Eji A Da Ne Emhin Nan Gbẹn Ọbhi Ebe ọsi Ikolo Unyẹnmhin bi Iwẹnna Oga Nọnsẹmhan
MARCH 1-7
EMHIN NE GHANLẸN NE RIBHI BAIBO | NUMBERS 7-8
“Ebi Mhan Miẹn Luẹ bhi Uwedẹ Nin Ibhokhan Izrẹl Rẹ Ha Nyẹnlẹn bhi Agọ”
it-1 497 ¶3
Agbaẹbho ọsi Izrẹl
Ene ha mun ọkalo bhi otọ Izrẹl, ele hi ene ha mundia nin ene ẹbho. (Ezr 10:14) Ene ekhaẹmhọn da ne emhin nan ha rẹ lu izọese re, ẹghe nan rẹ lu ibọkpọ ọsi oga fo. (Nu 7:1-11) Bhi ẹghe nọnsi Nehemiah, ene ohẹn, ene iLevite, bi ediọn ọsi ene ẹbho, ele hi ene mundia bhi ihe ọsi ene ẹbho rẹ re obọ ọbhi emhanmhan nọn ribhi otọ. (Ne 9:38–10:27) Ẹghe nin ibhokhan Izrẹl rẹ ha ribhi ojẹgbo, ene ekhaẹmhọn bhi ọne agbaẹbho, ene a zẹle bhi ọne agbaẹbho, ene ikpea kpataki, ne yi itue 250 da deba iKorah, Dathan, Abiram, bi On sọtẹ da iMoses bi Aaron. (Nu 16:1-3) Beji Jehova taman iMoses, Moses da zẹ ikpea 70 bhi ẹwẹ ibhokhan Izrẹl nin ele ha rẹkpa ọle gbẹloghe ene ẹbho, ranmhude ọle ọkpa ida sabọ lu ọle. (Nu 11:16, 17, 24, 25) Leviticus 4:15 tẹmhọn ‘ewanlẹn ọsi ọne agbaẹbho.’ Asabọmiẹn ewanlẹn ọsi ọne agbaẹbho, ene mun ọkalo bhi ọne agbaẹbho, ene bhohiẹn, bi ene ekhaẹmhọn, ele hi ene ha mundia nin ene ẹbho.—Nu 1:4, 16; Jos 23:2; 24:1.
it-2 796 ¶1
Reuben
Bhi agọ ọsi ibhokhan Izrẹl, ulin-uwa ọsi Reuben, Simeon bi Gad, ele ha ribhi obọ ọsi South bhi ibọkpọ ọsi uwa oga. Ulin-uwa ọsi Reuben, ọle hi ọne ha sun ọne usun ulin-uwa ea nan. Ahamiẹn ele khian kpanọ, ele ki rẹkhan usun ulin-uwa ea ọsi Judah, Issachar, bi Zebulun. (Nu 2:10-16; 10:14-20) Ọne emhanmhan ọsi ọsegbe-ọsegbe nan ele yẹ rẹkhan ẹghe nin ele rẹ ha lu izọese bhi ukpẹdẹ nan rẹ re ibọkpọ ọsi uwa oga guẹ nin Osẹnobulua.—Nu 7:1, 2, 10-47.
w04 8/1 25 ¶1
Emhin Eso Nan Miẹn Tie bhi Ebe ọsi Numbers
8:25, 26. Nin iwẹnna nesi Levite da sabọ ha khian nọnsẹn, a da taman ene iLevite ne wanre gbera ene ha sabọ ha miẹnsọn bhi uwa oga ghe nin ele zobọ bhọ rẹ ha lu iwẹnna oga. Ọkpakinọn, ele dẹ sabọ ha re iyobọ nin iLevite nekẹle ne sẹyẹ wẹnna. Ẹlẹnan nian, arẹmiẹn a bha yọle nin ọria zobọ bhọ rẹ ha tẹmhọn Osẹnobulua sade ọle ki manman wanre, emhin ribhọ nin mhan ha sabọ miẹn luẹ bhi uhi nan gbe nin ibhokhan iLevite nan. Ahamiẹn ghe ọria iyẹ manman lu iwẹnna oga eso ranmhude idọmanlẹn, ọle dẹ yẹ sabọ ha lu iwẹnna oga ọbhebhe nin ahu nọnsọle ha sabọ gbe.
Emhin Oriọn Ne Ghanlẹn
it-1 835
Ọmọndiọn
Beji a miẹn ghe ikpea ne yi imọndiọn bhi ẹwẹ ibhokhan Izrẹl, ele hi ene ọ sẹ ọle egbe rẹ ha sun azagba-uwa nọnsele kẹkẹ, ele hi ene mundia nin agbaẹbho ọsi ibhokhan Izrẹl rebhe. Jehova bhọ tobọle tale ghe, ọmọndiọn, ọle ibhokhan Izrẹl rebhe khin rẹji ọle ranmhude akovẹn nin ọle deba Abraham ve. (Ex 4:22) Ranmhude Jehova miẹn agbaẹbho ọsi Izrẹl fan, ọle da taman ele ghe, imọn ikpea rebhe nan ka biẹ, bhi ọsi eria bi ọsi elanmhẹn ki ha yi ọsi ọle. (Ex 13:2) Bhiriọ, a da zẹ imọndiọn rebhe ne yi ikpea nin Jehova.
MARCH 8-14
EMHIN NE GHANLẸN NE RIBHI BAIBO | NUMBERS 9-10
“Ebi Jehova Rẹ Sun Ẹbho Nesọle Yẹ”
it-1 398 ¶3
Agọ
Uwedẹ nin ibhokhan Izrẹl rẹ ha sibhi ijian ọkpa re diọbhi ije ọbhebhe mun agọ, rẹman ghe ele wo ha lu emhin rẹkhan emhanmhan (Bhi Numbers 33, Moses tẹmhọn eje kẹkẹ ne sẹbhi 40 nin ibhokhan Izrẹl da mun agọ). Ene ẹghe rebhe nin ọne ighogho iso ha rẹ ha ribhi okhun ọne ibọkpọ ọsi uwa oga, ibhokhan Izrẹl ida sibhi ọne agọ re. Ọne ighogho iso ha kpanọ, ele ki yẹ kpanọ. Jehova ha yọle nin ele mun agọ, ele ki mun agọ. Sẹyẹ, Jehova ha yọle nin ele kpanọ, ele ki kpanọ. (Nu 9:15-23) Akala eva ọsi siliva nin ele ha khue kẹkẹ, ọle ibhokhan Izrẹl rẹ ha lẹn ebi Jehova yọle nin ele lu yẹ. (Nu 10:2, 5, 6) Ẹghe nin ele ha rẹ ha khue ọne akala nọn ha de bhi uwedẹ kẹkẹ, ọ ki rẹkpa ene ibhokhan Izrẹl rẹ lẹn ghe, ẹghe sẹle nin ele ha rẹ kpanọ. Ẹghe ọhẹnhẹn nin ọnan rẹ sunu hi, ukpẹdẹ nọnzi uje, bhi uki nọnzẹva, bhi ẹkẹ ukpe nọnzeva [1512 B.C.E.]. Ahamiẹn ele khian kpanọ, ẹkpẹti akovẹn ele mun ke odalo. Bhiriọ, usun ulin-uwa ea ọsi Judah, Issachar, bi Zebulun ki rẹkhan ọlẹn. Ulin-uwa ọsi Judah hi ọne sun ọne usun nan. Ele ha ki ha khian, azagba-uwa ọsi Gershon bi Merari ki mun ihẹ nan noo bhi ẹkẹ ibọkpọ ọsi oga rẹkhan ele. Usun ọzeva nọn ha kpanọ hi, usun ulin-uwa ea ọsi Reuben, Simeon, bi Gad. Ulin-uwa ọsi Reuben hi ọne sun ọne usun nan. Ele ha ki kpanọ fo, azagba-uwa ọsi Kohath ki mun ibọkpọ ọsi oga rẹkhan ele. Usun ọzea nọn ha rẹkhan ele hi, usun ulin-uwa ea ọsi Ephraim, Manasseh, bi Benjamin. Bhi ọkike ọle, usun ulin-uwa ọsi Dan, Asher, bi Naphtali ki rẹkhan ele bhi ikeke. Ulin-uwa ọsi Dan sun ọne usun nan. Bhiriọ, ene ulin-uwa eva ne bun nẹ ne yẹ mhọn ahu nẹ, ele hi ene ha gbega enekẹle, ọkpa ribhi odalo, ọnọnkẹle da ribhi ikeke.—Nu 10:11-28.
Uwẹ Be Gbẹlokotọ bhi Uwedẹ Nin Osẹnobulua Rẹ Re Adia Nin Mhan?
Be imhan ha rẹ rẹman yẹ ghe adia nin Osẹnobulua re nin mhan ti mhan bhọ? Paul nin odibo da yọle: “Bha ha hẹnmhọn nin ene rẹ bha khian. Bha yẹ degbere ha rẹkhan ele.” (Heb. 13:17) Ọkpakinọn, ọ bha lẹkhẹ nan rẹ ha lu ọnan ẹghe rebhe. Bhi ọsi ijiẹmhin, ji a man yọle ghe ọkpa bhi ibhokhan Izrẹl ne nyẹnlẹn bhi ẹghe ọsi iMoses uwẹ khin. Ibha ki zẹ khian bhi ẹkẹ ọne ojẹgbo, ọne ighogho iso da mundia. Uwẹ bha lẹn ẹghe nin ọne ighogho iso ha mundia bhi enin sẹ, si ukpẹdẹ ọkpa nọn, la uzana ọkpa, la uki eso nọn, uwẹ bha lẹn. Uwẹ da ha nọọn egbe ẹ yọle, ‘Nin mẹn be ne ihẹ nesẹmhan rebhe sotọ?’ Bhi ọsi ọhẹnhẹn, uwẹ da ne emhin nin uwẹ ha noo bhi ọne ẹghe nin sotọ. Ikpẹdẹ eso ki gbera, ranmhude egbe lọ uwẹ nin uwẹ rẹ wo ha guanọ emhin bhi ẹkẹ ihẹ nesẹ, uwẹ da wo munhẹn ha ne emhin rebhe sotọ. Sokpan, ọ ki kẹ khere nin uwẹ rẹ ne emhin rebhe sotọ fo, uwẹ da daghe ghe ọne ighogho iso munhẹn ha kpanọ. Bhiriọ, emhin rebhe nin uwẹ ne sotọ, uwẹ da gbo kie munhẹn ha mhanmhan ele ọbhi ẹkẹ ẹkpa. Emhin nọn sẹ inian bha lẹkhẹ hiehie. Ọreyiriọ, ọ da khẹke nin ibhokhan Izrẹl re ẹjẹje kpanọ.—Num. 9:17-22.
Be imhan lu yẹ sade Osẹnobulua re adia nin mhan? Imhan be wo re ẹjẹje re obọ rẹkhan ọlẹn? La imhan be sẹyẹ lu emhin beji mhan ka rẹ lu emhin khẹ, ranmhude ọnin ki guẹ mhan egbe? Imhan be lẹn adia ọsọgbọn nin agbotu re re, bọsi uwedẹ nin mhan ha rẹ ha man ẹbho iBaibo, nin mhan ha rẹ ha tẹmhọn Osẹnobulua man ẹbho ne zẹ urolo ọbhebhe, nin mhan ha rẹ ha lu oga azagba-uwa nọnsẹmhan, nin mhan ha rẹ ha re obọ rẹkhan emhanmhan ọsi Otu Ewanlẹn Nin Agbotu Je Bu Idọkitọ, bi ebi mhan ha rẹ ha lu emhin yẹ bhi usikoko ne nẹ nesẹmhan? Ahamiẹn mhan re obọ rẹkhan adia nin agbotu ne nin mhan, mhan ki ha rẹman ghe adia nin Osẹnobulua re nin mhan ti mhan bhọ. Ahamiẹn ghe emhin ribhọ nin mhan guanọ nin mhan lu, ọ bha khẹke nin mhan mun udu nyan ẹwanlẹn nọnsẹmhan, sọkpan, ọkhẹke nin mhan mun udu nyan iJehova, yẹ re obọ rẹkhan adia nin agbotu nọnsọle ne nin mhan. Beji ọmọn rẹ nẹ bu ene biẹ ọle nin ele gbega ọle sade efi fi, iriọ mhan yẹ rẹ nẹ bu agbotu nọnsi Jehova nin ele re ugbega nin mhan sade mhan kuẹlo da ọnọghọ nọn diabe efi bhi ọne agbọn nan nin mhan ye.
Emhin Oriọn Ne Ghanlẹn
it-1 199 ¶3
Usikoko
Ebezẹle Nọn Da Khẹke Nan Ha Sikoko. Iluemhin ọsi Anagbera nin ibhokhan Izrẹl ha lu ukpe-ukpe da rẹman ghe emhin kpataki nọn nan rẹ ha sikoko yẹ luẹ emhin bhi obọ iJehova. Ahamiẹn ghe okpea khia la ọle bha yo ẹbho nan miẹn ghe ọle bha lu Anagbera, a ki gbe ọle a. (Nu 9:9-14) Ẹghe nin Hezekiah nin Ojie rẹ tie ibhokhan iJudah bi ibhokhan Izrẹl vae bhi Jerusalem nin ele dọ lu iluemhin ọsi Anagbera, ọle da taman ele ghe nin ele fikie bu iJehova re, sẹyẹ, nin ele hẹi ha mhọn akan-ehọ da iJehova, beji aba ele nin odede ka lu. Ọ da yẹ taman ele ghe nin ele ha hẹnmhọn nin Jehova yẹ ha vae bhi uwa oga dọ ha ga Ọle, beji a da miẹn ghe ẹkẹ ele nọn rẹ ha khọ iJehova ki lọre. Ranmhude Osẹnobulua nọn mhọn ẹkẹ ẹjẹjẹ bi itohan, ọle iJehova khin, ọle ida fi ikeke gbe ele sade ele bu ọle re. (2Ch 30:6-9) Ahamiẹn ghe ọria wo dotua ghe ọle bha yo ọne usikoko nin, ọ rẹman ghe ọle wo fi ikeke gbe Osẹnobulua. Arẹmiẹn ghe Kristiẹn iyẹ lu iluemhin ọsi Anagbera, Paul nin odibo da taman ele ghe nin ele hẹi ha gbẹdẹ ikolo oga. Bhiriọ, ọle da taman ele yọle: “Bha ji mhan ha mhọn aria-ji-egbe, nin mhan da ha lu emhin nọn ha re imhan ha mhọn ahoẹmhọn-egbe yẹ lu iwẹnna esili, nin mhan hẹi ha gbẹdẹ bhi usikoko nesẹmhan, beji eso guẹle. Nan ha re izebhudu nin egbe yẹ manman ha lu iriọ, beji bha rẹ ha daghe ọle ghe, ọne ukpẹdẹ sire.”—Heb 10:24, 25; fẹ CONGREGATION ghe.
MARCH 15-21
EMHIN NE GHANLẸN NE RIBHI BAIBO | NUMBERS 11-12
“Bezẹle Nọn Da Khẹke Nin Mhan Rẹban Ọkhọle Nan Rẹ Zaka-zunyọn?”
w01 6/15 17 ¶20
Bha Hẹi Kiẹn Eria Ne Yelea Ebi Ele Họnlẹn
20 Arẹmiẹn imhan nin Kristiẹn ẹlẹnan ida ha re obọ ọbhi ilọnmhọn oghẹ, ọ sẹyẹ khẹke nin mhan ha babegbe nin mhan hẹi re obọ ọbhi ilọnmhọn nọn ha re imhan ha zaka-zunyọn. Ranmhude, emhin nọn sẹ inian dẹ sabọ re ẹkẹ ha khọ iJehova. Ọnan zẹle nin Paul da taman mhan yọle: “Bha hẹi ji mhan dọnmhẹn iJehova, beji eso bhi ẹwẹ [ibhokhan Izrẹl] lu, nan da re ẹnyẹn fuẹn ele a. Bha hẹi dọ ha guinẹzọ, beji eso bhi ẹwẹ ele rẹ ha guinẹzọ, nin ọnọn fuẹn emhin an da fuẹn ele a.” (1 Corinthians 10:9, 10) Ene ibhokhan Izrẹl da ha zaka-zunyọn da iMoses bi Aaron, ele bhọ da yẹ ha zaka-zunyọn da Osẹnobulua tobọle ranmhude imanna nin ọle ha re uwedẹ ohan-ilo re nin ele. (Numbers 16:41; 21:5) Ilọnmhọn oghẹ nin ibhokhan Izrẹl ha lu be re ẹkẹ khọ Osẹnobulua gbera izaka-zunyọn nọnsele? Baibo rẹman ghe, ẹnyẹn gbe ẹbho ne bunbun ne ha zaka-zunyọn. (Numbers 21:6) Ọ kuẹ sẹ ọne ẹghe nin, a bhọ ka gbono ẹbho ne bun gbera 14,700 ne ha zaka-zunyọn. (Numbers 16:49) Bhiriọ bha ji mhan ha mun ekpẹn nin emhanmhan nin Jehova re ọbhi otọ nin mhan, beji a da miẹn ghe mhan bha dọnmhẹn iJehova bhi uwedẹ nin ọle rẹ re iziẹngbe man.
w06 7/15 15 ¶7
‘Rẹban Ọkhọle Nan Rẹ Zaka-zunyọn’
7 Ibhokhan Izrẹl da wo fi unun denọ! Ẹghe nin Jehova rẹ fan ibhokhan Izrẹl fia bhi igbọn nin ele rẹ ha ye bhi Egypt, bi ẹghe nin ọle rẹ hinmhin ele fo bhi Okpẹdẹ Nọn Gian, ele da ha so illo rẹ gẹn iJehova, ranmhude, ọ manman ti ele bhọ. (Exodus 15:1-21) Ranmhude ọnọghọ kẹkẹ nin ele ha miẹn bhi ẹkẹ ojẹgbo bi ofẹn ibhokhan iCanaan nọn ha mun ele, ibhokhan Izrẹl ne rẹ ha mhọn ọtibhọ da Osẹnobulua da munhẹn ha zaka-zunyọn. Nin ibhokhan Izrẹl rẹ ha khuẹnmhẹn iJehova bhi umiẹnfan nin ọle re nin ele, ele da ha khọẹkẹ ọle, ranmhude ele riale ghe Osẹnobulua bha re emhin nin ele guanọ nin ele. Ranmhude ibhokhan Izrẹl da ha zaka-zunyọn, ọ da rẹman ghe ele bha ha mhọn ọtibhọ da emhin nin Jehova ha re nin ele. Ọnan zẹle nin Jehova da yọle: “Ẹghela ene ẹbho nan ne imhẹn ha rẹ zobọ bhọ rẹ ha zaka-zunyọn da mẹn?”—Numbers 14:27; 21:5.
it-2 719 ¶4
Ovan
Nan Rẹ Ha Zaka-zunyọn. Nan rẹ ha zaka-zunyọn sabọ rẹ re egbe emhin lọ ọria, sẹyẹ, ọ riia emhin an. Ọ bha sẹ bue gbe nin ibhokhan Izrẹl rẹ sibhi otọ Egypt re, ele da ha zaka-zunyọn da iJehova. Ele da ha re unun ji uwedẹ nin Jehova rẹ ha noo iMoses bi Aaron rẹ sun ele. (Ex 16:2, 7) Akizẹbue, uwedẹ nin ele rẹ ha zaka da re egbe lọ iMoses rẹ sẹbhọ ghe, ọle da ha guanọ nin ọle yu. (Nu 11:13-15) Ọria nọn zaka-zunyọn dẹ sabọ si okhẹnan ji egbe ọle. Jehova tale ghe, ẹmhọn nin ene ẹbho ha ta rẹ re unun ji Moses, ghe ugbẹloghe nọnsọle nin Jehova ele re ọle ha re unun je. (Nu 14:26-30) Ranmhude ọne emhin nan, ẹbho ne bunbun da yuno.
Emhin Oriọn Ne Ghanlẹn
it-2 309
Manna
Ebi Ọ Dia Yẹ. Ọne imanna da ha fua bii ikpẹ icoriander, ọ da yẹ diabe amẹn-eran nọn khọ amẹnlọn. Ọ da dia bhi unun bii ekala nọn dia para nan re amẹnlọn gua la ekala nọn lẹnlẹn bhi unun nan re abhii rẹ gua. Ele ha ki re udo rẹ nọọ ọlẹn la lunmhun ọlẹn bhi okọ fo, ele ki nyẹn ọlẹn la lu ọle bọsi ekala.—Ex 16:23, 31; Nu 11:7, 8.
MARCH 22-28
EMHIN NE GHANLẸN NE RIBHI BAIBO | NUMBERS 13-14
“Ebi Urẹọbhọ Rẹ Re Izebhudu Nin Mhan Yẹ”
w06 10/1 16-17 ¶5-6
Urẹọbhọ bi Ofẹn Osẹnobulua Re Izebhudu Nin Ọria
5 Joshua bi Caleb, ne deba ẹbho ne dọ baba ọne Otọ Nin Jehova Ve nin ele fẹghe, da ha mhọn ọne ọhubhudu rẹ nabhi ọne otọ. Bhiriọ, ele da taman ene ibhokhan Izrẹl yọle: “Mhan dẹ gbe [ibhokhan iCanaan] khuelo. Ele iyẹ mhọn ugbega, sẹyẹ, Jehova ne imhan dia. Bha hẹi mun ofẹn ele.” (Numbers 14:9) Ọne izebhudu nan nin Joshua bi Caleb ha mhọnlẹn be khẹke? Ehe! Ranmhude, ele bi ibhokhan Izrẹl nekẹle daghe ebi Jehova rẹ re Egypt bi osẹ nesele rebhe ọbhi unun yẹ ẹghe nin ọle rẹ re Oya Igbe nin ele. Ele yẹ daghe ebi Jehova rẹ gbono iPharaoh bi eyokhọnlẹn nesọle a bhi ẹkẹ ọne Okpẹdẹ Nọn Gian yẹ. (Psalm 136:15) Ọnan rẹman ghe ọ bha khẹke nin ofẹn ha mun ene ikpea igbe nekẹle ne deba dọ baba ọne otọ fẹghe bi ene ẹbho ne rẹọ ele bhọ. Ranmhude ọne ẹmhọn nan manman ba iJehova bhi egbe, ọle da yọle: “Eka ẹghe ọ ha gbe ọkuẹsẹ ene ẹbho nan munhẹn ha mhọn urẹọbhọ da mẹn, arẹmiẹn mẹn re iyaman ne bunbun man ele?”—Numbers 14:11.
6 Jehova da wo rẹman ghe urẹọbhọ nin ene ẹbho nan bha ha mhọn da ọle zẹle nin ofẹn da ha mun ele. Ọnan rẹman ghe urẹọbhọ bi izebhudu ko diẹn kugbe. Ọnan zẹle ẹghe nin John nin odibo rẹ ha gbẹn ebe ji Kristiẹn ranmhude odan nin ele ye bhi uwedẹ oriọn, ọle da taman ele ghe, ranmhude urẹọbhọ nọnsele, ọle zẹle nin ele da sabọ khọn ọne agbọn nan miotọ. (1 John 5:4) Ẹlẹnan nian, urẹọbhọ nọn diabe ọsi Joshua bi Caleb nin Esali Jehova ne bun gbera ẹbo ehan rẹman, ọle zẹle nin ele da sabọ wewe ọta nọn mhẹn rẹji Agbejele nọnsi Osẹnobulua bhi otọ agbọn rebhe. Ene usẹn, ene dọmanlẹn, ene ziẹnlẹn bi ene wẹghẹ, ele kugbe wewe ọne ẹmhọn Agbejele bhi otọ agbọn rebhe. Ranmhude izebhudu nin ene ẹbho nan mhọn, eghian ele soso iribhọ nọn sẹ sabọ gue ele unun.—Romans 8:31.
Emhin Oriọn Ne Ghanlẹn
it-1 740
Otọ Nin Jehova Mun Nin Ibhokhan Izrẹl
ỌNE otọ nin Jehova mun nin ibhokhan Izrẹl wo ha yi otọ nọn mhẹn. Moses da je ikpea eso nin ele dọ baba ọne otọ fẹghe, yẹ ne emhin ugbo ne ribhi enin re nin ele daghe ọle. Ẹghe nin ene ẹbho ki rẹ ha vade, ele da gene mun ikperan ifig, pomegranates, bi ikperan-anyọn vae. Ene ikperan-anyọn khua sẹbhọ ghe ikpea eva re eran mun ele vae! Arẹmiẹn ofẹn ha mun ele ranmhude urẹọbhọ nin ele imhọnlẹn, ele da sẹyẹ yọle ghe ọne otọ, “otọ nin miliki bi amẹnlọn vuọnlẹn nọn.”—Nu 13:23, 27.
MARCH 29–APRIL 4
EMHIN NE GHANLẸN NE RIBHI BAIBO | NUMBERS 15-16
“Rẹban Okpẹhio bi Imẹn Lẹn Nẹ”
w11 9/15 27 ¶12
Jehova Be Lẹn Uwẹ?
12 Ẹghe nin ibhokhan Izrẹl rẹ ha khian Otọ Nin Osẹnobulua Ve nin ele, Korah da ha riale ghe emhin eso ribhọ nọn bha dia bhi emhanmhan nin Jehova re ọbhi otọ rẹji ele. Bhiriọ, ikpea ne bun sẹbhi 250 ne mun ọkalo bhi ẹwẹ ibhokhan Izrẹl da deba iKorah ha guanọ nin ele fi emhin denọ. Korah bi ene ẹbho nan da ha riale ghe ikolu nin ele bi Jehova ko mhọnlẹn wo manman deziẹn. Bhiriọ ele da taman iMoses yọle: “Egbe ibha lọ mhan! Ọrebhe bhi ọne agbaẹbho nan khiamhin, ele rebhe, Jehova yẹ ribhi ẹwẹ ele.” (Num. 16:1-3) Ele da rẹman ghe eria ne mhọn okpẹhio bi ene riale ghe ele lẹn nẹ ele khin! Bhiriọ, Moses da taman ele ghe Jehova dẹ rẹman eria ne gene yi ọsi ọle. (Tie Numbers 16:5.) Bhi ukpẹdẹ nọn rẹkhan ọlẹn, Korah bi ene ikpea nekẹle ne deba ọle ha sọtẹ da iMoses da yu.—Num. 16:31-35.
w11 9/15 27 ¶11
Jehova Be Lẹn Uwẹ?
11 Ọ iyi uwedẹ ọkpa Moses bi Korah rẹ ha rẹman ghe ele mun ekpẹn nin emhanmhan nin Jehova rẹ ọbhi otọ bi uwedẹ nin Ọle rẹ lu emhin. Uwedẹ nin ele veva rẹ ha lu emhin rẹso ebi Jehova rẹ ha ghe ele yẹ. Azagba-uwa ọsi Kohath bhi ulin-uwa ọsi Levi, ọle Korah na vae. Korah wo ha mhọn isẹhoa ne bunbun bhi otọ Izrẹl. Asabọmiẹn eso bhi ene isẹhoa nan hi, ọle daghe ẹghe nin Jehova rẹ miẹn ibhokhan Izrẹl fan bhi ọne Okpẹdẹ Nọn Gian, ọle re obọ ọbhi ebi Jehova lu da ibhokhan Izrẹl ne sọtẹ da ọle bhi Oke ọsi Sinai, ọle yẹ deba ha mun ọne ẹkpẹti akoven. (Ex. 32:26-29; Num. 3:30, 31) Ọnan rẹman ghe ọle wo ha sun rẹkhan iJehova bhi ikpe ne bunbun, sẹyẹ, ẹbho ne bunbun bhi ẹwẹ ibhokhan Izrẹl wo ha mun ekpẹn nanlẹn.
Emhin Oriọn Ne Ghanlẹn
w98 9/1 20 ¶1-2
Ha Mun Emhin Ne Kiẹn Okpemhin Nẹ Kalo bhi Iẹnlẹn Nọnsẹ!
Emhin nọn kakale ọne ẹmhọn nan khin bhi ẹlo nọnsi Jehova. Ọnin zẹle nin Baibo da yọle, “Jehova da taman iMoses yọle: ‘Bha hẹi ja miẹn ghe ibha bha gbe ọne okpea a.’ ” (Numbers 15:35) Bezẹle nan da miẹn ghe emhin nin ọne okpea nan lu da ha yi emhin nọn kakale bhi ẹlo nọnsi Jehova?
Ikpẹdẹ ehan a re nin ene ẹbho nin ele rẹ ha ko eran, nin ele rẹ ha guanọ ebale nin ele ha le, ukpọn nin ele ha yọ, bi uwa nin ele ha dia. Sokpan bhi ukpẹdẹ nọnzi ihinlọn, ele ki re ọle ha ga iJehova. Ọ iyi emhin ọbe nan rẹ ha ko eran, sokpan ọne ukpẹdẹ nin nan rẹyi nan rẹ ha ga iJehova, emhin ọbe nọn nan rẹ re ọle ha lu emhin ọbhebhe. Arẹmiẹn iKristiẹn ẹlẹnan iyẹ ribhi odotọ Uhi ọsi Moses, mhan dẹ yẹ sabọ miẹn emhin kpataki luẹ bhi emhin nọn sunu ẹghenin. Ọkhẹke nin mhan ha lẹn emhin ne kiẹn okpemhin nẹ bhi iẹnlẹn nọnsẹmhan ẹlẹnan.—Philippians 1:10.
APRIL 5-11
EMHIN NE GHANLẸN NE RIBHI BAIBO | NUMBERS 17-19
“Imẹn Hi . . . Emhin Uku Nọnsẹ”
IJehova Be Hi Ihaosa Nọnsẹ?
9 Re ọkhọle nọnsẹ ria ẹmhọn ene iLevite, ele bha miẹn otọ le bhi uku. Beji a miẹn ghe iwẹnna nọnsele hi, nin ele ha sun ene agbaẹbho bhi oga nọn khiale, ọ da khẹke nin ele mun udu tẹ iJehova, ranmhude ọle hi ihaosa nọnsele. Jehova dẹ ha re emhin nin ele ha rẹ gbẹloghe egbe nin ele. (Num. 18:20) Arẹmiẹn ọ iyi uwa oga natiọle temple nin ene ohẹn bi ene iLevite da ha ga mhan da ga ẹlẹnan, mhan dẹ sẹyẹ ha mun udu tẹ iJehova beji ele ka lu. Mhan ki ha mhọn ọne urẹọbhọ ghe Jehova dẹ re emhin nin mhan ha rẹ gbẹloghe egbe nin mhan. Beji mhan rẹ bu ọkpẹnlẹn ọsi ọne agbọn nan, ọkhẹke nin mhan ha mhọn urẹọbhọ da iJehova ẹghe rebhe ghe, ọle dẹ re emhin nin mhan ha rẹ ha gbẹloghe egbe nin mhan.—Rev. 13:17.
Jehova Hi Ihaosa Nọnsẹmhẹn
4 Be iJehova rẹ ha yi emhin uku rẹji ene iLevite ne lu iwẹnna oga yẹ? Arẹmiẹn Jehova bha mun otọ nin ele nọn ha yi emhin uku nọnsele, ọle da mun iwẹnna kpataki nin ele ha lu. Ọne iwẹnna hi, nin ele ha yi ohẹn rẹji ọle. Ọnan hi emhin uku nin Jehova re nin ele. (Josh. 18:7) Numbers 18:20 ji mhan lẹn ghe ibhokhan iLevite da sẹyẹ ha miẹn emhin nin ele ha rẹ ha gbẹloghe egbe. (Tie Numbers 18:19, 21, 24.) Obọ ọkpa bhi igbe nin ibhokhan Izrẹl ha zẹ ji Jehova, ọle da ha ne nin ene iLevite nọn ha yi ihaosa nọnsele. Ọnan rẹman ghe ene iLevite da ha miẹn obọ ọkpa bhi igbe bhi emhin ugbo bi emhin-uri rebhe nin ibhokhan Izrẹl nekẹle mhọnlẹn. Sẹyẹ, obọ ọkpa bhi igbe nọn mhẹn nẹ bhi emhin nin ene iLevite miẹn, ele da ha ne nin ene ohẹn. (Num. 18:25-29) Emhin rebhe ne khiale nin ibhokhan Izrẹl ha ne re rẹ zọese ji Jehova bhi uwa oga da yẹ ha yi ọsi ene ohẹn. Bhiriọ, ene emhin nan da re ene ohẹn lẹn ghe, Jehova dẹ sẹyẹ wo ha gbẹloghe ele.
Emhin Oriọn Ne Ghanlẹn
g02 6/8 14 ¶2
Emhin Nọn Ghanlẹn Umhẹn Khin
Umhẹn mundia nin emhin nọn iriia la emhin nọn ida fo ghẹdẹ. Ọnin zẹle bhi Baibo, akovẹn ribhọ natiọle “akovẹn ọsi umhẹn.” Ene ve ọne akovẹn nan ki le ebale kugbe nan re umhẹn ọi, nin ele rẹ re iyaman ọbhọ ghe ọne akovẹn dẹ ha ribhọ bhi ighegheghe. (Numbers 18:19) Bhi odotọ Uhi ọsi Moses, ibhokhan Izrẹl da ha ne umhẹn ba izọese rebhe nin ele ha lu bhi ukhuo-izọese, ranmhude, ọ mundia nin emhin nọn iwea la emhin nọn iriia.
APRIL 12-18
EMHIN NE GHANLẸN NE RIBHI BAIBO | NUMBERS 20-21
“Ha Re Ẹkẹ Omẹnhiẹn Lu Emhin Aharẹmiẹn Uwẹ Ribhi Ọnọghọ”
w09 9/1 19 ¶5
Ọbhohiẹn Nọn Wo Bhohiẹn bhi Uwedẹ Nọn Gbale
Ọhẹnhẹn, Osẹnobulua bha je iMoses nin ọle ne ene ẹbho talọ, arẹbiẹn nin ọle tie ele ẹbho ne wo bhi uhọnmhọn. Ọzeva, Moses bi Aaron bha re ogẹn ji Osẹnobulua. Ọnin zẹle nin Osẹnobulua da yọle: “Ibha bha . . . kpe imẹn khia.” (Numbers 20:12) Ẹghe nin Moses rẹ yọle, “bha be guanọ nin mhan na bhi ọne udo nan re amẹn nin bha,” ọ da diabe ghe ọle bi Aaron, ele hi ene ha re ọne uwedẹ ọhan-ilo nan re amẹn nin ene ẹbho, ghe ọ iyi Osẹnobulua. Ọzea, beji Jehova bha rẹ ka nin ẹbho ne sọtẹ da ọle bhi ore nọn gbera da nabhi otọ iCanaan, iriọ Jehova bha yẹ rẹ ka nin Moses bi Aaron da nabhi ọne otọ, ranmhude emhin nin ele lu. (Numbers 14:22, 23) Ọzenẹn, ene ha sun ibhokhan Izrẹl, ọle Moses bi Aaron ha khin. Osẹnobulua guanọ nin ẹbho ne ribhi ihe manman ha lu emhin bhi uwedẹ nọn diale.—Luke 12:48.
Emhin Oriọn Ne Ghanlẹn
w14 6/15 26 ¶12
Ẹlo Nin Jehova Rẹ Ghe Ọria bhi Eji Ọle Da Wẹghẹ Uwẹ Be Rẹ Ghe Ọle?
12 Bhi ene idia kẹkẹ nan, Jehova ha rẹ sabọ re oya nin Aaron le bhi enin. Ọkpakinọn, Jehova da daghe ọle ghe, Aaron iyi ọria ọbe la ọ iyi ẹmhọn ọlẹn. Ọ diabe ghe Aaron da ji idia nin ọle ye la emhin nin ẹbho ha ta da re ọle lu emhin nọn bha gba. Ẹghe nan rẹ taman ọlẹn ghe emhin nin ọle lu bha gba, ọle da miẹnkue yẹ re obọ ọbhi ibhohiẹn nọn gbale nọnsi Jehova. (Ex. 32:26; Num. 12:11; 20:23-27) Urẹọbhọ nin Aaron rẹman bi uwedẹ nin ọle rẹ fidenọ, ọle iJehova mun ọbhi ọkhọle. Ikpe ne bunbun rẹ gbera, a da sẹyẹ ha ye Aaron bi imọn nesọle re bii ẹbho ne mun ofẹn iJehova.—Ps. 115:10-12; 135:19, 20.
APRIL 19-25
EMHIN NE GHANLẸN NE RIBHI BAIBO | NUMBERS 22-24
“Jehova Da Fi Ihẹn Denọ Rẹ Kiẹn Erọnmhọn”
A Da Ha Wewe “Ọta Nọn Mhẹn Rẹji Jesu”
5 Beji ọ ka dia rẹji Kristiẹn bhi ore nin ọhẹnhẹn, ẹbho nesi Osẹnobulua ẹlẹnan bha ji ekpokpo da re ele zobọ bhọ rẹ ha lu iwẹnna itẹmhọn Osẹnobulua. Okha kẹkẹ rẹman ghe, a ha rẹ khu iKristiẹn sibhi agbaẹbho ọkpa re ha khian ije ọbhebhe la a mun ele ọbhi ighan, ele ki sẹyẹ ha lu iwẹnna itẹmhọn Osẹnobulua bhi enin. Bhi ọsi ijiẹmhin, ẹghe nan rẹ ha khọn okhọn ọzeva bhi ọne otọ agbọn nan rebhe, Esali Jehova da noo isẹhoa nin ele miẹn rẹ tẹmhọn Osẹnobulua man ẹbho bhi ighan kẹkẹ nin ele ha ye bhi Nazi. Obhokhan iJew ọkpa nọn miẹn Esali Jehova da yọle ghe, uwedẹ nin Esali Jehova ne ribhi ighan rẹ ha lu emhin da rẹman ọlẹn ghe ele gene lu rẹkhan ẹmhọanta ne ribhi Baibo. Bhiriọ, ọle da kiẹn ọkpa bhi Esali Jehova.
it-2 291
Emẹnmẹn
Emhin Emẹnmẹn Nọn Nan Rẹ Ha So IJehova Odan. Emhin uuki Balaam lu ẹghe nin ọle rẹ ha guanọ nin ọle dọ kha akhasẹ rẹji ibhokhan Izrẹl beji ọle ha da miẹn igho bhi obọ iBalak nin Ojie ọsi Moab. Ọkpakinọn, Jehova bha re otọ nanlẹn rẹ mun ọne emhanmhan sẹ, ọle da fi ọne emhanmhan denọ. Ẹghe nin Peter nin odibo rẹ ha tẹmhọn emhin nọn sunu ji Balaam nin ohẹn akhasẹ, ọle da yọle ghe, elanmhẹn nọn italọ da talọ bii ọria. Ọnan da mun idobolo ọbhi emhanmhan nọnsi Balaam. Peter nin odibo da noo ukpọta iGreek natiọle pa·ra·phro·niʹa, rẹ tẹmhọn emhin ọmẹnmẹn nin Balaam khian dọ lu. Ọne ukpọta nan mundia nin, nin ọria rẹ ha lu emhin bii ọria nin uhọnmhọn nọnsọle bha gba.—2Pe 2:15, 16; Nu 22:26-31.
Emhin Oriọn Ne Ghanlẹn
w04 8/1 27 ¶2
Emhin Eso Nan Miẹn Tie bhi Ebe ọsi Numbers
22:20-22—Bezẹle nin Jehova da ha khọẹkẹ iBalaam? Jehova ka taman iBalaam ghe nin ọle hẹi fi ibhọkhan Izrẹl unun. (Numbers 22:12) Ọrẹyiriọ, Balaam da sẹyẹ rẹkhan ekhaẹmhọn nesi Balak kpanọ beji ọle ha da dọ fi ibhokhan Izrẹl unun. Balaam da ha guanọ nin ọle lu emhin nọn ha ti ojie ọsi Moab bhọ, bi nin ọle da yẹ miẹn ihaosa bhi obọ ọle. (2 Peter 2:15, 16; Jude 11) Arẹmiẹn Jehova taman iBalaam nin ọle hẹi fi ibhokhan Izrẹl unun, sokpan nin ọle nan erọnmhọn nin ele, Balaam da sẹyẹ bu ọne ojie ranmhude emhin nin ọle guanọ bhi obọ ọle. Bhiriọ, ọle da taman ọlẹn ghe nin ọle je ikhuo nesele ne ga iBaal nin ele dọ re egbe ele man ikpea nesi ibhokhan Izrẹl beji ene ikpea ha da ne ele nowẹ. (Numbers 31:15, 16) Ranmhude ọne ẹlobhọ nan nin Balaam ha mhọnlẹn, ọle zẹle nin Osẹnobulua da ha khọẹkẹ ọle.
APRIL 26–MAY 2
EMHIN NE GHANLẸN NE RIBHI BAIBO | NUMBERS 25-26
“Otuọnkpa Dẹ Be Sabọ Fi Emhin Denọ?”
lvs 118 ¶1-2
“Nẹ bhi Igboghẹ!”
ỌRIA nọn gbe ehẹn ha khian gbe ehẹn, ọle ki diọbhi eji ọle ha da sabọ miẹn ehẹn nin ọle guanọ nin ọle gbe. Ọle ha ki sẹbhi ọne ẹdẹ, ọle ki re ebale rẹ khuan ufi yẹ re ọne ufi ọbhi ẹkẹ ẹdẹ. Ọle ki ha ziẹngbe khẹ nin ehẹn dọ le ọne ebale nan re ọbhi ọne ufi. Ehẹn ha ki gene vae dọ le ọne ebale nan rẹ kẹ ufi khẹ ọle, ọne ufi ki na bhi unun mun ọne ehẹn.
2 Iriọ yẹ nọn ẹlẹnan. A yẹ sabọ re ufi mun ẹbho. Bhi ọsi ijiẹmhin, ọ ki ha kẹ khere nin ibhokhan Izrẹl rẹ nabhi Otọ Nan Ve nin ele, ele da mun agọ bhi ẹgbo ọsi Moab. Ojie ọsi Moab da taman iBalaam ghe ọle dẹ re igho nọn manman hu nanlẹn sade ọle vae dọ fi ibhokhan Izrẹl unun. Akizẹbue, Balaam da miẹn uwedẹ nin ibhokhan Izrẹl ha da sabọ tobele fi egbe ele unun. Ọle da zẹ ufi nin ọle ha kẹ khẹ ele. Ọle da je imanmhẹn ọsi Moab nin ele diọbhi agọ ọsi Izrẹl nin ele dọ re egbe man ene ikpea beji ene ikpea ha da ne ele nowẹ.—Numbers 22:1-7; 31:15, 16; Revelation 2:14.
lvs 119 ¶4
“Nẹ bhi Igboghẹ!”
4 Bezẹle nin Ibhokhan Izrẹl ne bunbun da de ọbhi ufi nin Balaam khuan khẹ ele? Ranmhude, ebi egbe nọnsele guanọ ọkpa ele wo ha ria ẹmhọnlẹn, ele da yelea emhin rebhe nin Jehova lu nin ele. Emhin ne bunbun ribhọ nọn ha zẹ ibhokhan Izrẹl ha da ha sun rẹkhan iJehova. Jehova miẹn ele fan bhi igbọn nin ele ha ye bhi otọ Egypt, ọle re ebale nin ele le ẹghe nin ele rẹ ha ribhi ojẹgbo, sẹyẹ, ọle gbega ele rẹ dọ sẹbhi egbegbe Otọ Nan Ve nin ele. (Hebrews 3:12) Ọrẹyiriọ, ele da sẹyẹ de ọbhi ufi ọsi igboghẹ. Rẹji ọne ẹmhọn nan, Paul nin odibo da gbẹn yọle: “Bha hẹi dọ ha gboghẹ, beji eso bhi ẹwẹ ele rẹ gboghẹ, nan da fuẹn . . . ele a.”—1 Corinthians 10:8.
Emhin Oriọn Ne Ghanlẹn
it-1 359 ¶1-2
Ughu
Asabọmiẹn emhin eva ibhokhan Izrẹl ha lu nin ele rẹ lẹn ebi ele ha rẹ gha otọ yẹ. Ene emhin eva hi, ele ki ka fi ono nin ele rẹ lẹn ebi ele ha rẹ gha ọne otọ yẹ, sẹyẹ ele ki fẹ ebi ulin-uwa kẹkẹ bun sẹ yẹ. Asabọmiẹn ọne ono nin ele fi ha rẹkpa ene ulin-uwa kẹkẹ lẹn obọ nela ọne otọ nin ele ha le bhi uku ye. Bhiriọ, ọne ono ha tare si otọ nọn ribhi obọ ọsi North nọn, la ọsi South, ọsi East, la ọsi West, la ọnọn ribhi egbe ẹdẹ nọn, la ọnọn ribhi eji oke ye nin ele ha le bhi uku. Ebi ọne ono hi ki rẹ rẹman, obọ iJehova ọ na vae. Bhiriọ, ọ da rẹkpa ulin-uwa kẹkẹ bhi otọ Izrẹl nin ele hẹi ha mhọn ikhu da egbe la nin ele hẹi ha ne egbe van. (Pr 16:33) Ọne uwedẹ nan iJehova rẹ ha dia ẹmhọn, beji a da miẹn ghe idia nin ulin-uwa kẹkẹ bhi otọ Izrẹl ha ye ki diẹn mun ọta nin Jacob tale ẹghe nin ọle rẹ ha yu. Ene ọta ribhi Genesis 49:1-33.
Ele ha ki re ọne ono rẹ lẹn obọ nela ene ulin-uwa kẹkẹ ha da ha mhọn otọ nọnsele, ọ da khẹke nin ele lu emhin nọnzeva beji ele ha da lẹn eji ọne otọ nin ele ha le bhi uku ha kpọnọ sẹ. Ọne emhin nọnzeva hi: ele ki fẹghe ebi ene ulin-uwa kẹkẹ bun sẹ yẹ. Numbers 33:54 da yọle: “Bha dẹ fi ono rẹ gha ọne otọ nọn ha yi ọsi azaga-uwa nọnsẹbha kẹkẹ. Bha ki mun otọ nọn hu nẹ nin azagba-uwa nọn bun nẹ nin ele le bhi uku. Bha ki mun otọ nọn khere nin azagba-uwa nọn khere nẹ nin ele le bhi uku. Obọ nin ọne ono nan fi de ọi, enin ha yi alebhuku ọsi ọdeọde. Bha dẹ miẹn otọ nesẹbha le bhi uku beji ibha rẹ nabhi ulin-uwa ọsi aba bha vae.” Eji ọ hi ki rẹ khin nin ọne ono nan fi de fi ọi, a ida fi ọle denọ, sokpan, a dẹ sabọ fi ebi ọne otọ kpọnọ sẹ yẹ denọ. Bhi ọsi ijiẹmhin, ẹghe nan rẹ kere ghe eji a gha nin Judah kpọnọ gbe, a da hian sibhọre re ba ọne a gha nin ulin-uwa ọsi Simeon.—Jos 19:9.
SRIPTURES
MARCH 1-7
Numbers 8:17 Ranmhude, imẹn nyan ene imọndiọn rebhe nesi ibhokhan Izrẹl, aharẹmiẹn ọsi ọria nọn la ọsi elanmhẹn. Bhi ọne ukpẹdẹ nin mẹn rẹ gbono imọndiọn rebhe ne ribhi otọ Egypt a, mẹn da zẹ ele rẹ kiẹn ọsẹmhẹn.
Numbers 7:10 Ene ekhaẹmhọn da ne emhin nọnsele re bhi eji a da ha re ọne ukhuo-izọese guẹ bhi ọne ukpẹdẹ nan rẹ zẹ ọle. Ẹghe nin ene ekhaẹmhọn rẹ ne izọese nọnsele re bhi ọdalo ọne ukhuo-izọese,
Numbers 7:11 Jehova da taman iMoses yọle: “Bhi ukpẹdẹ-ukpẹdẹ, ọle ọkpa-ọkpa bhi ene ekhaẹmhọn ha rẹ ne izọese nọnsele re nan ha rẹ re ọne ukhuo-izọese guẹ.”
Numbers 8:25,26 Sokpan, ole ha ki gbera ikpe 50, ọle ki zobọ bhọ rẹ ha lu iwẹnna bhi uwa oga, ọle iyẹ da ha ga bhi enin. 26 Ọle dẹ sabọ ha re iyobọ nin ibhio ọle ne gbẹloghe iwẹnna nan lu bhi ọne ibọkpọ ọsi oga, ọkpakinọn, ọle ida lu ọne iwẹnna bhi enin. Ọnan hi emhin nin uwẹ ha lu rẹji ene iLevite bi iwẹnna nọnsele.”
MARCH 8-14
Numbers 9:13 Ọkpakinọn, ahamiẹn ghe okpea khia la ọle bha yo ẹbho, nan miẹn ghe ọle bha lu izọese ọsi Anagbera, a dẹ hian ọne ọria nin fia bhi ẹwẹ ẹbho nesọle, ranmhude ọle bha lu ọne izọese ji Jehova bhi ẹghe nan rẹ yi nanlẹn. Ọne okpea dẹ re uhọnmhọn ọbhi olukhọ nọnsọle.
Numbers 9:17,18 Ẹghe nọn hi ki rẹ khin nin ọne ighogho iso rẹ sibhi ọne ibọkpọ re, ene ibhokhan Izrẹl ki jẹje kpanọ, sẹyẹ, eji ọne ighogho iso ha da mundia, enin ene ibhokhan Izrẹl ha da mun agọ. 18 Jehova ha yọle nin ene ibhokhan Izrẹl kpanọ, ele ki kpanọ, sẹyẹ, Jehova ha yọle nin ele mun agọ, ele ki mun agọ. Bhi ene ẹghe rebhe nin ọne ighogho iso ha rẹ ha ribhi okhun ọne ibọkpọ, ele ida sibhi ọne agọ re.
Numbers 9:21,22 Ẹgheso, ọne ighogho iso ki mundia rẹ nabhi ọsemuan rẹ dọ sẹbhi ọsewewiẹ, sẹyẹ, ahamiẹn ọne ighogho iso kpanọ bhi ọsewewiẹ, ele ki yẹ kpanọ. Aharẹmiẹn ọsodamhẹn nọn la ọsasọn ọne ighogho iso rẹ kpanọ, ẹghenin ele ha yẹ rẹ kpanọ. 22 Aharẹmiẹn ikpẹdẹ eva nọn, la uki ọkpa nọn, la ọ bue gbera iriọ, bhi ene ikpẹdẹ rebhe nin ọne ighogho iso ha rẹ ha ribhi okhun ọne ibọkpọ, ene ibhokhan Izrẹl ki sẹyẹ ha ribhi ọne agọ, ele ida kpanọ. Ọkpakinọn ọne ighogho iso ha ki kpanọ, ele ki yẹ kpano.
Numbers 10:5-8 “Ẹghe nin ibha ha rẹ khue ọne akala nọn ha de bhi uwedẹ kẹkẹ, ene mun ago bhi obọ ọsi east ki kpanọ. 6 Ahamiẹn ibha kie khue ọne akala nọn ha de bhi uwedẹ kẹkẹ bhi ugbazeva, ene mun agọ bhi obọ ọsi south ki kpanọ. Ele dẹ re inian ha khue ọne akala nọn ha de bhi uwedẹ kẹkẹ ẹghe nin usun bhi ẹwẹ ele ha rẹ ha kpanọ ọkpa-ọkpa. 7 “Ẹghe nin bha ha rẹ tie ene ẹbho rebhe kugbe, bha ki khue ọne akala, sọkpan, ọne ukhuemhin nan ki dikẹ bhi ọne a khue sade bha khian kpanọ. 8 Imọn-ikpea nesi Aaron, ne yi ohẹn, ele ha khuẹ ene akala. Uwedẹ nan ha rẹ ha khue ene akala nan dẹ ha yi iyaman ọsi ighegheghe rẹji ibha bhi ore nọnsẹbha rebhe.
MARCH 15-21
Numbers 11:7,8 Ọne imanna da diabe ikpẹ coriander, ọ da yẹ diabe amẹn eran. 8 Ene ẹbho ki dagbare dọ ha rọ ọle. Ele ki re udo nan rẹ nọ emhin rẹ nọ ọle la ele ki lumhun ọlẹn bhi okọ. Ele ha ki lu ọnin fo, ele ki re ipọt rẹ nyẹn ọlẹn la ele ki lu ọle bọsi brẹdi nọn dia kholobo. Ọ da dia bhi unun bii ekala nan re abhii gua nọn lẹnlẹn bhi unun.
Numbers 11:1 Ẹghenin, ene ẹbho da munhẹn manman ha zaka-zunyọn bhi odalo iJehova. Ẹghe nin Jehova ki rẹ họn, ohu da manman re ọle, bhiriọ, eranlẹn da na obọ iJehova vae yẹ tuẹ ele a, ọ da yẹ tuẹ ẹbho eso a ne ribhi obọ nọn kike bhi ọne agọ.
Numbers 11:4-6 Ene iyi ibhokhan Izrẹl ne ha ribhi ẹwẹ ele da munhẹn ha mhọn ẹlobhọ, ene ibhokhan Izrẹl da yẹ munhẹn ha viẹ yọle: “Họla ha ki re elanmhẹn nin mhan le? 5 Mhan wo ye ẹmhọn ehẹn re nin mhan rẹ ha le bhi otọ Egypt ọsọhẹ, ene alubasa, cucumber, watermelon, leek, bi garlic! 6 Ọkpakinọn ejayenan nian, egbe mhan kẹ kua. Mhan iyẹ miẹn emhin ọbhebhe gbera imanna.”
Numbers 11:10-15 Moses da họn ghe ene ẹbho viẹ, azagba-uwa rẹ sẹbhi azagba-uwa, ọdeọde bhi ununro ọsi ibọkpọ nọnsọle. Bhiriọ, ohu da manman re iJehova. Sẹyẹ, ọne ẹmhọn bha ti Moses bhọ. 11 Bhiriọ Moses da taman iJehova yọle: “Bezẹle nin uwẹ da si ọbalọ ji ọguọmhandia nọnsẹ? Bezẹle nin uwẹ bha da re ẹlo esili rẹ ghe mẹn, nin uwẹ da mun ihẹ ọsi ene ẹbho rebhe nyan mẹn? 12 Imẹn hi ọnọn be hanmhan ene ẹbho nan? Imẹn be biẹ ele, nin uwẹ ha da taman mẹn yọle, ‘Mun ele ọbhi uki egbe nọnsẹ, beji ọne gaga ọmọn rẹ mun ọmọn,’ ha khian ọne otọ nin uwẹ ve ive ọle ghe uwẹ dẹ mun nin aba odede nọnsele? 13 Ejela imẹn ha da miẹn elanmhẹn re nin ene ẹbho nan rebhe? Ranmhude ele sẹyẹ viẹ bhi odalo nọnsẹmhẹn rẹ taman mẹn yọle, ‘Re elanmhẹn nin mhan le!’ 14 Imẹn ọkpa ida sabọ gbẹloghe ene ẹbho nan rebhe; ahu nọnsẹmhẹn ida gbe ọnan. 15 Ahamiẹn inian uwẹ ha lu mẹn le, wowo gbe mẹn a nian. Ahamiẹn ọria esili imẹn khin bhi ẹlo nọnsẹ, hẹi yẹ ji mẹn daghe ene ọnọghọ nan.”
MARCH 22-28
Numbers 13:27 Ọnan hi emhin nin ele dọ taman iMoses: “Mhan nabhi ọne otọ nin uwẹ je mhan ha khian. Bhi ọsi ẹmhọanta, otọ nin miliki bi amẹnlọn vuọnlẹn nọn, ikpẹ nọnsọle khọnan.
Numbers 13:31-33 Sokpan ene ikpea ne rẹkhan ọlẹn ha khian da yọle: “Mhan ida sabọ mun okhọn bu ene ẹbho, ranmhude ele mhọn ahu nẹ imhan.” 32 Ele da sẹyẹ wo ha taman ene ibhokhan Izrẹl ọta nọn imhẹn rẹji ọne otọ nin ele dọ baba fẹghe, ele da yẹ yọle: “Ọne otọ nin mhan na nẹga dọ baba fẹghe, otọ nọn gbe ẹbho ne nyẹnlẹn bhọ khuelo nọn, sẹyẹ, ene ẹbho rebhe nin mhan miẹn bhi enin kpọnọ gbera eria khọnkhan. 33 Bhi enin, mhan da miẹn ene iNeph′i·lim, imọn-ikpea nesi A′nak, ne nabhi Neph′i·lim vae. Mhan da diabe tete bhi ẹlo nọnsele bi ọsi mhan.
Numbers 14:11 Bhiriọ Jehova da taman iMoses yọle: “Eka ẹghe ọ ha gbe ọkuẹsẹ ene ẹbho nan munhẹn ha mun ekpẹn nin mẹn? Sẹyẹ, eka ẹghe ọ ha gbe ọkuẹsẹ ene ẹbho nan munhẹn ha mhọn urẹọbhọ da mẹn, arẹmiẹn mẹn re iyaman ne bunbun man ele?
Numbers 14:1-4 Bhiriọ ọne agbaẹbho rebhe da si uru okhun, ene ẹbho da yẹ munhẹn ha so dagbare yẹ viẹ bhi ọne asọn nin rebhe. 2 Ene ibhokhan Izrẹl rebhe da munhẹn ha zaka-zunyọn rẹji Moses bi Aaron, ene agbaẹbho rebhe da ha ta ọta nọn imhẹn da ele, yọle: “Ọ ha rẹ mhẹn nẹ sade mhan yu bhi otọ Egypt, la sade mhan yu bhi ẹkẹ ọne ojẹgbo nan! 3 Bezẹle nin Jehova ha da ne imhan vae bhi ọne otọ nan, nan re agbada rẹ gbono mhan an? Ele ki ne ikhuo mhan bi imọn nesẹmhan kpanọ. Ọ bha be mhẹn nẹ sade mhan fikie ha khian otọ Egypt?” 4 Ele bhọ da ha taman ọdeọde yọle: “Bha ji mhan zẹ ọria nọn ha sun mhan, nin mhan da fikiẹ ha khian otọ Egypt!”
Numbers 14:6-9 Joshua nin ọmọn nọnsi Nun bi Ca′leb nin ọmọn nọnsi Je·phun′neh, ne deba dọ baba ọne otọ fẹghe, da vinọn ukpọn nọnsele a, 7 ele da yẹ taman ọne agbaẹbho rebhe yọle: “Ọne otọ nin mhan na nẹga dọ baba fẹghe, otọ nọn wo manman mhẹn nọn. 8 Ahamiẹn Jehova re ẹlo esili rẹ ghe mhan, ọle dẹ gene mun mhan nabhi ọne otọ yẹ mun ọne otọ nin mhan, otọ nin miliki bi amẹnlọn vuọnlẹn. 9 Sokpan, bha hẹi sotẹ da iJehova, bha hẹi mun ofẹn ene ẹbho ne ribhi ọne otọ, mhan dẹ gbe ele khuelo. Ele iyẹ mhọn ugbega, sẹyẹ, Jehova ne imhan dia. Bha hẹi mun ofẹn ele.”
MARCH 29–APRIL 4
Numbers 15:32-35 Ẹghe nin ibhokhan Izrẹl rẹ ha ribhi ẹkẹ ojẹgbo, ele da miẹn okpea ọkpa nọn ha rọ ikuẹkuẹ eran bhi ukpẹdẹ iSabbath. 33 Ene miẹn ọlẹn ẹghe nin ọle rẹ ha rọ eran da mun ọlẹn bu iMoses bi Aaron bi ene agbaẹbho rebhe. 34 Ele da mun ọlẹn khue ranmhude a bha sẹ taman ele ebi ele ha lu ọle yẹ. 35 Bhiriọ, Jehova da taman iMoses yọle: “Bha hẹi ja miẹn ghe ibha bha gbe ọne okpea a, sẹyẹ, ọne agbaẹbho rebhe ki re udo rẹ gbe ọle bhi ole ọsi ọne agọ.”
Numbers 16:1-3 Bhiriọ, Kor′ah nin ọmọn nọnsi Iz′har, nin ọmọn nọnsi Ko′hath, nin ọmọn nọnsi Le′vi, da kpanọ, ọle bi Da′than bi A·bi′ram nin imọn nesi E·li′ab, bi On nin ọmọn nọnsi Pe′leth, nọn yi ọkpa bhi imọn nesi Reu′ben. 2 Ele bi ikpea ebhebhe ne yi ibhokhan Izrẹl ne yi itue 250, ene ekhaẹmhọn ọsi ọne agbaẹbho, ene a zẹle bhi ọne agbaẹbho, bi ene ikpea kpataki da kpanọ bu iMoses. 3 Bhiriọ, ele da kugbe nẹga iMoses bi Aaron yẹ taman ele yọle: “Egbe ibha lọ mhan! Ọrebhe bhi ọne agbaẹbho nan khiamhin, ele rebhe, Jehova yẹ ribhi ẹwẹ ele. Bhiriọ, bezẹle nin bha ha ki da ha tuẹn egbe bha okhun gbera ene ẹbho nesi Jehova nan?
Numbers 16:8-10 Moses da taman iKor′ah yọle: “Huẹan, bha kaehọ, ibha nin imọn-ikpea nesi Le′vi. 9 Ibha be riale ghe obhi emhin khere nọn nin Osẹnobulua ọsi Izrẹl rẹ zẹ bha bhi ẹwẹ ibhokhan Izrẹl rebhe, yẹ re otọ nin bha rẹ bu ọle re beji bha ha da ha lu iwẹnna bhi uwa oga ọsi Jehova, yẹ mundia bhi odalo ibhokhan Izrẹl rebhe ha lu iwẹnna oga nin ele, 10 sẹyẹ, ghe ọle si bha bi ibhio bha nin imọn-ikpea nesi Le′vi kẹ egbe? Ihe ọsi ohẹn ibha be yẹ guanọ nin bha mun?
Numbers 16:32 Bhiriọ, otọ da tuje unun an yẹ so ele lọ, azagba-uwa nọnsele, ẹbho rebhe nesi Kor′ah, bi emhin rebhe nin ele mhọnlẹn.
Numbers 16:35 Bhiriọ, eranlẹn da na obọ iJehova vae yẹ tuẹ ikpea a ne yi itue 250 ne ha re emhin nọn vin-ohin rẹ zọese.
APRIL 5-11
Numbers 18:19 Emhin ne khiale rebhe nin ibhokhan Izrẹl ha ne ji Jehova, mẹn ne nin uwẹ bi imọn-ikpea bi imọn-ikhuo nesẹ ne ne uwẹ, ne ha yi ihaosa nọnsẹ rẹ sẹbhi ighegheghe. Ọ dẹ ha yi akovẹn ọsi umhẹn rẹ sẹbhi ighegheghe bhi odalo iJehova rẹji uwẹ bi imọn nesẹ.”
Numbers 18:6,7 Mẹn tobọmhẹn ne ibhio ibha, nin ibhokhan iLevite, bhi ẹwẹ ibhokhan Izrẹl nin ele ha yi ẹsele rẹji bha. A ne ele nin Jehova nin ele ha lu iwẹnna bhi ibọkpọ ọsi oga. 7 Uwẹ bi imọn-ikpea nesẹ dẹ ha mhọn obọ bhọ rẹ ha gbẹloghe iwẹnna ọsi ohẹn nan lu rẹji ukhuo-izọese bi emhin ne ribhi ẹkẹ eji a re ukpọn rẹ wa a. Ene iwẹnna nan ibha ha lu. Imẹn mun iwẹnna ọsi ohẹn rẹ lu ẹsele nin bha, ahamiẹn ghe ọria ọbhebhe dọ ha lu ọle, a ki gbe ọle a.”
Numbers 18:20 Jehova da taman Aaron yọle: “Uwẹ ida miẹn emhin uku le bhi otọ nọnsele, sẹyẹ, uwẹ ida ha mhọn otọ soso bhi ẹwẹ ele. Imẹn hi ihaosa bi emhin uku nọnsẹ bhi ẹwẹ ibhokhan Izrẹl.
Numbers 18:24 Imẹn ne obọ ọkpa bhi igbe nin ibhokhan Izrẹl ha zẹ ji Jehova nin ibhokhan iLevite nọn ha yi emhin uku nọnsele. Ọnan zẹle nin mẹn da taman ele yọle. ‘Ele ida le emhin uku soso bhi ẹwẹ ibhokhan Izrẹl.’”
Numbers 18:21 “Uwẹ daghe ọle nian ghe mẹn ne obọ ọkpa bhi igbe rebhe ne ribhi otọ Izrẹl nin imọn-ikpea nesi Le′vi nọn ha yi emhin uku nọnsele ranmhude iwẹnna nọnsele, iwẹnna nin ele lu bhi ibọkpọ ọsi oga.
Numbers 18:26,27 “Uwẹ dẹ taman ene iLevite yọle, ‘Obọ ọkpa bhi igbe nin ibhokhan Izrẹl ha ne re, imẹn ne nin bha nọn ha yi emhin uku nọnsẹbha, sẹyẹ, ibha dẹ ne obọ ọkpa bhi igbe bhi ẹkẹ ọle rẹ zẹ ji Jehova. 27 Ọ dẹ ha yi emhin nin bha rẹ zẹ, bọsi ebale la anyọn la abhii nọn na obọ bha vae.
APRIL 12-18
Numbers 20:23-27 Bhiriọ, Jehova da taman iMoses bi Aaron bhi Oke ọsi Hor nọn ribhi egbegbe ughu ọsi otọ E′dom yọle: 24 “Aaron dẹ yu. Ọle ida nabhi ọne otọ nin mẹn ha mun nin ibhokhan Izrẹl, ranmhude bha veva gbobọra uhi nọnsẹmhẹn rẹji amẹn ọsi Mer′i·bah. 25 Ne Aaron bi ọmọn-okpea nọnsọle nin El·e·a′zar, uwẹ ha ne ele re bhi okhun Oke ọsi Hor. 26 Kuẹ ukpọn nin Aaron mun yọ, uwẹ ha mun yọ El·e·a′zar nin ọmọn nọnsọle. Enin Aaron ha da yu.” 27 Bhiriọ, Moses da lu beji Jehova taman ọlẹn. Ele da hẹn Oke ọsi Hor bhi odalo ene ẹbho rebhe.
Numbers 20:2-5 Bhi ọne ẹghe nin, amẹn bha ha ribhọ nin ele, bhiriọ, ele da kugbe ha re unun ji Moses bi Aaron. 3 Ene ẹbho da ha ne iMoses van yọle: “Ọ ha rẹ mhẹn nẹ sade mhan wo yu bhi ẹghe nin ibhio mhan rẹ yu bhi isira iJehova! 4 Bezẹle nin uwẹ da ne ẹbho nesi Jehova vae bhi ọne ojẹgbo nan nin mhan bi emhin-uri nesẹmhan dọ yu ọbhi enan? 5 Sẹyẹ, bezẹle nin uwẹ da ne mhan sibhi Egypt re nin mhan dọ yu ọbhi ọne otọ ọbe nan? Ọnan iyi otọ nan da miẹn ikpẹ bi fig bi ikperan anyọn bi pomegranate, sẹyẹ, amẹn nan wọn iribhọ.”
Numbers 20:10 Bhiriọ, Moses bi Aaron da si ene ẹbho koko bhi isi ọne oke, Moses da yi ele: “Bha kaehọ, bha ne wo bhi uhọnmhọn! Bha be guanọ nin mhan na bhi ọne udo nan re amẹn nin bha?
Numbers 20:12 Akizẹbue, Jehova da taman iMoses bi Aaron yọle: “Ranmhude ibha bha mhọn urẹọbhọ da mẹn yẹ kpe imẹn khia bhi ẹlo nọnsi ibhokhan Izrẹl, bha ida ne ene ẹbho nan nabhi ọne otọ nin mẹn ha mun nin ele.”
APRIL 19-25
Numbers 22:20-22 Bhiriọ, Osẹnobulua da zegbere man iBa′laam bhi ọsasọn yẹ taman ọlẹn yọle: “Ahamiẹn ene ikpea nan vae dọ tie uwẹ, uwẹ ha rẹkhan ele. Ọkpakinọn, ẹmhọn nin mẹn yọle nin uwẹ ta ọkpa uwẹ ha ta.” 21 Bhiriọ, Ba′laam da kpanọ ọsewewiẹ, ọle da muegbe ikẹtẹkẹtẹ nọnsọle ọbhi otọ yẹ rẹkhan ekhaẹmhọn nesi Mo′ab kpanọ. 22 Ọkpakinọn, ẹkẹ da manman ha khọ Osẹnobulua ranmhude ọle khian, bhiriọ, ẹhi nọnsi Jehova da dọ mundia khẹ ọle bhi uwedẹ nin ọle hẹi gbera. Bhi ọne ẹghe nan, Ba′laam da ha hẹn ikẹtẹkẹtẹ nọnsọle, sẹyẹ eguọmhandia nesọle eva da rẹkhan ọlẹn.
Numbers 22:3-6 bhiriọ, ofẹn ene ẹbho da ha mun ibhokhan iMo′ab, ranmhude ele manman bun; bhi ọsi ẹmhọanta, ẹmhọn ibhokhan Izrẹl da gbe ofẹn ibhokhan iMo′ab bhi ẹkẹ. 4 Bhiriọ, ibhokhan iMo′ab da taman ewanlẹn nesi Mid′i·an yọle: “Ene ẹbho nan dẹ mun otọ nọnsẹmhan rebhe beji ogho-ẹmena rẹ fuẹn ilunmhun ne ribhi ugbo a.” Ba′lak nin ọmọn nọnsi Zip′por hi ojie ọsi Mo′ab ẹghenin. 5 Ọle da je ukọ bu iBa′laam nin ọmọn nọnsi Be′or bhi Pe′thor, nọn sikẹ ọne Ẹdẹ nọn ribhi agbaẹbho nin ọle na vae. Ọle da datie ọle yẹ taman ọlẹn yọle: “Ghe ọle! Ẹbho nabhi otọ Egypt vae. Ghe ọle! Ele vẹ vuọn otọ rebhe, ele bhọ dọ ha nyẹnlẹn bhi odalo nọnsẹmhẹn. 6 Ejayenan nian, huẹan, vae dọ ne mẹn fi ene ẹbho nan unun, ranmhude ele mhọn ahu gbera mẹn. Asabọmiẹn mẹn ki sabọ khọn ele miotọ yẹ khu ele sibhi ọne otọ nan re, ranmhude mẹn lẹnmhin ghe ọria nin uwẹ nan erọnmhọn nan ki miẹn erọnmhọn, sẹyẹ, ọria nin uwẹ fi ọle unun ki kiẹn ọria nin ihẹn ri ọle bhi egbe.”
Numbers 22:12 Sokpan Osẹnobulua da taman iBa′laam yọle: “Hẹi rẹkhan ele ha khian. Hẹi fi ene ẹbho unun, ranmhude ẹbho nan nan erọnmhọn nan ele khin.”
Numbers 22:34,35 Ba′laam da taman ẹhi nọnsi Jehova yọle: “Mẹn lu khọlọ, ranmhude mẹn bha lẹn ghe uwẹ hi ọnọn mundia bhi uwedẹ khẹ mẹn. Ejayenan nian, ahamiẹn ghe emhin ọbe nọn bhi ẹlo nọnsẹ, mẹn dẹ fikie.” 35 Sokpan, ẹhi nọnsi Jehova da ki taman iBa′laam yọle: “Rẹkhan ẹne ikpea ha khian, sokpan ẹmhọn nin mẹn ha taman uwẹ ọkpa uwẹ ha ta.” Bhiriọ Ba′laam da rẹkhan ene ekhaẹmhọn nesi Ba′lak ha khian.
Numbers 23:11,12 Bhiriọ Ba′lak da taman iBa′laam yọle: “Be uwẹ lu mẹn le? Mẹn mun uwẹ re nin uwẹ dọ fi eghian nesẹmhẹn unun, ejayenan nian, erọnmhọn ọkpa uwẹ ki wo ha nan nin ele.” 12 Ọle da wanniẹn ọlẹn yọle: “Ọ ibe yi ọta nọn hi ki rẹ khin nin Jehova re mẹn bhi unun mẹn ha be ta?”
Numbers 24:12,13 Ba′laam da wanniẹn iBa′lak yọle: “Mẹn bha be taman ene ukọ nin uwẹ je re yọle, 13 ‘Aharẹmiẹn ghe Ba′lak mun uwa nọnsọle nin siliva bi golu vuọnlẹn nin mẹn, mẹn ida sabọ tobọmhẹn lu gbera iho nọnsi Jehova, ọ ha rẹ ha yi emhin esili la emhin ọbe. Ọta nin Jehova ha taman mẹn ọkpa mẹn ha ta’?
APRIL 26–MAY 2
Numbers 26:55,56 Ọkpakinọn, a dẹ fi ono rẹ gha ọne otọ. A dẹ rẹkhan elin ọsi ulin-uwa ọsi aba ele rẹ gha emhin uku nọnsele nin ele. 56 Ọne ono nan fi, ọle ha tare ebi a ha rẹ ne emhin uku nin ele yẹ, yẹ gha ọle nin ele beji ele bun sẹ yẹ bi beji ele khere sẹ yẹ.”
Numbers 25:1,2 Ẹghe nin ibhokhan Izrẹl rẹ ha nyẹnlẹn bhi Shit′tim, ene ẹbho da munhẹn ha deba imọn-ikhuo nesi Mo′ab gboghẹ. 2 Ene ikhuo da tie ene ẹbho nin ele dọ deba ele ha lu izọese nin ẹbọ nesele, bhiriọ, ene ẹbho da munhẹn ha le ebale yẹ deuhọnmhọnre nin ẹbọ nesele.
Numbers 25:3-5 Ibhokhan Izrẹl da deba ha ga iBa′al ọsi Pe′or, bhiriọ, ẹkẹ ibhokhan Izrẹl da ha khọ iJehova. 4 Jehova da taman iMoses yọle: “Ne ẹbho rebhe ne sun ene ẹbho nan, uwẹ ha yẹ re uri ele bhi uru bhi odalo iJehova bhi ọsodamhẹn, beji a da miẹn ghe ẹkẹ ibhokhan Izrẹl nọn rẹ ha khọ iJehova ki lọre.” 5 Bhiriọ, Moses da taman ene bhohiẹn bhi otọ Izrẹl yọle: “Ọdeọde bhi ẹwẹ bha dẹ gbono ikpea nesele a ne deba ga iBa′al ọsi Pe′or.”
Numbers 25:6-11 Sokpan, ọnan ki wo ha sunu, obhokhan Izrẹl ọkpa da mun obhokhan iMid′i·an nin okhuo re bhi eji ibhio ọle ye bhi odalo iMoses bi ibhokhan Izrẹl rebhe, ẹghe nin ele rẹ ha viẹ bhi ununro ọsi ibọkpọ ọsi oga. 7 Ẹghe nin Phin′e·has nin ọmọn nọnsi El·e·a′zar nin ọmọn nọnsi Aaron nin ohẹn ki rẹ daghe ọle, ọle da gua kpanọ bhi ẹwẹ ibhokhan Izrẹl re yẹ mun akpade mhọnlẹn bhi obọ nọnsọle. 8 Bhiriọ, ọle da bu ọne obhokhan Izrẹl bhi ibọkpọ nin ọle ye yẹ ji ọle ọbhi egbe nọnsele veva, ọne okpea nọn yi obhokhan Izrẹl bi ọne okhuo rẹ nabhi egbe-okhuo nọnsọle. Ọne ẹghe nin, ọkakale nin ibhokhan Izrẹl rẹ ha ye da fo. 9 Ẹbho ne yuno bhi ọne ọkakale nan da ha yi itue 24,000. 10 Bhiriọ, Jehova da taman iMoses yọle: 11 “Phin′e·has nin ọmọn nọnsi El·e·a′zar nin ọmọn nọnsi Aaron nin ohẹn re ẹkẹ ibhokhan Izrẹl nọn rẹ ha khọ mẹn lọre, ranmhude ọle bha re otọ nin ọria soso bhi ẹwẹ ele rẹ sọtẹ da mẹn. Bhiriọ, mẹn bha fuẹn ene ibhokhan Izrẹl a arẹmiẹn ghe mẹn guanọ nin ele ha ga imẹn ọkpa.
Numbers 33:54: Bha dẹ fi ono rẹ gha ọne otọ nọn ha yi ọsi azaga-uwa nọnsẹbha kẹkẹ. Bha ki mun otọ nọn hu nẹ nin azagba-uwa nọn bun nẹ nin ele le bhi uku. Bha ki mun otọ nọn khere nin azagba-uwa nọn khere nẹ nin ele le bhi uku. Obọ nin ọne ono nan fi de ọi, enin ha yi alebhuku ọsi ọdeọde. Bha dẹ miẹn otọ nesẹbha le bhi uku beji ibha rẹ nabhi ulin-uwa ọsi aba bha vae.