Eji A Da Ne Emhin Nan Gbẹn Ọbhi Ebe ọsi Ikolo Unyẹnmhin bi Iwẹnna Oga Nọnsẹmhan
MARCH 4-10
EMHIN NE GHANLẸN NE RIBHI BAIBO | ROMANS 12-14
“Ebi A Rẹ Re Ahoẹmhọn-Egbe Ọsaje Man Yẹ”
(Romans 12:10) Bha ha re ẹjẹjẹ ba oyẹẹ ọsi ibhio nin bha mhọn da egbe. Bha ha mun ọkalo bhi ekpẹn nan ko mun nin egbe.
it-1 55
Ẹkẹ-ẹjẹjẹ
Oyẹẹ nin ibhio mhọn da egbe (Gr., phi·la·del·phiʹa, “ẹkẹ-ẹjẹjẹ nin ibhio mhọn da egbe”), ọle ọkhẹke nin mhan ha mhọn da ibhio mhan nin mhan ko ribhi ẹkẹ agbotu. (Ro 12:10; Heb 13:1; yẹ fẹ 1Pe 3:8 ghe.) Okugbe nọn ribhi ẹkẹ agbotu khẹke nọn ziẹn bọsi ọne a miẹn bhi ẹkẹ azagba-uwa. Arẹmiẹn ene ribhi ẹkẹ agbotu ka mhọn oyẹẹ nọn senian, a da sẹyẹ taman ele nin ele manman ha re ọle man.—1Th 4:9, 10.
Phi·loʹstor·gos bhi urolo iGreek nọn mundia nin “nan rẹ ha mhọn ẹkẹ-ẹjẹjẹ,” ọle a rẹ tẹmhọn eria ne manman sikẹ egbe. Sterʹgo bhi urolo iGreek a kẹ rẹ tẹmhọn ẹkẹ-ẹjẹjẹ bọsi ọne a miẹn bhi ẹkẹ azagba-uwa. Paul nin odibo da re ibhude nin Kristiẹn nin ele ha mhọn ọne ikpẹ nan. (Ro 12:10) Paul da sẹyẹ tale ghe, bhi ẹghe ọkike ọsi ọne agbọn nan, ẹbho ida yẹ ha mhọn ẹkẹ-ẹjẹjẹ (Gr., aʹstor·goi). Ọle da yẹ yọle ghe uu khẹke eria ne dia inian.—2Ti 3:3; Ro 1:31, 32.
(Romans 12:17-19) Hẹi re ọbe rẹ haosa ọbe. Emhin nọn ha mhẹn ẹbho rebhe bhi ẹlo, ọle uwẹ ha mhọn bhi ọkhọle. 18 Beji ọ ha ji uwẹ lu sẹ, ji a miẹn ghe uwẹ bi eria rebhe koko ribhi ọfure. 19 Ene imhan hoẹmhọnlẹn, bha hẹi ha lu haosa, ọkpakinọn, ze ohu obọ nin Osẹnobulua, ranmhude, a gbẹn ọle ọbhi otọ ghe: “ ‘Imẹn da sọikhi; Imẹn dẹ lu haosa,’ iriọ Jehova tale.”
w09 10/15 8 ¶3
“Uwẹ Bi Eria Rebhe Koko Ha Ribhi Ọfure”
3 Tie Romans 12:17. Paul da yọle ghe sade ẹbho zuọzuọ mhan, nin mhan hẹi lu haosa. Ọkhẹke nin mhan ha re obọ rẹkhan ọne adia nan, manman nọn, bhi ẹkẹ azagba-uwa nin ọrebhe ida ga iJehova. Ọ bha khẹke nin ọdọ la amhẹn nọn yi Kristiẹn bhi ọne azagba-uwa ha re ọta ọkhọbhunun, la emhin ọbe ọbhebhe rẹ haosa ọbe. Ọmhẹn inabhọre sade mhan re ọbe rẹ haosa ọbe. Ọne ẹmhọn bhọ ki manman ha khọ ọbhọ.
w07 7/1 24-25 ¶12-13
“Hẹi Re Ọbe Rẹ Haosa Ọbe”
12 Paul da yẹ taman mhan ebi mhan ha rẹ ha nin ẹbho rebhe lu emhin yẹ. Ọle da yọle: “Hẹi re ọbe rẹ haosa ọbe.” Ene ọta nan yẹ diẹn mun ọta nin ọle ka ta, nọn yọle: “He emhin ebe.” Be mhan ha rẹ yọle ghe mhan he emhin ebe yẹ sade mhan re ọbe rẹ haosa ọbe? Mhan ha lu iriọ, ahoẹmhọn-egbe nọnsẹmhan ki ha yi ọsi ikpunun. Paul da yọle: “Emhin nọn ha mhẹn ẹbho rebhe bhi ẹlo, ọle uwẹ ha mhọn bhi ọkhọle.” (Romans 12:9, 17) Be imhan ha rẹ re obọ rẹkhan ọne adia nan yẹ?
13 Bhi ilẹta nin Paul ka gbẹn ji Kristiẹn ne ribhi Corinth, ọle da tẹmhọn ekpokpo nin ene edibo miẹn bhi egbe. Ọle da yọle: “Mhan dọ kiẹn ughe nin ọne agbọn nan, ene ẹhi, bi eria ghe.” Ọle da yẹ yọle ghe, ẹbho ha rẹ ha lu ele emhin ọbe ele ilu haosa. (1 Corinthians 4:9-13) Iriọ yẹ nọn rẹji mhan ẹlẹnan. Ẹbho ne ribhi ọne agbọn nan ghe mhan. Ele ha daghe ghe mhan lu emhin esili arẹmiẹn a kpokpo mhan, ọ dẹ sabọ re ele ha ka mhan ehọ sade mhan tẹmhọn Agbejele man ele.—1 Peter 2:12.
(Romans 12:20, 21) Ọkpakinọn, “ahamiẹn ohanmhẹn gbe oghian uwẹ, re ebale nanlẹn le; ahamiẹn ohanmhẹn amẹn gbe ọle, sa amẹn nanlẹn wọn. Uwẹ ha lu iriọ, uwẹ ki ri iriọ ha koko igiọnmhẹn eranlẹn ọle bhi uhọnmhọn.” 21 Hẹi ji ọbe khọn uwẹ miotọ, ha re emhin esili rẹ khọn ọbe miotọ.
w12 11/15 29 ¶13
Bha Ha Re Ọkhọle Rebhe Rẹ Rẹhunmhan Egbe
13 Ẹghe eso, uwẹ dẹ sabọ rẹkpa ọria nọn lu uwẹ emhin ọbe rẹ dọ lẹn iJehova ranmhude uwedẹ nin uwẹ rẹ nin ọle lu emhin. Paul nin odibo da gbẹn yọle: “‘Ahamiẹn ohanmhẹn gbe oghian uwẹ, re ebale nanlẹn le; ahamiẹn ohanmhẹn amẹn gbe ọle, sa amẹn nanlẹn wọn. Uwẹ ha lu iriọ, uwẹ ki ri iriọ ha koko igiọnmhẹn eranlẹn ọle bhi uhọnmhọn.’ Hẹi ji ọbe khọn uwẹ miotọ, ha re emhin esili rẹ khọn ọbe miotọ.” (Rom. 12:20, 21) Emhin nọn mhẹn nin mhan lu aharẹmiẹn eria lu ọbe da imhan, dẹ sabọ re ele fidenọ ha lu emhin esili da mhan. Mhan ha re ifuẹkẹ bi itohan ha ne ele lu emhin, ele sabọ re otọ nin mhan rẹ ha man ele iBaibo. Beji ọ ki rẹ de, mhan ha re ekpẹn ne ele talọ, ọ ki re isẹhoa nin ele rẹ ha ria eria nyan iẹnlẹn esili nọnsẹmhan.—1 Pet. 2:12; 3:16.
Guanọ Emhin Oriọn ne Ghanlẹn
(Romans 12:1) Bhiriọ, mẹn re ẹjẹjẹ nọnsi Osẹnobulua rẹ bhii bha, ibhio, nin bha ha ze egbe bha re bọsi izọese nọn nyẹnlẹn, nọn khiale, nọn yẹ yẹẹ Osẹnobulua, ọnan hi oga nọn khiale nin bha re ẹwanlẹn nọnsẹbha lu.
lvs 76-77 ¶5-6
Ebi Mhan Ha Rẹ Ha Zẹ Ebi Mhan Ghe Yẹ
5 Emhin rebhe nin mhan lu rẹso oga nin mhan ga iJehova. Paul da re otọ ọle man ẹghe nin ọle rẹ yọle: “Bha ha ze egbe bha re bọsi izọese nọn nyẹnlẹn, nọn khiale, nọn yẹ yẹẹ Osẹnobulua.” (Romans 12:1) Jesu da yọle: “Uwẹ dẹ re udu rebhe, egbe rebhe, ọkhọle rebhe, bi ahu rebhe rẹ hoẹmhọn iJehova nin Osẹnobulua nọnsẹ.” (Mark 12:30) Mhan wo guanọ nin mhan re emhin ne mhẹn nẹ nesẹmhan nin Jehova ẹghe rebhe. Bhi ẹghe ọsi Izrẹl, elanmhẹn nin egbe gba nan ọle a guanọ nin ọria rẹ zọese ji Jehova. Ahamiẹn egbe bha gba nin ọne elanmhẹn, Osẹnobulua ida miẹn ọlẹn ọbhi egbe. (Leviticus 22:18-20) Iriọ yẹ nọn ẹlẹnan. Ọ dẹ yẹ sabọ sunu ghe iJehova bha yẹ ka miẹn oga nọnsẹmhan ọbhi egbe. Be ọnan ha rẹ sunu yẹ?
6 Jehova da yọle: “Ọkhẹke nin bha khia ranmhude mẹn khiamhin.” (1 Peter 1:14-16; 2 Peter 3:11) Oga nọnsẹmhan a khia, ọle ọkpa Jehova ha da miẹn ọlẹn ọbhi egbe. (Deuteronomy 15:21) Oga nọnsẹmhan ida ha yi ọnọn khiale sade mhan lu emhin ne iyẹẹ Jehova, emhin bii igboghẹ, okhọn, la emhin idunan. (Romans 6:12-14; 8:13) Ọ ida yẹẹ iJehova sade mhan ghe emhin ne dia inian. Ene emhin nan dẹ sabọ re oga nọnsẹmhan kiẹn oga nọn bha khia. Ele dẹ yẹ sabo ria ikolu nin mhan bi Jehova ko mhọnlẹn an.
(Romans 13:1) Nin ọrebhe ha degbere nin ene gbẹloghe, ranmhude ugbẹloghe iribhọ nin Osẹnobulua bha re ahu nan; ene ugbẹloghe ne ribhọ nian, Osẹnobulua mun ele gbọ.
w08 6/15 31 ¶4
Emhin Eso Nan Miẹn Tie bhi Lẹta Nan Gbẹn Ji Kristiẹn Ne Ribhi Rome
13:1—Uwedẹ nela Osẹnobulua rẹ mun “ugbẹloghe ne ribhọ nian” gbọ? Uwedẹ nin Osẹnobulua rẹ mun “ene ugbẹloghe ne ribhọ nian” gbọ hi, ọle re otọ nin ele rẹ ha gbẹloghe. Sẹyẹ, eghe eso, Osẹnobulua bhọ ka lẹn ẹbho ne ha gbẹloghe, ọkuẹsẹ ele munhẹn ha gbẹloghe. Ọta akhasẹ kẹkẹ ribhi Baibo ne rẹkpa mhan rẹ lẹn ọnan.
Baibo Nan Ha Tie
(Romans 13:1-14) Nin ọrebhe ha degbere nin ene gbẹloghe, ranmhude ugbẹloghe iribhọ nin Osẹnobulua bha re ahu nan; ene ugbẹloghe ne ribhọ nian, Osẹnobulua mun ele gbọ. 2 Bhiriọ, ọria nọn irẹ khin nọn sọtẹ da ene gbẹloghe bha re obọ bhi emhanmhan nọnsi Osẹnobulua; ene bha re obọ ọbhọ, dẹ tobele mun ibhohiẹn ji egbe ele. 3 Ranmhude eria nan mun ofẹn ele ene gbẹloghe khin, rẹji ene lu emhin ebe, ọ iyi rẹji ene lu emhin esili. Uwẹ be guanọ nin uwẹ hẹi ha mun ofẹn ene gbẹloghe? Ha lu emhin esili, uwẹ ki miẹn ogẹn bhi obọ ele. 4 Ranmhude, ọmhẹn nọnsẹ, ọle zẹle nin Osẹnobulua da re ele ọbhọ ne ha gbẹloghe uwẹ. Sokpan, uwẹ a ha lu emhin ebe, ha mun ofẹn, ranmhude ọ bha gheghe mun agbada mhọnlẹn. Ọle hi ọne Osẹnobulua jele, ọnọn sọikhi rẹ khọn ene lu emhin ebe. 5 Bhiriọ, ọ mhọn ebe manman zẹ nọn da khẹke nin bha ha mhọn idegbere, ọ iyi ranmhude ohu nọnsele ọkpa, sokpan ranmhude ọkhọle-umueria nọnsẹbha. 6 Ọnin zẹle nin bha da haosa igho uhọnmhọn; ranmhude ele hi eguọmhandia nin Osẹnobulua je nin ele mun ọne emhanmhan nan sẹ. 7 Ha ẹbho emhin ne khẹke ele: bha ha igho uhọnmhọn nin ọria nọn yọle nin bha ha ọle le; bha ha oko nin ọria nọn yọle nin bha ha ọle le; bha ha mun ofẹn ọria nọn yọle nin bha ha mun ofẹn ọlẹn; bha ha mun ekpẹn nin ọria nọn yọle nin bha ha mun ekpẹn nanlẹn. 8 Bha hẹi ha mhọn ọria soso osa gbera nan rẹ hoẹmhọn egbe; ranmhude ọria nọn hoẹmhọn ibo ọle, uhi ọle re obọ rẹkhan. 9 Ranmhude uhi yọle, “Bha hẹi gboghẹ, bha hẹi gbugbe, bha hẹi ra, bha hẹi ha mhọn ẹlobhọ,” uhi nọn irẹ khin ne ki kẹre, a ku ele gbe bhi uhi ọkpa nọn yọle: “Hoẹmhon ibo ẹ, beji uwẹ rẹ hoẹmhọn egbe nọnsẹ.” 10 Ọnọn hoẹmhọn ibo ọle ida lu emhin ebe da ọle; bhiriọ, ahoẹmhọn-egbe, ọle mun uhi sẹ. 11 Bha ha lu ọnan ranmhude bha lẹn ọne ẹghe, bha lẹn ghe ọne ẹghe sẹle nian nin bha rẹ riọ bhi owe, ranmhude umiẹnfan nọnsẹmhan ki sire nian gbera ẹghe nin mhan rẹ la munhẹn ha ga. 12 Ẹdẹ dẹ kẹ we; ọne ukpẹdẹ sire. Bhiriọ, bha ji mhan muno emhin ebiuki kua, yẹ muno emhin okhọn ọsi ẹfua yọ. 13 Bha ji mhan ha khian okhian nọn gbale bhi ọsodanmhẹn, ọ iyi bhi iluemhin ne bha gba, la nan rẹ ha da anyọn gbe egbe, ọ iyi bhi igboghẹ, la unyẹnmhin esankan, ọ iyi bhi okhọnlẹn bi ẹlobhọ. 14 Sokpan mun akpa ọsi Jesu Kristi nin Ebeanlẹn yọ. Sẹyẹ, hẹi ha mhanmhan ya khẹ emhin ne yẹẹ efun.
MARCH 11-17
EMHIN NE GHANLẸN NE RIBHI BAIBO | ROMANS 15-16
“Guanọ Iziẹngbe bi Ikoudure bhi Obọ Nọnsi Jehova”
(Romans 15:4) Emhin rebhe nan gbẹn ọbhi otọ, a gbẹn ele nin ele ha dia mhan, beji a da miẹn ghe ranmhude iziẹngbe nọnsẹmhan bi ikoudure nin mhan ha miẹn bhi Ebenọnkhiale, mhan ki ha mhọn ikhuaẹloghe.
w17.07 14 ¶11
“Deba Ene Viẹ Ha Viẹ”
11 Okha bhi Baibo nọn tẹmhọn ebi Jesu rẹ gbe eviẹ a yẹ ẹghe nin Lazarus rẹ yu, da ha yi ijiẹmhin ọkpa bhi ijiẹmhin ne bunbun bhi ẹkẹ iBaibo ne re ikoudure nin mhan. Ọnan zẹle nin Baibo da yọle: “Emhin rebhe nan gbẹn ọbhi otọ, a gbẹn ele nin ele ha dia mhan, beji a da miẹn ghe ranmhude iziẹngbe nọnsẹmhan bi ikoudure nin mhan ha miẹn bhi Ebenọnkhiale, mhan ki ha mhọn ikhuaẹloghe.” (Rom. 15:4) Ahamiẹn uwẹ ribhi akhiẹ, uwẹ dẹ sabo miẹn ikoudure bhi ene iBaibo nan:
▪ “Jehova sikẹ ẹbho nin udu nọnsele waa a; ẹbho nin oriọn nọnsele wẹghẹ a, ọle miẹn ele fan.”—Ps. 34:18, 19.
▪ “Ẹghe nin ekpokpo rẹ ha gbe mẹn ahu sotọ, uwẹ [Jehova] da re izebhudu nin mẹn yẹ ko mẹn udu re.”—Ps. 94:19.
▪ “Jesu Kristi nin Ebealẹn mhan tobọle bi Osẹnobulua nin Aba mhan, ne hoẹmhọn mhan yẹ re ikoudure ọsi ighegheghe bi ikhuaẹloghe nọn mhẹn nin mhan, rẹ na bhi obọ ifuẹkẹle nọn bha khẹke mhan, dẹ ko bha udu re, yẹ mun bha deziẹn.”—2 Thess. 2:16, 17.
(Romans 15:5) Osẹnobulua nọn ko ọria udu re, nọn yẹ rẹkpa ọria rẹ ziẹngbe dẹ rẹkpa bha nin bha ha mhọn ọkhọle bọsi Jesu Kristi,
w16.04 14 ¶5
“Ji Iziẹngbe Da Lu Iwẹnna Nọnsọle Sotọ”
5 Bu iJehova re nin ọle re ahu nin uwẹ. Jehova hi “Osẹnobulua nọn ko ọria udu re, nọn yẹ rẹkpa ọria rẹ ziẹngbe.” (Rom. 15:5) Ọle ọkpa lẹn otọ ekpokpo nin mhan miẹn bhi egbe. Ọle sẹyẹ lẹn idia nin mhan ye, bi ebi egbe dia mhan yẹ. Ranmhude ọnan, ọle ọkpa ha sabo rẹkpa mhan rẹ ha mhọn iziẹngbe. Baibo yọle: “Emhin rebhe nin ẹbho ne mun ofẹn ọlẹn guanọ, ọle re nin ele; Ọle ha họn usomhin nọnsele, ọle ki miẹn ele fan.” (Ps. 145:19) Be bhọ Osẹnobulua ha rẹ re ewanniẹn ọbhi erọnmhọn nọnsẹmhan yẹ, sade mhan bhii ọle nin ọle re ahu nin mhan rẹ ziẹngbe?
(Romans 15:13) Nin Osẹnobulua nọn re iruduba nin ọria, re eghọnghọn bi ọfure nin bha, ranmhude ibha mun udu nyan ọlẹn, nin bha da sabọ manman ha mhọn iruduba bi ahu ọsi ẹlinmhin nọn khiale.
w14 6/15 14 ¶11
“Ọkhẹke Nin Uwẹ Hoẹmhọn IJehova Nin Osẹnobulua Nọnsi Uwẹ”
11 Jehova ‘re iruduba ọsi aribhọ ọsi ighegheghe nin mhan.’ (Rom. 15:13) Ọne iruduba nan nin Osẹnobulua re nin mhan rẹkpa mhan rẹ ha mhọn iziẹngbe sade mhan miẹn edọnmhẹn. Enanzẹle ne ziẹngbe sẹbhi ọkpẹnlẹn dẹ deba iJesu gbẹloghe bhi ẹgua-okhun. (Rev. 2:10) Ene ga nọnsẹn, ne ha nyẹnlẹn bhi ọne otọ nan, dẹ nyẹnlẹn bhi otọ ọfubhegbe bhi ighegheghe. (Luke 23:43) Ọne ive nan bha be ti mhan bhọ? Eghọnghọn bi ọfure bha be vuọn udu nọnsẹmhan rẹ lẹn ọnan? Oyẹẹ nin mhan mhọn da Osẹnobulua nọn re “ẹsele ne mhẹn rebhe bi ẹsele ne gbale rebhe” nin mhan, bha be tuẹn okhun?—Jas. 1:17.
Guanọ Emhin Oriọn ne Ghanlẹn
(Romans 15:27) Bhi ọsi ẹmhọanta, ọ yẹẹ ele rẹ lu iriọ. Gene-gene eluosa ele khin rẹji ele; ahamiẹn ene agbaẹbho le bhi emhin oriọn nọnsele, ọ yẹ khẹke nin ene agbaẹbho yẹ re emhin nin ele mhọn rẹ ha ele osa.
w89 12/1 24 ¶3
Oyẹẹ Ọsaje Ibha Gene Mhọn?
Bhi ọsi ẹmhọanta, ọkhẹke nin Kristiẹn ne iyi Jew re obọ kpa iKristiẹn nin ibhokhan iJew. Ọ da wo manman khẹke, ranmhude iKristiẹn ne ribhi Jerusalem ka yẹ rẹkpa ele. Kristiẹn ne ribhi Jerusalem, ele tẹmhọn Osẹnobulua man ele. Bhi Baibo natiọle The New English Bible, inian a rẹ gbẹn ẹmhọn nin Paul ta bhi ọne ulọnlẹn nan: “Ahamiẹn ene iKristiẹn nin ibhokhan iJew tẹmhọn Osẹnobulua man ene iyi Jew, ọkhẹke nin ene iyi Jew re ebi ele mhọn rẹ re obọ kpa ibhokhan iJew.”—Romans 15:27.
(Romans 16:25) Bhi inian, rẹji Ọnọn ha sabọ mun bha ziẹn ranmhude ọta nọn mhẹn nin mẹn ta, bi ẹmhọn Jesu Kristi nin mẹn wewe, ranmhude arẹman ọsi ọne ọta ẹkhokho nan re nẹko bhi ẹghe nọn rele
it-1 858 ¶5
Nan Rẹ Lẹn Ebe Ha Sunu, Nan Rẹ Zẹ Ọria Ọbhi Otọ
Mezaya, la Jesu Kristi, ọle hi ọne ikpẹ nan vele ghe, obọ ọle ẹbho rebhe ne khiale bhi ọne otọ nan ha da miẹn erọnmhọn. (Ga 3:8, 14) Ẹghe nin Adam bi Eve rẹ sọtẹ da iJehova, ọle a ka rẹ sounun bhi ọne ikpẹ nan, sokpan a bha sẹ biẹ Abel ẹghenin. (Ge 3:15) Ikpe 4,000 gbera fo a kuẹ dọ gbe otọ ọle fanọn an ebi ọne ikpẹ nan mundia nan. Bhi ọsi ẹmhọanta, a gene wo re ẹmhọn ọne ikpẹ nan nẹko bhi ikpe ne bunbun.—Ro 16:25-27; Eph 1:8-10; 3:4-11.
Baibo Nan Ha Tie
(Romans 15:1-16) Ọkhẹke nin mhan ne ziẹnlẹn ha rẹkpa ene bha ziẹn bhi eji ele da wẹghẹ, ọ iyi nin mhan rẹ wo ha lu emhin nọn yẹẹ mhan ọkpa. 2 Bha ji ọdeọde bhi ẹwẹ mhan ha lu emhin nọn ha ti ibo ọle bhọ, emhin nọn ha mhẹn ọle bhi egbe, nọn ha tuẹn ọlẹn okhun. 3 Ranmhude Jesu Kristi bhọ bha ha lu emhin nọn yẹẹ egbe ọle ọkpa, sokpan beji a rẹ gbẹn ọlẹn, a da yọle: “Ezuọzuọ nin ele ha zuọzuọ uwẹ da rẹso mẹn bhi egbe.” 4 Emhin rebhe nan gbẹn ọbhi otọ, a gbẹn ele nin ele ha dia mhan, beji a da miẹn ghe ranmhude iziẹngbe nọnsẹmhan bi ikoudure nin mhan ha miẹn bhi Ebenọnkhiale, mhan ki ha mhọn ikhuaẹloghe. 5 Osẹnobulua nọn ko ọria udu re, nọn yẹ rẹkpa ọria rẹ ziẹngbe dẹ rẹkpa bha nin bha ha mhọn ọkhọle bọsi Jesu Kristi, 6 Nan da miẹn ghe ibha rebhe ki kugbe re unun ọkpa rẹ ha re ogẹn ji Osẹnobulua nin Aba iJesu Kristi nin Ebeanlẹn mhan. 7 Bhiriọ, bha ha miẹn ẹbho ọbhi egbe beji Jesu Kristi rẹ miẹn bha ọbhi egbe, bhiriọ bha ki ha re ogẹn ji Osẹnobulua. 8 Ranmhude mẹn taman ibha ghe Jesu Kristi da ha ga ẹbho nan ruẹle ranmhude ẹmhọanta nọnsi Osẹnobulua, nan da sabọ fẹ otọ ive nin Ọle vele nin aba ele odede, 9 sẹyẹ, nin ene agbaẹbho sabọ re ogẹn ji Osẹnobulua ranmhude itohan nọnsọle. Beji a rẹ gbẹn ọlẹn bhi otọ: “Ọle zẹle mẹn ha da ji ene agbaẹbho lẹn ghe mẹn lẹn uwẹ, sẹyẹ, mẹn dẹ so illo rẹ gẹn elin nọnsẹ.” 10 Ọle da yẹ yọle: “Ha ghọnghọn, ibha nin agbaẹbho, bi ẹbho nesọle.” 11 Ọle da sẹyẹ yọle: “Bha gẹn Jehova, ibha nin agbaẹbho, bha ji ẹbho rebhe gẹn ọlẹn.” 12 Isaiah da yẹ yọle: “Ọria dẹ na bhi ulin uwa nọnsi Jesʹse vae, ọnọn ha dọ gbẹloghe agbọn; ọle agbọn rebhe ha mun udu nyan.” 13 Nin Osẹnobulua nọn re iruduba nọn ọria, re eghọnghọn bi ọfure nin bha ranmhude nin bha rẹ mun udu nyan ọlẹn, nin bha da sabọ manman ha mhọn iruduba bi ahu ọsi ẹlinmhin nọn khiale. 14 Ibhio mẹn, mẹn wo rẹọbhọ ghe ibha wo mhọn ikpẹ esili, ibha wo mhọn ilẹn-otọ-emhin rebhe, bi ibha wo yẹ sabọ re ibhude nin egbe. 15 Ọrẹyiriọ, mẹn gbẹn ebe ne bunbun rẹ tẹmhọn eso man ibha, nin mẹn da sabọ kie ye bha ele re, ranmhude itohan nọn bha khẹke nin mẹn miẹn bhi obọ Osẹnobulua 16 nin mẹn rẹ ha yi ọguọmhandia ọsi Jesu rẹji ene agbaẹbho. Iwẹnna nọn khiale nan rẹ ta ọta nọn mhẹn nọnsi Osẹnobulua, ọle mẹn lu, nan da miẹn ene agbaẹbho nan ki dọ kiẹn izọese nan miẹn ọbhi egbe, nin ẹlinmhin nọn khiale kpe khia.
MARCH 18-24
EMHIN NE GHANLẸN NE RIBHI BAIBO | 1 CORINTHIANS 1-3
“Ọria Ọriọn Uwẹ Khin La Ọria Efun?”
(1 Corinthians 2:14) Ọkpakinọn, oria efun ika miẹn emhin ọsi ẹlinmhin nọnsi Osẹnobulua ọbhi egbe, ranmhude, emhin nin ẹwanlẹn iye nọn rẹji ọle; ọle ida sabọ lẹn ele, ranmhude, uwedẹ ọsi oriọn a rẹ fẹ otọ ọle ghe nọnsẹn.
Uwedẹ Nela Ọria Nọn Mun Oga Mhọn Nọnsẹn Rẹ Lu Emhin?
4 Be ọria nọn khu ọbhi ilọnmhọn efun egbe rẹ lu emhin yẹ? Ilọnmhọn efun egbe, ọle ọne agbọn nan mun kalo ha khu. Paul da tale ghe, ọne ọkhọle nan rẹ mun ọsi efun egbe kalo, ọle eria ne mhọn akan-ẹho mhọnlẹn. (Eph. 2:2) Ọne ọkhọle nan zẹle ẹbho ne bunbun ida guanọ nin ele dikẹ, bhiriọ, ele ki wo ha lu beji ẹbho nekẹle lu. Ọsi efun egbe ele mun kalo. Ranmhude ọnan, emhin nọn iki rẹ khin nọn na ẹbho bhi ọkhọle, ọle ẹbho ne bunbun lu ẹlẹnan, ele izẹwẹ dọnmhegbe nin ele rẹ rẹkhan adia nọnsi Osẹnobulua. Ebi ọle ha rẹ hẹn usi yẹ, la ebi ọle ha rẹ fe yẹ, ọle ọria nọn khu ọbhi ilọnmhọn efun egbe ria ẹmhọnlẹn ẹghe rebhe. Ọta nọnsọle ọkpa ọle guanọ nọn munsẹ.
5 Uwedẹ ọbhebhe nin mhan ha rẹ sabọ lẹn eria ne khu ọbhi ilọnmhọn efun egbe hi, ikpẹ ne imhẹn nin ele rẹman. (Gal. 5:19-21) Lẹta nin ọhẹnhẹn nin Paul gbẹn ji agbotu nọn ribhi Corinth da tẹmhọn ikpẹ eso nin ọria nọn dia iriọ mhọnlẹn. Ene ikpẹ hi: ele ki ha deba ibo, ele ki ha si ozughu bi ovan, ele ki ha mun ibhio ele yo ikotu, ele imun ekpẹn nin ene ribhi ihe, ele ki ha le ebale yẹ da anyọn gbe egbe. Ele ha miẹn edọnmhẹn, ele ida zẹwẹ ziẹngbe hiehie, ele ki wo de. (Prov. 7:21, 22) Jude da tale bhi Baibo ghe, eso dẹ dere bhi oga.—Jude 18, 19.
(1 Corinthians 2:15, 16) Sokpan, ọria ọriọn fẹ otọ emhin rebhe ghe nọnsẹn, ọkpakinọn, ọria soso ifẹ ọle tobọle ghe. 16 “Họla sẹ sabọ lẹn ọkhọ nọnsi Jehova, nin ọle ha da dọ man Ọle emhin?” Ọkpakinọn, mhan mhọn ọkhọ nọnsi Kristi.
Uwedẹ Nela Ọria Nọn Mun Oga Mhọn Nọnsẹn Rẹ Lu Emhin?
6 Uwedẹ nela ọria nọn mun oga mhọn nọnsẹn rẹ lu emhin? Eria ne mun oga mhọn nọnsẹn, ẹmhọn Osẹnobulua ọle ele mun kalo ẹghe rebhe. Ele ki ha dọnmhegbe nin ele rẹ ha re egbe khọkhọ Osẹnobulua. (Eph. 5:1) Ọnan rẹman ghe uwedẹ nin Jehova rẹ ghe emhin, ọle ele rẹ ghe emhin. Ele wo deba iJehova muobọ. Ele dọnmhegbe nin ele rẹ nyẹnlẹn rẹkhan adia nọnsi Jehova. (Ps. 119:33; 143:10) Eria ne mun oga mhọnlẹn nọnṣen, ele ire ikpẹ ne imhẹn man, ikpẹ ọsi ẹlinmhin nọn khiale, ọle ele rẹman. (Gal. 5:22, 23) Ọria nin ẹmhọn ẹki ti ọle bhọ, nọn ire ẹki nọnsọle khiẹn, ọle hi ọria nọn lẹn ẹlo ẹki. Bhiriọ, ọria nin ẹmhọn oga ti ọle bhọ, nọn ire ẹmhọn oga khiẹn, ọle hi ọria nọn mun oga mhọn nọnsẹn.
Uwedẹ Nela Ọria Nọn Mun Oga Mhọn Nọnsẹn Rẹ Lu Emhin?
15 Be bhọ mhan ha rẹ sabọ re egbe khọkhọ iJesu yẹ? Bhi 1 Corinthians 2:16, Baibo da yọle nin mhan ha mhọn “ọkhọle nọnsi Kristi.” Romans 15:5 da yẹ yọle nin mhan “ha mhọn ọkhọle bọsi Jesu.” Nin mhan rẹ sabọ diabe iJesu, ọkhẹke nin mhan lẹn uwedẹ nin ọle rẹ ria eria, ebi emhin dia ọle yẹ bhi egbe, bi uwedẹ nin ọle rẹ lu emhin, mhan ki yẹ ha re egbe khọkhọ ọle bhi ene uwedẹ nan. Ikolu nin ọle bi Osẹnobulua ko mhọnlẹn, ọle Jesu mun kalo gbera emhin rebhe. Mhan ha re egbe khọkhọ iJesu, mhan ki sabọ diabe iJehova. Ọnan zẹle nọn da yi emhin kpataki nin mhan rẹ ha ria eria beji Jesu rẹ ha ria eria.
Guanọ Emhin Oriọn ne Ghanlẹn
(1 Corinthians 1:20) Ọne okpea nọn mhọn ẹwanlẹn bho? Ọne scribe bho? Ọne ọria nọn gbugan bhi ọne agbọn nan bho? Osẹnobulua bha be re ẹwanlẹn ọsi ọne agbọn nan de uhuki a?
it-2 1193 ¶1
Ẹwanlẹn
Ọne agbọn nan da he emhin rebhe nin Osẹnobulua nabhi obọ iJesu re nin ele, ranmhude, bhi ẹlo nọnsele, emhin uhuki nọn. Arẹmiẹn ene gbẹloghe sabọ bhohiẹn nọnsẹn, ele da bhohiẹn eku gbe iJesu yẹ gbe ọle a. (1Co 1:18; 2:7, 8) Sokpan Osẹnobulua da re ẹwanlẹn ọsi ọne agbọn nan rẹ de uhuki a. Ọle da noo ikpea nan re ẹlo gbe a, ne bha yẹ sẹ emhin soso bhi ọne agbọn nan rẹ mun iho nọnsọle sẹ, nin ọle rẹ re ẹkhọle rẹ lo ene yọle ghe ele mhọn ẹwanlẹn bhi ọne agbọn nan. (1Co 1:19-28) Paul da ye iKristiẹn ne ribhi Corinth re ghe, “ẹwanlẹn ọsi ọne agbọn nan,” bi “ọsi ene gbẹloghe bhi ọne agbọn nan” dẹ kiẹn ihoho. Ọnan rẹman ghe ẹmhọn ẹwanlẹn ọsi ọne agbọn nan bha deba emhin nin ọle ha man ẹbho le. (1Co 2:6, 13) Ọle da sekha nin Kristiẹn ne ribhi Colossae nin ele rẹban iman-emhin ọsi eria [phi·lo·so·phiʹas, ọnin hi, nan rẹ hoẹmhọn ẹwanlẹn] bi ọta ohoghe nin ẹbho ta.—Col 2:8; yẹ fẹ ulọnlẹn 20-23 ghe.
(1 Corinthians 2:3-5) Mẹn da re uwẹghẹmhin, ofẹn, bi umun-linlẹn rẹ bu ibha re; 4 ọta ọhubhudu nin mẹn ha ta bi emhin nin mẹn ha man iyi ẹwanlẹn ọsi eria, sokpan ahu ẹlinmhin nọn khiale rẹkpa mẹn, 5 nan da miẹn ibha mun urẹọbhọ nọnsẹbha nyan ahu nọnsi Osẹnobulua, ọ iyi ẹwanlẹn ọsi eria.
w08 7/15 27 ¶6
Emhin Eso Nan Miẹn Tie bhi Lẹta Nan Gbẹn Ji Kristiẹn Ne Ribhi Corinth
2:3-5. Agbaẹbho nan da man iman-emhin ọsi ene iGreek, ọle agbaẹbho ọsi Corinth ha khin. Asabọ miẹn ghe, ẹghe nin Paul rẹ ha tẹmhọn Osẹnobulua bhi enin, ofẹn da ha mun ọlẹn si ọle dẹ sabọ talọ bhi uwedẹ nọn ha rẹso ene ẹbho bhi ọkhọle. Ọrẹyiriọ, ọle bha ji uwẹghẹmhin la ọfẹn nin ọle rẹ ha mhọnlẹn da de idobolo ọbhi iwẹnna itẹmhọn Osẹnobulua nin ọle lu. Iriọ yẹ nọn rẹji mhan ẹlẹnan. Ọkhẹke nin mhan hẹi ji ofẹn eria la emhin soso de idobolo ọbhi iwẹnna itẹmhọn Osẹnobulua nin mhan lu. Bọsi Paul, ọkhẹke nin mhan mun udu nyan iJehova nin ọle rẹkpa mhan.
Baibo Nan Ha Tie
(1 Corinthians 1:1-17) Paul, nan tiele nọn dọ kiẹn odibọ nọnsi Jesu Kristi ranmhude iho nọnsi Osẹnobulua, bi Sosʹthe·nes nin obhio mhan, 2 rẹji agbotu nọnsi Osẹnobulua nọn ribhi Corinth, rẹji bha nan kpe khia, ne deba iJesu Kristi ribhi okugbe, nan tiele ne dọ ha yi eria ne khiale, yẹ rẹ deba ọrebhe ne tie elin nọnsi Jesu Kristi nin Ebeanlẹn mhan, Ebeanlẹn nọnsele bi Ebeanlẹn nọnṣemhan: 3 Bha ha mhọn itohan nọn bha khẹke bi ọfure nọn na obọ Osẹnobulua nin Aba mhan bi Jesu Kristi nin Ebeanlẹn mhan vae. 4 Mẹn wo khuẹnmhẹn Osẹnobulua nọnsẹmhẹn nin ibha ẹghe rebhe, ranmhude itohan nọn bha khẹke nin Osẹnonulua na obọ iJesu Kristi re nin bha; 5 ranmhude bhi uwedẹ rebhe bha da wo miẹn elele bhi obọ ọle, nin bha rẹ sabọ ha talọ nọnsẹn yẹ mhọn ilẹn-otọ-emhin nọn gbale, 6 beji ẹmhọn ọsali rẹji Kristi rẹ deziẹn bhi ẹwẹ bha, 7 nan da miẹn ibha bha ha guanọ emhin soso, beji bha rẹ ha khẹ ẹghe nan ha rẹ re Jesu Kristi nin Ebeanlẹn mhan man. 8 Ọle dẹ yẹ mun ibha deziẹn rẹ sẹbhi ọkpẹnlẹn, nan da miẹn ibha bha ha mhọn emhin ebe soso bhi egbe bhi ukpẹdẹ ọsi Jesu Kristi nin Ebeanlẹn mhan. 9 Osẹnobulua ihiẹ ọria, obọ ọle a da tie bha nin bha dọ deba Ọmọn nọnsọle nin Jesu Kristi nin Ebeanlẹn mhan. 10 Ẹghe nan nian, mẹn taman bha, ibhio, rẹ na elin ọsi Jesu Kristi nin Ebeanlẹn mhan, nin bha rebhe koko ha ta ọta ọkpa, nin iwa-egbea hẹi ha ribhi ẹwẹ bha, sokpan nin bha rebhe koko ha ribhi okugbe, yẹ ha mhọn ọkhọ ọkpa, yẹ ha ria eria bhi uwedẹ ọkpa. 11 Ibhio mẹn, ẹbho eso bhi uwa ọsi Chloʹe tẹmhọn bha man mẹn ghe, ozukhu ribhi ẹwẹ ibha. 12 Ebi mẹn re ọle ta khọnan, ọdeọde bhi ẹwẹ bha yọle: “Ibo ọsi Paul mẹn ye,” “Sokpan ọsi A·polʹlos mẹn ye,” “Sokpan ọsi Ceʹphas mẹn ye,” “Sokpan ọsi Kristi mẹn ye.” 13 Kristi ibe yi ọkpa? A be gbe iPaul a bhi okhun eran ranmhude ibha? La elin nọnsi Paul ibha be rẹ mianmẹn? 14 Mẹn khuẹnmhẹn Osẹnobulua ghe ọ iyi mẹn gbe ibha soso ruẹ bhi amẹn gbera Crisʹpus bi Gaʹius. 15 Bhiriọ, ọria soso ida yọle ghe elin mẹn ibha rẹ mianmẹn. 16 Ehe, Mẹn yẹ re amẹn nin azagba-uwa ọsi Stephʹa·nas. Rẹji enekẹle, mẹn bha lẹn si mẹn yẹ re amẹn nin ele. 17 Ranmhude Kristi je mẹn, ọ iyi nin mẹn dọ re amẹn nin ẹbho, sokpan nin mẹn dọ wewe ọta nọn mhẹn; ọ iyi nin mẹn dọ ha ta ọta nọn mhẹn bhi ehọ, nan hẹi dọ miẹn ghe oran iloya ọsi Kristi dọ kiẹn ihoho.
MARCH 25-31
EMHIN NE GHANLẸN NE RIBHI BAIBO | 1 CORINTHIANS 4-6
“Obhi Iyist Khere, Ọle Re Ibrẹdi Huẹ”
(1 Corinthians 5:1, 2) Bhi ọsi ẹmhọanta, a taman mẹn ẹmhọn igboghẹ nọn ribhi ẹwẹ bha, igboghẹ nọn sẹriọ bhọ iribhi ẹwẹ ẹbho ne iga Osẹnobulua—nin okpea rẹ deba okhuo aba ọle ha nowẹ. 2 Ibha be re ọle ha dẹgbọ? O bha be khẹke nin bha ha lu akhiẹ, nan da miẹn a re ọne okpea nọn lu ọne emhin nan sibhi ẹwẹ bha re?
(1 Corinthians 5:5-8) ibha dẹ mun okpea nọn dia iriọ ne Esu, nọn gbe ọle khuelo bhi efun, nan da miẹn ọne oriọn miẹn umiẹnfan bhi ẹdẹ ọsi Ebeanlẹn mhan. 6 Idẹgbọ nọnsẹbha bha gba. Ibha bha be lẹn ghe obhi iyist khere, ọle re ibrẹdi huẹ? 7 Bha mun iyist nọn dọmanlẹn fia nin bha da sabọ ha yi brẹdi ọsọgbọn, nan da miẹn ibha bha huẹ. Bhi ọsi ẹmhọanta, a re Kristi nin ohuan Anagbera nọnsẹmhan rẹ zọese. 8 Bhiriọ, bha ji mhan ha lu ọne iluemhin, ọ iyi iyist nọn dọmanlẹn, la iyist ọsi emhin ebe mhan ha rẹ ha lu ọle, ọkpakinọn, ibrẹdi nọn ihuẹ ọsi ẹkẹata bi ẹmhọanta mhan ha rẹ ha lu ọle.
(1 Corinthians 5:13) nin Osẹnobulua ha bhohiẹn ene ribhi ole? “Re ọria-ọbe nọn ribhi ẹwẹ bha kie.”
it-2 230
Iyist
Iyist Paul yẹ rẹ lu ijiẹmhin, ẹghe nin ọle rẹ taman agbotu nọn ribhi Corinth ghe nin ele khu okpea nọn gboghẹ fia bhi agbotu nọnsele. Ọle da yole: “Ibha bha be lẹn ghe obhi iyist khere, ọle re ibrẹdi huẹ? Bha mun iyist nọn dọmanlẹn fia nin bha da sabọ ha yi brẹdi ọsọgbọn, nan da miẹn ibha bha huẹ. Bhi ọsi ẹmhọanta, a re Kristi nin ohuan Anagbera nọnsẹmhan rẹ zọese.” Ọle da sẹ yẹ re ebi ọne iyist mundia nan man ele. Ọle da yọle: “Bhiriọ, bha ji mhan ha lu ọne iluemhin, ọ iyi iyist nọn dọmanlẹn, la iyist ọsi emhin ebe mhan ha rẹ ha lu ọle, ọkpakinọn, ibrẹdi nọn ihuẹ ọsi ẹkẹata bi ẹmhọanta mhan ha rẹ ha lu ọle.” (1Co 5:6-8) Iluemhin ọsi Eka Nọn Ihuẹ nin ibhokhan iJew lu, bhi ẹghe nan wo la lu iluemhin Anagbera fo, ọle Paul ha mhọn bhi ọkhọle ẹghe nin ọle rẹ ta ọne ọta nan. Beji obhi iyist rẹ re ibrẹdi huẹ, iriọ agbotu a rẹ kiẹn agbotu ne bha khia bhi ẹlo nọnsi Jehova sade ele bha khu ọne okpea nọn gboghẹ fia bhi ẹwẹ ele. Ọkhẹke nin ele re ọne ọria sibhi ẹwẹ ele re, beji ibhokhan Izrẹl irẹ zẹ iyist obọ bhi uwa nọnsele sade ele lu Iluemhin ọsi Eka Nọn Ihuẹ.
it-2 869-870
Esu
Be bhọ a re ọle ta nan rẹ ‘mun ọria ne Esu, nọn gbe ọle khuelo bhi efun’?
Ẹghe nin Paul rẹ taman agbotu nọn ribhi Corinth ebi ele ha lu da ọkpea nọn ne okhuo aba ọle ha nowẹ, ọle da yọle: “Ibha dẹ mun okpea nọn dia iriọ ne Esu, nọn gbe ọle khuelo bhi efun.” (1Co 5:5) Uhi ọnan khin rẹji ele, nin ele khu ọne ọria fia bhi agbotu. Nin ele hẹi yẹ deba ọne ọria ha lu emhin soso. (1Co 5:13) Uwedẹ nan rẹ mun ọne ọria nin Esu hi ghe, a khu ọne ọria fia bhi agbotu nabhi agbọn nin Esu gbẹloghe. Beji obhi iyist rẹ re ibrẹdi huẹ, ọne okpea dẹ sabọ ria ọne agbotu a. A ha khu ọne okpea fia, ọne agbotu ki kpe khia. (1Co 5:6, 7) Emhin nọn sẹbhi inian Paul yẹ lu da iHymenaeus bi Alexander, ranmhude ele mun urẹọbhọ nọnsele fia yẹ dọ wẹghẹ bhi uwedẹ oriọn.—1Ti 1:20.
(1 Corinthians 5:9-11) Bhi ilẹta nin mẹn gbẹn ji bha, mẹn da taman bha nin bha hẹi ha ne eria ne gboghẹ muobọ, 10 ọ iwo yi eria rebhe ne gboghẹ bhi ọne agbọn nan, la ene mhọn ẹlobhọ, la ene mun ibo ele lu, la ene ga ẹbọ. Ọ a ha yi iriọ, ibha dẹ kpanọ bhi ọne agbọn nan. 11 Ọkpakinọn, mẹn ki gbẹn ji bha nian nin bha hẹi nin ọria soso muobọ, nọn yọle ghe obhio mhan ọle khin, ọkpakinọn, ọle gboghẹ, la ọle mhọn ẹlobhọ, la ọle ga ẹbọ, la ọle zẹ ọkhọbhunun, la ọle da anyọn gbe egbe, la ọle mun ibo ọle lu. Bha bhọ hẹi deba ọria nọn dia iriọ le ebale.
lvs 241, endnote
Nan Rẹ Khu Ọria Fia bhi Agbotu
Ahamiẹn ọria nọn lu emhin ọbe bha ka fidenọ ha re obọ rẹkhan emhanmhan nọnsi Jehova, ọle ida yẹ ha yi ọkpa bhi ẹwẹ ene ribhi ẹkẹ agbotu. Ọkhẹke nan khu ọne ọria nọn dia inian fia bhi agbotu. A ha khu ọne ọria fia fo, ọ bha khẹke nan ha ne ọne ọria lu emhin la deba ọne ọria ha talọ. (1 Corinthians 5:11; 2 John 9-11) Emhanmhan nan rẹ khu ọria nọn lu emhin ọbe fia bhi agbotu, gbega elin nọnsi Jehova bi agbotu nọnsẹmhan. (1 Corinthians 5:6) Mhan ha khu ọria nọn lu emhin ọbe fia bhi agbotu, onan ki rẹkpa ọne ọria rẹ kie sabọ bu iJehova re.—Luke 15:17.
▸ Uhọnmhọnlẹn 3, uduọle 19
Guanọ Emhin Oriọn ne Ghanlẹn
(1 Corinthians 4:9) Ọ dia mẹn ghe, Osẹnobulua rẹ mhan nin etuegbe kiẹn ene kike nan ha rẹman bii ikpea nan bhohiẹn uu gbe, ranmhude mhan dọ kiẹn ughe nin ọne agbọn nan, ene ẹhi, bi eria ghe.
w09 5/15 24 ¶16
Ẹhi—Ẹlinmhin Ne Rẹkpa Ẹbho
16 Ẹhi daghe iKristiẹn ne miẹn ekpokpo bhi egbe. (1 Cor. 4:9) Ọ manman ti ene ẹhi bhọ sade mhan ga nọnsẹn. Ele sẹ yẹ ghọnghọn sade ọria nọn lu emhin ọbe fikie bu iJehova re. (Luke 15:10) Ene ẹhi yẹ daghe ebi Kristiẹn nin ikhuo rẹ nyẹnlẹn nọnsẹn yẹ. Baibo yọle “nin ikhuo ha mun iyaman ọsi ekpẹn ọbhi uhọnmhọn nọnsele, ranmhude ene ẹhi.” (1 Cor. 11:3, 10) Ẹmhọanta nọn, ọ wo manman ti ene ẹhi bhọ rẹ daghe iKristiẹn nin ikhuo, bi ibhio mhan nekẹle ne ribhi agbotu re obọ rẹkhan emhanmhan ọsi agbotu. Uwedẹ nin ibhio mhan nan rẹ re obọ rẹkhan emhanmhan ọsi agbotu rẹkpa ene ẹhi rẹ ha yere ghe, ọkhẹke nin ele yẹ ha lu irio.
(1 Corinthians 6:3) Ibha bha be lẹn ghe imhan ha bhohiẹn ẹhi? Ahamiẹn iriọ nọn, iẹnlẹn ọsi ọne agbọn nan kii?
it-2 211
Uhi
Uhi Nan Gbe Nin Ẹhi. Arẹmiẹn ghe ene ẹhi khua okhun nẹ eria, odotọ uhi nọnsi Osẹnobulua ele sẹyẹ ye. (Heb 1:7, 14; Ps 104:4) Jehova bhọ yẹ gbe uhi nin Esu nọn nanlẹn suan yẹ de ọle obọ i bhi emhin eso. (Job 1:12; 2:6) Michael nọn mun ọkalo bhi ene ẹhi lẹn ghe Jehova hi Ọbhohiẹn Nọn Kokhun Nẹ. Ọnan zẹle nin ọle da taman Esu yọle: “Jehova dẹ fi uwẹ unun.” (Jude 9; yẹ fẹ Zec 3:2 ghe.) Osẹnobulua nin Jehova mun ene ẹhi rebhe bhi odotọ ugbẹloghe nọnsi Jesu. (Heb 1:6; 1Pe 3:22; Mt 13:41; 25:31; Php 2:9-11) Ọnan zẹle Jesu da sabọ ji ẹhi ọkpa bu iJohn. (Re 1:1) Ọrẹyiriọ, bhi 1 Corinthians 6:3 Paul nin odibo da yọle ghe a zẹ ibhio iJesu ne bhohiẹn ene ẹhi. Ranmhude, asabọmiẹn ghe ele dẹ deba iJesu bhohiẹn ene ẹhi ne imhẹn.
Baibo Nan Ha Tie
(1 Corinthians 6:1-14) Ọria soso be ribhi ẹwẹ bha nin ọle bi ọria ọbhebhe ko mhọn ẹmhọn, nọn gbudu ha khian ikotu bhi eji ikpea ne bha khia ye, ọ iyi eji ene khiale ye? 2 La ibha bha be lẹn ghe eria ne khiale ha bhohiẹn ọne agbọn nan? Ahamiẹn ibha ha bhohiẹn ọne agbọn nan, ibha bha be sẹ ene ha bhohiẹn ẹmhọn ne bha sẹ emhin soso? 3 Ibha bha be lẹn ghe imhan ha bhohiẹn ẹhi? Ahamiẹn iriọ nọn, iẹnlẹn ọsi ọne agbọn nan kii? 4 Ahamiẹn ibha mhọn ẹmhọn ọsi ọne agbọn nan nin bha ha bhu, ikpea nan re ẹlo gbe a bhi ẹkẹ agbotu ibha ha be je ne dọ bhohiẹn ọlẹn? 5 Mẹn ne ibha talọ nin mẹn re ẹkhọle ha lo bha. Okpea nọn mhọn ẹwanlẹn soso ibe ribhi ẹwẹ ibha nọn ha sabọ bhohiẹn ibhio ọle? 6 Sokpan, obhio mun obhio ọle yo ikotu bhi eji ene imhọn urẹọbhọ da bhohiẹn! 7 Bhi ọsi ẹmhọanta, emhin nọn bha gba nọn nin bha rẹ ha mhọn ẹmhọn bhi ẹwẹ bha. Bezẹle nin bha ida guanọ nan yọle ibha a bhohiẹn gbe? Bezẹle nin bha ida guanọ nan mun ibha lu? 8 Nin bha rẹ lu iriọ, ibha da lu emhin ọbe da ibhio bha yẹ mun ele lu! 9 La, ibha bha be lẹn ghe ẹbho ne bha khia ida nabhi Agbejele nọnsi Osẹnobulua? Hẹi ji a hiẹ ibha. Ene gboghẹ, la ene ga ẹbo, la ikpea ne ji ikpea da nin ele nowẹ, la ikpea ne ne ikpea nowẹ, 10 la oyi, la ene mhọn ẹlobhọ, edanyọn gbe egbe, la eria ọkhọbhunun, la ene mun ibo ele lu ida nabhi Agbejele nọnsi Osẹnobulua. 11 Iriọ eso bhi ẹwẹ ibha rẹ khin. Ọkpakinọn a kpe ibha khia, a re ibha kiẹn ene khiale; a re ibha kiẹn ene khiale bhi elin nọnsi Jesu Kristi nin Ebeanlẹn mhan bi ẹlinmhin ọsi Osẹnobulua nọnsẹmhan. 12 Emhin rebhe ọkhẹke nin mẹn lu, ọkpakinọn ọ iyi emhin rebhe mẹn ha da miẹn elele. Emhin rebhe ọkhẹke nin mẹn lu, ọkpakinọn mẹn ida ji emhin soso ha dia mẹn. 13 Ẹkẹ, ọle a lu ebale nan, a da yẹ lu ẹkẹ nin ebale, sokpan Osẹnobulua dẹ re ele veva kiẹn ihoho. Ebeanlẹn mhan, ọle nyan egbe, ọ iyi igboghẹ nyan ọlẹn. Sẹyẹ, Ebeanlẹn mhan gbẹloghe ọne egbe. 14 Sokpan Osẹnobulua riọ Ebeanlẹn kpanọ, ọle dẹ yẹ re ahu nọnsọle rẹ riọ mhan kpanọ bhi uu.