Man Emhin Nọn Gbale

Luke 1:3

EBI UWẸ HA LU: Noo emhin nan ha sabọ gba ẹkẹ ọle rẹ rẹkpa ene uwẹ ne talọ rẹ tobele daghe ẹmhọanta nọn ribhi ebi uwẹ ta.

EBI A RẸ LU ỌLE YẸ:

• Ne emhin nin uwẹ ha man dagbare bhi eji a gba ẹkẹ ọle. Jamiẹn ghe, bhi ẹkẹ iBaibo emhin nin uwẹ ta na dagbare. Wo ha na bhi ẹkẹ iBaibo tie dagbare sade uwẹ miẹn isẹhoa re lu iriọ. Ahamiẹn uwẹ sounun ọbhi emhin nin ekhẹn azemhinre guanọ kere ghe ẹmhọanta nọn, la emhin nan ta bhi niuz, la emhin nọn gene sunu ji ọria, la ebi ọ hi rẹ khin nin uwẹ ho nin uwẹ rẹ man emhin, ka fẹghe si uwẹ dẹ sabọ gba ẹkẹ eji uwẹ da re ọne emhin dagbare, si ẹmhọanta sẹyẹ nọn, la si a ki fi ọle denọ.

• Noo ebe nin uwẹ da ne emhin nin uwẹ man nọnsẹn. Re otọ iBaibo nin uwẹ tiele man bhi uwedẹ nọn ha rẹ diẹn kugbe ba emhin nan gbẹn nẹga ọne eji uwẹ tiele. Ji ọle sẹyẹ diẹn kugbe ba iBaibo rebhe, bi ebe nin ọguọmhandia nọn wanlan nan gba ẹkẹ ọle gbẹn. (Matt. 24:45) Ahamiẹn uwẹ dẹ noo ebe ọsi agbọn, mhọn ẹwan nin uwẹ hẹi ta ebi ọria nọn gbẹn ọlẹn bha ta, la ebi ọle imhọn bhi ọkhọle.

• Rẹkpa ene uwẹ ne talọ rẹ ria eria nyan ebi uwẹ ta. Ahamiẹn uwẹ tie iBaibo fo, la uwẹ sounun bhi emhin nin eria gbẹn, noo ijiẹmhin, la, re ẹwanlẹn noo inọnta, nin uwẹ rẹ rẹkpa ene uwẹ ne talọ rẹ tobele daghe ẹmhọanta nọn ribhọ.