IKristiẹn Ọsaje Esali Jehova Be Khin?

Imhan nin Esali Jehova rẹọbhọ ghe, iKristiẹn ọsaje, ọle mhan khin. Fẹ emhin ea ne re imhan ta iriọ. Ọhẹnhẹn, emhin nin mhan rẹọ i. Ọzeva, elin nọn rẹ mhan dikẹ. Ọzea, oyẹẹ nin mhan mhọn da egbe.

1. Ejela Esali Jehova da miẹn emhin nin ele rẹọ i?

Jesu yọle ghe, ‘ẹmhọanta ọta nọnsi Osẹnobulua khin.’ (John 17:17) Beji Jesu rẹ ha noo Ebenọnkhiale rẹ man emhin, iriọ Esali Jehova yẹ rẹ re iBaibo man emhin. Fẹ ebi ele rẹ munhẹn ha lu ọnan yẹ bhi ukpe 1870. Bhi ọne ukpe nin, usun ẹbho eso da kugbe ha luẹ iBaibo, nin ele da lẹn ẹmhọanta ne ribhi ẹkẹ ọle. Iman-emhin ne ribhi Baibo ele rẹọ i, arẹmiẹn ghe ene iman-emhin dikẹ bhi iman-emhin ọsi otuẹ nekẹle. Ele da yẹ munhẹn ha taman ẹbho ẹmhọanta nin ele luẹ bhi Baibo.a

2. Bezẹle nin mhan da tie egbe mhan Esali Jehova?

Jehova tie ẹbho esali nesọle ranmhude ele taman ẹbho ẹmhọanta rẹji ọle. (Hebrews 11:4–12:1) Bhi ọsi ijiẹmhin, bhi ẹghe ẹdẹlẹ, ọle da taman ibhokhan Izrẹl yọle: “Esali nesẹmhẹn bha khin.” (Tie Isaiah 43:10.) Baibo da yẹ tie iJesu “Ọsali Nan Gbaẹkẹ Ọle.” (Revelation 1:5) Ranmhude ọnan, bhi ukpe 1931, mhan da yọle nan ha tie mhan Esali Jehova. Ọne elin nan manman ti mhan bhọ.

3. Be Esali Jehova rẹ re ahoẹmhọn-egbe man yẹ beji Jesu lu?

Jesu wo manman hoẹmhọn edibo nesọle. Ọle bi ele da manman sikẹ egbe bọsi ibhio. (Tie Mark 3:35.) Iriọ Esali Jehova yẹ rẹ kugbe bii azagba-uwa ọkpa, arẹmiẹn ije kẹkẹ bhi ọne otọ agbọn nan ele na vae. Ọnin bhọ zẹle nin mhan da tie egbe mhan ibhio. (Philemon 1, 2) Mhan yẹ re obọ rẹkhan ebi Baibo tale, ghe, nin mhan “ha mhọn oyẹẹ da ibhio mhan rebhe bhi ọne otọ agbọn nan rebhe.” (1 Peter 2:17) Uwedẹ kẹkẹ, ọle Esali Jehova rẹ re ọne oyẹẹ nan man. Ọkpa bhọ hi, uwedẹ nin ele rẹ rẹkpa ibhio ele bhi otọ agbọn rebhe sade emhin idunmhuri sunu.

MANMAN LẸN OTỌLE NỌNSẸN

4. Baibo iman-emhin nesele na vae

Jehova ka tale ọbhi otọ khẹ ghe, ẹghe vade nin ẹbho ha rẹ manman lẹn ẹmhọanta ne ribhi ẹkẹ iBaibo. Tie Daniel 12:4, bha ha yẹ zilo nyan ọne inọnta nan:

• Be ha “gba ije rebhe” beji Kristiẹn ọsaje ha rẹ manman ha guanọ otọ iBaibo fẹghe?

Fẹ ebi Charles Russell bi eria eso rẹ kugbe ha luẹ iBaibo yẹ. Ghe ọne IVIDIO, bha ha yẹ zilo nyan ọne inọnta nan:

VIDIO: Ebi A Rẹ Kie Miẹn Ẹmhọanta Yẹ (7:45)

• Beji a rẹman bhi ọne ividiọ, be iCharles Russell bi ibo ọle rẹ kugbe ha gua otọ ẹmhọn ne ribhi Baibo yẹ?

Uwẹ be rẹ lẹn?

Ẹgheso, mhan ki fi emhin eso nin mhan rẹ rẹọ i denọ. Bezẹle nin mhan da lu iriọ? Beji ẹdẹ rẹ fẹkẹ gbanọn an sade ẹdẹ we de, iriọ Jehova rẹ rẹkpa ẹbho nesọle rẹ lẹn otọ ẹmhọanta ne ribhi Baibo. (Tie Proverbs 4:18.) Ranmhude ọnan, arẹmiẹn Baibo ifidenọ, mhan fi emhin eso nin mhan rẹ rẹọ i denọ beji mhan rẹ manman ha lẹn otọ iBaibo.

5. Mhan lu emhin rẹkhan elin nan tie mhan le

VIDIO: Elin Nan Rẹ Lẹn Mhan (2:40)

• Bezẹle nin ọne elin nan da yi elin nọn khẹke nan ha tie mhan le?

Bezẹle nin Jehova da zẹ ẹbho nin ele ha yi esali nesọle? Ranmhude, ọle guanọ nin ele rẹkpa ẹbho rẹ lẹn ghe, ọle hi Osẹnobulua ọsi ẹmhọanta. Ọnan wo manman khẹke, ranmhude ẹbho ne bunbun sẹ re ohoghe rẹ riia ọle elin an. Ji mhan fẹ eva ghe bhi ene ohoghe nan.

Ene man emhin bhi oga eso yọle ghe, Osẹnobulua guanọ nin mhan ha noo amanzẹ rẹ ga ọle. Ẹmhọanta be khọnin? Tie Leviticus 26:1, bha ha zilo nyan ene inọnta nan:

• Be bhọ hi ẹmhọanta nin mhan miẹn luẹ bhi eji mhan tiele? Be ọ dia iJehova bhi egbe yẹ, sade mhan noo amanzẹ rẹ ga ọle?

Ene man emhin bhi oga eso yọle ghe, Jesu, ọle hi Osẹnobulua. Ẹmhọanta be khọnin? Tie John 20:17, bha ha zilo nyan ene inọnta nan:

• Be bhọ hi ẹmhọanta nin mhan miẹn luẹ bhi eji mhan tiele? Ọria ọkpa Osẹnobulua bi Jesu be khin?

• Be ọ dia uwẹ yẹ bhi egbe rẹ lẹn sẹbhọ ghe, Osẹnobulua je Esali nesọle, nin ele dọ rẹkpa ẹbho rẹ lẹn ẹmhọanta rẹji ọle bi Ọmọn nọnsọle?

6. Mhan wo hoẹmhọn egbe

Baibo yọle nin Kristiẹn ọsaje ha mhọn okugbe, beji ije kẹkẹ bhi egbe ọsi ọria rẹ wẹnna kugbe. Tie 1 Corinthians 12:25, 26, bha ha yẹ zilo nyan ene inọnta nan:

• Be ọ khẹke nin Kristiẹn ọsaje lu sade ibhio ele nin ele ko ga ribhi ọnọghọ?

• Emhin nela uwẹ sẹ daghe, nọn re uwẹ rẹọbhọ ghe Esali Jehova gene hoẹmhọn egbe?

Ahamiẹn Esali Jehova bhi agbaẹbho ọkpa ribhi ọnọghọ, ibhio ele bhi otọ agbọn rebhe ki jẹje je urẹkpa ji ele. Nin uwẹ rẹ daghe ijiẹmhin ọkpa, ghe ọne IVIDIO, bha ha zilo nyan inọnta nọn rẹkhan ọlẹn.

VIDIO: Efi Nọn Riia Emhin An bhi Haiti (5:29)

• Be uwedẹ nin Esali Jehova rẹ rẹkpa ibhio ele sade emhin idunmhuri sunu rẹ rẹman yẹ ghe, ele mhọn oyẹẹ da egbe?

EBI MHAN LUẸLE

Ene gene rẹkhan Jesu, ele Esali Jehova khin. Eji mhan hi rẹ ha ye bhi ọne otọ agbọn nan rebhe, ibhio mhan khin. Sẹyẹ, Baibo, ọle iman-emhin nesẹmhan na vae. Mhan yẹ rẹkpa ẹbho rẹ lẹn ẹmhọanta rẹji Jehova.

Uwẹ Be Yẹ Yere?

• Bezẹle nin mhan da yọle nan ha tie mhan Esali Jehova?

• Be imhan rẹ ne egbe lu emhin yẹ?

• Uwẹ be riale ene gene rẹkhan iJesu Esali Jehova khin?

FẸ ENE EMHIN NAN GHE

Lẹn okha nọnsẹmhan.

Esali Jehova Re Urẹọbhọ Man, Obọ 1: Ele Sibhi Ebiuki Re (1:00:53)

Fẹ ijiẹmhin ọkpa ghe nọn rẹman ebi Esali Jehova rẹ rẹkpa ẹbho yẹ, nin ele rẹ lẹn ẹmhọanta rẹji iman-emhin ohoghe nin ẹbho eso man.

Ẹbho Nesi Osẹnobulua Gẹn Elin Nọnsọle (7:08)

Miẹn ewanniẹn rẹji inọnta eso nin uwẹ ha sabọ ha mhọnlẹn rẹji Esali Jehova.

“Inọnta Nin Ẹbho Kẹ Nọọn Rẹ Da Esali Jehova” (Obọ ọkpa bhi jw.org)

Ẹmhọn ẹbho ne na bhi agbaẹbho ebhebhe vae bha ha yẹẹ Stephen. Ọle da wo ha lu ele khọlọ. Fẹghe ebi ọle daghe bhi egbe Esali Jehova nọn re ọle fidenọ.

“Iẹnlẹn Nọnsẹmhẹn Da Wo Ha Khọ Ọbhọ” (The Watchtower, July 1, 2015)