.

17. Be Jehova rẹ re emhin nin Adamu bi Ivi bi ọne Esu lu khian yẹ? Be da nabhọre? (Yẹ fẹ ifoto ghe.)

¹⁷ Edandan iribhọ ghe uwedẹ nin Jehova rẹ re emhin nin Esu lu, bi ọne Adamu bi Ivi lu khian wo han Esu ilo. (Ps. 92:5) Jehova da re otọ nin Adamu bi Ivi rẹ biẹ imọn. Ọnan da rẹman ghe ọle iyi ọbhahoghe, sokpan, ọle mun ọta nin ọle ta sẹ. Sẹyẹ Jehova da rẹman ghe, ọle ha ta emhin, a igbo miẹn ọle bha mun ọlẹn sẹ. Ọle da zẹ uwedẹ dagbare nin ọle ha rẹ mun iho nọnsọle sẹ. Ọle da zẹ “ọmọn” egbe dagbare nọn da hinmhin imọn ọsi Adamu bi Ivi ne hẹnmhọn nanlẹn. (Gen. 3:15; 22:18) Ọne ọmọn dẹ re iẹnlẹn nọnsọle rẹ zọese nin eria beji ele ha da sabọ miẹn umiẹnfan. Esu bha rẹ zẹwẹ re ẹlo ọbhi ọnan! Bezẹle? Ranmhude, oyẹẹ nin Jehova mhọn da mhan zẹle ọle zẹ ọne uwedẹ nan egbe dagbare nin ọle rẹ miẹn mhan fan. (Matt. 20:28; John 3:16) Esu imhọn ọne ikpẹ nan, ọsi egbe ọle ọkpa ọle khu. Bhiriọ, be da sunu ranmhude ọne emhanmhan nin Jehova zẹ ọle egbe dagbare? Ẹghe nin ene Ikpe Uli nin Jesu ha rẹ gbẹloghe ha rẹ sotọ, imọn ọsi Adamu bi Ivi nọn gba nan ki le ọne otọ nan bhi uku nan ki da rẹ kiẹn otọ ọfubhegbe beji Jehova ka rẹ mhanmhanlẹn tee. Bhi ọne ẹghe nan, ọ ki diabe Jehova yọle “Omẹga.”

EBI MHAN HA RẸ HA ZIẸN URẸỌBHỌ NIN MHAN MHỌN DA IVE ỌSI AGBỌN ỌSỌGBỌN NIN JEHOVA VELE

18. Emhin ea nela rẹ mhan rẹọbhọ ghe Osẹnobulua dẹ sabọ mun ive nesọle sẹ? (Sẹyẹ fẹ ọne ẹkpẹti ghe nọn yọle “Emhin Ea Ne Ha Rẹkpa Mhan Rẹ Mun Udu Nyan Ive Nesi Jehova.”)

¹⁸ Rẹji ebi mhan luẹ bhi ọne uhọnmhọn-ọta nan, emhin nela mhan ha sabọ noo rẹ rẹkpa ẹbho ne bha rẹọbhọ ghe, Jehova dẹ mun ive ọsi agbọn ọsọgbọn nin ọle ve sẹ? Ọhẹnhẹn, Jehova tobọle ve ọne ive. Ebe ọsi Revelation da yọle: “Ọnọn dotua bhi uke okhun ọne ojukhuo da yọle: ‘Ghọle! Mẹn re emhin rebhe kiẹn ọsọgbọn.’” Jehova mhọn ọne ẹwanlẹn bi ọne ahu nin ọle rẹ mun ive nesọle sẹ, sẹyẹ, ọ ghọn ọlẹn rẹ lu ọle. Ọzeva, Jehova lẹn sẹbhọ ghe ọle dẹ mun ọta nin ọle tale sẹ. Ranmhude ọnan, inian ọ diabe ọne ive bhọ munsẹ fo bhi ẹlo ọle. Ọnan zẹle nin ọle da yọle: “Ẹmhọanta nọn, sẹyẹ, ẹmhọn nan ha sabọ mun udu nyan ele khin. . . . Ene emhin nan munsẹ.” Ọzea, Jehova ha mun emhin ke, ọle re ọle sotọ sẹsẹsẹ, beji ene ọta “Imẹn hi ọne Afa bi ọne Omẹga” rẹman. Jehova dẹ rẹman ghe ọbhahoghe Esu khin, sẹyẹ ọle ida sabọ mun ọlẹn mhọn rẹ mun iho nọnsọle sẹ.

19. Be uwẹ ha sabọ lu sade ọria bha rẹọbhi ive ọsi agbọn ọsọgbọn nin Osẹnobulua vele?

¹⁹ Yere ghe, ẹghe nọn hi ki rẹ khin nin uwẹ rẹ tẹmhọn emhin ne re mhan rẹọbhi ive nesi Osẹnobulua man ẹbho bhi inẹbho, uwẹ yẹ ziẹn urẹọbhọ nin uwẹ mhọn da ene ive. Bhiriọ, be uwẹ ha lu yẹ sade uwẹ kie tie ẹmhọn ive ọsi agbọn ọsọgbọn nọn ribhi Revelation 21:4 man ọria, sokpan ọne ọria da taman ẹn ghe, “Ọ wo mhẹn bhi ehọ a, sokpan ọle bha rẹọbhọ?” Dọnmhegbe tie ulọnlẹn nọnzi 5 bi ọnọnzi 6 man ọlẹn, uwẹ ha yẹ gbotọle fanọn an. Rẹman ọne ọria ebi Jehova rẹ re obọ ọbhi ọne ive yẹ ghe ọle dẹ mun ọlẹn sẹ.—Isa. 65:16.