Eji A Da Ne Emhin Nan Gbẹn Ọbhi Ebe ọsi Ikolo Unyẹnmhin bi Iwẹnna Oga Nọnsẹmhan
OCTOBER 7-13
EMHIN NE GHANLẸN NE RIBHI BAIBO | JAMES 3-5
“Ha Rẹman Ghe Uwẹ Mhọn Ẹwanlẹn Nọn Na Obọ Osẹnobulua Vae”
(James 3:17) Bhi ọsi ọhẹnhẹn, ẹwanlẹn nọn na obọ Osẹnobulua vae khiamhin. Ọ khu ọbhi ọfure, ọ lu emhin bhi oleghe, ọ kẹ hẹnmhọn, itohan bi ikpẹ ne mhẹn yẹ vuọn ọlẹn, ọ izọn ọria, ọ iyẹ do ẹki ikpunun.
cl 221-222 ¶9-10
Uwẹ Be Rẹman Ghe Uwẹ Mhọn “Ẹwanlẹn Nọn Na Obọ Osẹnobulua Vae”?
9 “Bhi ọsi ọhẹnhẹn, ẹwanlẹn nọn na obọ Osẹnobulua vae khiamhin.” Ọria nọn khiale hi, ọria nọn ilu emhin esankan. Sokpan, ọ iyi bhi emhin nin ọle lu ọkpa ọle ha da khia, ọle ki yẹ khia bhi ẹkẹ ọkhọle nọnsọle. Baibo rẹman ghe ẹkẹ ọkhọle ẹwanlẹn na i. Ọkpakinọn, ahamiẹn ọkhọle nọnsẹmhan ria eria ne bha gba, ẹwanlẹn nọn na obọ Osẹnobulua vae ida sabọ nabhọ. (Proverbs 2:10; Matthew 15:19, 20) Sokpan, ahamiẹn ọkhọle nọnsẹmhan khiale, beji mhan ha sabọ lu sẹ, mhan ki sabọ fi ikeke gbe emhin ebe yẹ ha lu emhin ne mhẹn. (Psalm 37:27; Proverbs 3:7) Ọ ibe yi emhin nọn gbale ghe ukhiamhin, ọle hi ikpẹ ọhẹnhẹn ọsi ẹwanlẹn nọn na obọ Osẹnobulua vae? Ranmhude, ahamiẹn ghe mhan bha khia, mhan ida sabọ ha mhọn ene ikpẹ nekẹle.
10 “Ọ khu ọbhi ọfure.” Ẹwanlẹn nọn na obọ Osẹnobulua vae, ọle rẹkpa mhan rẹ ha khu ọbhi ọfure. Ọkpa bhi ikpẹ ọsi ahu ẹlinmhin nọn khiale, ọle ọfure khin. (Galatians 5:22) Mhan ki ha dọnmhegbe nin mhan hẹi lu emhin soso nọn ha si ozughu re bhi ẹwẹ ẹbho nesi Jehova. (Ephesians 4:3) Ahamiẹn ọfure iyẹ ribhi ẹwẹ mhan, ọkhẹke nin mhan dọnmhegbe rẹ khu ọbhọ nin mhan rẹ kie ha mhọn ọfure. Bezẹle nọn da yi emhin kpataki nin mhan rẹ ha khu ọbhi ọfure? Ranmhude, Baibo yọle ghe, ‘mhan a ha nyẹnlẹn bhi ọfure, Osẹnobulua ọsi oyẹẹ bi ọfure ki ne mhan dia.’ (2 Corinthians 13:11) Bhiriọ, mhan ha deba ọdeọde ha nyẹnlẹn bhi ọfure, Osẹnobulua ọsi ọfure ki ne mhan dia. Ahamiẹn mhan bi ibhio mhan iko ribhi ọfure, ọ dẹ rẹso ikolu nin mhan bi Jehova ko mhọnlẹn. Be bhọ mhan ha rẹ rẹman yẹ ghe, eria ne khu ọbhi ọfure mhan khin? Bha ji mhan fẹ ijiẹmhin ọkpa ghe.
(James 3:17) Bhi ọsi ọhẹnhẹn, ẹwanlẹn nọn na obọ Osẹnobulua vae khiamhin. Ọ khu ọbhi ọfure, ọ lu emhin bhi oleghe, ọ kẹ hẹnmhọn, itohan bi ikpẹ ne mhẹn yẹ vuọn ọlẹn, ọ izọn ọria, ọ iyẹ do ẹki ikpunun.
cl 223-224 ¶12
Uwẹ Be Rẹman Ghe Uwẹ Mhọn “Ẹwanlẹn Nọn Na Obọ Osẹnobulua Vae”?
12 “Ọ lu emhin bhi oleghe.” Be a re ọle ta nan rẹ ha lu emhin bhi oleghe? Ene fẹ otọ ẹmhọn nan gbẹn bhi Baibo yọle ghe, ọ bha lẹkhẹ nan rẹ zedu ukpọta iGreek nan zedu ọle diọbhi “lu emhin bhi oleghe” bhi James 3:17. Ọnan zẹle bhi Baibo eso, a da zedu ọne ukpọta nan diọbhi “ọria nọn fu,” “ọria nọn mhọn iziẹngbe,” bi “ọria nọn ria ẹmhọn eria ọbhebhe.” Emhin nan gbẹn bhi otọ ọle bhi New World Translation da re ọle man ghe, “nan rẹ re otọ nin ẹbho ọbhebhe,” ọle ọne ukpọta nan mundia nan. Uwedẹ nela mhan ha rẹ re ọle man ghe, mhan mhọn ọne ikpẹ nan bhi iẹnlẹn nọnsẹmhan?
cl 224-225 ¶14-15
Uwẹ Be Rẹman Ghe Uwẹ Mhọn “Ẹwanlẹn Nọn Na Obọ Osẹnobulua Vae”?
14 “Ọ kẹ hẹnmhọn.” Ukpọta iGreek nan zedu ọle diọbhi “nan rẹ kẹ ha hẹnmhọn,” iribhi ije ebhebhe bhi obọ iBaibo nan re urolo iGreek gbẹn. Ọkpa bhi eria ne fẹ otọ ẹmhọn nan gbẹn bhi Baibo da yọle ghe, “a kẹ re ọne ukpọta nan rẹ tẹmhọn uwedẹ nin eyokulo rẹ jẹje rẹkhan adia.” Ọ mundia nin “nan rẹ ha re ehọ bhi ude” bi “nan rẹ degbere ha rẹkhan adia.” Ọria nọn mhọn ẹwanlẹn nọn na obọ Osẹnobulua vae, muegbe nin ọle rẹ re obọ rẹkhan adia ne ribhi Baibo. Ọle iyi ọria nọn ika fi ọkhọle denọ aharẹmiẹn a re iBaibo rẹ taman ọlẹn emhin nin ọle ho nin ọle lu bha gba. Sokpan, a ha re iBaibo rẹ rẹman ọlẹn ghe emhin nin ọle lu la emhin nin ọle rẹọ i bha gba, ọle ki muegbe nin ọle rẹ fi uwedẹ nin ọle rẹ lu emhin denọ. Ẹbho be lẹn uwẹ bii ọria nọn kẹ hẹnmhọn?
“Itohan bi Ikpẹ Ne Mhẹn Yẹ Vuọn Ọlẹn”
15 “Itohan bi ikpẹ ne mhẹn yẹ vuọn ọlẹn.” Ikpẹ kpataki itohan khin bhi ẹwẹ ikpẹ ọsi ẹwanlẹn nọn na obọ Osẹnobulua vae. Ranmhude, iBaibo yọle ghe, itohan vuọn ọne ẹwanlẹn nan. “Itohan” bi “ikpẹ ne mhẹn” ele a koko ta kugbe. Ọnan wo manman gba, ranmhude, bhi Baibo, itohan mundia nin nan rẹ mhọn ẹkẹ ẹjẹjẹ da ẹbho yẹ rẹkpa ele. Ebe ọkpa da yọle ghe itohan hi, nin emhin rẹ ba mhan bhi egbe sade emhin ebe sunu ji ọria, mhan ki yẹ guanọ uwedẹ rẹ rẹkpa ọne ọria nin emhin ebe sunu je. Bhiriọ, ọria nọn mhọn ẹwanlẹn nọn na obọ Osẹnobulua vae, imhọn ọkhọle ebe. Ọle iyẹ yi ọria nọn gheghe lẹn emhin. Ọria nọn mhọn ọne ẹwanlẹn nan mhọn ẹkẹ ẹjẹjẹ, ọle ki ha guanọ uwedẹ nin ọle rẹ rẹkpa ẹbho. Be bhọ mhan ha rẹ rẹman yẹ ghe mhan mhọn itohan?
(James 3:17) Bhi ọsi ọhẹnhẹn, ẹwanlẹn nọn na obọ Osẹnobulua vae khiamhin. Ọ khu ọbhi ọfure, ọ lu emhin bhi oleghe, ọ kẹ hẹnmhọn, itohan bi ikpẹ ne mhẹn yẹ vuọn ọlẹn, ọ izọn ọria, ọ iyẹ do ẹki ikpunun.
cl 226-227 ¶18-19
Uwẹ Be Rẹman Ghe Uwẹ Mhọn “Ẹwanlẹn Nọn Na Obọ Osẹnobulua Vae”?
18 “Ọ izọn ọria.” Ẹwanlẹn nọn na obọ Osẹnobulua vae izọn ọria. Ahamiẹn mhan mhọn ọne ẹwanlẹn nan, mhan ki dọnmhegbe rẹ re izọn-egbe sibhi ọkhọle nọnsẹmhan re. (James 2:9) Mhan ida ha re obọ ikẹ rẹ mun ẹbho eso ranmhude ele manman yo isikulu, la ele manman fe, la ele mhọn ihe nin ele ye bhi ẹkẹ agbotu. Mhan ida ha re ẹlo gbe ibhio mhan an, aharẹmiẹn ele imanman mhọn emhin. Beji a miẹn ghe, iJehova hoẹmhọn ele, ọ yẹ khẹke nin mhan hoẹmhọn ele.
19 “Ọ iyẹ do ẹki ikpunun.” Ukpọta iGreek nan zedu ọle diọbhi “ẹki ikpunun,” sabo rẹ mundia nin ọria nọn lu arẹman bhi esẹ. Ẹghe ẹdẹlẹ, ekhẹn iGreek bi Rome ne lu arẹman bhi esẹ ki mun emhin gue ẹlo nọnsele sade ele lu arẹman. Ranmhude ọnan, ọne ukpọta iGreek nan, ọle a rẹ tẹmhọn ọria nọn manlu, nọn bha ho nin ọle re ebi ọle gene khin man. Ọ bha khẹke nin mhan re ikpunun ha ne ibhio mhan lu emhin. Ọkhẹke nin uwedẹ nin mhan rẹ nin ibhio mhan lu emhin bi emhin nin mhan ria ji ele ha yi ọsi ẹkẹ-ata.
Guanọ Emhin Oriọn ne Ghanlẹn
(James 4:5) La ibha be riale ghe ebenọnkhiale imhọn emhin nọn zẹle nọn da yọle: “Ọ wo yẹẹ ẹlinmhin nọn ribhi egbe mhan rẹ ha mhọn ẹlobhọ”?
w08 11/15 20 ¶6
Emhin Eso Nan Miẹn Tie bhi Ebe ọsi James bi ọsi Peter
4:5—IBaibo nela James sounun ọlẹn bhi enan? A bha manman miẹn ijanlẹn ọkpa bhi Baibo nan ha da miẹn ene ọta nan beji James rẹ tale tee. Ọrẹyiriọ, asabọmiẹn ghe, ẹmhọn ne ribhi Genesis 6:5; 8:21; Proverbs 21:10; bi Galatians 5:17, ọle ha talọ je.
(James 4:11, 12) Ibhio, bha hẹi ha re unun ji egbe. Ọria-ọria nọn re unun ji obhio ọle, uhi ọle re unun je. Sẹyẹ, ọria-ọria nọn bhohiẹn gbe obhio ọle, uhi ọle bhohiẹn gbe. Ahamien uwẹ ki bhohiẹn uhi, uwẹ iyẹ yi ọnọn re obọ rẹkhan uhi, sokpan, ọnọn bhohiẹn uwẹ ki khin. 12 Otuọnkpa sẹsẹ hi Ọnọn Gbuhi, ọle yẹ hi Ọnọn Bhohiẹn. Ọle hi ọnọn sabọ miẹn ọria fan, yẹ sabọ fuẹn ọria a. Họla uwẹ khin nin uwẹ ha da ha bhohiẹn gbe ibo ẹ?
w97 11/15 20-21 ¶8
Urẹọbhọ Zẹle Nin Mhan Da Re Iziẹngbe Man Yẹ Nan Erọnmhọn
8 Ọ iyi emhin nọn gbale sade mhan re unun ria ibhio mhan an. (James 4:11, 12) Ọkpakinọn, eria eso re unun ria ibo ele a, ranmhude ele riale ghe emhin nin ele lu mhẹn nẹ, la ranmhude ele guanọ nin ele khua okhun gbera eria ebhebhe. (Psalm 50:20; Proverbs 3:29) Ọne ukpọta iGreek nan noo bhi enan rẹ tẹmhọn ‘nan rẹ re unun ji ọria,’ da rẹman ghe, ọria nọn re unun ji obhio ọle mhọn ẹkẹ-khọmhin, ọne ọria ki yẹ ha mun orẹsin sin obhio ọle. Ọnan ki dọ re ọne ọria ha bhohiẹn gbe obhio ọle. Be bhọ ọria nọn re unun ji obhio ọle, rẹ re unun ji uhi nọnsi Osẹnobulua, yẹ bhohiẹn gbe ọne uhi yẹ? Ẹghe nin Jesu rẹ ha ribhi ọne otọ nan, ọle da yọle ghe, ene ekhẹn iscribe bi Pharisee “fikeke gbe uhi nọnsi Osẹnobulua,” ha re uwedẹ nọnsele bhohiẹn gbe ẹbho. (Mark 7:1-13) Iriọ yẹ nọn ẹlẹnan. Ahamiẹn mhan bhohiẹn gbe ibhio mhan, ibhio mhan nin Jehova bha bhohiẹn gbe, uhi nọnsi Osẹnobulua, ọle mhan bhohiẹn gbe. Mhan sẹyẹ re iriọ yọle ghe ọne uhi bha mhẹn sẹ. Ahamiẹn mhan re unun ria ibhio mhan an, mhan bha re iriọ re obọ rẹkhan uhi nọn yọle nin mhan hoẹmhọn ibo mhan.—Romans 13:8-10.
Baibo Nan Ha Tie
(James 3:1-18) Ibhio mẹn, ọ bha khẹke nin ene bunbun bhi ẹwẹ bha kiẹn ene man emhin, ranmhude, ibha lẹnmhin ghe imhan ha miẹn ibhohiẹn nọn kaka nẹ. 2 Mhan rebhe yẹ wo dobọ igba ne bunbun. Ahamiẹn ọria idunun, ọria nọn gba nan, ọle ọne ọria khin, ọle dẹ yẹ sabọ re egbe ọle khian. 3 Mhan ha re uri rẹ gba akasi unun nin ọle ha ka mhan ehọ, mhan ki yẹ sabọ dia egbe nọnsọle. 4 Yẹ ria ẹmhọn okọ ne khua: Arẹmiẹn ele manman kpọnọ, sẹyẹ, ukpahoho fi ele yo fi ele re, obhi emhin khere ọle ọria nọn gua ọne okọ rẹ dia ọle diọbhi eje ghọn ọlẹn. 5 Iriọ olanmhẹn yẹ rẹ dia khere bhi egbe, ọrẹyiriọ, ọ manman dẹgbọ. Ghe ebi obhi eranlẹn nan fiele rẹ tuẹ udede ẹgbo a yẹ! 6 Eranlẹn, ọle olanmhẹn yẹ khin. Olanmhẹn mundia nin agbọn nọn bha khia bhi egbe nọnsẹmhan, ranmhude, ọ re okan sin egbe, yẹ fie eranlẹn ọbhi iẹnlẹn. Ge·henʹna, ọle fie ọne eranlẹn ọbhọ. 7 A imiẹn elanmhẹn ẹwẹ, afianmhẹn, elanmhẹn ne lẹnlẹn bhi otọ, la elanmhẹn ne ribhi ẹkẹ ẹdẹ nin ọria ida sabọ rẹ khian. 8 Sokpan, ọria soso iribhọ nọn ha sabọ dia olanmhẹn. Ọ ban-yo-ban-re yẹ si ikuan-egbe re. Iriọ obi sẹyẹ rẹ vuọn ọlẹn. 9 Ọne olanmhẹn nin mhan rẹ gẹn iJehova nin Aba, ọle mhan yẹ rẹ ghunmhun eria nan miẹn ghe Osẹnobulua manlẹn bhi arẹkhọkhọ nọnsọle. 10 Unun nan rẹ nan erọnmhọn, a yẹ re ọle ghunmhun ihẹn. Ibhio mẹn, ọ imhẹn ne emhin rẹ dia inian. 11 Amẹn nọn mhẹn bhi unun bi amẹn nọn riala ida sabọ dagbare bhi udo ọkpa. 12 Ibhio mẹn, oran ifig ida sabọ mọn ikpẹ olive, sẹyẹ, oran igrape ida sabọ mọn ikpẹ ifig. A ida yẹ sabọ miẹn amẹn nọn mhẹn bhi ẹkẹ ẹdẹ nin umhẹn ye. 13 Họla mhọn ẹwanlẹn bi ilẹn-otọ-emhin bhi ẹwẹ bha? Ji ọle re unyẹnmhin esili nọnsọle rẹ rẹman ghe ẹkẹ nọn fu nan miẹn bhi ẹwanlẹn ọle rẹ lu emhin. 14 Sokpan, ahamiẹn ghe igbọvo bi itẹn-abọ ribhi ọkhọle nọnsẹbha, bha hẹi ha dẹgbọ yẹ bha ohoghe da ẹmhọanta. 15 Ọnan iyi ẹwanlẹn nọn na obọ Osẹnobulua vae; ọsi ọne agbọn nan nọn, ọsi elanmhẹn ẹwẹ nọn, ọsi ẹlinmhin ebe yẹ nọn. 16 Ranmhude, eji ọ iki rẹ ha khin nin igbọvo bi itẹn-abọ ye, ozughu bi emhin ebe rebhe dẹ yẹ ha ribhi enin. 17 Bhi ọsi ọhẹnhẹn, ẹwanlẹn nọn na obọ Osẹnobulua vae khiamhin. Ọ khu ọbhi ọfure, ọ lu emhin bhi oleghe, ọ kẹ hẹnmhọn, itohan bi ikpẹ ne mhẹn yẹ vuọn ọlẹn, ọ izọn ọria, ọ iyẹ do ẹki ikpunun. 18 Yẹ deba ọnin, eje fure, ọle a da kọ ikpẹ ọsi ikhiakhiale rẹji eria ne khu ọbhi ọfure.
OCTOBER 14-20
EMHIN NE GHANLẸN NE RIBHI BAIBO | 1 PETER 1-2
“Ọkhẹke Nin Bha Khia”
(1 Peter 1:14, 15) Bọsi ibhokhan ne hẹnmhọn, bha hẹi yẹ ji ọkhọle nin bha ha mhọnlẹn ẹghe nin bha bha sẹ rẹ lẹn emhin soso ha dia bha, 15 ọkpakinọn, bọsi Ọnọn Khiale nọn tie bha, bha dọnmhegbe rẹ kpe khia bhi ilọnmhọn nesẹbha rebhe,
w17.02 9 ¶5
Ẹsele Nọn Gbale Nọn Na Obọ Osẹnobulua Vae, Ọle Izọese Nọnsi Jesu Khin
5 Be bhọ mhan ha rẹ rẹman yẹ ghe mhan hoẹmhọn elin nọnsi Jehova? Uwedẹ nin mhan rẹ lu emhin. Jehova guanọ nin mhan rebhe ha yi eria ne khiale. (Tie 1 Peter 1:15, 16.) Ọnan rẹman ghe iJehova ọkpa mhan ha ga. Mhan ki yẹ ha re ọkhọle rebhe hẹnmhọn nanlẹn. Aharẹmiẹn a kpokpo mhan, mhan ki dọnmhegbe rẹ ha re obọ rẹkhan uhi bi adia nesọle. Mhan re ogẹn ji Jehova sade mhan re obọ rẹkhan uhi nesọle. (Matt. 5:14-16) Mhan ki yẹ rẹman ghe uhi nesọle mhẹn nẹ, yẹ rẹman ghe, ọbha ohoghe Esu khin. Ranmhude ọ bha gba mhan fo, ẹghe eso mhan dobọ. Ahamiẹn mhan dobọ, mhan ki dọnmhegbe rẹ fidenọ, yẹ re obọ kie bhi ene emhin ne iyẹẹ Jehova.—Ps. 79:9.
(1 Peter 1:16) ranmhude, a gbẹn ọlẹn bhi otọ yọle: “Ọkhẹke nin bha khia ranmhude mẹn khiamhin.”
lvs 77 ¶6
Ebi Mhan Ha Rẹ Ha Zẹ Ebi Mhan Ghe Yẹ
6 Jehova da yọle: “Ọkhẹke nin bha khia ranmhude mẹn khiamhin.” (1 Peter 1:14-16; 2 Peter 3:11) Oga nọnsẹmhan ha khia, ọle ọkpa Jehova ha da miẹn ọlẹn ọbhi egbe. (Deuteronomy 15:21) Oga nọnsẹmhan ida ha yi ọnọn khiale sade mhan lu emhin ne iyẹẹ Jehova, emhin bii igboghẹ, okhọn, la emhin idunan. (Romans 6:12-14; 8:13) Ọ ida yẹẹ iJehova sade mhan ghe emhin ne dia inian. Ene emhin nan dẹ sabọ re oga nọnsẹmhan kiẹn oga nọn bha khia. Ele dẹ yẹ sabọ ria ikolu nin mhan bi Jehova ko mhọnlẹn an.
Guanọ Emhin Oriọn ne Ghanlẹn
(1 Peter 1:10-12) Reji ọne umiẹnfan nan, ene akhasẹ ne kha akhasẹ rẹji itohan nọn bha khẹke nan mhọn da bha, da manman guanọ otọ ọne ẹmhọn nọnsẹn. 11 Ele da manman guanọ otọ ọne ẹghe nin ẹlinmhin nọn ribhi egbe nọnsele taman ele rẹji Kristi, ẹghe nọn rẹ tẹmhọn oya nin Kristi ha le bi uyi nọn ha rẹkhan ọlẹn. 12 A da re ọle man ele ghe ọguọmhandia ele khin, ọ iyi rẹji egbe ele, sokpan rẹji bha, nin ele tẹmhọn emhin nan yẹ wo taman bha rẹ na obọ ẹbho ne ta ọta nọn mhẹn man bha. Ahu ẹlinmhin nọn khiale nọn na ẹgua-okhun vae, ọle ele rẹ ta ọne ọta nan man bha. Ene ẹhi bhọ yẹ guanọ nin ele lẹn otọ ene emhin nan.
w08 11/15 21 ¶10
Emhin Eso Nan Miẹn Tie bhi Ebe ọsi James bi ọsi Peter
1:10-12. Ene ẹhi da ha guanọ nin ele lẹn otọ emhin nin akhasẹ nesi Osẹnobulua gbẹn rẹji usun ọsi enanzẹle. Ọkpakinọn, ẹghe nin Jehova rẹ munhẹn ha ne enanzẹle lu emhin, ọle ele rẹ dọ sabọ lẹn otọ ene emhin nan. (Eph. 3:10) Ọ bha be khẹke nin mhan re egbe khọkhọ ijiẹmhin ọsi ene ẹhi nan, yẹ ha guanọ otọ “emhin ne dinmhin nesi Osẹnobulua”?—1 Cor. 2:10.
(1 Peter 2:25) Ranmhude, ibha rẹ diabe ihuan ne bibi odẹ, sokpan, ejayenan nian, bha fikie bu ọsun-ohuan nọnsẹbha bi ọnọn gbẹloghe bha.
it-2 565 ¶3
Ọnọn Gbẹloghe Bha
Ọnọn Ke Okhun Nẹ bhi Ene Gbẹloghe. Ẹmhọn nọn ribhi Isaiah 53:6, nọn tẹmhọn eria ne diabe ihuan ne bibi odẹ, ọle iPeter sẹyẹ ha tẹmhọnlẹn ẹghe nin ọle rẹ yọle: “Ibha rẹ diabe ihuan ne bibi odẹ.” Sokpan, ọle da sẹyẹ yọle: “Ejayenan nian, bha fikie bu ọsun-ohuan nọnsẹbha bi ọnọn gbẹloghe bha.” (1 Pe 2:25) Jehova hi ọsun-ohuan nin ọle ha tẹmhọnlẹn, ranmhude, ẹbho nin iPeter gbẹn ọne ebe nan je bha sibhi uwedẹ nọnsi Jesu Kristi re. Ọkpakinọn, rẹ na obọ iJesu, ọle ele na bu iJehova nin Ọsun-ohuan nọn Ke Okhun Nẹ. (Ps 23:1; 80:1; Jer 23:3; Eze 34:12) Ọnọn gbẹloghe, ọle iJehova yẹ khin. Ọle ọnọn fẹ ebi emhin rẹ khian yẹ. (Ps 17:3) Nan rẹ fẹ “ebi emhin rẹ khian yẹ,” ọle hi e·pi·sko·peʹ bhi urolo iGreek. Jehova ha dọ “fẹ emhin ghe,” ọkakale la eghọnghọn sabọ nabhọre. Bhi eji a da noo ọne ukpọta nan bhi Luke 19:44, a da re ọle tẹmhọn ọkakale nin Jerusalem miẹn bhi egbe, ẹghe nin Osẹnobulua rẹ bhohiẹn gbe ele bhi ore nin ọhẹnhẹn. Luke da yọle ghe Jerusalem ‘bha lẹn ẹghe nan rẹ dọ fẹ ọle ghe.’ Bhi obọ nọnkẹle, 1 Peter 2:12 da yọle ghe ẹbho dẹ miẹn elele ‘bhi ukpẹdẹ nin Osẹnobulua ha dọ fẹ emhin ghe’ bhi ukpẹdẹ ibhohiẹn, ranmhude ọnan, ele ki ha re ekhuẹnmhuẹn ji ọle.
Baibo Nan Ha Tie
(1 Peter 1:1-16) Ilẹta nin Peter, etuegbe nọnsi Jesu Kristi, gbẹn ji eriọbhe ne nyẹnlẹn bhi Ponʹtus, Ga·laʹti·a, Cap·pa·doʹci·a, Asia, bi Bi·thynʹi·a; enanzẹle 2 ranmhude ebi Osẹnobulua nin Aba ka lẹn ọbhi otọ, nan re ẹlinmhin rẹ kpe khia, nin ele da kiẹn eria ne hẹnmhọn, nan yẹ khakha aranlẹn nọnsi Jesu Kristi nyan. Nin itohan nọn bha khẹke nan mhọn da bha bi ọfure nin bha mhọn ha bun ọbhọ. 3 Ogẹn hi ọsi Osẹnobulua nin Aba iJesu Kristi nin Ebeanlẹn mhan, ranmhude itohan nọnsọle, ọle rẹ mhan kiẹn eria nan la biẹ ne mhọn ikhuaẹloghe nọn nyẹnlẹn, rẹ na bhi obọ ariọkpanọ bhi uu nọnsi Jesu Kristi, 4 nin mhan da sabọ le uku nọn iwea, nin okan iye, nọn iyẹ fafa a. A mun ọlẹn ya khẹ bha bhi ẹgua-okhun, 5 ibha nin Osẹnobulua re ahu nọnsọle gbega rẹ na obọ urẹọbhọ, nin bha da sabọ miẹn umiẹnfan nan ha rẹman bhi ẹghe nọn kike. 6 Ranmhude ọnan, ibha manman ghọnghọn, arẹmiẹn bhi obhi ẹghe khere—sade ọ bhọ khẹke—ibha miẹn ọkakale kẹkẹ bhi egbe, 7 nan da miẹn ghe urẹọbhọ nọnsẹbha nan dọnmhẹn fẹghe, nọn ghan gbera igolu nọn sẹyẹ guọ kua arẹmiẹn ghe a re ọle na bhi eranlẹn, ki ha yi ọnọn re ogẹn, uyi, bi ọghọ re, bhi ẹghe nan ha rẹ re iJesu Kristi man. 8 Arẹmiẹn bha bha sẹ ka miẹn ọlẹn khẹ, bha da hoẹmhọn ọlẹn. Arẹmiẹn bha bha sẹyẹ miẹn ọlẹn nian, bha da yẹ ha mhọn urẹọbhọ da ọle, bha da wo yẹ manman ha mhọn eghọnghọn nan isabọ re emhin soso khọkhọ, 9 beji emhin nọn re ibha ha mhọn urẹọbhọ ha rẹ sẹ bha bhi obọ, umiẹnfan nọnsẹbha. 10 Reji ọne umiẹnfan nan, ene akhasẹ ne kha akhasẹ rẹji itohan nọn bha khẹke nan mhọn da bha, da manman guanọ otọ ọne ẹmhọn nọnsẹn. 11 Ele da manman guanọ otọ ọne ẹghe nin ẹlinmhin nọn ribhi egbe nọnsele taman ele rẹji Kristi, ẹghe nọn rẹ tẹmhọn oya nin Kristi ha le bi uyi nọn ha rẹkhan ọlẹn. 12 A da re ọle man ele ghe ọguọmhandia ele khin, ọ iyi rẹji egbe ele, sokpan rẹji bha, nin ele tẹmhọn emhin nan yẹ wo taman bha rẹ na obọ ẹbho ne ta ọta nọn mhẹn man bha. Ahu ẹlinmhin nọn khiale nọn na ẹgua-okhun vae, ọle ele rẹ ta ọne ọta nan man bha. Ene ẹhi bhọ yẹ guanọ nin ele lẹn otọ ene emhin nan. 13 Bhiriọ, bha gbega ọkhọle nọnsẹbha; bha ha mhọn ẹwanlẹn nọn gbale; bha khuaẹloghe itohan nọn bha khẹke nan ha rẹman bha bhi ẹghe nan ha rẹ re iJesu Kristi man. 14 Bọsi ibhokhan ne hẹnmhọn, bha hẹi yẹ ji ọkhọle nin bha ha mhọnlẹn ẹghe nin bha bha sẹ rẹ lẹn emhin soso ha dia bha, 15 ọkpakinọn, bọsi Ọnọn Khiale nọn tie bha, bha dọnmhegbe rẹ kpe khia bhi ilọnmhọn nesẹbha rebhe, 16 ranmhude, a gbẹn ọlẹn bhi otọ yọle: “Ọkhẹke nin bha khia ranmhude mẹn khiamhin.
OCTOBER 21-27
EMHIN NE GHANLẸN NE RIBHI BAIBO | 1 PETER 3-5
“Ọkpẹnlẹn ọsi Emhin Rebhe Sire”
(1 Peter 4:7) Ọkpakinọn, ọkpẹnlẹn ọsi emhin rebhe sire. Bhiriọ, bha ha mhọn ọkhọle nọn gbale, bha ha yẹ ha nan erọnmhọn.
w13 11/15 3 ¶1
‘Bha Ha Nan Erọnmhọn’
ỌRIA ọkpa nọn ka ha lu iwẹnna ọsasọn da yọle: “Ẹghe nin owe rẹ manman re ọria hi sade ẹdẹ khian dọ we.” Bhi ọsi ẹmhọanta, ẹbho ne ganẹdẹ dẹ rẹọbhọ ẹmhọn nin ọne ọria nan tale. Ẹghe nin mhan da nyẹnlẹn ẹlẹnan yẹ diabe ẹghe nin ẹdẹ rẹ ho nọn we. Ọkike ọsi ọne agbọn nan nin Ojuu gbẹloghe mhan da nyẹnlẹn, bhiriọ, mhan dẹ manman dọnmhegbe nin mhan hẹi wẹ. (Rom. 13:12) Okhẹnan dẹ nabhọre sade mhan ji owe re mhan bhi ọne ẹghe nan. Bhiriọ, ọkhẹke nin mhan “ha mhọn ọkhọle nọn gbale, yẹ ha nan erọnmhọn” ẹghe rebhe.—1 Pet. 4:7.
(1 Peter 4:8) Rẹ gbera emhin rebhe, bha ha mhọn ahoẹmhọn-egbe nọn dinmhin da egbe, ranmhude, ahoẹmhọn-egbe, ọle gue olukhọ ne bunbun.
w99 4/15 22 ¶3
Lẹn Eji Uwẹ Da Wẹghẹ, Uwẹ Ha Yẹ Khọn Ọlẹn Miotọ
Ọkike ọle, ọkhẹke nin mhan ha yere ẹmhọn nin Peter nin odibo tale, nọn yọle: “Ọkpẹnlẹn ọsi emhin rebhe sire. Bhiriọ, bha ha mhọn ọkhọle nọn gbale, bha ha yẹ ha nan erọnmhọn. Rẹ gbera emhin rebhe, bha ha mhọn ahoẹmhọn-egbe nọn dinmhin da egbe, ranmhude, ahoẹmhọn-egbe, ọle gue olukhọ ne bunbun.” (1 Peter 4:7, 8) Emhin nọn lẹkhẹ nọn nin olukhọ nesẹmhan bi ọsi ibhio mhan rẹ kiẹn idobolo ji mhan. Ojuu bhọ lẹn ọnan. Ọnan zẹle nin ọle da guanọ nin ọle si iwa-egbea re bhi ẹwẹ mhan, nin ọle da sabọ khọn mhan miotọ. Ọle lẹnmhin ghe mhan ha kugbe, mhan ida de. Bhiriọ, ọkhẹke nin mhan ha re oyẹẹ nọn dinmhin rẹ rẹhunmhan ibhio mhan sade ele lu mhan khọlọ. Mhan ha lu iriọ, mhan ida re otọ nin Esu hiehie.—Ephesians 4:25-27.
(1 Peter 4:9) Bha ha miẹn ọdeọde bhi ẹwẹ bha ọbhi egbe. Bha hẹi ha re izaka-zuyọn rẹ lu ọle.
Ọkhẹke Nan Ha Miẹn Ẹbho Ọbhi Egbe—Emhin Eghọnghọn Nọn
2 Bhi ẹwẹ ene emhin nin Peter tẹmhọnlẹn bhi ọne lẹta, ọle da yẹ taman ele ghe, nin ele ha miẹn ọdeọde bhi ẹwẹ ele ọbhi egbe. (1 Pet. 4:9) Bhi urolo iGreek, ebi a re ọle ta nan rẹ miẹn ọria ọbhi egbe, ọle hi, nan rẹ ha mhọn ẹkẹ ẹjẹjẹ da ọriọbhe. Ọkpakinọn, Peter da gbẹn ji ene iKristiẹn ghe nin ele ha miẹn ene ele ko ga ọbhi egbe. Elele nela ele ha miẹn bhọ sade ele miẹn ọdeọde ọbhi egbe?
3 Ọ dẹ rẹkpa ele rẹ manman sikẹ egbe. Ọria sẹ ka tie ẹ vae bhi isọle khẹ? Ọ bha be manman sẹ uwẹ ọnyẹnmhẹn nin uwẹ rẹ yo? Ẹghe nin uwẹ rẹ tie ẹbho eso nin bha ko ribhi agbotu vae bhi uwa nọnsẹ, ikolu nin bha ko mhọnlẹn bha be kie si diẹn? Mhan a ha miẹn ibhio mhan ọbhi egbe, mhan ki sabọ manman sikẹ ele. Ranmhude emhin wo manman ha khọ ọbhọ, ọ da khẹke nin Kristiẹn ne ha nyẹnlẹn bhi ẹghe nọnsi Peter rẹ manman sikẹ egbe nọnsẹn. Iriọ yẹ nọn rẹji imhan nin Kristiẹn ẹlẹnan nian ne nyẹnlẹn bhi ẹghe ọkike ọsi ọne agbọn nan.—2 Tim. 3:1.
Guanọ Emhin Oriọn ne Ghanlẹn
(1 Peter 3:19, 20) Bhi ọne idia nan, ọle da kpanọ dọ tẹmhọn Osẹnobulua man ẹlinmhin ne ribhi ighan, 20 ne ka ha mhọn akan-ehọ bhi ẹghe nin Osẹnobulua rẹ ha mhọn iziẹngbe bhi ẹghe nọnsi Noah, ẹghe nan rẹ ha bọn okọ, nin ikpeta ẹbho—itue elẹnlẹn—na i, nin ele da miuhọnmhọn bhi ọne amẹn.
w13 6/15 23
Ọta Nin Eria Ne Tie Ebe Nesẹmhan Nọọn
Ẹghe nin Baibo rẹ yọle ghe iJesu dọ “tẹmhọn Osẹnobulua man ẹlinmhin ne ribhi ighan,” be ọ re ọle ta? (1 Pet. 3:19)
▪ Peter nin odibo da rẹman ghe ene ẹlinmhin nan, ele hi ene ẹlinmhin “ne ka ha mhọn akan-ehọ bhi ẹghe nin Osẹnobulua rẹ ha mhọn iziẹngbe bhi ẹghe nọnsi Noah.” (1 Pet. 3:20) O wo khia bhi ẹlo a ghe ẹlinmhin ne deba Ojuu sọtẹ da iJehova, ele iPeter ha tẹmhọnlẹn. Jude da tẹmhọn “ẹhi ne bha debhi ihe nọnsele a, ne sibhi eje khẹke nin ele da ha nyẹnlẹn re.” Ọle da yọle ghe Osẹnobulua “mun ele ya bhi ighan ọsi ighegheghe bhi ẹkẹ ẹkpa-ebiuki ha khẹ iguẹzọ ọsi ukpẹdẹ nọn khua.”—Jude 6.
Uwedẹ nela ene ẹhi nan rẹ ha mhọn akan-ehọ bhi ẹghe nọnsi Noah? Ọkuẹsẹ Osẹnobulua dọ re amẹn rẹ fuẹn agbọn an bhi ẹghe nọnsi Noah, ene ẹhi nan da mun akpa ọsi eria yọ dọ ha nyẹnlẹn bhi ọne otọ nan—emhin nin Osẹnobulua bha mhanmhan nin ele. (Gen. 6:2, 4) Ele da ha ne ikhuo nowẹ. Osẹnobulua bhọ bha man ele nin ele ha ne ikhuo nowẹ. Emhin esankan ele wo lu bhi ẹlo nọnsi Osẹnobulua. (Gen. 5:2) Ẹghe nin Osẹnobulua rẹyi ha sẹ, ọle dẹ fuẹn ene ẹhi nan an ne mhọn akan-ẹho da ọle. Ejayenan nian, beji ebe nọnsi Jude tale, ene ẹhi sẹ ribhi ighan bhi “ẹkẹ ẹkpa-ebiuki.”
Ẹghela iJesu rẹ “tẹmhọn Osẹnobulua man ẹlinmhin ne ribhi ighan”? Be bhọ ọle rẹ lu ọle yẹ? Peter yọle ghe Jesu re egbe ẹlinmhin riọ kpanọ bhi uu fo, ọle kuẹ dọ lu ọne emhin nan. (1 Pet. 3:18, 19) Sẹyẹ, Peter da yọle ghe iJesu “da kpanọ dọ tẹmhọn Osẹnobulua.” Uwedẹ nin Peter rẹ ta ọne ẹmhọn nan da rẹman ghe emhin nọn sunu fo ọle ha tẹmhọn ọlẹn. Ikpọta nin Peter noo rẹman ghe iJesu bhọ tẹmhọn Osẹnobulua man ene ẹlinmhin fo ọkuẹsẹ iPeter gbẹn ebe ọhẹnhẹn nọnsọle. Ọ diabe ghe, ẹghe nin Jesu rẹ riọ kpanọ fo, ọle da dọ taman ene ẹhi ne imhẹn oya nọn khẹ ele bhi odalo. Ọne ẹmhọn nin Jesu taman ele, ọ iyi ọnọn ha re iruduba nin ele. Sokpan, ọta ibhohiẹn nọn rẹji ele. (Jonah 1:1, 2) Jesu mhọn ọne ahu nin ọle rẹ ta ene ọta ibhohiẹn nan man ele, ranmhude, ọle wo ga Osẹnobulua nọnsẹn rẹ sẹbhi ukpẹdẹ nin ọle yu. Osẹnobulua da yẹ riọ ọle kpanọ. Ojuu bha sabọ mun ọlẹn gba.—John 14:30; 16:8-11.
Bhi ẹghe odalo, Jesu dẹ mun Ojuu bi ene ẹhi nan ne imhẹn fiọ bhi uhio nọn imhọn ọkpẹnlẹn. (Luke 8:30, 31; Rev. 20:1-3) Ọkuẹsẹ ẹghenin, ene ẹhi nan ne imhẹn ribhi ighan bhi ẹkẹ ẹkpa-ebiuki. Osẹnobulua dẹ gene gbe ele khuelo.—Rev. 20:7-10.
(1 Peter 4:6) Bhi ọsi ẹmhọanta, ọnan zẹle nan da sẹyẹ tẹmhọn Osẹnobulua man ene yu, nan da miẹn ghe aharẹmiẹn a bhohiẹn ele bhi uwedẹ efun bhi ẹlo ọsi eria, ele ki ha nyẹnlẹn bhi uwedẹ oriọn bhi ẹlo nọnsi Osẹnobulua.
w08 11/15 21 ¶8
Emhin Eso Nan Miẹn Tie bhi Ebe ọsi James bi ọsi Peter
4:6—Hebhọ “ene yu” nan “tẹmhọn Osẹnobulua man”?
Eria ne rẹ ha ribhi olukhọ ọkuẹsẹ ele dọ lẹn ẹmhọanta, ele hi eria ne yu nin Peter tẹmhọn ọlẹn. Ranmhude, ele rẹ yu bhi uwedẹ ọsi oriọn. (Eph. 2:1) Ẹghe nin ele ki rẹ dọ luẹ ẹmhọanta yẹ dọ ha mhọn urẹọbhọ da emhin nin ele luẹle, ele da munhẹn ha nyẹnlẹn bhi uwedẹ oriọn.
Baibo Nan Ha Tie
(1 Peter 3:8-22) Ọkike ọle, ọkhẹke nin bha rebhe ha mhọn ọkhọle ọkpa, aria-ji-egbe, ahoẹmhọn-egbe nin ibhio mhọn da egbe, ẹkẹ-ẹjẹjẹ bi idegbere. 9 Bha hẹi re ọbe rẹ haosa ọbe, la ghunmhun eria ne ghunmhun bha. Bha ha re emhin esili rẹ ha ele osa. Ranmhude, ọnan zẹle nan da tie bha, nin bha da sabọ le emhin esili bhi uku. 10 “Ọria-ọria nọn hoẹmhọn iẹnlẹn nọnsọle, nọn yẹ guanọ nin ẹdagbọn nọnsọle mhẹn nanlẹn dẹ gbega olanmhẹn nọnsọle bhi emhin ebe, yẹ gbega unun nọnsọle nọn hẹi bha ohoghe. 11 Ji ọle fikeke gbe emhin ebe dọ ha lu emhin esili; ji ọle guanọ ọfure yẹ khu ọbhọ. 12 Ranmhude, ẹlo nọnsi Jehova ribhi egbe ọsi ene khiale, ọle yẹ ka ele ehọ sade ele nan erọnmhọn ji ọle. Sokpan, ọle nin Jehova imun ẹlo ọbhi egbe ọsi ẹbho ne lu emhin ebe.” 13 Bhi ọsi ẹmhọanta, họbhọ ha lu emhin ebe da bha sade bha mhọn ọhubhudu rẹ ha lu emhin esili? 14 Sokpan, aharẹmiẹn ibha le oya ranmhude emhin esili nin bha lu, ibha ghọnghọn. Ọkpakinọn, bha hẹi mun ofẹn emhin nin ele mun ofẹn ọlẹn, bha hẹi kpokpo egbe. 15 Ọkpakinọn, bha kpe iKristi khia bọsi Ebeanlẹn bhi ẹke ọkhọle nọnsẹbha, bha muegbe ọbhi otọ ẹghe rebhe nin bha rẹ sabọ talọ bhi isira ẹbho rebhe ne ho nin ele lẹn ebezẹle nin bha da mhọn ikhuaẹloghe nin bha mhọnlẹn, sokpan, bha ha re uwedẹ ekpẹn bi ọkhọ nọn lọre rẹ talọ. 16 Bha ha mhọn ọkhọle umueria nọn gbale, nan da miẹn ghe uwedẹ nọn hi rẹ khin nin ẹbho rẹ re unun ji bha, ẹkhọle ki ha lo ene ẹbho ne re unun ji bha, ranmhude unyẹnmhin esili nọnsẹbha bọsi eria ne rẹkhan iKristi. 17 Ranmhude, nin bha rẹ le oya ranmhude ibha lu emhin esili, sade Osẹnobulua re otọ nin bha rẹ le ọne oya, ọle mhẹn nẹ nin bha le oya ranmhude bha lu emhin ebe. 18 Kristi da yu bhi olukhọ osukpa, ọria nọn khiale da yu nin eria ne bha khia, nin ọle da sabọ ne bha bu Osẹnobulua. A da gbe ọle a bhi efun, sokpan, a da riọ ọle kpanọ bhi egbe ẹlinmhin. 19 Bhi ọne idia nan, ọle da kpanọ dọ tẹmhọn Osẹnobulua man ẹlinmhin ne ribhi ighan, 20 ne ka ha mhọn akan-ehọ bhi ẹghe nin Osẹnobulua rẹ ha mhọn iziẹngbe bhi ẹghe ọsi Noah, ẹghe nan rẹ ha bọn okọ, nin ikpeta ẹbho—itue elẹnlẹn—na i, nin ele da miuhọnmhọn bhi ọne amẹn. 21 Inian imianmẹn yẹ diabe ọnan. Ọne imianmẹn nan sẹyẹ wo miẹn bha fan nian (ọ iyi nan rẹ gbo itọn ọsi efun sibhi egbe re, ọkpakinọn, nin mhan rẹ bhii Osẹnobulua nin ọle re ọkhọle-umueria nọn gbale nin mhan), rẹ na bhi obọ uriọkpanọ nin Jesu riọkpanọ bhi uu. 22 Ọle ribhi obera nọnsi Osẹnobulua, ranmhude ọle diọbhi okhun, a da mun ene ẹhi bi ugbẹloghe bi ahu ọbhi odotọ ọle.
OCTOBER 28–NOVEMBER 3
EMHIN NE GHANLẸN NE RIBHI BAIBO | 2 PETER 1-3
“Mun Ọkhọle Ọbhi Ẹghe Nin Ukpẹdẹ Nọnsi Jehova Ha Rẹ Vae”
(2 Peter 3:9, 10) Jehova ire ive nesọle rẹ rọẹghẹ beji ẹbho eso ria ọle le. Ọkpakinọn, iziẹngbe ọle mhọn da bha, ranmhude, ọle iguanọ nin ọria soso fuẹn an, ọle guanọ nin ọrebhe fidenọ. 10 Sokpan, ukpẹdẹ nọnsi Jehova dẹ vae bọsi oyi, ẹghe nin okhun ha rẹ re usomhin si egbe kie, ọkpakinọn, emhin ne ribhọ ne manman ghan ki nianlan an, otọ bi iwẹnna nan lu bhọ ki zegbere.
w06 12/15 27 ¶11
Jehova Dẹ Vae Dọ Bhohiẹn Nọn Gbale
11 Be iJesu re ọle ta ẹghe nin ọle rẹ yọle ghe iJehova dẹ ‘jẹje’ vae dọ bhohiẹn nọn gbale? IBaibo rẹman mhan ghe, arẹmiẹn ghe iJehova manman mhọn iziẹngbe, ọle ida ria ẹghe a rẹ fuẹn ene lu emhin ebe a sade ọne ẹghe sẹle. (Luke 18:7, 8; 2 Peter 3:9, 10) Bhi ẹghe nọnsi Noah, Jehova bha ria ẹghe a rẹ re amẹn fuẹn eluemhin-ebe a. Iriọ yẹ nọn bhi ẹghe nọnsi Lot, ẹghe nin Jehova rẹ re eranlẹn rẹ fuẹn agbaẹbho ọsi Sodom bi Gomorrah a. Jesu yọle ghe iriọ ọ ha yẹ dia ẹghe nin Ọmọn nọnsi okpea ha rẹ vae. (Luke 17:27-30) Ugbekhuelo dẹ re ẹjẹje sunu ji ene lu emhin ebe. (1 Thessalonians 5:2, 3) Bhi ọsi ẹmhọanta, mhan mhọn ọne iruduba ghe iJehova ida re otọ nin ọne agbọn Esu nan rẹ gbera ẹghe nin ọle rẹyi nanlẹn.
(2 Peter 3:11, 12) Beji a miẹn ghe ene emhin nan dẹ re inian nianlan an, bha gbẹlokotọ bhi unan ọria nin bha khin bhi unyẹnmhin esili bi iwẹnna oga nin bha rẹ ga Osẹnobulua, 12 beji bha ha rẹ ha khẹ, yẹ mun ọkhọle ọbhi ẹghe nin ukpẹdẹ nọnsi Jehova ha rẹ vae, ẹghe nan ha rẹ re eranlẹn tuẹ okhun an, yẹ nianlan emhin ne ribhọ a!
w06 12/15 19 ¶18
“Ukpẹdẹ Nọn Khua Nọnsi Jehova Sire”
18 Ọnan zẹle nin Peter nin odibo da taman mhan nin mhan “mun ọkhọle ọbhi ẹghe nin ukpẹdẹ nọnsi Jehova ha rẹ vae.” Be imhan ha rẹ lu ọnan yẹ? Uwedẹ ọkpa nin mhan ha rẹ lu ọnan hi, ‘mhan ki gbẹlokotọ bhi unan ọria nin mhan khin bhi unyẹnmhin esili bi oga nin mhan ga Osẹnobulua.’ (2 Peter 3:11, 12) Mhan a ha lu iwẹnna oga ẹghe rebhe, ọ ki rẹkpa mhan rẹ ha “mun ọkhọle ọbhi ẹghe nin ukpẹdẹ nọnsi Jehova ha rẹ vae.” Ukpọta iGreek nan zedu ọle diọbhi “mun ọkhọle ọbhi,” mundia nin “nan rẹ tua emhin.” Mhan ida sabọ gene tua ẹghe nin ukpẹdẹ nọnsi Jehova ha rẹ vae. Ọrẹyiriọ, mhan a ha lu iwẹnna oga ẹghe rebhe, ẹghe ki jẹje gbera.—1 Corinthians 15:58.
Guanọ Emhin Oriọn ne Ghanlẹn
(2 Peter 1:19) Bhiriọ, a wo re ẹmhọn ọne akhasẹ man mhan nọnsẹn, sẹyẹ, ibha wo lu nọnsẹn beji bha rẹ gbẹlokotọ bhọ, bọsi ukpa nọn bhala bhi ebiuki (ọkuẹsẹ ẹdẹ we, sẹyẹ ahiẹnhiẹn ọsewewiẹ zegbere) bhi ọkhọle nọnsẹbha.
w08 11/15 22 ¶2
Emhin Eso Nan Miẹn Tie bhi Ebe ọsi James bi ọsi Peter
1:19—Họla hi ọne “ahiẹnhiẹn ọsewewiẹ”? Ẹghela ọle rẹ zegbere? Be rẹkpa mhan rẹ lẹn ghe ọ zegbere fo? Jesu Kristi bhi ihe ọsi Ojie ọsi Agbejele nọnsi Osẹnobulua, ọle hi “ahiẹnhiẹn ọsewewiẹ.” (Rev. 22:16) Bhi ukpe 1914, ọle ọne ahiẹnhiẹn nan zegbere, ranmhude, ọne ukpe nin Jesu kiẹn Ojie. Beji ahiẹnhiẹn ọsewewiẹ rẹ rẹman ghe ẹdẹ ọsọgbọn we, iriọ ẹghe nin Jesu rẹ kiẹn ojie rẹ rẹman ghe ugbẹloghe ọsọgbọn munhẹn. Ẹghe nin Jesu rẹ fi egbe denọ bhi isira edibo nesọle eso, ọle da rẹman uyi bi ahu nin ọle ha rẹ gbẹloghe. Ọne emhin nan nọn sunu da rẹman ghe ọta akhasẹ ne ribhi Baibo dẹ munsẹ. Ọta akhasẹ ne ribhi Baibo nin mhan gbẹlokotọ ha tie, ọle rẹkpa mhan rẹ daghe ẹfua. Ọnan da rẹkpa mhan rẹ lẹn ghe ọne Ahiẹnhiẹn Ọsewewiẹ zegbere fo.
(2 Peter 2:4) Bhi ọsi ẹmhọanta, Osẹnobulua bha de obọ ọi nin ọle rẹ re oya nin ene ẹhi ne lu emhin ebe, ọkpakinọn, ọle da mun ele fiọ bhi Tarʹta·rus, ọle da mun ele bhi ighan ọsi ẹkpa-ebiuki ha khẹ ukpẹdẹ ibhohiẹn.
w08 11/15 22 ¶3
Emhin Eso Nan Miẹn Tie bhi Ebe ọsi James bi ọsi Peter
2:4—Be hi “Tartarus”? Ẹghela Osẹnobulua rẹ mun ene ẹhi ne lu emhin ebe fiọ bhọ? Ighan nan mun ẹhi ne lu emhin ebe fiọ ọi, ọle Tartarus khin. Ọ iyi ighan nan mun eria fiọ ọi. Ighan bhi ẹkẹ ẹkpa-ebiuki, ọle ene ẹhi ne sẹriọ ye bhi uwedẹ oriọn, ranmhude, ele ida sabọ daghe ẹfua nọnsi Osẹnobulua, la lẹn otọ emhanmhan nesọle. Ẹhi ne ribhi Tartarus imhọn ikhuaẹloghe rẹji ẹghe odalo. Bhi ẹghe nọnsi Noah, ọle Osẹnobulua rẹ mun ene ẹhi nan fiọ bhi Tartarus. Ele dẹ ha ribhi enin rẹ sẹbhi ẹghe nan ha rẹ fuẹn ele a.
Baibo Nan Ha Tie
(2 Peter 1:1-15) Ilẹta nin Simon Peter, ọguọmhandia bi etuegbe nọnsi Jesu Kristi, gbẹn ji ẹbho ne mhọn urẹọbhọ nọn ghanlẹn bii ọsẹmhan, rẹ na obọ ikhiale ọsi Osẹnobulua nọnsẹmhan bi Jesu Kristi nin Ọmiẹnmhanfan: 2 Nin ilẹnmhin nọn gbale ọsi Osẹnobulua bi ọsi Jesu nin Ebeanlẹn mhan re itohan nọn bha khẹke bi ọfure nin bha mhọnlẹn ha bun ọbhọ. 3 Ranmhude, ahu nọnsi Jesu re imhan ha mhọn emhin ne diẹn mun iẹnlẹn bi oga nan ga Osẹnobulua, rẹ na ilẹnmhin nọn gbale ọsi Ọnọn re uyi bi umhẹnmhin nọnsọle tie mhan. 4 Rẹ na obọ ene emhin nan, ọle da re imhan miẹn ene ive ne ghanlẹn, nan da miẹn ghe rẹ na obọ ene emhin nan, ibha ki sabọ diabe ọle, ranmhude, ibha sabọ miuhọnmhọn bhi olukhọ ọsi ọne agbọn nan, nin iria eria ne imhẹn sire. 5 Ranmhude ọnan, rẹ deba urẹọbhọ nọnsẹbha, bha dọnmhegbe nin bha ha yi eria ne mhẹn, rẹ deba umhẹnmhin nọnsẹbha, bha ha yi eria ne mhọn ilẹnmhin, 6 rẹ deba ilẹnmhin nọnsẹbha, bha ha mun egbe bhi ibẹẹ, rẹ deba imun-egbe-bhi-ibẹẹ, bha ha mhọn iziẹngbe, rẹ deba iziẹngbe nọnsẹbha, bha ha re ọkhọle rebhe ga, 7 rẹ deba nan rẹ re ọkhọle rebhe ga, bha ha mhọn ẹkẹ ẹjẹjẹ, rẹ deba ẹkẹ ẹjẹjẹ nọnsẹbha, bha ha mhọn ahoẹmhọn-egbe. 8 Sade bha mhọn ene emhin nan rebhe, nin bha da yẹ ji ele gba bha egbe, ele dẹ gbega bha nin bha hẹi fuọfuọ a, la kiẹn ene bha yẹ mọn ikpẹ bhi ẹmhọn ilẹnmhin nọn gbale nọnsi Jesu Kristi nin Ebeanlẹn mhan. 9 Ranmhude, ọria-ọria nọn imhọn ene emhin nan kiẹn ọnọn ruẹlo, ọ gue ẹlo nọnsọle nin ọle hẹi daghe ẹfua, ọle yẹ yelea ebi a rẹ kpe olukhọ nin ọle lu bhi ẹghe nọn gbera kua yẹ. 10 Bhiriọ, ibhio, bha manman ha dọnmhegbe nin bha rẹ rẹman egbe bha ghe a gene tie bha, yẹ zẹ ibha. Ranmhude, ibha a ha lu ene emhin nan, ibha ida de ghẹdẹ. 11 Bhi ọsi ẹmhọanta, bha ha re inian ha lu emhin, bha dẹ nabhi Agbejele ọsi ighegheghe ọsi Jesu Kristi nin Ebeanlẹn bi Ọmiẹnmhanfan nọnsẹmhan. 12 Ranmhude ọnan, mẹn wo muegbe nin mẹn rẹ ha ye bha ene emhin nan re ẹghe rebhe, arẹmiẹn ghe ibha ka lẹn ele, bi bha yẹ mun oga ẹmhọanta nin bha ye mhọn nọnsẹn. 13 Sokpan, mẹn riale ghe emhin nọn gbale nọn nin mẹn rẹ ha ye bha egbe re, beji a miẹn ghe imẹn sẹyẹ nyẹnlẹn bhi ọne ibọkpọ nan. 14 Ranmhude, imẹn bi bha lẹnmhin ghe a dẹ kẹ re ọne ibọkpọ nan kie, beji Jesu Kristi nin Ebeanlẹn mhan ka rẹman mẹn. 15 Mẹn dẹ wo ha lu eka nin mẹn ha sabọ lu, beji a da miẹn ghe imẹn ha kpanọ fo, ibha ki sabọ tobọbha ha ye ene emhin nan re.