Ẹbho Rebhe bhi Ọne Otọ Nan Da Ha “Zẹ Urolo Ọkpa”

11:1-4, 6-9

Bhi Babel, Jehova da zagha urolo ọsi ẹbho a. Sokpan, ẹlẹnan nian, ọle koko usun nọn bun bhi “otọ rebhe, agbaẹbho rebhe, bi urolo rebhe,” ne ha nyẹnlẹn bhi agbọn ọsọgbọn. Ọle re “urolo nọn khiale” nin ele ‘beji ele ha da sabọ ha sotie elin nọnsi Jehova, yẹ ha re okugbe ga ọle.’ (Zep 3:9; Re 7:9) Ẹmhọanta nọn ribhi Baibo rẹji elin nọnsi Jehova bi emhanmhan nesọle, ọle hi ọne “urolo nọn khiale.”

Ahamiẹn ọria luẹ urolo ọsọgbọn, ọ iyi ikpọta ọsi ọne urolo ọkpa ọle ha luẹ, ọle dẹ yẹ luẹ uwedẹ nan rẹ ria eria bhi ọne urolo. Iriọ yẹ nọn, beji mhan rẹ luẹ ọne “urolo nọn khiale,” ọ iyi ẹmhọanta ne ribhi Baibo ọkpa mhan ha gheghe luẹ, mhan dẹ yẹ ‘fi ọkhọle nọnsẹmhan denọ.’ (Ro 12:2) Ọnan iyi emhin nin mhan ha lu osukpa yẹ mun fia. Mhan dẹ ha lu ọle rẹ ha khian. Ọnan ki rẹkpa mhan rẹ sabọ deba ẹbho nesi Jehova ha mhọn okugbe.—1Co 1:10.