Be Uwẹ Ha Rẹ Sabọ Ha Luẹ Baibo Nọnsẹn Yẹ Nin Uwẹ Da miẹn elele Bhọ?

Joshua tie ebe ọsi Uhi; Ẹghe nin uwa ne ribhi Jericho rebhe rẹ ha de guọghua, uwa ọsi Rahab ọkpa bha dẹ; Ẹghe nin Joshua rẹ denọ ẹlo da okhun yẹ tuẹn obọ okhun a nan erọnmhọn

JOSHUA da wo kuẹlo ọbhi ọnọghọ. Ọkhẹke nin ọle khọn ene ọnọghọ nan beji ọle ha da sabọ sun ibhokhan Izrẹl sẹbhi otọ nan rẹ ve ive nin ele. Jehova da taman ọlẹn ghe emhin dẹ kiẹn ọlẹn nanlẹn. Jehova da ze ọle udu yọle: ‘Mun zeze, uwẹ ha lu rẹkhan uhi nọnsẹmẹn. Ha tie ọle asọn bi odanmhẹn, uwẹ ha gbẹlokotọ lu rẹkhan ebe a gbẹn ọbhọ. Bhiriọ, emhin ki kiẹn ọlẹn nin uwẹ. Sẹyẹ uwẹ ki sabọ re ewanlẹn ha lu emhin.’—Josh. 1:7, 8.

Bhi ọne ẹghe “ọkakale nọn bha lẹkhẹ” nin mhan da nyẹnlẹn ẹlẹnan, mhan yẹ wo kuẹlo ọbhi ọnọghọ ne bunbun. (2 Tim. 3:1) Bọsi Joshua, mhan dẹ sabọ khọn ene ọnọghọ nan sade mhan re obọ rẹkhan adia nesi Jehova. Ahamiẹn mhan tie Baibo ẹdẹdẹ, mhan ki miẹn adia nin mhan ha sabọ rẹ khọn ọnọghọ nin mhan miẹn bhi egbe.

Ọkpakinọn, asabọ miẹn ghe eso bhi ẹwẹ mhan bha manman guẹ ebe nan tie, bhiriọ ebe nan tie imanman yẹẹ ele. Ranmhude emhin kpataki nọn nan rẹ luẹ Baibo, fẹ ebe a gbẹn ọbhi ẹkpẹti ghe nọn yọle “Fẹghe Si Ebe Ribhi Enan Dẹ Sabọ Rẹkpa Ẹ.” Ebe a gbẹn ọbhi enin dẹ rẹkpa uwẹ rẹ sabọ ha luẹ ebe nọnsẹn, ọ ki yẹ re ọle ha ti uwẹ bhọ rẹ ha luẹ ọle.

Ọne ọria nọn gbẹn ebe ọsi Psamls 119 da so illo yọle: “Dia mẹn bhi uwedẹ ọsi uhi nesẹ, ẹmhọn ele manman ti mẹn bhọ.” (Ps. 119:35) Baibo nan luẹ dẹ wo sabọ manman ha sẹ uwẹ ọnyẹnmhẹn. Uwẹ dẹ wo miẹn emhin ne bunbun luẹ bhọ beji uwẹ a rẹ ha guanọ emhin oriọn ne ghanlẹn bhọ.

Arẹmiẹn uwẹ i sun agbaẹbho beji Joshua ka lu, uwẹ yẹ wo mhọn ọnọghọ nin uwẹ kuẹlo ọ. Bhiriọ, beji Joshua lu, re ẹghe ọbhi otọ rẹ ha luẹ ọta nọnsi Osẹnobulua. Uwẹ a yẹ ha re obọ rẹkhan emhin nin uwẹ luẹle. Nin uwẹ da miẹn elele, ọle zẹle nin Osẹnobulua da gbẹn ele ọbhi otọ. Uwẹ ha lu inian, emhin ki yẹ kiẹn ọlẹn nin uwẹ, sẹyẹ uwẹ ki sabọ re ẹwanlẹn ha lu emhin.

FẸGHE SI EBE RIBHI ENAN DẸ SABỌ RẸKPA Ẹ

Ha nan erọnmhọn fo uwẹ kuẹ munhẹn. Ọta nesi Osẹnobulua, ọle ribhi ẹkẹ Baibo. Ọle gbẹn ele ọbhi otọ nin ele da sabọ rẹkpa mhan. Bhiriọ, uwẹ a ha tie Baibo, bhii ọle nin ọle rẹkpa ẹ lẹn otọ emhin nin uwẹ tie, nin uwẹ sabọ ha yere ebi uwẹ tiele, bi nin uwẹ sabọ ha re obọ rẹkhan ele.—Ezra 7:10.
Ha nọọn egbe uwẹ ọta sade uwẹ tie Baibo la ebe nesẹmhan: ‘Be bhọ eji mẹn tiele nan mhan mẹn le rẹji Jehova? Be bhọ ọ rẹ diẹn mun uhọnmhunje nọn ribhi Baibo yẹ? Be bhọ mẹn ha rẹ sabọ re ebi mẹn luẹle nan rẹ rẹkpa ẹbho yẹ?’
Ha ria eria nyan emhin nin uwẹ luẹle. Uwẹ ha ki zẹ tie, zobọ khere uwẹ ha ria eria nyan ebi uwẹ ki sẹ tie. Nọọn egbe ẹ ene inọnta nan rẹ ria eria nyan ebi uwẹ ki sẹ tie: ‘Be ọne emhin nin mẹn luẹ khian nan dia mẹn yẹ bhi egbe? Bezẹle nọn da dia mẹn iriọ bhi egbe? Be ọrẹ diẹn mun emhin ne ki sẹ ka sunu ji mẹn bhi iẹnlẹn khẹ, bi ene sunu ji mẹn ẹlẹnan, rẹsẹbhi ene ha sabọ sunu ji mẹn bhi ẹghe odalo? Be imhẹn ha rẹ re obọ rẹkhan adia ne ribhi eji mhẹn tiele bhi iẹnlẹn nọnsẹmhẹn yẹ?’ (Job 23:5; Ps. 49:3) Dọnmhegbe riale si uwẹ dẹ sabọ gbotọle fanọan ebezẹle nin Jehova da taman ene ga ọle nin ele rẹban emhin eso, la dọnmhegbe ria emhin ne ha sunu sade a bha lu rẹkhan ebi Jehova tale.—Deut. 32:28, 29.
Ha re ọkhọle rẹ daghe ebe sunu sade uwẹ tie eji emhin da ha sounu bhi Baibo. Bhi ọsi ijiẹmhin, re ọkhọle rẹ daghe ebe emhin dia yẹ ẹghe nin ibhio Joseph rẹ khiẹn ọlẹn nin ibhokhan Ishmael. (Gen. 37:18-28) Be bhọ uwẹ daghe, be uwẹ họn, be uwẹ re ihue ya? Ejayenan nian, riale uwẹ ọnọn ribhi idia nin ene ẹbho ye. Be bho emhin dia ele bhi egbe yẹ, be ele ria? Ahamiẹn uwẹ dinian re ọkhọle daghe ebi uwẹ luẹ ẹmhọnlẹn, ebi uwẹ luẹ ki wo manman mun uwẹ ẹlo kore.
Noo emhin nin agbotu zẹ ọle egbe re nanrẹ luẹ emhin dimhin. Dọnmhegbe rẹ lẹn ebi a rẹ noo ene ribhi urolo nọnsẹ yẹ a ha rẹ miẹn intanẹt ọ ye la a print ọ dagbare bhi ebe. Uwẹ sabọ rẹ taman ẹbho nin ele mhan uwẹ ebi a rẹ noo ele nọnsẹn yẹ. Bhi ọsi ijiẹmhin, Watch Tower Publications Index la Research Guide for Jehovah’s Witnesses, dẹ sabọ rẹkpa uwẹ guanọ ebi a zilo nyan bhi uhọnmhọn-ọta kẹkẹ nan ki sẹ gbẹn dagbare. Ọ dẹ yẹ rẹkpa mhan miẹn eji a da gbotọle fanọan bhi ije kẹkẹ bhi Baibo. Ahamiẹn uwẹ mhọn New World Translation of the Holy Scriptures bhi urọlo nin uwẹ lẹnlẹn, ha noo appendix ne ribhọ. Ọnan dẹ sabọ rẹkpa mhan lẹn agbaẹbho nan so ọle unun bhi Baibo, ebi a rẹ ha man emhin yẹ ẹghenin, bi emhin kẹkẹ.
Kie re ẹlo nanbhi emhin nin uwẹ luẹle kẹkẹ ọnan dẹ rẹkpa uwẹ ha ye ene emhin nin uwẹ luẹle re. Sẹyẹ, dọnmhegbe rẹ man ẹbho ebi uwẹ luẹle. Bhiriọ nọọn egbe ẹ, mẹn luẹ emhin soso nin mẹn ha sabọ noo bhi itẹmhọn Osẹnobulua? Uwẹ ha lu inian, ebi uwẹ luẹle ki sabọ de uwẹ bhi ọkhọle a. Uwẹ ki yẹ sabọ re ele ha rẹkpa ẹbho.