UHỌNMHỌN-ỌTA NỌNZI 26
Muegbe Khẹ Ukpẹdẹ Nọnsi Jehova
“Ukpẹdẹ ọsi Jehova gene vade beji oyi rẹ vae bhi ọsasọn.”—1 THESS. 5:2.
ILLO 143 Bha Ji Mhan Re Eghọnghọn Ha Khẹ Ọne Ukpẹdẹ
EBI MHAN DA LUẸa
1. Be ọkhẹke nin mhan lu nin mhan da miuhọnmhọn bhi ukpẹdẹ nọnsi Jehova?
BAIBO ha tẹmhọn ukpẹdẹ nọnsi Jehova, ebi ọ tẹmhọnlẹn hi, ẹghe nin Jehova ha rẹ mun ibhuohiẹn bu eghian ọlẹn, yẹ miẹn ẹbho nesọle fan. Bhi ẹghe nọn gbera, Jehova mun ibhuohiẹn bu agbaẹbho eso. (Isa. 13:1, 6; Ezek. 13:5; Zeph. 1:8) Bhi ẹghe nọnsẹmhan, ukpẹdẹ nọnsi Jehova dẹ munhẹn bhi ẹghe nin ọle ha rẹ noo ene gbẹloghe rẹ mun okhọn bu Babilọn Nọn Khua. Ọne ẹghe ki kpẹn bhi okhọn Amagẹdọn. Nin mhan rẹ miuhọnmhọn bhi ọne ukpẹdẹ nin, ọkhẹke nin mhan ha muegbe ọbhi otọ nian. Jesu ji mhan lẹn ghe, ọkhẹke nin mhan wo ha muegbe ọbhi otọ khẹ “ekpokpo nọn khua.”—Matt. 24:21; Luke 12:40.
2. Be 1 Thessalonians rẹ rẹso mhan yẹ ẹlẹnan?
2 Bhi ilẹta nin ọhẹnhẹn nin Pọl nin odibo gbẹn ji Kristiẹn ne ha ribhi Tẹsẹlonaika, ọle da noo arẹkhọkhọ kẹkẹ rẹ rẹkpa ele rẹ wo ha muegbe khẹ ukpẹdẹ ibhuohiẹn nọnsi Jehova. Pọl lẹnmhin ghe ukpẹdẹ nọnsi Jehova ida sẹ vae bhi ọne ẹghe nin. (2 Thess. 2:1-3) Ọrẹyiriọ, ọle da taman ele nin ele muegbe ọbhi otọ khẹ ọne ukpẹdẹ bọsi ghe, ọ dẹ vae ewiẹ. Mhan dẹ yẹ sabọ re obọ rẹkhan ọne adia nan. Bha ji mhan fẹghe ebi Pọl rẹ gbotọ ene ẹmhọn nan fanọn an yẹ: (1) ebi ukpẹdẹ nọnsi Jehova ha rẹ vae yẹ, (2) ẹbho ne ida miuhọnmhọn bhi ọne ukpẹdẹ (3) ebi mhan ha rẹ muegbe ọbhi otọ yẹ beji mhan ha da miuhọnmhọn.
EBI UKPẸDẸ NỌNSI JEHOVA HA RẸ VAE YẸ
Pọl da noo arẹkhọkhọ kẹkẹ nin mhan ha da miẹn emhin luẹ beji ọle ha gbẹn 1 Thessalonians (Fẹ uduọle nọnzi 3 ghe)
3. Be ukpẹdẹ nọnsi Jehova ha rẹ vae yẹ beji oyi rẹ vae bhi ọsasọn? (Yẹ fẹ ifoto ghe.)
3 “Beji oyi rẹ vae bhi ọsasọn.” (1 Thess. 5:2) Ọnan hi ọhẹnhẹn bhi arẹkhọkhọ nin Pọl odibo noo rẹ tẹmhọn ebi ukpẹdẹ nọnsi Jehova ha rẹ vae yẹ. Ọsasọn oyi kẹ rẹ wo re ẹjẹje gbe, ranmhude ọne ẹghe nan ele ha rẹ sabọ de khuan ẹbho nin ele ho nin ele ra. Iriọ ukpẹdẹ nọnsi Jehova ha yẹ rẹ re iguaguako vae bhi ẹghe nin ẹbho ne bunbun bha rẹ ẹlo ọi. Uwedẹ nin emhin ha rẹ re ẹjẹje sunu bhọ dẹ han ẹbho nesi Osẹnobulua ilo. Ọkpakinọn, ele ida miẹn ugbekhuelo nọn da sunu ji eria ọbe.
4. Be ukpẹdẹ nọnsi Jehova rẹ diabe ọbalọ nọn de vẹ okhuo nọn ho nọn biẹ?
4 “Beji ọbalọ rẹ de vẹ okhuo nọn ho nọn biẹ.” (1 Thess. 5:3) Okhuo nọn hanmhan bha lẹn ẹghe nin ubiẹmhin ha rẹ munhẹn ha lu ọle tee. Ọrẹyiriọ, ọle lẹnmhin ghe ọ dẹ sunu. Ọne ẹghe ha sẹ, iguaguako ọ rẹ sunu. Iriọ ọ yẹ rẹ ba, sẹyẹ egbe ida ji ọle re ọbhi otọ ọkuẹsẹ ọle biẹ ọne ọmọn. Iriọ yẹ nọn. Mhan bha lẹn ọne ukpẹdẹ, la ọne uriagogo tee nin ukpẹdẹ nọnsi Jehova ha rẹ vae. Ọrẹyiriọ, mhan lẹnmhin ghe ọne ukpẹdẹ dẹ vae. Iguaguako ọ ha rẹ mun eria ne bha ka Jehova ehọ, sẹyẹ ele ida miuhọnmhọn.
5. Be ekpokpo nọn khua rẹ diabe ẹdẹ nọn fẹkẹ ha gbanọn an yẹ?
5 Beji ẹdẹ rẹ gbanọn an. Bhi arẹkhọkhọ nọnzi ea nin Pọl noo, ọle da yẹ tẹmhọn oyi ne ra ọsasọn. Ọkpakinọn, bhi ọne ẹghe nan, Pọl da re ukpẹdẹ nọnsi Jehova rẹ khọkhọ ẹdẹ nọn fẹkẹ ha gbanọn an. (1 Thess. 5:4) Oyi ne dọ ra ọsasọn sabọ rẹ muno emhin sẹbhọ ghe, ele bha yẹ lẹn ghe ẹghe manman ha khian. Asabọmiẹn ele bhọ iyẹ da lẹn ẹghe nin ẹdẹ ha rẹ gbanọn an, bhiriọ a ki mun ele. Iriọ ekpokpo nọn khua ha rẹ ze ẹbho ne wo ha lu emhin nin Osẹnobulua hele egbe dagbare. Mhan bha ho nin mhan diabe ele. Mhan dẹ rẹman ghe mhan muegbe khẹ ukpẹdẹ nọnsi Jehova sade mhan rẹban emhin ne iyẹẹ Osẹnobulua, yẹ ha lu “emhin rebhe ne mhẹn, ne khiale, ne yi ẹmhọanta.” (Eph. 5:8-12) Pọl da gbo kie noo arẹkhọkhọ eva ebhebhe rẹ tẹmhọn ẹbho ne ida miuhọnmhọn.
ẸBHO NELA IDA MIUHỌNMHỌN BHI UKPẸDẸ NỌNSI JEHOVA?
6. Uwedẹ nela ẹbho ne bunbun rẹ ribhi owe ẹlẹnan? (1 Thessalonians 5:6, 7)
6 Ẹbho ne wẹ. (Tie 1 Thessalonians 5:6, 7.) Pọl da re ẹbho ne ida miuhọnmhọn bhi ukpẹdẹ nọnsi Jehova rẹ khọkhọ ẹbho ne wẹ. Ele bha lẹn emhin ne sunu nẹga ele, la ebi ẹghe rẹ ha khian yẹ. Bhiriọ, ele ilẹn sade emhin kpataki sunu, la luẹ emhin bhọ. Ẹbho ne bunbun ẹlẹnan diabe ẹbho ne gene wẹ. (Rom. 11:8) Ele bha rẹọbhọ ghe emhin ne sunu bhi ọne agbọn nan ẹlẹnan rẹman ghe ọkpẹnlẹn ọsi ọne agbọn nan mhan da nyẹnlẹn, sẹyẹ ekpokpo nọn khua dẹ kẹ vae. Emhin kẹkẹ ne fidenọ bhi ọne agbọn nan sabọ rẹ re ẹbho riọ re bhi owe nin ele ye, yẹ munhẹn ha re ehọ ọbhi ẹmhọn Agbejele nin mhan ta. Ọrẹyiriọ, nin ele rẹ wo ha sasa, ene bunbun bhi ẹwẹ ele ki fikie diọbhi idia nin ele ka ye. Sẹyẹ, eso ne rẹọbhọ ghe ukpẹdẹ ibhuohiẹn dẹ ha ribhọ, riale ghe ọ sẹyẹ wo manman ree. (2 Pet. 3:3, 4) Ọkpakinọn, mhan lẹn sẹbhọ ghe ọkhẹke nin mhan manman ha babegbe beji ẹdẹ rẹ gbera.
7. Be ẹbho nin Osẹnobulua ha fuẹn an rẹ diabe edanyọn-gbe-egbe yẹ?
7 Ẹbho ne da anyọn gbegbe. Pọl nin odibo da re ẹbho nin Osẹnobulua da fuẹn an rẹ khọkhọ edanyọn-gbe-egbe. Ẹbho ne da bubu a ikẹ lẹn ebe sunu nẹga ele, sẹyẹ, ele isabọ ze emhin ne mhẹn rẹ lu. Iriọ yẹ nọn rẹji eria ọbe. Ele irẹọbhi uhọnmhunje nọnsi Osẹnobulua. Ele zẹ nin ele rẹ ha nyẹnlẹn bhi uwedẹ nọn ha si ugbekhuelo ji ele. Baibo ji Kristiẹn lẹn ghe nin ele ji ẹwanlẹn gba nin ele, yẹ ha ria eria nọnsẹn. (1 Thess. 5:6) Ọria ọkpa nọn fẹ otọ Baibo ghe da yọle, “ọria nọn ji ẹwanlẹn gba ọle bhi uhọnmhọn sabọ ku egbe ọi, ọle idọ ha ha-yo-ha-re. Sẹyẹ, ọle ria ẹmhọn nọnsẹn beji ọle ha da sabọ ze emhin nọn mhẹn rẹ lu.” Bezẹle nọn da khẹke nin mhan hẹi ha ha-yo-ha-re? Beji a ha da miẹn mhan bha dọ deba bhi ẹmhọn ahinmhin-ibo, bi ẹmhọn ne dia iriọ. Ranmhude uwedẹ nin ẹbho ha rẹ manman ha lu ilọnmhọn ahinmhin-ibo bi emhin ebhebhe ne dia inian, ọ sabọ rẹ nọghọ mhan rẹ miẹn ghe mhan bha deba ibo soso beji ukpẹdẹ nọnsi Jehova ha rẹ ha sire. Ọrẹyiriọ, ọ bha khẹke nin mhan ha kpokpo egbe sade ẹbho re ẹmhọn ahinmhin-ibo rẹ guanọ ebi re mhan bhi unun. Ẹlinmhin nọn khiale nọnsi Osẹnobulua dẹ sabọ rẹkpa mhan rẹ ha mhọn ọkhọle nọn lọre, yẹ rẹ sabọ ze emhin ne mhẹn rẹ lu.—Luke 12:11, 12.
BE IMHAN HA LU RẸ MUEGBE ỌBHI OTỌ KHẸ UKPẸDẸ NỌNSI JEHOVA?
Arẹmiẹn ẹbho wo ha lu beji ọ ghọn ele ẹlẹnan, mhan mun awegbe ẹlọnmhọn ọsi urẹọbhọ bi oyẹẹ yọ, yẹ mun ukparu ẹlọnmhọn ọsi ikhuaẹloghe yọ rẹ muegbe ọbhi otọ ha khẹ ukpẹdẹ nọnsi Jehova (Fẹ uduọle nọnzi 8 bi 12 ghe)
8. Be 1 Thessalonians 5:8 rẹ tẹmhọn emhin ne ha rẹkpa mhan rẹ ha babegbe, yẹ rẹ ha ria eria nọnsẹn? (Yẹ fẹ ifoto ghe.)
8 “Mun awegbe ẹlọnmhọn . . . bi . . . ukparu ẹlọnmhọn yọ.” Pọl da re mhan khọkhọ eyokhọnlẹn ne muegbe okhọn nọnsẹn, ne yẹ wo ha babegbe. (Tie 1 Thessalonians 5:8.) Ẹbho rẹọbhọ ghe ọkhẹke nin ọyokhọnlẹn muegbe rẹ khọn ẹghe nọn hi ki rẹ khin nin okhọn rẹ zegbere. Iriọ yẹ nọn rẹji mhan. Mhan rẹman ghe mhan muegbe ọbhi otọ khẹ ukpẹdẹ nọnsi Jehova sade mhan mun awegbe ẹlọnmhọn ọsi urẹọbhọ bi oyẹẹ yọ, yẹ mun ukparu ẹlọnmhọn ọsi ikhuaẹloghe yọ. Ene emhin nan veva dẹ wo rẹkpa mhan.
9. Be urẹọbhọ rẹ gbega mhan yẹ?
9 Awegbe ẹlọnmhọn gbega udu ọsi ọyokhọnlẹn. Urẹọbhọ bi oyẹẹ gbega ọkhọle nọnsẹmhan. Ele rẹkpa mhan rẹ wo ha ga Osẹnobulua, yẹ sun rẹkhan Jesu. Urẹọbhọ rẹkpa mhan rẹ lẹn ghe Jehova dẹ re ihaosa nin mhan bhi uwedẹ nin mhan rẹ re ọkhọle rebhe rẹ ha ga ọle. (Heb. 11:6) Ọ rẹkpa mhan rẹ sun rẹkhan Jesu nọn sun mhan aharẹmiẹn mhan kuẹlo da ọnọghọ. Mhan dẹ sabọ ziẹn urẹọbhọ nọnsẹmhan sade mhan gbẹlokotọ bhi ijiẹmhin ọsi ibhio mhan ne sun rẹkhan Jehova arẹmiẹn ele kuẹlo da ekpokpo, la bha miẹn rẹ lu. Ọnan ki rẹkpa mhan rẹ ziẹngbe ọkakale. Sẹyẹ, mhan dẹ sabọ khọn ọne okhẹnan nan rẹ wo ha khu afe, sade mhan re egbe khọkhọ ibhio mhan ne deobọre bhi iẹnlẹn beji ele ha da sabọ mun ẹmhọn Agbejele kalo.b
10. Be oyẹẹ nin mhan mhọn da Osẹnobulua bi idiake nesẹmhan rẹ rẹkpa mhan rẹ ziẹngbe yẹ?
10 Ọ yẹ wo khẹke nin mhan ha mhọn oyẹẹ beji mhan da sabọ ha babegbe, yẹ rẹ re ẹwanlẹn lu ha emhin. (Matt. 22:37-39) Oyẹẹ nin mhan mhọn da Osẹnobulua dẹ rẹkpa mhan rẹ ha tẹmhọn ọlẹn man ẹbho aharẹmiẹn ọ dẹ sabọ si ọkakale ji mhan. (2 Tim. 1:7, 8) Ranmhude mhan yẹ hoẹmhọn ẹbho ne iga Jehova, mhan wo dọnmhegbe rẹ ha guanọ ẹbho nin mhan ha tẹmhọn Osẹnobulua man bhi idunmhun nin mhan da lu ọle. Mhan bhọ re ifoni bi lẹta rẹ lu ọle. Mhan mhọnlẹn bhi ọkhọle ghe, ẹdọkpa, ene ẹbho nan dẹ fidenọ yẹ dọ ha lu emhin ne mhẹn.—Ezek. 18:27, 28.
11. Be oyẹẹ nin mhan da ibhio mhan nin mhan ko ga rẹ rẹkpa mhan yẹ? (1 Thessalonians 5:11)
11 Mhan yẹ hoẹmhọn ibhio mhan nin mhan ko ga. Mhan rẹman ghe mhan hoẹmhọn ele sade mhan “re izebhudu nin egbe, yẹ ha bọn egbe okhun.” (Tie 1 Thessalonians 5:11.) Bọsi eyokhọnlẹn ne ko ribhi ibo ọkpa bhi okhọnlẹn, mhan re izebhudu nin egbe. Bhi ọsi ẹmhọanta, ọyokhọnlẹn sabọ rẹ dobọ kuan ọyokhọnlẹn ọbhebhe nin ele ko ribhi ibo ọkpa bhi okhọnlẹn. Ọkpakinọn, ọle ida wo taan ẹlo a lu ọle. Iriọ yẹ nọn. Mhan ida wo taan ẹlo a lu emhin nọn ha ba ibhio mhan nin mhan ko ga bhi egbe, la lu haosa sade ele lu mhan khọ. (1 Thess. 5:13, 15) Mhan yẹ rẹman ghe mhan hoẹmhọn ewanlẹn ne gbẹloghe agbotu sade mhan mun ekpẹn nin ele. (1 Thess. 5:12) Ọ bha sẹ sẹbhi ukpe ọkpa nan mun agbotu nọn ribhi Tẹsẹlonaika gbọ beji Pọl gbẹn ọne lẹta nan ji ele. Asabọmiẹn ewanlẹn ne re ọne agbotu khian bha sẹ manman lẹn emhin sẹ, sẹyẹ ele wo dobọ. Ọrẹyiriọ, ọkhẹke nin ibhio ele ha mun ekpẹn nin ele. Beji ekpokpo nọn khua rẹ ha sire, asabọmiẹn mhan dẹ wo ha guanọ adia bhi obọ ewanlẹn ne ribhi agbotu nọnsẹmhan gbera ọnikhẹ. Asabọmiẹn mhan ida yẹ ha miẹn adia bhi obọ Bẹtẹ nọn ke okhun nẹ, la Bẹtẹ nọn ribhi eji mhan ye. Ọ manman khẹke nin mhan hoẹmhọn ewanlẹn ne ribhi agbotu nọnsẹmhan nian, yẹ ha mun ekpẹn nin ele. Ebe hi ki rẹ sunu, bha ji mhan wo ha noo ẹwanlẹn, ọ iyi nin mhan rẹ ha ghe eji ele ida lu nọnsẹn, ọkpakinọn, nin mhan rẹ ha yere ghe, Jehova hi ọnọn noo Jesu rẹ dia ene ikpea nan.
12. Be ikhuaẹloghe nin mhan mhọn rẹ gbega ọkhọle nọnsẹmhan yẹ?
12 Beji ukparu ẹlọnmhọn rẹ gbega uhọnmhọn ọsi ọyokhọnlẹn, iriọ ikhuaẹloghe ọsi umiẹnfan nin mhan mhọn rẹ gbega iria-eria nọnsẹmhan. Ranmhude ikhuaẹloghe nọn ziẹn nin mhan mhọn, mhan lẹn sẹbhọ ghe ihoho emhin nin ọne agbọn nan ha sabọ re nin ọria khin. (Phil. 3:8) Ikhuaẹloghe nin mhan mhọn rẹkpa mhan nin mhan hẹi dọ ha ha-yo-ha-re. Wallace bi Laurinda ne ga bhi otọ Africa dọ kere ghe ẹmhọanta ọnan khin. Bhi ẹkẹ uzana ea, inẹn Wallace da yu, sẹyẹ aba Laurinda da yu. Ranmhude emianmhẹn KOVID-19, ele bha sabọ diọbhi uwa dọ deba azagba-uwa nọnsele. Wallace da gbẹn yọle: “Ranmhude ikhuaẹloghe ọsi ariọkpanọ nin mẹn mhọn, mẹn bha ha ria ẹmhọn ebe ele diayẹ bhi ọne agbọn nan ọkuẹsẹ ele yu, sokpan mẹn da ha ria ẹmhọn ebi ele ha diayẹ sade a riọ ele kpanọ bhi agbọn ọsọgbọn. Ọne ikhuaẹloghe nan wo rẹkpa mẹn rẹ ziẹngbe ẹghe nọn hi ki rẹ khin nin ahiẹ rẹ hiẹ mun mẹn.”
13. Be imhan ha lu nin mhan da sabọ ha mhọn ẹlinmhin nọn khiale?
13 “Bha ji eranlẹn ọsi ẹlinmhin nọn khiale ha nyọn bhi egbe nọnsẹbha. Bha hẹi fuẹn ọlẹn an.” (1 Thess. 5:19) Pọl da re ẹlinmhin nọn khiale rẹ khọkhọ ọyaya nin mhan mhọn. Ahamiẹn mhan mhọn ẹlinmhin nọn khiale, ọ ki ha hu mhan bhi udu rẹ wo ha lu emhin ne mhẹn, yẹ re ọyaya ha wẹnna nin Jehova. (Rom. 12:11) Be imhan ha lu rẹ sabọ ha mhọn ẹlinmhin nọn khiale yẹ? Mhan ki ha bhii Jehova nin ọle re ọle nin mhan, ha tie Baibo, yẹ ha yo ikolo oga nin ọle re ẹlinmhin nọnsọle rẹ dia. Mhan da ha lu iriọ, mhan ki sabọ ha mhọn “ikpẹ ọsi ẹlinmhin nọn khiale.”—Gal. 5:22, 23.
Nọọn egbe ẹ, ‘Emhin nin mẹn lu be rẹman ghe mẹn guanọ nin Osẹnobulua yẹ wo ha re ẹlinmhin nọn khiale nin mẹn?’ (Fẹ uduọle nọnzi 14 ghe)
14. Be ọkhẹke nin mhan rẹban ahamiẹn mhan guanọ nin Osẹnobulua wo ha re ẹlinmhin nọn khiale nin mhan? (Yẹ fẹ ifoto ghe.)
14 Ahamiẹn Osẹnobulua re ẹlinmhin nọn khiale nin mhan, ọkhẹke nin mhan mhọn ẹwanlẹn nin mhan hẹi dọ fuẹn eranlẹn ọsi ọne ẹlinmhin an. Ẹbho ne nyẹnlẹn nọnsẹn, ne yẹ ria ẹmhọn emhin ne mhẹn Osẹnobulua re ẹlinmhin nọn khiale nan. Ọle ida re ẹlinmhin nọn khiale nin mhan sade mhan dọ ha ria ẹmhọn emhin ne gbitọn an, yẹ dọ ha lu ele. (1 Thess. 4:7, 8) Nin mhan rẹ sẹyẹ ha miẹn ẹlinmhin nọn khiale bhi obọ Osẹnobulua, ọ bha khẹke nin mhan “ha ghe ọta akhasẹ bii ebe bha lu uhọnmhọn emhin.” (1 Thess. 5:20) Ọta akhasẹ nan tẹmhọnlẹn bhi ọne ulọnlẹn nan mundia nin uhọnmhunje rebhe nin Osẹnobulua rẹ ẹlinmhin nọnsọle rẹ ji mhan lẹn, rẹ dọ sẹbhi ene tẹmhọn ukpẹdẹ nọnsi Jehova, bi ẹghe ọkike nin mhan da nyẹnlẹn. Mhan ida ha riale ghe ukpẹdẹ nọnsi Jehova, la Amagẹdọn ida vae bhi ẹghe nọnsẹmhan. Mhan re uwedẹ nin mhan rẹ nyẹnlẹn, bi “iwẹnna oga nin [mhan lu] rẹ ga Osẹnobulua” ukpẹdẹ-ukpẹdẹ rẹ rẹman ghe mhan ho nin ọne ukpẹdẹ kẹ vae, sẹyẹ mhan mhọn ọlẹn bhi ọkhọle.—2 Pet. 3:11, 12.
“GBẸLOKOTỌ BHI EMHIN REBHE”
15. Be imhan ha lu beji a ha da miẹn ghe ọta ne bha gba, bi ọta ohoghe nin Esu rẹ khian bha hiẹ mhan? (1 Thessalonians 5:21)
15 Bhi ẹghe nọn bha yẹ ree gbe nian, eghian nesi Osẹnobulua dẹ ha yọle: “Ọfure bi ugbega!” bhi uwedẹ eso. (1 Thess. 5:3) Ọta ohoghe nin Esu rẹ khian ki gba ije rebhe, yẹ re ọle hiẹ ẹbho ne bunbun. (Rev. 16:13, 14) Imhan kii? Esu ida sabọ hiẹ mhan sade mhan ‘gbẹlokotọ [la “dọnmhẹn”] emhin rebhe fẹghe.’ (Tie 1 Thessalonians 5:21; fẹ study notes ghe.) Ukpọta Grik nan zedu ọle diọbhi “gbẹlokotọ,” a noo ọle rẹ tẹmhọn uwedẹ nan rẹ gbẹlokotọ rẹ dọnmhẹn ẹlọnmhọn fẹghe nan rẹ lẹn si ọsaje gene nọn. Bhiriọ, ọkhẹke nin mhan ha dọnmhẹn emhin nin mhan họn, la tie fẹghe nin mhan rẹ lẹn si ẹmhọanta gene nọn. Ọ wo khẹke nin Kristiẹn ne ribhi Tẹsẹlonaika lu iriọ. Ọ yẹ wo khẹke nin mhan ha lu iriọ beji ekpokpo nọn khua rẹ ha sire. Nin mhan rẹ wo ha rẹọbhi emhin rebhe nin mhan họn, ọkhẹke nin mhan ha re ebi Baibo ta, bi emhin nin agbotu ji mhan lẹn rẹ fẹghe si ẹmhọanta ele gene khin. Mhan da ha lu iriọ, Esu ida sabọ re ọta ohoghe soso nin ẹbho wewe nẹga rẹ hiẹ mhan.—Prov. 14:15; 1 Tim. 4:1.
16. Ikhuaẹloghe nela mhan rebhe mhọn? Be imhan muegbe rẹ lu?
16 Mhan lẹnmhin ghe, ẹbho nesi Jehova rebhe dẹ miuhọnmhọn bhi ekpokpo nọn khua. Ọkpakinọn, ọdeọde bhi ẹwẹ mhan bha lẹn ẹdẹ nọn ha we ewiẹ. (Jas. 4:14) Aharẹmiẹn ẹlo mhan sẹbhi ekpokpo nọn khua, la mhan yumhin ọkuẹsẹ ẹghe nin, mhan lẹnmhin ghe mhan dẹ miẹn iẹnlẹn ọsi ẹdẹdẹmhẹndẹ sade mhan wo sun rẹkhan Jehova. Enanzẹle ki dọ deba Jesu bhi okhun, usun nọnkẹle ki nyẹnlẹn bhi ọne otọ nan bhi ọfubhegbe. Bha ji mhan rebhe ha ziẹn ikhuaẹloghe nin mhan mhọn, yẹ wo ha muẹgbe ọbhi otọ khẹ ukpẹdẹ nọnsi Jehova!
ILLO 150 Bu IJehova Re Nin Ọle Miẹn Uwẹ Fan
a Mhan dẹ miẹn arẹkhọkhọ kẹkẹ nan noo bhi Thessalonians nin ọhẹnhẹn uhọnmhọnlẹn nọnzi 5 nan rẹ tẹmhọn ukpẹdẹ nọnsi Jehova. Be bhọ ọne ukpẹdẹ? Be ọ ha rẹ vae yẹ? Hela ha miuhọnmhọn? Hela ida miuhọnmhọn? Be imhan ha rẹ muegbe khẹ ọle yẹ? Bhi ọne uhọnmhọn-ọta nan, mhan dẹ miẹn ewanniẹn rẹji ene inọnta nan, ye zilo nyan ẹmhọn kẹkẹ nin Pọl nin odibo noo.
b Fẹ ene usun uhọnmhọn-ọta ghe nọn yọle “They Offered Themselves Willingly.”