Eji A Da Ne Emhin Nan Gbẹn Ọbhi Ebe ọsi Ikolo Unyẹnmhin bi Iwẹnna Oga Nọnsẹmhan
JANUARY 3-9
EMHIN NE GHANLẸN NE RIBHI BAIBO | JUDGES 15-16
“Akhailu Nọn Nan Rẹ Ha Hian Ọrẹ Gbe Egbe!”
w12 4/15 8 ¶4
Ihian-ọrẹ-gbe-egbe—Emhin Ọbe Nọn Sunu Ẹlẹnan!
4 Ọhẹnhẹn, bha ji mhan zilo nyan Delilah nin okhuo ọbe, nin Samson nin Ọbhohiẹn zẹ bhi ọshọ. Samson da ha guanọ nin ọle sun ibhokhan Izrẹl ne ha dọ ne ibhokhan iPhilistine khọnlẹn. Ekhaẹmhọn isẹn nesi ibhokhan iPhilistine lẹnmhin ghe Delilah bha gene hoẹmhọn iSamson, bhiriọ, ele da taman ọlẹn ghe, ele dẹ re emhin nanlẹn sade ọle dọ rẹkpa ele guanọ otọ ebe re ahu nin Samson, beji ele ha da sabọ gbe ọle a. Delilah da wo re obọ ọbhi ọne olo nan. Sokpan, igba ea nin ọle rẹ dọnmhegbe rẹ guanọ otọ ọle, ọ bha fo ọle. Ọle da ha lẹlẹ iSamson ọbhọ nọn taman ọlẹn. Ọle ki zẹ kpokpo ọle, “egbe da lọ [iSamson], rẹ sẹbhọ ghe ọle khian yu.” Bhiriọ, Samson da taman ọlẹn ghe, rẹ na ẹghe nan rẹ biẹ ọle, ọle bha sẹ gbẹn eto nọnsọle, ọne eto re ahu nanlẹn. Delilah ki lẹn ebe re ahu nin Samson fo, ọle da gbẹn eto ọsi Samson a, ẹghe nin Samson rẹ nowẹ mun uhọnmhọn ọbhi uke egbe nọnsọle. Bhiriọ, ọle da mun iSamson nin eghian ọlẹn, nin ele lu ọle ebe yẹẹ ele. (Judg. 16:4, 5, 15-21) Akhailu Delilah wo lu riọ! Ranmhude ikhu, ọle da khiẹn ọria nọn hoẹmhọn ọlẹn.
w05 1/15 27 ¶5
Emhin Eso Nan Miẹn Tie bhi Ebe ọsi Judges
14:16, 17; 16:16. Nan rẹ ha viẹ la guinẹzọ rẹ sua ọria ọbhọ rẹ lu emhin, ọ dẹ sabọ ria ikolu a.—Proverbs 19:13; 21:19.
w12 4/15 11-12 ¶15-16
Ihian-ọrẹ-gbe-egbe—Emhin Ọbe Nọn Sunu Ẹlẹnan!
15 Be okhuo bi ọdọ ha rẹ ha sun rẹkhan egbe yẹ? Ọta nọnsi Osẹnobulua da yọle: “Deba okhuo nin uwẹ re egbe usẹn-obhokhan re ha sọnyẹnmhẹn.” Ọ da yẹ yọle ghe nin okhuo bi ọdọ ko ha sọnyẹnmhẹn bhi iẹnlẹn. (Prov. 5:18; Eccl. 9:9) Beji okhuo bi ọdọ ha rẹ ko ha wanre, ele ki ha mun egbe rebhe bi ọkhọle rebhe ọbhi ikolu nọnsele. Ọnan rẹman ghe, ele ki ha ka egbe ehọ, ko ha gbe ẹghe kugbe, yẹ manman sikẹ egbe. Ebe ha rẹkpa ele ziẹn ibọdọ bi ireokhuo nọnsọle, bi ikolu nin ele bi Jehova ko mhọnlẹn, ọle ele ha denọ ẹlo ọi. Bhiriọ, ele ki ha tie iBaibo kugbe, yo iwẹnna itẹmhọn Osẹnobulua kugbe, yẹ ko bhii Jehova nọn nan erọnmhọn nin ele.
SUN RẸKHAN IJEHOVA
16 Ibhio mhan eso ne ribhi agbotu da lu olukhọ nọn manman kaka. Bhiriọ, a da re adia nọn manman kaka nin ele, beji a ha da miẹn ghe ele ki ziẹn bhi oga. (Titus 1:13) Sokpan, ọ da khẹke nan khu eso sibhi oga re ranmhude emhin ebe nọn kaka nin ele lu. Ẹbho ne miẹn ene adia nan ọbhi egbe, ọ da rẹkpa ele rẹ fikie bu iJehova re. (Heb. 12:11) Ahakimiẹn ghe a khu ọmọẹ ẹ la ọria bhi azagba-uwa nọnsẹ sibhi oga re kii? Ọne ẹghe nan uwẹ ha rẹ rẹman ghe Osẹnobulua uwẹ sun rẹkhan, ọ iyi ọne ọria nin. Jehova gbuhi nin mhan ghe nin mhan hẹi deba ọria nọn hi ki rẹ khin nan khu sibhi oga re ha muobọ. Ọle gbẹlokotọ fẹghe si mhan re obọ rẹkhan ọne uhi nin.—Tie 1 Corinthians 5:11-13.
Emhin Oriọn Ne Ghanlẹn
w05 3/15 27 ¶6
Ahu Nin Jehova Re Nin Samson Rẹkpa Ọle Rẹ Khọn Miotọ!
Emhin nin Samson guanọ nin ọle lu hi, nin ọle khọn ibhokhan iPhilistine miotọ. Ọnin hi emhin nin ọle wo denọ ọkhọle ọi. Nin ọle da sabọ khọn eghian nesi Osẹnobulua miotọ, ọle zẹle nin ọle da dia bhi uwa ọsi agbilẹ a bhi Gaza. Ọ iyi ẹmhọn oghẹ zẹle nin ọle da diọbhi enin. Ọle da ha guanọ eji ọle ha da gbe asọn bhi Gaza, uwa ọsi ọne agbilẹ ọkpa ọle da miẹn eji ọle ha dia i. Bhi ọsasọn ogiziẹn, ọle da sibhi uwa ọsi ọne okhuo re. Ọle da fi obọ mun ene odẹ ne ribhi ọne igeti ọsi ọne agbaẹbho bi ikazi eva ne ribhọ, yẹ banọ ele sibhọre. Ọle da muno ele ha khian oke nọn sikẹ iHebron. Eji ọle khian na ree sẹbhi ikpọwala 60. Jehova re obọ ọbhi ọne emhin nan nin ọle lu yẹ re ahu nanlẹn rẹ lu ọle.—Judges 16:1-3.
JANUARY 10-16
EMHIN NE GHANLẸN NE RIBHI BAIBO | JUDGES 17-19
“Okhẹnan Nabhọre Sade A Gbobọra Uhi Nọnsi Osẹnobulua”
it-2 390-391
Micah
1. Okpea nọn na ulin-uwa ọsi Ephraim vae. Micah da gbobọra uhi nọnzi elẹnlẹn bhi ẹwẹ uhi igbe nin Jehova gbe nin ibhokhan Izrẹl. (Ex 20:15) Ọle da do isiliva 1,100 ọsi inẹn ọlẹn re. Ọle ki miẹnkue ghe ọle hi ọnọn re ọne igho, yẹ re ọne igho fikie ji inẹn ọlẹn, inẹn ọlẹn da yọle ghe ọle dẹ re ọne igho isiliva ze ji Jehova. Ọle ki yẹ re ọne igho rẹ man amanzẹ yẹ ne ene amanzẹ nin ọne ọmọn nọnsọle. Inẹn ọlẹn da re isiliva 200 bhi ẹkẹ ọne igho nin ojogun. Ọne ojogun da re ọle man amanzẹ. Akizẹbue, ọne amanzẹ da ha ribhi uwa ọsi Micah. Micah wo ha mhọn ẹbọ bhi uwa nọnsọle. Ọle da yẹ man ephod bi teraphim. Ọle da taman ọkpa bhi imọn nesọle ghe nọn ha yi ohẹn nọnsọle. Arẹmiẹn ghe ọle man lu ọnan nin ọle rẹ gẹn iJehova, emhin ebe ọle lu, ranmhude ọle gbobọra uhi nọnsi Jehova nọn yọle ghe nan hẹi man ẹbọ yẹ ha ga ọle. (Ex 20:4-6) Ọle da yẹ gbobọra uhi rẹji ene ohẹn bi uhi nin Jehova rẹ yọle ghe uwa oga nọnsọle ọkpa a ha da ha lu ilọnmhọn oga. (Jg 17:1-6; De 12:1-14) Akizẹbue, Micah da re obhi Levite ọkpa natiọle Jonathan, nin ọmọn nọnsi Gershom, nin ọmọn nọnsi Moses, ọbhi uwa nọn ha yi ohẹn nọnsọle, yẹ ha ha ọle osa. (Jg 18:4, 30) Micah da ha riale ghe emhin esili ọle wo lu riọ, bhiriọ, ọle da yọle ghe Jehova dẹ nan erọnmhọn nanlẹn. (Jg 17:7-13) Sokpan ọ iyi uwa ọsi Aaron Jonathan na vae, bhiriọ ọ bha khẹke nin ọle ha ga bhi ihe ọsi ohẹn. Ọnan da wo re emhin ebe nin Micah lu rẹ manman khọ ọbhọ.—Nu 3:10.
it-2 391 ¶2
Micah
Ọ bha sẹ bue gbe Micah bi ikpea eso da khu rẹkhan ibhokhan iDan. Ele ki ke ele re, ibhokhan iDan da nọọn ele ebe sunu. Bhiriọ, Micah da yọle: “Bha ne ene ẹbọ nin mẹn manlẹn, yẹ re ọne ohẹn kpanọ. Be ki kẹre nin mẹn?” Bhiriọ, ibhokhan iDan da yọle ghe, sade Micah yẹ rẹkhan ele, yẹ so ele bhi uhọnmhọn, ele dẹ sabọ kuan ọlẹn. Micah ki daghe ọle ghe ibhokhan iDan mhọn ahu nẹ ele, ọle da fikie ha khian uwa. (Jg 18:22-26) Ọnin ki gbera, ibhokhan iDan da dunmhun agbaẹbho ọsi Laish a, tuẹ ọle a, yẹ bọn agbaẹbho nọnsele ọbhi ọne otọ. Jonathan bi imọn nesọle da ha ga bhi ihe ọsi ohẹn nin ibhokhan iDan. Ene amanzẹ nin ibhokhan iDan ne bhi obọ iMicah, ele da ha noo ọle rẹ ga bhi ene ikpẹdẹ rebhe nin uwa oga rẹ ha ribhi Shiloh.—Jg 18:27-31.
Emhin Oriọn Ne Ghanlẹn
w15 12/15 10 ¶6
Baibo Nọn Lẹkhẹ Nan Rẹ Lẹn Otọle
6 Emhin kẹkẹ nan miẹn nọn zẹle nọn da khẹke nan ne elin nọnsi Osẹnobulua ọbhi Baibo wo kie bun ọbhọ. Ijan 7,216, ọle a da noo elin nọnsi Jehova bhi Baibo natiọle New World Translation nan printi bhi 2013. Elin ọsi Jehova da re igba 6 rẹ gbera eka igba nan noo ọne elin bhi ọne a printi bhi 1984. Ijan isẹn nan da noo ọne elin hi, 1 Samuel 2:25; 6:3; 10:26; 23:14, 16. Ebezẹle nan da noo elin nọnsi Osẹnobulua bhi ene ulọnlẹn nan kẹkẹ bhi ọne iBaibo ọsọgbọn hi, a da kere ghe, ọne elin ribhi ene ulọnlẹn nin bhi Dead Sea Scrolls. Ọ gbera ikpe 1,000 nan gbẹn ọne iDead Sea Scrolls nan, a kuẹ gbẹn obọ ọsi Baibo nan re ikpọta iHebrew natiọle Masorah gbẹn. Ijan ọzehan nan da noo ọne elin nan hi Judges 19:18. Ebezẹle nan da noo ọne elin bhi ọne ulọnlẹn nan hi, ranmhude emhin eso nan guanọ otọ ọle miẹn bhi Baibo nan gbẹn bhi ẹghe ẹdẹlẹ.
JANUARY 17-23
EMHIN NE GHANLẸN NE RIBHI BAIBO | JUDGES 20-21
“Ha Guanọ Ewanniẹn bhi Obọ IJehova”
w11 9/15 32 ¶2
Uwẹ Dẹ Be Sabọ Lu Bii Phinehas Sade Uwẹ Kuẹlo Da Ọnọghọ?
Ikpea nesi Gibeah bhi ulin-uwa ọsi Benjamin da mun okhuo iLevite ọkpa ho yẹ gbe ọle a. Ranmhude ọnan, ibhokhan Izrẹl nekẹle da muegbe yẹ mun okhun bu ulin-uwa ọsi Benjamin. (Judg. 20:1-11) Ele da nan erọnmhọn ji Jehova nọn rẹkpa ele ọkuẹsẹ ele dọ khọnlẹn. Sokpan, obọ ọsi ulin-uwa ọsi Benjamin da kokhun nẹ ọsi ele igba eva, bhiriọ, ele da gbono ikpea ne bunbun a bhi ẹwẹ ele. (Judg. 20:14-25) Ọnan dẹ be re ele ha riale ghe erọnmhọn nin ele nanlẹn bha wẹnna? Jehova be gene ha guanọ nin ele mun okhọn bu ibhio ele bhi emhin ebe nin ele lu?
w05 1/15 27 ¶9
Emhin Eso Nan Miẹn Tie bhi Ebe ọsi Judges
20:17-48—Bezẹle nin Jehova da ji obọ ọsi ulin-uwa ọsi Benjamin da kokhun nẹ ọsi ulin-uwa nekẹle igba eva arẹmiẹn ghe, ọkhẹke nan re oya nin ulin-uwa ọsi Benjamin bhi emhin ebe nin ele lu? Bhi ọsi ọhẹnhẹn, Jehova da ji ibhokhan iBenjamin da gbono ẹbho ne bunbun a bhi ulin-uwa ọsi ibhokhan Izrẹl nekẹle. Jehova lu ọnan nin ọle rẹ fẹghe si ibhokhan Izrẹl muegbe nin ele rẹ re emhin ebe sibhi ẹwẹ ele re.
w11 9/15 32 ¶4
Uwẹ Dẹ Be Sabọ Lu Bii Phinehas Sade Uwẹ Kuẹlo Da Ọnọghọ?
Be imhan ha sabọ miẹn luẹ bhi ọnan? Ọnọghọ eso nan miẹn bhi ẹkẹ agbotu ikẹ sibhọre, aharẹmiẹn ene ewanlẹn manman dọnmhegbe nin ele rẹ re ọle sibhọre, la nan erọnmhọn ọbhọ nin Osẹnobulua rẹkpa ele. Emhin nọn dia iriọ ha sunu, ọkhẹke nin ene ewanlẹn yere ebi Jesu tale nọn yọle: “Bha, ha nọọn, a ki re nin bha; bha ha guanọ, ibha ki miẹn; bha ha so obọ bhi odẹ, a ki tuje ọle a nin bha.” (Luke 11:9) Aharẹmiẹn ghe, ọ diabe ghe Jehova rọẹghe rẹ re ewanniẹn ọbhi erọnmhọn nin ene ewanlẹn nanlẹn, ọkhẹke nin ele ha mhọn ọne iruduba ghe ọle dẹ re ewanniẹn ọbhọ bhi ẹghe nọn khẹke.
Emhin Oriọn Ne Ghanlẹn
Uwẹ Be Rẹ Lẹn?
Be a rẹ ha noo ukpiri nan rẹ fi udo yẹ bhi okhọnlẹn bhi ẹghe ẹdẹlẹ?
Ukpiri nan rẹ fi udo, ọle David noolo rẹ gbe iGoliath nin aguanlan an. Asabọmiẹn ghe ẹghe nin David rẹ ha yi ọsun-ohuan ọle rẹ luẹ ebi a rẹ noo ọne ukpiri nan yẹ.—1 Samuel 17:40-50.
Rẹ na otọ ha dẹ, ọle ibhokhan Egypt bi ibhokhan Assyria rẹ ha noo ukpiri nan rẹ fi udo bhi ifoto nọnsele. Obhi ukpọn la ohian nan diẹn mun ukpiri eva, ọle a rẹ lu ọne ukpiri nan, nan rẹ fi udo. Udo nọn kpoa bhẹbhẹ, ọle a noo bhọ. Ọne udo nan dẹ sabọ bhia sẹ bii ikpabọ enẹn nan ku kugbe, yẹ sabọ khua sẹ bii ukpu izẹ. Nin ọria rẹ sabọ fi ọne udo nan, ọle ki re ọle ọbhi ẹkẹ ọne ukpọn la ọne ohian nan diẹn mun ọne ukpiri. Ọne ọria ki manman fi ọne ukpiri nẹga uhọnmhọn nọnsọle, yẹ re osukpa zẹ obọ ọkpa ọsi ọne ukpiri obọ. Bhiriọ, ọne udo ki tin fia dọ de gbe ọne emhin nin ọle kọnlẹn.
Ẹbho ne guanọ emhin bhi ẹkẹ otọ wo manman miẹn udo ne bunbun nan noo bhi ẹghe okhọnlẹn bhi Middle East. Ọnan rẹman ghe ele wo ha noo ukpiri nan rẹ fi udo bhi ẹghe ẹdẹlẹ. Ọkakulo nọn guẹ rẹ noo ọne ukpiri ha fi ọne udo, ọne udo dẹ sabọ nẹ gbera imoto nọn manman runẹ. Ẹbho eso bha rẹọbhọ ghe a ha fi ọne udo nan, ọ dẹ sabọ tin sẹ bii ufẹnmhẹn. Ebi ọ hi ki rẹ dia yẹ, ọne udo nan re ukpiri fi, dẹ sabọ gbe ọria a.—Judges 20:16.
JANUARY 24-30
EMHIN NE GHANLẸN NE RIBHI BAIBO | RUTH 1-2
“Ha Khu Ọbhi Oyẹẹ Nọn Ibeghe”
w16.02 14 ¶5
Re Egbe Khọkhọ Imọẹ Nesi Jehova
5 Ruth ha rẹ sabọ yọle ghe, inẹn ọlẹn bi ibhio ọle ne ribhi Moab dẹ sabọ gbẹloghe ọle, beji a miẹn ghe ọdọ ọle yu. Moab hi agbaẹbho nọnsọle. Ọle wo guẹ ebi a rẹ lu emhin yẹ bhi enin, bi urolo nan zẹ bhọ. Sẹyẹ, ẹbho ne ribhi enin hi ẹbho nesọle. Naomi ida sabọ ne ene emhin nan soso nanlẹn bhi Bethlehem. Ranmhude ọnan, Naomi da taman iRuth nọn dia bhi Moab a. Naomi da yọle ghe ọle ida sabọ re ọdọ nin ikhuo nesi imọn nesọle, la re uwa nin ele dia. Ruth dẹ be ha guanọ nin ọle fikie bu ẹbho nesọle bi osẹ ọsi agbaẹbho nọnsọle? Eye! Ọle bha diabe Orpah nọn fikie bu ẹbho bi osẹ nesọle.—Ruth 1:9-15.
w16.02 14 ¶6
Re Egbe Khọkhọ Imọẹ Nesi Jehova
6 Ọ diabe ghe obọ iNaomi la obọ ọdọ ọle nọn yu Ruth da luẹ ẹmhọn iJehova. Jehova bha diabe osẹ nan miẹn bhi Moab. Ruth lẹnmhin ọkhẹke nin ọle hoẹmhọn iJehova yẹ ha ga ọle. Sokpan, ọ iyi nin ọle gheghe lẹn ọnan ọkpa, ọ da khẹke nin ọle lu rẹkhan ebi ọle lẹnlẹn. Ruth da noo ẹwanlẹn, ọle da zẹ iJehova nọn ha yi Osẹnobulua nọnsọle. Bhiriọ ọle da taman iNaomi yọle: “Ẹbho nesẹ ki kiẹn ẹbho nesẹmhẹn. Osẹ nọnsẹ ki yẹ kiẹn Osẹ nọnsẹmhẹn.” (Ruth 1:16) Ọ wo ti mhan bhọ rẹ daghe ebi iRuth rẹ wo hoẹmhọn iNaomi yẹ. Ọrẹyiriọ, oyẹẹ nin ọle mhọn da iJehova bhọ kokhun nẹ. Okpea ọkpa natiọle Boaz, nọn mhọn otọ, da wo gẹn iRuth nin ọle rẹ dọ nẹko bhi otọ ugbega nọnsi Jehova. (Tie Ruth 2:12.) Ọnan wo ye imhan re ebi obhi ọkhọkhọ rẹ nẹko bhi otọ igẹn ọsi inẹn ọlẹn yẹ nọn gbega ọle. (Ps. 36:7; 91:1-4) Jehova da wo gene kiẹn ugbega rẹji Ruth. Ọle da wo re ihaosa nanlẹn bhi urẹọbhọ nin ọle rẹman. Bhiriọ, Ruth bha miẹn ebe ha zẹ nin ọle ha da kiọya ọbhi emhin nin ọle zẹ rẹ lu.
Emhin Oriọn Ne Ghanlẹn
w05 3/1 27 ¶1
Emhin Eso Nan Miẹn Tie bhi Ebe ọsi Ruth
1:13, 21—Jehova hi ọnọn be si ọbalọ bi ọkakale ji Naomi? Eye. Naomi bha yọle ghe Osẹnobulua lu emhin ebe soso. Sokpan, ranmhude ọkakale ne ha sunu ji ọle, ọle da ha riale ghe obọ iJehova ele na vae. Egbe iẹnlẹn da wo khan ọlẹn. Yẹ deba ọnin, bhi ẹghe ẹdẹlẹ, ọria ha biẹ ọmọn, a ki yọle ghe Osẹnobulua nan erọnmhọn nanlẹn. Sokpan ọnọn bha miẹn ọmọn biẹ, a ki yọle ghe Osẹnobulua fi ọle unun. Naomi bha ha mhọn eyẹẹ, sẹyẹ, imọn eva nin ọle rẹ ha mhọnlẹn da yuno. Ọnan sẹ ebi re iNaomi ha riale ghe Jehova re ẹkhọle lu ọle.
JANUARY 31–FEBRUARY 6
EMHIN NE GHANLẸN NE RIBHI BAIBO | RUTH 3-4
“Ha Lu Ebi Ẹbho Ha Rẹ Lẹn Uwẹ Ọbhi Ọria Nọn Mhẹn”
w12 10/1 22 ¶5
“Okhuo Esili”
Edandan iribhọ ghe uru nọn lọ a nin Boaz rẹ ne iRuth talọ wo ko ọle udu re. Ọle da taman ọlẹn yọle: “Jehova dẹ nan erọnmhọn nin uwẹ, ọmọn nọnsẹmhẹn. Oyẹẹ nọn ibeghe nin uwẹ rẹman bhi ọne ẹghe nan nian gbera ọne uwẹ rẹman bhi ọsi ọhẹnhẹn, ranmhude uwẹ bha dọ bu ene usẹn-ikpea ne fele la ne bha fe.” (Ruth 3:10) “Ọsi ọhẹnhẹn” nin Boaz tẹmhọnlẹn hi, oyẹẹ nọn ibeghe nin Ruth rẹman, nin ọle rẹ rẹkhan Naomi fikie vae bhi Izrẹl yẹ ha gbẹloghe ọle. “Ọne ẹghe nan nian” nin ọle sounun ọlẹn da ha yi ọne ẹghe nan nin Ruth rẹ bu ọle re. Boaz da yọle ghe, ọ wo lẹkhẹ nin ikhuo bii Ruth ne bha sẹ dọmanlẹn rẹ ha guanọ ọdọ bhi ẹwẹ usẹn-ikpea ne fele la ne bha fe. Sokpan Ruth bha lu iriọ. Ọle da ha guanọ nin ọle lu emhin esili da iNaomi bi ọdọ iNaomi nọn yu. Ọle da ha guanọ nan miẹn ghe, elin ọsi ọdọ iNaomi nọn yu bha yulua bhi otọ Izrẹl. Ọne emhin nan nin Ruth lu, nin ọle bha rẹ mun ọsi egbe ọle kalo, da wo rẹso iBoaz bhi ọkhọle.
w12 10/1 23 ¶1
“Okhuo Esili”
Riale ebi ọ rẹ ti Ruth bhọ yẹ ẹghe nin ọle rẹ ria ẹmhọn ebi Boaz taman ọlẹn ghe, ẹbho wo lẹn ọlẹn ọbhi okhuo esili. Edandan iribhọ ghe, nin ọle rẹ ha guanọ nin ọle lẹn iJehova yẹ ha ga Ọle deba ebezẹle nin ọle da ha yi okhuo esili. Ọle wo re ifuẹkẹ man Naomi bi ẹbho nesọle. Ọle da wo dọnmhegbe rẹ ha nyẹnlẹn rẹkhan uwedẹ nan rẹ lu emhin bhi otọ Izrẹl nin ọle bha rẹ ka lẹn khẹ. Mhan ha re egbe khọkhọ iRuth, mhan ki ha re ekpẹn ne ẹbho lu emhin yẹ mun ekpẹn nin uwedẹ nin ele rẹ lu emhin, bi ebi a rẹ lu emhin bhi isele. Mhan ha lu iriọ, ẹbho ki yẹ lẹn mhan ọbhi eria esili.
w12 10/1 24 ¶3
“Okhuo Esili”
Boaz da re iRuth bhi amhẹn. Akizẹbue, Baibo da taman mhan yọle: “Jehova da ji ọle da hanmhan. Bhiriọ, ọle da biẹ ọmọn-okpea.” Ikhuo nesi Bethlehem da nan erọnmhọn nin Naomi yẹ gẹn iRuth. Ele da yọle ghe Ruth mhẹn gbera imọn-ikpea ihinlọn rẹji Naomi. Baibo taman mhan ghe, akizẹbue ọmọn nọnsi Ruth da dọ kiẹn aba odede ọsi David nin Ojie nọn khua. (Ruth 4:11-22) Sẹyẹ, David da dọ kiẹn aba odede ọsi Jesu Kristi.—Matthew 1:1.
Emhin Oriọn Ne Ghanlẹn
w05 3/1 29 ¶3
Emhin Eso Nan Miẹn Tie bhi Ebe ọsi Ruth
4:6—Be ọria nọn dẹ emhin kiere ha rẹ sabọ si ozughu ọbhi emhin uku nọnsọle yẹ sade ọle dẹ emhin kiere? Ahamiẹn ghe ọria nọn mhọn otọ, obọ gbe ọle sẹbhọ ghe ọle khiẹn otọ nọnsọle, ọnọn khẹke nọn dẹ ọle kiere ki re igho nọnsọle rẹ dẹ ọle kiere. Sokpan, eka ikpe ne kẹre rẹ sẹbhi ukpe iJubilee ha tare eka igho ọle ha ha bhi ọne otọ. (Leviticus 25:25-27) Ọle ha lu iriọ, emhin uku nọnsọle ki si re otọ. Yẹ deba ọnin, ahakimiẹn ghe Ruth biẹ ọmọn-okpea, ọne otọ nin ọle ha dẹ kiere bhi obọ iNaomi ki kiẹn ọsi ọne ọmọn-okpea, ọ ida ha yi ọsi ọmọn nọnsọle la ibhio ọle soso.
FEBRUARY 7-13
EMHIN NE GHANLẸN NE RIBHI BAIBO | 1 SAMUEL 1-2
“Ha Tan Ọkhọle a Man IJehova bhi Erọnmhọn”
ia 55 ¶12
Ọle Da Tan Ọkhọle Nọnsọle Man Osẹnobulua bhi Erọnmhọn
12 Ijiẹmhin ọsi Hannah wo rẹman ẹbho nesi Osẹnobulua ebi a rẹ nan erọnmhọn yẹ. Jehova taman eguọmhandia nesọle rebhe ghe, nin ele ha tan ọkhọle a rẹ taman ọlẹn ebi emhin dia ele yẹ bhi egbe sade ele nan erọnmhọn ji ọle, beji ọmọn rẹ tan ọkhọle a man ene biẹ ọle. (Tie Psalm 62:8; 1 Thessalonians 5:17.) Rẹji erọnmhọn nan nan ji Jehova, Peter nin odibo da gbẹn ọne ọta ikoudure nan nọn yọle: “Zẹ ekpokpo rebhe nesẹbha obọ nanlẹn, ranmhude ẹmhọn bha rẹtẹ ọle.”—1 Pet. 5:7.
w07 3/15 16 ¶4
Egbe Da Fu IHannah Re
Be imhan ha sabọ miẹn luẹ bhi ọne okha nan? Ahamiẹn mhan nan erọnmhọn ji Jehova rẹ taman ọlẹn ọnọghọ nin mhan ye, ọkhẹke nin mhan ji ọle lẹn ebi emhin dia imhan yẹ bhi egbe bi ebi mhan guanọ nin ọle lu nin mhan. Aharẹmiẹn emhin soso iribhọ nin mhan ha sabọ lu rẹ kpẹn ọnọghọ nin mhan ye, ọkhẹke nin mhan zẹ emhin rebhe obọ nanlẹn. Ọnin hi emhin nọn mhẹn nẹ nin mhan ha lu.—Proverbs 3:5, 6.
Emhin Oriọn Ne Ghanlẹn
w05 3/15 21 ¶5
Emhin Eso Nan Miẹn Tie bhi Ebe ọsi Samuel Nin Ọhẹnhẹn
2:10—Beji a miẹn ghe ojie iribhi otọ Izrẹl, bezẹle nin Hannah da ki nan erọnmhọn ji Jehova ghe nọn “re ahu nin ojie nọnsọle”? Bhi Uhi nan nabhi obọ iMoses gbe nin ibhokhan Izrẹl, a ka ta ọle bhi otọ khẹ ghe ibhokhan dẹ ha mhọn ọria nọn ha yi ojie nọnsele. (Deuteronomy 17:14-18) Ọ ki bu ẹghe nin Jacob ha rẹ yu, ọle da yọle: “Ọkpọ [arẹkhọkhọ ọsi ugbẹloghe] ọsi ojie ida sibhi obọ ọsi Judah re.” (Genesis 49:10) Rẹ deba ọnin, rẹji Sarah nin odede ọsi ibhokhan Izrẹl, Jehova da yọle: “Ijie ne ha gbẹloghe ẹbho ne bunbun ki na obọ ọle vae.” (Genesis 17:16) Ọnan rẹman ghe, ojie nọn ha vae bhi ẹghe odalo, ọle iHannah ha tẹmhọn ọlẹn bhi erọnmhọn.
FEBRUARY 14-20
EMHIN NE GHANLẸN NE RIBHI BAIBO | 1 SAMUEL 3-5
“Jehova Mhọn Ifuẹkẹ”
Emhin Oriọn Ne Ghanlẹn
w05 3/15 21 ¶6
Emhin Eso Nan Miẹn Tie bhi Ebe ọsi Samuel Nin Ọhẹnhẹn
3:3—Samuel be gene nowẹ bhi Eje Khiale Nẹ? Eye, ọle bha nowẹ bhi enin. Azagba-uwa ọsi Kohath bhi ulin-uwa ọsi Levi, ọle Samuel na vae. Ọne ulin-uwa nan iga bhi ihe ọsi ohẹn. (1 Chronicles 6:33-38) Bhiriọ, ọle ida sabọ nabhi eje khiale nẹ, yẹ miẹn emhin ne khiale. (Numbers 4:17-20) Ẹgodo nọn ribhi uwa oga, ọle Samuel ha sabọ khian sẹ. Enin ọle da nowẹ. A sabọ rẹ miẹn ghe ijeso bhi ọne ẹgodo nin, ọle Eli da nowẹ. Eji ẹkpẹti nọnsi Osẹnobulua ye nan sounun ọlẹn mundia nin uwa oga nọnsi Jehova.
FEBRUARY 21-27
EMHIN NE GHANLẸN NE RIBHI BAIBO | 1 SAMUEL 6-8
“Họla Hi Ojie Nọnsẹ?”
it-2 163 ¶1
Agbejele Nọnsi Osẹnobulua
Ibhokhan Izrẹl Da Ha Guanọ Ọria Nọn Ha Yi Ojie Nọnsele. Ọ ki bue ikpe 400 nin ibhokhan Izrẹl sibhi Egypt re, sẹyẹ ọ ki gbera ikpe 800 nin Jehova deba Abraham ve akovẹn, ibhokhan Izrẹl da ha guanọ nin ele ha mhọn ọria nọn ha yi ojie nọnsele, beji agbaẹbho nekẹle yẹ rẹ mhọn ojie. Ọne emhin nan nin ele lu rẹman ghe, ele hele nin Jehova ha yi ojie nọnsele. (1Sa 8:4-8) Ele lẹn ive nin Jehova ve nin Abraham bi Jacob, bhiriọ ele da ha khẹ ẹghe nin Osẹnobulua ha rẹ mun ọne ejele gbọ. Emhin ebhebhe nọn zẹle nin ele da ha khẹ ọria nọn kiẹn ojie nọnsele hi, ranmhude ọta akhasẹ nin Jacob tale rẹji Judah ọkuẹsẹ ọle yu (Ge 49:8-10), ọta nin Osẹnobulua tale ẹghe nin ibhokhan Izrẹl rẹ sibhi Egypt re (Ex 19:3-6), akovẹn nin Osẹnobulua ve nin ele (De 17:14, 15), bi emhin eso nin Osẹnobulua je iBalaam nin akhasẹ ta (Nu 24:2-7, 17). Hannah nin inẹn iSamuel wo yẹ tẹmhọn ọne ikhuaẹloghe nan bhi erọnmhọn nin ọle nanlẹn. (1Sa 2:7-10) Ọkpakinọn, Jehova bha ta emhin rebhe rẹji ebi ọne ejele ha dia yẹ. Ọle bha tẹmhọn ẹghe nin ọle ha rẹ mun ọne ejele gbọ, sẹyẹ, ọle bha tẹmhọn ọria nọn ha yi ojie ọsi ọne ejele, la si ọne otọ nan ọne ejele ha ye la okhun ẹlinmhin nọn. Bhiriọ, emhin nọn bha khẹke nọn, nin ibhokhan Izrẹl rẹ ha yọle ghe, nan re ọria nin ele nọn ha yi ojie nọnsele.
w11 1/1 27 ¶1
Ole Da Sẹyẹ Ziẹngbe Arẹmiẹn Emhin Bha Khian Nọnsẹn
Ghe ewanniẹn nin Jehova re nin Samuel ẹghe nin ọle rẹ ta ọne ẹmhọn nan man ọlẹn bhi erọnmhọn: “Re ehọ ọbhi emhin rebhe nin ene ẹbho taman uwẹ; ọ iyi uwẹ ele hele, sokpan imẹn ele hele nọn ha yi ojie nọnsele.” Ọne ewanniẹn nan da wo ko iSamuel udu re. Sokpan, ibhokhan Izrẹl bha mun ekpẹn nin Jehova hiehie bhi ọne emhin nan nin ele lu. Jehova da taman akhasẹ nọnsọle nọn taman ibhokhan Izrẹl emhin nin ele ha miẹn sade ele re ọria kiẹn ojie nọnsele. Samuel ki ta ọne ọta nan man ele, ele da yọle ghe, ọ ha rẹ ha ye iriọ, ele yẹ guanọ nin ọria ha yi ojie nọnsele. Samuel da wo lu beji Osẹnobulua taman ọlẹn, beji ọle ka wo lu khẹ. Ọle da dọ zẹ ojie nin Osẹnobulua yọle ghe nọn ha yi ojie ọsi ibhokhan Izrẹl.—1 Samuel 8:7-19.
w10 1/15 30 ¶9
Uwedẹ Nin Jehova Rẹ Gbẹloghe Mhẹn Nẹ!
9 Emhin ne sunu rẹ ne otọ ha de rẹman ghe, ọta nin Jehova rẹ sekha nin ibhokhan Izrẹl, ẹmhọanta nọn. Ibhokhan Izrẹl wo ha miẹn okhẹnan kẹkẹ ranmhude eria ne ha gbẹloghe ele. Manman nọn, sade ọne ojie nọn gbẹloghe fikeke gbe iJehova. Beji ijiẹmhin ọsi ibhokhan Izrẹl rẹman, ọ bha han ilo ghe eria ne gbẹloghe ne iga iJehova, bha sẹ sabọ re ọkpẹnlẹn ọbhi ọbalọ ọsi eria. Ẹmhọanta nọn ghe, otu efinẹfi eso bhii Osẹnobulua nọn nan erọnmhọn bhi ebi ele lu rẹ mun ọfure bi ugbega re. Sokpan, be Osẹnobulua ha ki rẹ nan erọnmhọn nin ẹbho ne bha re obọ bhi ugbẹloghe nọnsọle yẹ?—Ps. 2:10-12.
Emhin Oriọn Ne Ghanlẹn
w02 4/1 12 ¶13
Bezẹle Nọn Da Khẹke Nin Mhan Mianmẹn?
13 Ọkuẹsẹ ọria mianmẹn rẹ kiẹn ọkpa bhi Esali Jehova, ọkhẹke nin ọle ka fidenọ. Ọria nọn re ọkhọle rebhe zẹ ghe ọle dẹ ha rẹkhan iJesu, ọle tobọle fidenọ. Ọria nọn sẹriọ ki fikeke gbe emhin ebe nin ọle ka rẹ ha lu khẹ, yẹ muegbe rẹ ha lu ebe yẹẹ Osẹnobulua. Ikpọta iHebrew bi Greek nan rẹ tẹmhọn ufidenọ bhi ẹkẹ iBaibo, mundia nin nan rẹ fi egbe denọ. Ọnan rẹman ghe ọne ọria dẹ fikeke gbe emhin ebe nin ọle ka rẹ ha lu khẹ yẹ bu Osẹnobulua. (1 Kings 8:33, 34) Ọria nọn fidenọ ki ha lu emhin ne rẹman ghe ọle gene fidenọ. (Acts 26:20) Ọria nọn dia iriọ ki sibhi oga ohoghe re, ha nyẹnlẹn rẹkhan uhi nesi Jehova, yẹ re ọkhọle rebhe rẹ ga ọle. (Deuteronomy 30:2, 8-10; 1 Samuel 7:3) Ọria ha fidenọ bhi emhin ebe nin ọle ka lu khẹ, iria-eria nọnsọle, ebe yẹẹ ọle, bi uwedẹ nin ọle rẹ lu emhin ki fidenọ. (Ezekiel 18:31) Ọria ha fidenọ, ọle ki ne ikpẹ ne imhẹn nin ọle ka rẹ ha mhọnlẹn kua, yẹ dọ ha mhọn ikpẹ esili.—Acts 3:19; Ephesians 4:20-24; Colossians 3:5-14.
FEBRUARY 28–MARCH 6
EMHIN NE GHANLẸN NE RIBHI BAIBO | 1 SAMUEL 9-11
“Ọria Nọn Mhọn Idegbere Yẹ Lu Emhin Ọbhi Oleghe ISaul Ka Ha Khin”
w14 3/15 9 ¶8
Ebi Mhan Ha Rẹ Ha Mun Ẹmhọn ọsi Eria Nekẹle Kalo Yẹ
8 Ijiẹmhin ọsi Saul nin Ojie da ha yi ijiẹmhin nan rẹ sekha nin mhan ghe, ọkhọle nan rẹ ha khu ọbhi ọsi egbe ọria dẹ sabọ riia ọkhọle nan rẹ mun ẹmhọn ọsi eria nekẹle kalo. Ẹghe nin Saul wo rẹ la kiẹn ojie, ọle da wo ha mhọn idegbere yẹ ha lu emhin ọbhi oleghe. (1 Sam. 9:21) Ọle bha ka re oya nin ẹbho ne ha sọtẹ da ugbẹloghe nọnsọle, arẹmiẹn ghe ọle ha rẹ sabọ lu iriọ rẹ gbega ọne ihe ọsi ojie nin Osẹnobulua re ọle ọi. (1 Sam. 10:27) Saul nin Ojie da ji ẹlinmhin nọnsi Osẹnobulua dia ọle ẹghe nin ọle rẹ sun ibhokhan Izrẹl rẹ dọ khọn ene Ammonite miotọ. Ọnin ki fo, ọle da re idegbere rẹ re ogẹn ji iJehova nọn rẹ rẹkpa ele khọn miotọ.—1 Sam. 11:6, 11-13.
w95 12/15 10 ¶1
Ene Ammonite—Ẹbho Ne Re Emhin Ebe Rẹ Haosa Ifuẹkẹ
Ene Ammonite gbo re emhin ebe rẹ haosa ifuẹkẹ nin Osẹnobulua mhọn da ele. Jehova bha re ẹlo gbe ọne emhin nan nin ene Ammonite lu a. “Ẹlinmhin nọnsi Osẹnobulua da re ahu nin Saul ẹghe nin ọle rẹ họn ọne ẹmhọn nan, bhiriọ, ohu da manman re ọle.” Ẹlinmhin nọnsi Osẹnobulua da rẹkpa iSaul, bhiriọ ọle da koko eyokhọnlẹn 330,000. Ele da khọn ene Ammonite miotọ rẹ sẹbhọ ghe, ene miuhọnmhọn bhi ẹwẹ ele da zagha a yẹ re ọkpa-ọkpa ha khian.—1 Samuel 11:6, 11.
Emhin Oriọn Ne Ghanlẹn
w05 3/15 22 ¶8
Emhin Eso Nan Miẹn Tie bhi Ebe ọsi Samuel Nin Ọhẹnhẹn
9:9—Be a re ọle ta nan rẹ yọle ghe, “ọne a tiọle akhasẹ ẹlẹnan, ọle a tie ọbo bhi ẹghe ẹdẹlẹ”? Asabọmiẹn ghe, ranmhude ihe ọsi akhasẹ bhi otọ Izrẹl ki wo manman ha yi ihe kpataki bhi ẹghe ọsi Samuel bi ẹghe ọsi ene ijie ọsi ibhokhan Izrẹl, a bha yẹ ha tie ele ọbo, a da ha tie ele akhasẹ. Samuel hi akhasẹ ọhẹnhẹn bhi ẹwẹ ẹbho nan do ha tie ele akhasẹ.—Acts 3:24.