Obọ Osẹnobulua Ọnin Ọta Nọn Mhẹn Nan Gene Nan Vae?

1. Ọbhọ nyan iBaibo?

Ọta nọn mhẹn ghe, ẹbho dẹ nyẹn bhi otọ nan bhi ighegheghe, ẹkẹ iBaibo ọye. (Psalm 37:29) Ikuẹkue ebe 66 ribhi ẹkẹ iBaibo. Ikpea 40 ne mhọn urẹọbhọ Osẹnobulua rẹ gbẹn iBaibo. Ọki bu ikpe 3,500 nin Mozisi gbẹn ebe isẹn nọn hẹnhẹn ne ribhọ. Jọni gbẹn ebe nọn kike. Ikpe 1,900 ki gbera nọnle gbọnlẹn. Ọbhọ nyan ọta nele gbẹn ọbhi ẹkẹ iBaibo? Osẹnobulua re ahu ẹlinmhin nọn khiale nọnsọle taman ele ebi ele ha gbẹn. (2 Samuel 23:2) Ọta nọnsi Osẹnobulua ele gbẹn ọbhọ, ọiyi ọsele. Bhiriọ, iJehova nyan iBaibo.—Tie 2 Timothy 3:16; 2 Peter 1:20, 21.

Ghe ọne ividio Ọbhọ Nyan IBaibo?

2. Bi mhan rẹ gene lẹn yẹ ghe ẹmhọn-ata ribhi Baibo?

Mhan lẹnmhin ghe obọ Osẹnobulua Baibo nan vae, ranmhude ọta akhasẹ rebhe ne ribhọ, aida miẹn ọbha sunu beji ọle rẹ tale. Imhan ne eria ida sabọ lu ọnin. (Joshua 23:14) Osẹnobulua nọn kokhun nẹ ọkpa la sabọ lu ọnan.—Tie Isaiah 42:9; 46:10.

Ebe nọn nin obọ Osẹnobulua vae, abha miẹn ọbha dikẹ. IBaibo ne bunbun asẹ gbẹn bhi urolo kẹkẹ. Ẹbho nebunbun mhọn iBaibo. Arẹmiẹn ọrele nan gbọnlẹn, emhin eso nin ẹbho bha ka lẹn khẹ rẹji ọnin otọ nan, iBaibo ka tale. Deba ọnin, ebi enin itue 40 ne gbọnlẹn gbẹn, da kugbe kiọn ọkpa.a Ebi Baibo ta rẹji ihoẹmhọn-egbe, obọ Osẹnobulua ọsi ihoẹmhọn-egbe ọkpa ọa sabọ nan vae. IBaibo yẹ mhọn ahu nọn rẹ fi ẹbho iẹnlẹn denọ. Enan zẹle ẹbho nebunbun rẹọbhọ ghe Ọta nọnsi Osẹnobulua iBaibo gene khin.—Tie 1 Thessalonians 2:13.

Ghe ọne ividio Be Imhan Rẹ Lẹn Yẹ Ẹmhọn-ata Gene Ribhi Baibo?

3. Be bhọ ribhi ẹkẹ iBaibo?

Uhọnmhọn-ọta kpataki nọn ribhi Baibo, ọle hi ghe, Osẹnobulua mhọn emhanmhan nọn mhẹn rẹji agbọn. Baibo taman mhan ebi okpea nin ọhẹnhẹn rẹ mun ogba ọfubhegbe fia yẹ, bi eba da rẹ kie miọnlẹn yẹ.—Tie Revelation 21:4, 5.

Uhi, adia, bi ibhude yẹ ribhi ẹkẹ iBaibo. Gbera enin, okha ọsi ebi Osẹnobulua rẹ ne ẹbho khian yẹ bhi Baibo, ji mhan lẹn ọria nọnle khin. Bhiriọ, iBaibo dẹ sabọ rẹkpa mhan rẹ lẹn Osẹnobulua. Ọrẹman mhan ebi mhan rẹ sabọ ha yi ọmọẹ Osẹnobulua yẹ.—Tie Psalm 19:7, 11; James 2:23; 4:8.

4. Buwẹ arẹ sabọ lẹn otọ iBaibo yẹ?

Ọnin brokiọ nan dẹ sabọ rẹkpa ẹ rẹ lẹn otọ iBaibo. Uwedẹ nin Jesu rẹ man emhin, ọle ọda noo. Jesu a tie Baibo ọki taan otọle a. —Tie Luke 24:27, 45.

Ebe mhẹn sẹ bi ọta nọn nin obọ Osẹnobulua vae, ọi ribhọ. Ọrẹ yiriọ, ọbha yẹẹ ẹbho eso. Hẹi ji ọnan re egbe lọ ẹ. Ranmhude nuwẹ rẹha mhọn aribhọ ọsi ighegheghe, ọkhẹke nuwẹ lẹn Osẹnobulua.—Tie John 17:3.