UHỌNMHỌN-ỌTA NỌNZI 25
Ene Ewanlẹn—Bha Luẹ Emhin bhi Ijiẹmhin ọsi Gidiọn
“Ẹghe ida sẹ mẹn sade mẹn munhẹn ha tẹmhọn Gidiọn.”—HEB. 11:32.
ILLO 124 Bha Ji Mhan Ha Mhọn Asun-rẹkhan
EBI MHAN DA LUẸa
1. Beji 1 Peter 5:2 rẹman, ẹsọn kpataki nela ene ewanlẹn miẹn?
JEHOVA mun ọne ẹsọn nin ene ewanlẹn rẹ ha gbẹloghe ihuan ne manman ghan nesọle. Ene ikpea nan izẹwẹ re ẹsọn nin Jehova mun nin ele khiẹn. Ele manman wẹnna kaka rẹ sun ihuan nesi Jehova. (Jer. 23:4; tie 1 Peter 5:2.) Ọ manman re imhan ghọnghọn rẹ ha mhọn ikpea ne sẹnian bhi agbotu nọnsẹmhan!
2. Ọnọghọ kẹkẹ nela ene ewanlẹn ha sabọ kuẹlo da?
2 Ene ewanlẹn wo kuẹlo da ọnọghọ kẹkẹ beji ele rẹ miẹn ọne ẹsọn nin Jehova mun nin ele. Bhi ọsi ẹmhọanta, ọ dẹ khẹke nin ene ewanlẹn wẹnna kaka nin ele rẹ sabọ wo ha gbẹloghe agbotu. Tony nọn yi ọwanlẹn bhi agbotu bhi United States da dọ kere ghe, ọkhẹke nin ọle deobọre bhi iwẹnna nin ọle miẹn ọbhi egbe bhi agbotu. Ọle da yọle: “Ẹghe nin emianmhẹn KOVID-19 rẹ wo la munhẹn, mẹn da ha lu iwẹnna ọbhebhe ba ene mẹn ka lu khẹ. Mẹn ki ha sun uwedẹ mhan rẹ ha do ikolo oga bi iwẹnna itẹmhọn Osẹnobulua. Arẹmiẹn mẹn wo ha miẹnsọn ne bunbun, iriọ ebhebhe yẹ rẹ wo ha zegbere. Akizẹbue, mẹn bha yẹ miẹn ẹghe rẹ ha tie Baibo, rẹ tobọmẹn ha luẹ emhin, yẹ nan erọnmhọn.” Ọkakale ọbhebhe obhio mhan nin Ilir nọn na bhi Kosovo vae kuẹlo da. Ẹghe nin ọle rẹ ha ribhi eji a da ha khọnlẹn, ọ da ha nọghọ ọle rẹ re obọ rẹkhan adia ọsi agbotu. Ọle da yọle: “Ẹghe nin Bẹtẹ rẹ je mẹn nin mẹn dọ rẹkpa bhi eji a da khọnlẹn, ọ da wo rẹso izebhudu nọnsẹmhẹn. Ofẹn da ha mun mẹn, sẹyẹ, ọne ẹsọn nan mun nin mẹn da wo diabe emhin nin ẹwanlẹn iye.” Ọ bha lẹkhẹ nin Tim nọn lu iwẹnna misiọnari bhi Asia rẹ ha lu iwẹnna ne khẹke nin ọle ha lu ukpẹdẹ-ukpẹdẹ. Ọle da yọle: “Ẹgheso, egbe ki wo manman lọ mẹn sẹbhọ ghe, ọ ki ha nọghọ mẹn rẹ re iyobọ nin ene ibhio mhan.” Be ha sabọ rẹkpa ewanlẹn ne kuẹlo da ọnọghọ ne sẹnian?
3. Be ijiẹmhin ọsi Gidiọn ha rẹ sabọ rẹkpa mhan rebhe yẹ?
3 Ene ewanlẹn dẹ sabọ miẹn emhin luẹ bhi obọ Gidiọn. (Heb. 6:12; 11:32) Jehova da zẹ ọle nin ọle ha gbẹloghe ẹbho nesọle, yẹ sun ele. (Judg. 2:16; 1 Chron. 17:6) Bọsi Gidiọn, Jehova mun ọne ẹsọn nin ene ewanlẹn rẹ ha gbẹloghe ẹbho nesọle bhi ọne ẹghe nọn bha zẹwẹ lẹkhẹ nan. (Acts 20:28; 2 Tim. 3:1) Mhan dẹ miẹn emhin luẹ bhi idegbere nin Gidiọn ha mhọnlẹn, uwedẹ nin ọle rẹ lu emhin ọbhi oleghe, bi uwedẹ nin ọle rẹ hẹnmhọn nin Jehova. Emhin wo dọnmhẹn iziẹngbe nọnsọle beji ọle rẹ ha lu ọne iwẹnna. Aharẹmiẹn ọwanlẹn mhan khin, la mhan iyi ọle, ebi mhan da luẹ dẹ rẹkpa mhan rẹ manman ha khuẹnmhẹn ene ewanlẹn bhi ẹsọn nin ele miẹn. Mhan dẹ sabọ ha re iyobọ nin ene ikpea nan ne manman wẹnna kaka bhi agbotu.—Heb. 13:17.
SADE EMHIN DỌNMHẸN IDEGBERE NỌNSẸ, BI ỌNE ỌKHỌLE NIN UWẸ RẸ HA LU EMHIN ỌBHI OLEGHE
4. Be Gidiọn rẹ rẹman yẹ ghe ọle mhọn idegbere, sẹyẹ ọle lu emhin ọbhi oleghe?
4 Okpea nọn mhọn idegbere, nọn yẹ lu emhin ọbhi oleghe Gidiọn ha khin.b Ẹghe nin ẹhi nọnsi Jehova rẹ taman ọlẹn ghe Jehova zẹ ọle nin ọle dọ miẹn ibhokhan Izrẹl fan bhi obọ ibhokhan Midian, ọne okpea nan nọn mhọn idegbere da yọle: “Idunmhun nọnsẹmhẹn khere nẹ bhi ẹwẹ ulin-uwa ọsi Manasẹ.” (Judg. 6:15) Ọle da ha riale ghe, ọle ida sabọ lu ọne iwẹnna nan. Ọkpakinọn, Jehova lẹn ghe ọle dẹ sabọ lu ọle. Jehova da rẹkpa ọle rẹ sabọ miẹn ọne ẹsọn.
5. Ẹghela ọ ha rẹ ha nọghọ ọwanlẹn rẹ re idegbere man, yẹ lu emhin ọbhi oleghe?
5 Ene ewanlẹn dọnmhegbe rẹ rẹman ghe ele mhọn idegbere, sẹyẹ, ele lu emhin ọbhi oleghe bhi emhin rebhe nin ele lu. (Mic. 6:8; Acts 20:18, 19) Ele ire ebi ele sabọ lu, la emhin nin ele sẹ sabọ lu rẹ dẹgbọ, la ha ghe egbe ele bii eria ne bha sẹ emhin soso ranmhude idobọ nọnsele. Ọrẹyiriọ, ọ nọghọ ele ẹgheso rẹ ha re idegbere man yẹ lu emhin ọbhi oleghe. Bhi ọsi ijiẹmhin, ọwanlẹn sabọ rẹ miẹn ẹsọn ne bunbun ọbhi egbe, ọkpakinọn, ọ ki ha nọghọ ọle rẹ lu ele. Ẹbho sabọ rẹ ha re unun riia ọle a bhi uwedẹ nin ọle rẹ miẹnsọn eso, la khuẹnmhẹn ọlẹn bhi uwedẹ nin ọle rẹ miẹnsọn ọbhebhe. Bhi idia nọn sẹnian, be ene ewanlẹn ha sabọ miẹn luẹ bhi obọ Gidiọn nọn ha rẹkpa ele?
Bọsi Gidiọn, ọwanlẹn nọn lu emhin ọbhi oleghe dẹ ji ẹbho da rẹkpa ọle sade ọle mhanmhan ebi a ha rẹ lu iwẹnna itẹmhọn Osẹnobulua nan da re ebe wa (Fẹ uduọle nọnzi 6 ghe)
6. Be ene ewanlẹn ha sabọ miẹn luẹ bhi obọ Gidiọn rẹji nan rẹ ha lu emhin ọbhi oleghe? (Yẹ fẹ ifoto ghe.)
6 Guanọ urẹkpa. Ọria nọn lu emhin ọbhi oleghe lẹn sẹbhọ ghe, emhin eso ribhọ nin ọle ida sabọ lu. Gidiọn da rẹman ghe, ọle lu emhin ọbhi oleghe bhi uwedẹ nin ọle rẹ dọ guanọ urẹkpa bhi obọ ẹbho. (Judg. 6:27, 35; 7:24) Iriọ ewanlẹn ne re ẹwanlẹn lu emhin yẹ wo lu. Tony nin mhan ka tẹmhọnlẹn da yọle: “Ranmhude uwedẹ nan rẹ bẹẹ mẹn wanre, mẹn ki wo ha miẹn ẹsọn ne bunbun ọbhi egbe aharẹmiẹn ọ ida fo mẹn. Bhiriọ, mẹn da zẹ nin mhan rẹ zilo nyan ebi a rẹ lu emhin ọbhi oleghe yẹ bhi oga azagba-uwa nọnsẹmhan, yẹ nọọn okhuo mẹn ebi ọle ghe ọle yẹ. Sẹyẹ, mẹn da dọ ghe ọne ividio bhi jw.org nọn yọle, Man Ele Emhin, Mun Udu Nyan Ele, Uwẹ Ayẹ Re Ahu Nele, Beji Jesu Lu.” Tony da munhẹn ha tie ẹbho nin ele dọ rẹkpa ọle. Be ki nabhọre? Tony da yọle: “A wo ha miẹnsọn rebhe ne ribhi agbotu nọnsẹn. Sẹyẹ, mẹn dọ miẹn ẹghe nian rẹ ha ziẹn ikolu nin mẹn bi Jehova ko mhọnlẹn.”
7. Be ene ewanlẹn ha rẹ sabọ re egbe khọkhọ Gidiọn yẹ sade ẹbho re unun riia ele a? (James 3:13)
7 Hẹi ji ohu re uwẹ sade a re unun riia ẹ a. Emhin ọbhebhe nọn ha sabọ dọnmhẹn idegbere nin ọwanlẹn mhọn hi, sade ẹbho re unun riia ọle a. Bhi ọnan, mhan dẹ yẹ miẹn emhin luẹ bhi ijiẹmhin ọsi Gidiọn. Ranmhude ọle lẹnmhin ghe ọ bha gba nanlẹn, ohu bha re ọle ẹghe nin ibhokhan Ifrem rẹ re unun ha riia ọle a. (Judg. 8:1-3) Gidiọn bha re ohu nin ele talọ. Ọle da rẹman ghe, ọle mhọn idegbere bhi uwedẹ nin ọle rẹ ka ele ehọ beji ele ha ta emhin nọn khọ ele bhi ẹkẹ, yẹ re ifuẹkẹ rẹ nin ele talọ. Ọnan da re ọkhọle nọnsele dere. Ewanlẹn ne re ẹwanlẹn lu emhin dẹ sabọ re egbe khọkhọ Gidiọn sade ele kaehọ nọnsẹn, yẹ re ifuẹkẹ rẹ nin ẹbho talọ sade a re unun riia ele a. (Tie James 3:13.) Bhiriọ, ele ki sabọ ha tuẹn ọfure nọn ribhi agbotu okhun.
8. Be ọkhẹke nin ene ewanlẹn rẹ lu emhin yẹ sade a gẹn ele? Re ijiẹmhin ọbhọ.
8 Re ogẹn rebhe ji Jehova. Ẹghe nin ẹbho rẹ ha gẹn Gidiọn ranmhude nin ọle rẹ khọn ibhokhan Midian miotọ, ọle da re ọne ogẹn ji Jehova. (Judg. 8:22, 23) Be ene ewanlẹn bhi agbotu ha rẹ sabọ re egbe khọkhọ Gidiọn yẹ? Ọkhẹke nin ele ha re ogẹn ji Jehova bhi emhin rebhe nin ele sabọ lu. (1 Cor. 4:6, 7) Bhi ọsi ijiẹmhin, ahamiẹn a khuẹnmhẹn ọwanlẹn bhi uwedẹ nin ọle rẹ re ọta man, ọle sabọ yọle ghe, Ọta nọnsi Osẹnobulua emhin nin ọle man na vae, sẹyẹ agbotu nọnsọle bhọ man mhan emhin. Ọwanlẹn sabọ rẹ fẹ uwedẹ nin ọle rẹ man emhin ghe, nin ọle rẹ lẹn si ọle re ọne ọta re ogẹn ji Jehova, la si egbe ọle ọle rẹman. Bha ji mhan fẹ ijẹmhin ọsi ọwanlẹn ọkpa ghe natiọle Timothy. Ẹghe nan rẹ la re Timothy kiẹn ọwanlẹn, ọ da wo ha yẹẹ ọle rẹ ha re ọta ogbakha man. Ọle da yọle: “Arẹkhọkhọ bi okha ne bha lẹkhẹ nan rẹ lẹn otọle mẹn rẹ mun ọta nọnsẹmhẹn hẹn. Ẹbho da wo manman ha gẹn mẹn ranmhude ọnan. Ọnan da re ẹbho ha re ogẹn nọn khẹke Jehova bi Ọta nọnsọle nin ọne iman-emhin na vae nin mẹn.” Akizẹbue, ọle da kere ghe ọkhẹke nin ọle fi uwedẹ nin ọle rẹ man emhin denọ beji a ha da miẹn ọle bha yẹ ha tie egbe ọle bhi egbe. (Prov. 27:21) Be ki nabhọre? Ọle da yọle: “Ibhio mhan kẹkẹ bhi agbotu da dọ ha taman mẹn ebi ọta nọnsẹmhẹn rẹ rẹkpa ele rẹ sabọ khọn ọnọghọ yẹ, rẹ ziẹngbe edọnmhẹn la rẹ sabọ sikẹ Jehova. Ene ọta nan nin ibhio mhan ha taman mẹn da wo re mẹn ha ghọnghọn gbera ọne ẹghe nin ele rẹ ha gẹn mẹn.”
SADE EMHIN DỌNMHẸN IZEBHUDU NỌNSẸ, LA RE ỌLE NỌGHỌ UWẸ RẸ RE OBỌ RẸKHAN ADIA
Gidiọn da ne kie bhi eyokhọnlẹn nesọle beji Jehova taman ọlẹn. Ọle da zẹ ikpea 300 ne rẹman ghe ele babegbe (Fẹ uduọle nọnzi 9 ghe)
9. Emhin nela ha rẹ re ọle nọghọ Gidiọn rẹ hẹnmhọn nin Jehova yẹ re izebhudu man? (Fẹ adudu nọn ribhi odalo ọle ghe.)
9 Ẹghe nin Jehova rẹ re Gidiọn kiẹn ọbhohiẹn ọsi ibhokhan Izrẹl fo, ọ da khẹke nin ọle wo ha hẹnmhọn nin Jehova yẹ ha mhọn izebhudu. Bhi ọne ẹghe nan, a da mun ọne ẹsọn nanlẹn nin ọle rẹ dunmhun ukhuo izọese nin aba ọle da ga Bel a. Ọne ẹsọn nan bha zẹwẹ lẹkhẹ. (Judg. 6:25, 26) Bhi ẹghe ọbhebhe, beji ọle si eyokhọnlẹn nin ọle ha rẹ khọn koko fo, Jehova da taman ọlẹn nin ọle ne kie bhi ene ẹbho nin ọle sikoko. Igba-eva ọle lu ọnan. (Judg. 7:2-7) Bhi ọkike ọle, Jehova da taman ọlẹn nin ọle mun okhọn bu eghian ọlẹn bhi ọsasọn ogiziẹn.—Judg. 7:9-11.
10. Emhin nela ha sabọ re ọle nọghọ ọwanlẹn rẹ re obọ rẹkhan adia?
10 Ọkhẹke nin ene ewanlẹn muegbe rẹ kẹ ha re obọ rẹkhan adia. (Jas. 3:17) Ọwanlẹn nọn hẹnmhọn nin Jehova rẹ ẹjẹje re obọ rẹkhan adia ne ribhi Baibo, bi ene ọle re agbotu nọnsọle re nin mhan. Ọle ha lu iriọ, ọle ki ha re ijiẹmhin esili ọbhi otọ nin ẹbho nekẹle. Ọrẹyiriọ, emhin eso dẹ sabọ re ọle nọghọ ọle rẹ re obọ rẹkhan adia. Bhi ọsi ijiẹmhin, ọ sabọ rẹ ha nọghọ ọle rẹ re obọ rẹkhan adia rebhe nan re nanlẹn. Ẹgheso, ọle bhọ sabọ rẹ ha riale si ẹwanlẹn ribhi adia eso, la si ọ gene khẹke. La, asabọmiẹn a mun iwẹnna nanlẹn nọn ha sabọ mun iẹnlẹn nọnsọle ọbhi okhẹnan. Bhi idia ne sẹnian, be ene ewanlẹn ha rẹ sabọ re egbe khọkhọ Gidiọn yẹ bhi uwedẹ nin ọle rẹ hẹnmhọn nin Jehova?
11. Be ha rẹkpa ene ewanlẹn rẹ sabọ ha re obọ rẹkhan adia?
11 Re ehọ bhi adia yẹ re obọ rẹkhan ọlẹn. Osẹnobulua da taman Gidiọn ebi ọle ha rẹ dunmhun ukhuo izọese ọsi aba ọle a yẹ, eji ọle ha da bun ukhuo izọese ọsọgbọn ji Jehova, bi unan elanmhẹn nin ọle ha rẹ ze. Gidiọn bha dọ ha ria ẹmhọn ebi Jehova taman ọlẹn igba eva, ọle da wo lu beji a taman ọlẹn tee. Ẹlẹnan nian, agbotu nọnsi Jehova noo ilẹta, ebe kẹkẹ bi emhin ne dia iriọ rẹ re adia nin ene ewanlẹn, nọn ha rẹkpa ele rẹ gbega ẹbho nesi Jehova yẹ rẹ sabọ sikẹ ọle. Imhan wo hoẹmhọn ene ewanlẹn bhi uwedẹ nin ele rẹ re obọ rẹkhan adia nin agbotu re nin ele. Ọrebhe bhi agbotu wo miẹn elele bhi ọnan.—Ps. 119:112.
12. Be ene ewanlẹn ha rẹ sabọ re obọ rẹkhan adia nọn ribhi Hebrews 13:17 yẹ sade agbotu fi uwedẹ nan rẹ ka ha lu emhin denọ?
12 Re obọ ọbhọ sade agbotu fi emhin denọ. Yere ghe ẹghe ribhọ nin Jehova rẹ taman Gidiọn nin ọle je ene bunbun bhi eyokhọnlẹn nọnsọle fikie ha khian uwa. (Judg. 7:8) Asabọmiẹn ọle da ha riale: ‘Ọnan be gene khẹke? Ọnan dẹ wẹnnamhin?’ Ọrẹyiriọ, Gidiọn da lu beji a taman ọlẹn. Ẹlẹnan nian, ene ewanlẹn re egbe khọkhọ Gidiọn sade ele re obọ rẹkhan uwedẹ ọgbọn nin agbotu yọle nan rẹ ha lu emhin. (Tie Hebrews 13:17.) Bhi ọsi ijiẹmhin, bhi 2014, Otu Nọn Sun Oga da fi uwedẹ nan rẹ re igho re nan rẹ bọn Kindọn Họọ bi Asẹmbli Họọ nesẹmhan denọ. (2 Cor. 8:12-14) A da yọle ghe, agbotu nan bọn Kindọn Họọ nan ida yẹ ha ha igho nan rẹ bọn ọle nin ele fikie. Bhi ejayenan nian, igho nin agbotu kẹkẹ re re a ki noo rẹ bọn Kindọn Họọ bi Asẹmbli Họọ bhi eji a da guanọ ele, aharẹmiẹn enan bọn ọlẹn nan imanman mhọn igho. Ẹghe nin José rẹ lẹn ẹmhọn ọne uwedẹ ọgbọn nan, ọle da ha riale ghe ọnan ida wẹnna, ghe ‘A bhọ ida sabọ bọn Kindọn Họọ ọkpa.’ Ọle da yẹ yọle ghe, ‘Ọ iyi inian a rẹ lu emhin bhi eji ọle na vae.’ Be rẹkpa José rẹ lu rẹkhan ebi agbotu tale? Ọle da yọle: “Proverbs 3:5, 6 da ye mẹn re ghe ọkhẹke nin mẹn mun udu nyan Jehova. Emhin esili kẹkẹ wo na bhi ọne emhanmhan ọgbọn nan re. Rẹ gbera ghe mhan bọn Kindọn Họọ ne bunbun nian, mhan yẹ dọ luẹ uwedẹ kẹkẹ nan rẹ re iyobọ re beji a ha da miẹn ene manman mhọnlẹn ki sabọ re iyobọ nin ene imhọnlẹn.”
Aharẹmiẹn a mun idobolo ọbhi iwẹnna oga nọnsẹmhan, mhan dẹ yẹ sabọ re izebhudu ha tẹmhọn Osẹnobulua (Fẹ uduọle nọnzi 13 ghe)
13. (a) Be Gidiọn ha mhọn bhi ọkhọle? (b) Be ene ewanlẹn ha rẹ sabọ re egbe khọkhọ Gidiọn yẹ? (Yẹ fẹ ifoto ghe.)
13 Re izebhudu rẹ lu iho nọnsi Jehova. Arẹmiẹn ofẹn mun Gidiọn, sẹyẹ ọne ẹsọn nan mun nanlẹn dẹ sabọ si okhẹnan ji ọle, ọle da yẹ wo hẹnmhọn nin Jehova. (Judg. 9:17) Beji ọle ki dọ lẹn fo ghe Jehova re ọle bhi ikeke, ọle da dọ ha mhọn ọne izebhudu ghe Jehova dẹ rẹkpa ọle beji ọle rẹ sun ẹbho nesọle. Ewanlẹn ne ribhi eji a da mun idobolo ọbhi iwẹnna oga nọnsẹmhan wo re egbe khọkhọ Gidiọn. Ele wo ha re izebhudu mun ọkalo bhi ikolo oga, bi iwẹnna oga nesẹmhan, arẹmiẹn a dẹ sabọ ranmhude ọnan mun ele khue, ha gua ele ọta bhi unun, miẹn ele iwẹnna la gbe ele.c Bhi ẹghe ekpokpo nọn khua, ọ dẹ khẹke nin ene ewanlẹn re obọ rẹkhan adia nan ha re nin ele aharẹmiẹn ọ ida lẹkhẹ nan rẹ re obọ rẹkhan. Eso bhi ene adia sabọ rẹ ha yi, ebi mhan ha rẹ wewe uhọnmhunje ọsi ibhohiẹn nọn manman kaka yẹ, bi ebi mhan ha lu rẹ miuhọnmhọn bhi obọ Gọgi ọsi Megọgi.—Ezek. 38:18; Rev. 16:21.
SADE EMHIN DỌNMHẸN IZIẸNGBE NỌNSẸ
14. Emhin nela dọnmhẹn iziẹngbe ọsi Gidiọn?
14 Ọ da wo khẹke nin Gidiọn wẹnna kaka nin ọle rẹ sabọ lu iwẹnna nan mun nanlẹn. Ẹghe nin ibhokhan Midian rẹ nẹgbe bhi ọne okhọn nin ọle mun bu ele bhi ọsasọn ogiziẹn, ọle da khu rẹkhan ele rẹ na bhi iyala ọsi Jẹzriẹ rẹ dọ sẹbhi Ẹdẹ ọsi Jọdan. Asabọmiẹn ẹgbo wo nẹga enin. (Judg. 7:22) Gidiọn be mundia beji ọle sẹbhi Jọdan? Eye! Arẹmiẹn egbe lọ ọle, ọle bi ikpea nesọle ne bun sẹbhi 300 da fan ọne ẹdẹ ra yẹ khu rẹkhan ele. Ele da ke ibhokhan Midian re, yẹ khọn ele miotọ.—Judg. 8:4-12.
15. Be ha sabọ re ọle nọghọ ọwanlẹn rẹ ziẹngbe?
15 Ẹgheso, egbe sabọ rẹ lọ ọwanlẹn ranmhude ẹsọn nin ọle miẹn rẹ gbẹloghe azagba-uwa nọnsọle bi ibhio mhan bhi agbotu. Ọnan ha sunu, be ene ewanlẹn ha rẹ re egbe khọkhọ Gidiọn yẹ?
Ewanlẹn ne re oyẹẹ man sẹ wo rẹkpa ibhio ele ne guanọ urẹkpa (Fẹ uduọle nọnzi 16 bi 17 ghe)
16-17. Be rẹkpa Gidiọn rẹ sabọ ziẹngbe? Izebhudu nela ene ewanlẹn ha sabọ ha mhọnlẹn? (Isaiah 40:28-31) (Yẹ fẹ ifoto ghe.)
16 Ha mhọnlẹn bhi ọkhọle ghe, Jehova dẹ re ahu nin uwẹ. Gidiọn da ha mhọnlẹn bhi ọkhọle ghe Jehova dẹ re ahu nanlẹn. Gene-gene, iriọ Jehova lu. (Judg. 6:14, 34) Ẹghe ọkpa ribhọ nin Gidiọn bi ikpea nesọle rẹ re oẹ khu rẹkhan ijie eva ọsi ibhokhan Midian. Asabọmiẹn akasi ene ijie nan ha hẹn. (Judg. 8:12, 21) Ọrẹyiriọ, Jehova da rẹkpa ele rẹ sabọ khu ele kere yẹ khọn ele miotọ. Bọsi Gidiọn, ene ewanlẹn dẹ yẹ sabọ mun udu nyan Jehova, Osẹ nin ‘Ahu igbo fo ọle bhọ, nin egbe igbo lọ ọle.’ Ọle dẹ ha re ahu nin ele bhi ẹghe nin ele rẹ guanọ ọle.—Tie Isaiah 40:28-31.
17 Bha ji mhan fẹ ijiẹmhin ọsi Matthew ghe, nọn yi ọkpa bhi Otu Ewanlẹn Nin Agbotu Je Bu Idọkitọ. Be rẹkpa ọle rẹ sabọ ziẹngbe? Ọle da yọle: “Mẹn wo miẹn ahu nọn na obọ Jehova vae nin Philippians 4:13 tẹmhọnlẹn. Ẹghe-ẹghe nin egbe rẹ manman lọ mẹn, mẹn ki wo bhii Jehova nin ọle re ahu nọn khẹke nin mẹn rẹ sabọ rẹ iyobọ nin ibhio mhan. Bhi ene ẹghe nan, mẹn sẹ wo daghe ebi Jehova rẹ re ẹlinmhin nọn khiale rẹ re ahu nin mẹn yẹ, yẹ rẹ sabọ ziẹngbe.” Bọsi Gidiọn, ewanlẹn bhi agbotu wo kuẹlo da ọkakale kẹkẹ beji ele rẹ gbẹloghe ihuan nesi Osẹnobulua. Bhi ọsi ẹmhọanta, ọkhẹke nin ele lẹn ebi ahu nọnsele ha sabọ gbe, yẹ lẹn sẹbhọ ghe, ele ida sabọ lu emhin rebhe nọn re ele bhi ọkhọle. Ọkpakinọn, ele dẹ sabọ ha mhọn ọne izebhudu ghe, Jehova dẹ họn ubhimhin nọnsele yẹ re ahu nin ele rẹ ziẹngbe.—Ps. 116:1; Phil. 2:13.
18. Beji mhan luẹle, be ene ewanlẹn ha rẹ sabọ re egbe khọkhọ Gidiọn yẹ?
18 Emhin ne bunbun ribhọ nin ene ewanlẹn ha sabọ miẹn luẹ bhi obọ Gidiọn. Ọkhẹke nin ene ewanlẹn rẹman ghe ele mhọn idegbere yẹ lu emhin ọbhi oleghe bhi eka iwẹnna nin ele miẹn ọbhi egbe bhi agbotu, bi sade a re unun riia ele a, la gẹn ele bhi emhin nin ele sabọ lu. Ọkhẹke nin ele ha re ehọ bhi adia yẹ mhọn izebhudu, manman nọn beji ọne agbọn nan rẹ bu ọkpẹnlẹn. Sẹyẹ, ọkhẹke nin ele ha mhọnlẹn bhi ọkhọle ghe, Osẹnobulua dẹ re ahu nin ele rẹ sabọ ziẹngbe ọkakale nọn hi ki rẹ khin nin ele ha kuẹlo da. Mhan wo manman khuẹnmhẹn ene ewanlẹn bhi ẹsọn nin ele miẹn bhi agbotu. “Bha ji ẹmhọn ikpea ne sẹ iriọ ha ti bha bhọ.”—Phil. 2:29.
ILLO 120 Ha Mhọn Ẹkẹ Nọn Fu Bọsi Jesu
a Jehova da zẹ Gidiọn nin ọle ha sun ẹbho nesọle yẹ gbega ele. Ẹghe nin emhin bha rẹ lẹkhẹ hiehie bhi otọ Izrẹl Jehova rẹ mun ọne ẹsọn nan nanlẹn. Ọ dẹ sẹ ikpe 40 nin Gidiọn lu ọne iwẹnna na. Ọkpakinọn, ọle wo kuẹlo da ọnọghọ kẹkẹ. Mhan dẹ zilo nyan ebi ijiẹmhin nọnsọle ha rẹ rẹkpa ene ewanlẹn bhi agbotu yẹ ẹlẹnan sade ele kuẹlo da ọkakale.
b Ọne ukpọta idegbere, bi nan rẹ ha lu emhin ọbhi oleghe wo khọ egbe. Ahamiẹn mhan lu emhin ọbhi oleghe, mhan ida ha ria ẹmhọn egbe man gbera beji ọkhẹke, mhan ki rẹọbhọ ghe emhin eso ribhọ nin mhan ida sabọ lu. Ahamiẹn mhan mhọn idegbere, mhan ki ha mun ekpẹn nin ẹbho yẹ ghe ele bii eria ne khua okhun gbera mhan. (Phil. 2:3) Bhi ọsi ẹmhọanta, ọria nọn mhọn idegbere yẹ lu emhin ọbhi oleghe.
c Fẹ ọne uhọnmhọn-ọta ghe nọn yọle “Ha Ga iJehova Aharẹmiẹn Ene Gbẹloghe Mun Idobolo Fiọ Mhan bhi Oga” bhi Ọkhẹughe ọsi Julai 2019, apapale 10-11, uduọle nọnzi 10-13.