Bi Azagba-uwa Nọnsẹ Arẹ Sabọ Aghọnghọn Yẹ?

1. Bezẹle nin ibọdọ bi iriokhuo bhi uwedẹ nọn gbale da re eghonghọn re bhi azagba-uwa?

Obọ iJehova, Osẹnobulua ọsi eghọnghọn, nọn guanọ nin azagba-uwa aghọnghọn, ọta nọn mhẹn nan vae. (1 Timothy 1:11) Ọle mun iẹnlẹn azagba-uwa gbọ. Ibọdọ bi iriokhuo bhi uwedẹ nọn gbale, ọ re eghọnghọn re bhi azagba-uwa, ranmhude ọ gbogbaga ọnin okpea, okhuo bi imọn nele biẹle. Ọkhẹke nin ene ga Osẹnobulua rẹkhan uhi ọsi ibọdọ bi iriokhuo bhi ẹbho nọnsele.—Tie Luke 2:1, 4, 5.

Bi Osẹnobulua ghe ibodọ bi iriokhuo yẹ? Ọle ọ guanọ nọn ha yi okugbe ọsi okpea bi okhuo rẹsẹbhi ukpẹdẹ uu. Jehova guanọ nin okhuo bi ọdọ sun rẹkhan egbe. (Hebrews 13:4) Uwa-egbea ọsi okhuo bi ọdọ bha yẹẹ iJehova. (Malachi 2:16) Ahamiẹn ọkpa bhi ẹwẹ ele gboghẹ, Jehova re ẹho nin ọnọn kẹle rẹ kpanọ bọ ọdọ la re okhuo ọbhebhe.—Tie Matthew 19:3-6, 9.

2. Bi okhuo bi ọdọ arẹ ne egbe a lu emhin yẹ?

Jehova man okhuo bi ọdọ ne ha rẹkpa egbe. (Genesis 2:18) Ọnin okpea uhọnmhọn-uwa. Ọkhẹke nọnle ha guanọ ebale, ukpọn bi ejadia nin okhuo bi imọn nesọle. Ọle la yẹ a man ele ẹmhọn Osẹnobulua. Ọ ki hoẹmhọn okhuo ọle beji ọrẹ hoẹmhọn egbọle. Ọkhẹke nin okhuo bi ọdọ ha mhọn oyẹẹ bi ekpẹn da egbe. Ranmhude mhan bha gba, ọkhẹke nin okhuo bi ọdọ a rẹhunmhan egbe. Ele ha luẹ rẹ lu ọnan, azagba-uwa ki ha ghọnghọn.—Tie Ephesians 4:31, 32; 5:22-25, 33; 1 Peter 3:7.

3. Ọikhẹke nuwẹ sibhi ibọdọ bi iriokhuo nọnsẹ re ranmhude eghọnghọn iribhọ?

Ahamiẹn okhuo bi ọdọ mhọn ọnọghọ bhi iẹnlẹn uwa, ọkhẹke ne kakabọ ri ahoẹmhọn-egbe man. (1 Corinthians 13:4, 5) Baibo bha re obọ bhọ nin okhuo bi ọdọ wa-egbea ranmhude ọnọghọ nan miẹn bhi ibọdọ bi iriokhuo.—Tie 1 Corinthians 7:10-13.

4. Bi Osẹnobulua guanọ nin bha nin ibhokhan?

Jehova guanọ nin bha ha ghọnghọn. Ọlezẹle nin Jehova da re ibhude nọn mhẹn nẹ nin bha, nin bha rẹ sọnyẹnmhẹn bhi ẹghe usẹn. Ọle yẹ ho nin bha min elele bhi ẹwanlẹn bi ilẹn-emhin ọsi ene biẹ bha. (Colossians 3:20) Jehova ho nin bha miẹn eghọnghọn nọn ribhọ sade ibha lu iho nọnsi Jehova bi Ọmon nọnsọle.—Tie Ecclesiastes 11:9–12:1; Matthew 19:13-15; 21:15, 16.

5. Enebiọmọn, bi bha ha lu nin imọn nesẹ bha ada ha ghọnghọn?

Ọkhẹke nin bha situa wẹnna rẹ guane ebale, ikpọn bi ejadia nin imọn nesẹ bha. (1 Timothy 5:8) Ọkpa kinọn, nele rẹ miẹn eghọnghọn, ọkhẹke nin bha man ele ẹmhọn Osẹnobulua ne sabọ hoẹmhọn lẹn, yẹ rẹkhanlẹn. (Ephesians 6:4) Bha ha manman họemhọn Osẹnobulua, imọn nesẹbha dẹ sabọ regbe khọkhọ bha. Bha ha re adia nele bhi ẹkẹ Ọta nọnsi Osẹnobulua, ọdẹ rẹkpa ele bhi uwedẹ nọn mhẹn.—Tie Deuteronomy 6:4-7; Proverbs 22:6.

Isudu bi ogẹn, ọri ibhokhan ghọnghọn. Ọyẹ khẹke nan dia ele. Iman-emhin nọn sẹnian dẹ gbogba ga ele, ne hẹi lu emhin okan. (Proverbs 22:15) Ọrẹ yiriọ, hẹi gbe ele ugbemhin oya.—Tie Colossians 3:21.

Esali Jehova nanbhi Baibo gbẹn ebe nebunbun ne miẹnkpa imọn bi enebiọmọn.—Tie Psalm 19:7, 11.