Bezẹle Nin Mhan Da Muegbe Nọnsẹn Yo Ikolo Oga Nọnsẹ Mhan?

Fẹ ọnin ẹdudu nan ghe, nuwẹ daghe ebi Esali Jehova rẹ muegbe nọnsẹn rẹ yo ikolo oga nọn sele yẹ. Bezẹle nin mhan da diriọ muegbe?

Nin mhan rẹ mun ekpẹn nin Osẹnobulua nọnsẹ mhan. Ẹmhọn-ata gene nọn ghe ọiyi egbe nin mhan mun ọkpa Osẹnobulua daghe. (1 Samuel 16:7) Ọrẹ yiriọ, mhan ha si koko nin mhan rẹ gale, ebe ri mhan bhi ọkhọle hi, nin mhan ri ekpẹn ji Osẹnobulua bi enin mhan koko ga. Ahamiẹn mhan ho nin mhan nin ọbhuohiẹn bhi ikotu talọ, ọdẹ khẹke nan muegbe beji ọa rẹ ri ekpẹn nan lẹn bhi ihe nọn ye. Iriọ yẹ nọn, ebi mhan rẹ muegbe yẹ sade mhan yo ikolo oga, rẹman ọghọ nin mhan mhọn nin ‘Ọbhuohiẹn nọn kokhun nẹn,’ Osẹnobulua nin Jehova bi eji mhan da ga ọle.​—Genesis 18:⁠25.

Ọrẹman ghe mhan rẹkhan ebi mhan luẹ. IBaibo taman mhan ghe nin mhan ha ‘muegbe nọnsẹn bii eria ne mhọn umueria nọn gbale.’ (1 Timothy 2:​9, 10) ‘Imuegbe nọnsẹn’ hi, nin man rẹban ukpọn nan yọ nọn ri egbe man la ọsi nin aba daghe mhẹn. Mhan ha mhọn umueria nọn gbale, ọki rẹkpa mhan rẹ ha zẹ ukpọn ne mhẹn nin mhan ha yọ. Ọnan ha yẹ rẹkpa uwẹ rẹ zẹ ukpọn ikikẹ nuwẹ ha yọ. Mhan a muegbe nọnsẹn ọki ri ‘ogẹn ji Osẹnobulua bi ebi mhan man ẹbho le.’ (Titus 2:10; 1 Peter 2:12) Mhan ha muegbe nọnsẹn ha yo ikolo oga, ọki yẹẹ ẹbho ne dọ rẹ deba mhan ga iJehova.

Hẹi ja miẹn ghe ukpọn nuwẹ ha yọ aki zẹ uwẹ bha yo iKindọn Họọ. Yọ ukpọn nọn khiakhiale nọn mhọn-ose, ọiyi ọnọn ghan gbe.

• Bezẹle nọn da khẹke nin mhan rẹ a muegbe nọnsẹn sade mhan khin ikolo oga?

• Be rẹkpa mhan rẹ lẹn ebi mhan rẹ muegbe yẹ sade man khin ikolo oga?