Hela Tẹmhọn Agbejele Nọnsi Osẹnobulua Ẹlẹnan?

Jehova de kẹ re Agbejele nọnsọle rẹ re ọkpẹnlẹn ọbhi ọnọghọ rebhe ne ribhi ọne agbọn nan ẹlẹnan. Uhọnmhunje nọn khẹke nin ẹbho rebhe họn khọnan. Jesu da taman edibo nesọle nin ele dọ ha wewe ọne uhọnmhunje nan man ẹbho. (Matthew 28:19, 20) Be Esali Jehova rẹ re obọ rẹkhan ẹmhọn nin Jesu tale yẹ?

1. Be ẹmhọn nọn ribhi Matthew 24:14 rẹ munsẹ yẹ ẹlẹnan?

Jesu yọle ghe, “ọne ọta nọn mhẹn ọsi Agbejele nan, a dẹ wewe ọle na bhi eji eria hi ki rẹ ha ye bhi ọne otọ nan rebhe.” (Matthew 24:14) Ọ manman wo re Esali Jehova ghọnghọn nin ele rẹ ha lu ọne iwẹnna nan. Mhan wo tẹmhọn Agbejele nọnsi Osẹnobulua bhi ọne otọ agbọn nan rebhe bhi urolo ne bun gbera uli. Ọne ẹsọn nan iyi obhi ẹsọn khere. Ahu nọnsi Jehova mhan rẹ ha lu ọle.

2. Be imhan rẹ wẹnna kaka yẹ rẹ tẹmhọn Osẹnobulua man ẹbho?

Mhan manman wo dọnmhegbe nin mhan rẹ tẹmhọn Osẹnobulua man ẹbho bhi eji ọ ki rẹ khin nin mhan da miẹn ele. Bọsi Kristiẹn bhi ore nin ọhẹnhẹn, mhan yẹ dọnmhegbe rẹ tẹmhọn Osẹnobulua “na bhi ukuwa rẹ sẹbhi ukuwa.” (Acts 5:42) Ọne uwedẹ nan wo rẹkpa mhan rẹ ha miẹn ẹbho ne bunbun tẹmhọn Osẹnobulua man. Ọkpakinọn, ranmhude ẹbho ne bunbun ribhọ nan ikere bhi uwa, mhan sẹyẹ tẹmhọn Osẹnobulua man ẹbho bhi ughe. Mhan wo noo isẹhoa nọn ki rẹ khin nọn zegbere rẹ tẹmhọn iJehova bi iho nọnsọle.

3. Hela ọne ẹsọn nan rẹ tẹmhọn Agbejele khẹke?

Ọkheke nin ọrebhe ne gene rẹkhan iJesu ha tẹmhọn ọne Agbejele man ẹbho. Mhan ire obọ ikpẹghẹdẹ mun ọne ẹsọn nan. Mhan manman dọnmhegbe nin mhan rẹ lu eka nin mhan ha sabọ lu bhi ọne iwẹnna, ranmhude, mhan lẹnmhin ghe, ọ dẹ re ẹbho miuhọnmhọn. (Tie 1 Timothy 4:16.) A iha mhan osa bhi ọne iwẹnna, ranmhude Baibo yọle: “Ọsọhẹ a rẹ re nin bha, bha yẹ ha re nin ẹbho ọsọhẹ.” (Matthew 10:7, 8) Arẹmiẹn ẹbho eso ika mhan ehọ, mhan sẹyẹ lu ọne iwẹnna itẹmhọn Osẹnobulua, ranmhude, uwedẹ ọkpa nọn nin mhan rẹ ga iJehova. Ọne iwẹnna yẹ re iJehova ghọnghọn.

MANMAN LẸN OTỌLE NỌNSẸN

4. Mhan manman dọnmhegbe nin mhan rẹ tẹmhọn Osẹnobulua man ẹbho rebhe

VIDIO: “Itẹmhọn Osẹnobulua bhi Eje Manman Ree” (7:33)

• Emhin nela ti uwẹ bhọ bhi ẹwẹ emhin nin Esali Jehova lu nin ele da sabọ ha tẹmhọn Osẹnobulua man ẹbho?

Tie Matthew 22:39 bi Romans 10:13-15, bha ha zilo nyan ene inọnta nan:

• Be iwẹnna itẹmhọn Osẹnobulua nin mhan lu, rẹ rẹman yẹ ghe mhan hoẹmhọn ibo mhan?

• Ẹlo nela iJehova rẹ ghe ẹbho ne tẹmhọn Agbejele?​—Fẹ ulọnlẹn 15 ghe.

5. Ene deba Osẹnobulua wẹnna mhan khin

Emhin ne sẹ sunu bhi agbaẹbho kẹkẹ rẹman ghe, Jehova dia mhan bhi ọne iwẹnna nan. Bhi ọsi ijiẹmhin, ọsodanmhẹn ọkpa, beji obhio mhan natiọle Paul bhi agbaẹbho ọsi New Zealand rẹ ha lu iwẹnna itẹmhọn Osẹnobulua, ọle da sobọ bhi odẹ ọsi okhuo ọkpa. Ọsewewiẹ bhi ọne ukpẹdẹ nin, ọne okhuo ka bhii Jehova bhi erọnmhọn nin ọle je ọria bu ọle re. Ọ bha sẹ bue gbe, obhio mhan nin Paul da sobọ bhi odẹ.

Tie 1 Corinthians 3:9, bha ha zilo nyan ọne inọnta nan:

• Be okha kẹkẹ, bọsi ọnọn sunu bhi New Zealand rẹ rẹman yẹ ghe, Jehova dia iwẹnna nọnsẹmhan?

Tie Acts 1:8, bha ha zilo nyan ọne inọnta nan:

• Bezẹle nin mhan da guanọ urẹkpa nọnsi Jehova bhi iwẹnna itẹmhọn Osẹnobulua nin mhan lu?

Uwẹ be rẹ lẹn?

Bhi ikolo oga nin mhan do bhi ẹkẹ uzana, mhan luẹ ebi a rẹ tẹmhọn Osẹnobulua man ẹbho yẹ. Ahamiẹn uwẹ sẹ yo ene ikolo nan khẹ, be uwẹ ghe ene iman-emhin yẹ?

6. Osẹnobulua hi ọnọn je mhan

Bhi ore nin ọhẹnhẹn, ẹbho da wo ha guanọ nin ele de idobolo ọbhi iwẹnna itẹmhọn Osẹnobulua. Ranmhude ọnan, ene iKristiẹn da ha noo uhi kẹkẹ ọsi gọvamẹti, yẹ ha mun ẹzọ yo ikotu, beji ele ha da miẹn otọ rẹ ha tẹmhọn Agbejele. (Philippians 1:7) Ọnin hi emhin nin Esali Jehova yẹ lu ẹlẹnan.a

VIDIO: Ebi Mhan Rẹ Khu Ọbhọ Yẹ Nin Mhan Da Miẹn Otọ Rẹ Ha Tẹmhọn Osẹnobulua (2:28)

Tie Acts 5:27-42, bha ha zilo nyan ọne inọnta nan:

• Bezẹle nin mhan ha da sẹyẹ ha tẹmhọn Osẹnobulua aharẹmiẹn a yọle nin mhan hẹi yẹ tale?​—Fẹ ulọnlẹn 29, 38, bi 39 ghe.

EBI MHAN LUẸLE

Jesu da taman ene rẹkhan ọlẹn nin ele dọ ha tẹmhọn Agbejele na bhi otọ agbọn rebhe. Jehova wo rẹkpa ẹbho nesọle rẹ ha lu ọne iwẹnna.

Uwẹ Be Yẹ Yere?

• Be Esali Jehova rẹ lu iwẹnna itẹmhọn Osẹnobulua yẹ bhi otọ agbọn rebhe?

• Be iwẹnna itẹmhọn Osẹnobulua nin mhan lu rẹ rẹman yẹ ghe mhan hoẹmhọn ibo mhan?

• Uwẹ be riale iwẹnna nọn ha sabọ re ọria ha ghọnghọn iwẹnna itẹmhọn Osẹnobulua khin? Bezẹle nin uwẹ da ta iriọ?

FẸ ENE EMHIN NAN GHE

Ghe ọne ividio nan nin uwẹ rẹ daghe ebi Esali Jehova rẹ tẹmhọn Osẹnobulua yẹ bhi agbaẹbho nin ẹbho da manman bun.

Ebi A Rẹ Lu Iwẹnna Itẹmhọn Osẹnobulua Nan Da Re Ebe Waa Yẹ bhi Paris (5:11)

Be Esali Jehova lu, nin ele da sabọ tẹmhọn Osẹnobulua man ẹbho nin okhọn khu sibhi agbaẹbho nọnsele re?

Ebi Mhan Rẹ Tẹmhọn Osẹnobulua Man Ẹbho Nin Okhọn Khu Yẹ (5:59)

Kaehọ okha ọsi obhio mhan, nin uwẹ daghe eghọnghọn nọn nabhọre, sade ọria re iẹnlẹn nọnsọle rẹ ha lu iwẹnna itẹmhọn Osẹnobulua.

Ọne Iwẹnna Nan Rẹ Mẹn Ghọnghọn (6:29)

Fẹ ẹzọ eso nan bhu nin Esali Jehova bhi ikotu, nọn re ọle lẹkhẹ nin ele rẹ ha lu iwẹnna itẹmhọn Osẹnobulua.

“Ene Tẹmhọn Agbejele Da Mun Ẹzọ Ha Khian Ikotu” (God’s Kingdom Rules!, uhọnmhọnlẹn 13)

5. Emhin wo fidenọ bhi ọne agbọn nan rẹ na bhi ukpe 1914 ha vade

Ghe ọne IVIDIO.

VIDIO: Ọne Agbọn Nan Wo Fidenọ Rẹ Na bhi Ukpe 1914 Ha Vade (1:10)

Jesu ka tale ọbhi otọ ebi emhin ha diayẹ bhi ọne agbọn nan sade ọle munhẹn ha gbẹloghe. Tie Luke 21:9-11, bha ha zilo nyan ọne inọnta nan:

• Bhi ẹwẹ ene emhin nan sounun ọlẹn bhi enan, enela uwẹ sẹ hẹnmhọnlẹn la re ẹlo uwẹ daghe?

Paul nin odibo da yẹ tẹmhọn ebi ẹbho da rẹ ha lu emhin yẹ bhi ẹghe ọkike ọsi ọne agbọn nan. Tie 2 Timothy 3:1-5, bha ha zilo nyan ọne inọnta nan:

• Enela bhi ene ikpẹ nan uwẹ sẹ daghe bhi egbe ọsi ẹbho ẹlẹnan?

6. Be imhan ha re ọhubhudu ha lu, beji a miẹn ghe Agbejele nọnsi Osẹnobulua munhẹn ha gbẹloghe bhi okhun?

Tie Matthew 24:3, 14, bha ha zilo nyan ene inọnta nan:

• Be hi iwẹnna kpataki nọn rẹman ghe Agbejele nọnsi Osẹnobulua gbẹloghe nian?

• Be uwẹ ha lu nin uwẹ da sabọ deba bhi ọne iwẹnna nan?

Agbejele nọnsi Osẹnobulua munhẹn ha gbẹloghe bhi okhun. Ọne ugbẹloghe dẹ kẹ sẹ ọne otọ nan. Ọne ẹghe bha yẹ ree hiehie. Tie Hebrews 10:24, 25, bha ha zilo nyan ọne inọnta nan:

• Be ọkhẹke nin ọdeọde bhi ẹwẹ mhan ha lu beji mhan “rẹ ha daghe ọle ghe, ọne ukpẹdẹ sire”?