Eji A Da Ne Emhin Nan Gbẹn Ọbhi Ebe ọsi Ikolo Unyẹnmhin bi Iwẹnna Oga Nọnsẹmhan
MAY 2-8
EMHIN NE GHANLẸN NE RIBHI BAIBO | 1 SAMUEL 27-29
“Ebi Devid Rẹ Noo Ẹwanlẹn Yẹ bhi Ẹghe Okhọnlẹn”
it-1 41
Ekish
Igba-eva nin Devid rẹ ha nẹ bhi obọ Sọl, ọle da nẹko bhi agbaẹbho nin Ekish nin Ojie da gbẹloghe. Bhi ẹghe ọhẹnhẹn nin ọle rẹ sẹbhi enin, ele da rẹ ha riale ghe, oghian ọle khin. Sokpan Devid da ha lu bọsi ọmhẹnmhẹn. Bhiriọ, Ekish da zẹ ọle obọ, ọle bha lu ọle emhin soso. (1Sa 21:10-15; Ps 34:Ebi a gbẹn ọbhi okhun ọlẹn; 56:Ebi a gbẹn ọbhi okhun ọlẹn) Bhi ọsi ugba-zeva nin ọle rẹ ha khian enin, eyokhọnlẹn 600 bi azagba-uwa nesele, ele rẹkhan Devid ha khian. Bhiriọ, Ekish da yọle nin ele debhi Ziklag a. Bhi ẹkẹ ukpe bi uki enẹn nin ele gbe bhi enin, Ekish da rẹọbhọ ghe, agbaẹbho ne ribhi otọ Juda, ele Devid bi eyokhọnlẹn nesọle ha mun okhọnlẹn yo. Sokpan, agbaẹbho ọsi ibhokhan Gẹshọ, ene Girzite, bi ibhokhan Amalẹk, ele Devid ha mun okhọnlẹn yo. (1Sa 27:1-12) Devid wo hiẹ Ekish rẹ sẹbhọ ghe, Ekish da wo muegbe nin ọle re Devid kiẹn ọnọn ha gbega ọle ẹghe nin ele rẹ ha muegbe rẹ mun okhọn bu Sọl nin Ojie. Sokpan, ọ ki bu ẹghe nin ele ha rẹ kpanọ, ekhaẹmhọn nesi ibhokhan Filistia bha ka nin Devid bi ikpea nesọle da rẹkhan ele. Bhiriọ, a da yọle nin ele fikie ha khian Ziklag. (1Sa 28:2; 29:1-11) Ẹghe nin Devid ki rẹ kiẹn ojie yẹ dọ khọn otọ Gat, ọle bha gbe Ekish a. Ekish yẹ ha ribhi agbọn ẹghe nin Solomọn rẹ ha gbẹloghe.—1Ki 2:39-41; yẹ fẹ uhọnmhọn-ọta natiọle GATH ghe.
it-2 245 ¶6
Ohoghe
Baibo yọle ghe, emhin ebe ohoghe khin. Ọrẹyiriọ, ọnin bha rẹman ghe mhan dẹ wo ha ta emhin rebhe man ẹbho ne bha khẹke nin mhan tale man. Jesu yọle: “Bha hẹi ne emhin ne khiale nin awa, la emhin nesẹbha ne ghanlẹn ọbhi odalo une, nin ele hẹi re oẹ nunu ọle a yẹ fikie bu bha re dọ zanzan bha a.” (Mt 7:6) Ọnin zẹle ẹgheso, Jesu bha ka gbotọ emhin fanọn an man ẹbho la wo re ewanniẹn bhi inọnta nin ẹbho nọọn ọlẹn, nin ọle hẹi si okhẹnan ji egbe ọle. (Mt 15:1-6; 21:23-27; Joh 7:3-10) Bhiriọ, mhan dẹ sabọ yọle emhin ẹwanlẹn nọn nin Ebraham, Aizik, Rehab, bi Ẹlaisha bha da wo gbotọ emhin rebhe fanọn an man ẹbho ne iga Jehova.—Ge 12:10-19; uhọnmhọnlẹn 20; 26:1-10; Jos 2:1-6; Jas 2:25; 2Ki 6:11-23.
Emhin Oriọn Ne Ghanlẹn
Ene Yu Dẹ Be Sabọ Rẹkpa Ene Nyẹnlẹn?
Ria ọle ghe. Baibo yọle ghe, “ọle ki fikie diọbhi otọ.” ‘Bhi ọne ukpẹdẹ nin ọle yu, iria-eria nọnsọle ki yẹ yu.’ (Psalm 146:4) Sọl bi Samuẹl lẹnmhin ghe, Osẹnobulua bha re obọ ọbhọ nan rẹ ha lu ilọnmhọn ikpẹbo. Sọl bhọ ọnọn ka yọle nan ne ilọnmhọn ikpẹbo sibhi otọ Izrẹl re!—Leviticus 19:31.
Ria ọne ẹmhọn nan ghe, sade Samuẹl nin akhasẹ gene ha nyẹnlẹn bii ẹlinmhin nọn, ọle dẹ be gbobọrauhi nọnsi Osẹnobulua yẹ ka nin ene lu ilọnmhọn ikpẹbo re ọle dagbare bu Sọl? Bhi ọne ẹghe nan, Jehova bha yẹ ka ne Sọl talọ. Uwẹ be riale ghe, ọnọn lu ilọnmhọn ikpẹbo dẹ be sabọ sua Osẹnobulua Nọn Ke Okhun Nẹ ọbhọ, nin ọle na obọ Samuẹl nọn yu rẹ ne Sọl talọ? Eye. Ọ wo khia bhi ẹlo a ghe, ọne “Samuẹl” nin, iyi Samuẹl nin akhasẹ nọnsi Osẹnobulua. Ẹlinmhin ebe nọn man ha lu bii Samuẹl nọn yu nọn.
MAY 9-15
EMHIN NE GHANLẸN NE RIBHI BAIBO | 1 SAMUEL 30-31
“Ji Jehova Nin Osẹnobulua Nọnsẹ Da Mun Uwẹ Ziẹn”
w06 8/1 28 ¶12
Ha Mun Ofẹn Jehova Nin Uwẹ Da Ha Ghọnghọn!
12 Ranmhude ofẹn Jehova nọn ha mun Devid, ọle da ha si egbe bhi emhin ebe nan lu. Sẹyẹ, ọle da sabọ noo ẹwanlẹn rẹ lu ebe khẹke bhi ẹkẹ idia nọn kakale. Bhi ẹkẹ ukpe bi uki enẹn, Devid bi ikpea nesọle da ha nẹ nin Sọl. Ele da sabọ nẹko bhi Ziklag, ọkpa bhi agbaẹbho ọsi ibhokhan Filistia. (1 Samuel 27:5-7) Ẹghe ọkpa ribhọ nin Devid bi ikpea nesọle rẹ dagbare, ibhokhan Amalẹk da vae dọ muno ikhuo ele, imọn nesele, ihuan nesele, yẹ tuẹ ọne agbaẹbho a. Ẹghe nin Devid bi ikpea nesọle ki rẹ fikiere yẹ daghe ebe sunu, ele da gbeviẹ a. Ele da viẹ sẹbhọ ghe, ẹkẹ da ha khọ ele. Bhiriọ, ikpea nesi Devid da yọle ghe, ele dẹ re ido-ido gbe Devid a. Bhi ẹkẹ ọne idia nan, Devid bha ji egbe lọ ọle. (Proverbs 24:10) Ranmhude ofẹn Jehova nọn ha mun Devid, ọle da bhii Jehova nọn rẹkpa ọle. Bhiriọ, Jehova da gene ziẹn ọle udu. Devid bi ikpea nesọle da sabọ khu ene Amalẹk mun, yẹ miẹn ele emhin rebhe nin ele ne bhi agbaẹbho nọnsele.—1 Samuel 30:1-20.
w12 4/15 30 ¶14
Jehova Gbega Mhan Nin Mhan Da Sabọ Miẹn Umiẹnfan
14 Devid wo kuẹlo da ọkakale ne bunbun bhi iẹnlẹn nọnsọle. (1 Sam. 30:3-6) Ọta nin ọle tale wo rẹman ghe, Jehova lẹn ebi emhin dia ọle yẹ bhi egbe. (Tie Psalm 34:18; 56:8.) Jehova yẹ lẹn ebi emhin dia mhan yẹ bhi egbe. Ahamiẹn emhin sunu ji mhan nọn gbe ahu nọnsẹmhan sotọ, Jehova ida fikeke gbe mhan. Ọ ko mhan udu re rẹ lẹn ghe Jehova ne mhan dia, beji ọle yẹ rẹ ne Devid dia. Ọnin zẹle nin Devid da so ọne illo nọn yọle: “Mẹn dẹ manman ha ghọnghọn ranmhude ahoẹmhọn-egbe nọnsẹ nọn ibeghe, ranmhude uwẹ daghe ọbalọ nin mẹn ye; uwẹ lẹn ọnọghọ nin mẹn kuẹlo da.” (Ps. 31:7) Jehova wo gene daghe ọbalọ nin mhan ye, ọle re ikoudure nin mhan yẹ ziẹn mhan udu. Ikolo oga nesẹmhan hi uwedẹ ọkpa nin ọle rẹ ko mhan udu re.
Emhin Oriọn Ne Ghanlẹn
w05 3/15 24 ¶8
Emhin Eso Nan Miẹn Tie bhi Ebe ọsi Samuẹl Nin Ọhẹnhẹn
30:23, 24. Ebe sunu bhi Numbers 31:27 rẹman ghe, ẹlo nọn ghanlẹn, ọle Jehova rẹ ghe ẹbho nan zẹ, ne ha robọkpa bhi ẹkẹ agbotu. Emhin nọn hi ki rẹ khin nin mhan lu, ọkhẹke nin mhan re “ọkhọle rebhe rẹ lu ọle ji Jehova, ọ iyi eria.”—Colossians 3:23.
MAY 16-22
EMHIN NE GHANLẸN NE RIBHI BAIBO | 2 SAMUEL 1-3
“Be Imhan Miẹn Luẹ bhi Ọne Illo Natiọle ‘Ufẹnmhẹn’?”
w00 6/15 13 ¶9
Mun Ekpẹn Nin Ẹbho Ne Ribhi Ihe Ne Gbẹloghe Uwẹ
9 Devid be ha kpokpo egbe ẹghe nan rẹ ha lu ọle khọlọ? Devid da viẹ bu Jehova rẹ taman ọlẹn ghe, ẹbho guanọ nin ele gbe ọle a. (Psalm 54:3) Ọle da taan ọkhọle man Jehova yole: “Hinmhin mẹn bhi obọ eghian nesẹmhẹn, Eo Osẹnobulua nọnsẹmhẹn . . . Ikpea ne ziẹnlẹn ne imẹn khọnlẹn. Eo Jehova, ọ iyi ranmhude olukhọ nin mẹn lu la emhin ebe nin mẹn lu zẹle. Arẹmiẹn mẹn bha lu emhin ebe soso, ele khu rẹkhan mẹn yẹ ha guanọ nin ele ne mẹn khọnlẹn. Vae dọ họn usomhin nọnsẹmhẹn, uwẹ ha yẹ daghe ebi ele lu.” (Psalm 59:1-4) Ọ be sẹ ka sunu ji uwẹ khẹ ghe, arẹmiẹn uwẹ bha lu emhin ebe soso, ene ribhi ihe nọn khua da ha re obọ oya mun uwẹ? Devid bha zobọ bhọ rẹ ha mun ekpẹn nin Sọl. Ẹghe nin Sọl rẹ yu, nin Devid rẹ ha ghọnghọn ghe, oghian ọlẹn yu, ọle da so illo akhiẹ rẹ yọle: “Ene a hoẹmhọnlẹn bi ene daan ẹbho Sọl bi Jonatan ha khin . . . Ele bhọ tua nẹ oghohọn, Ele da mhọn ahu nẹ oduman. Eo imọn-ikhuo nesi Izrẹl, bha viẹ nin Sọl.” (2 Samuel 1:23, 24) Ijiẹmhin esili Devid wo rẹman riọ! Arẹmiẹn Sọl wo ha lu Devid khọlọ, ọle da wo yẹ ha mun ekpẹn nanlẹn ranmhude Jehova hi ọnọn zẹ Sọl.
w12 4/15 10 ¶8
Ihian-ọrẹ-gbe-egbe—Emhin Ọbe Nọn Sunu Ẹlẹnan!
8 Baibo yẹ tẹmhọn eria ne bunbun ne ga nọnsẹn. Bha ji mhan tẹmhọn eva bhi ẹwẹ ele yẹ daghe ebi mhan ha sabọ miẹn luẹ bhi obọ ele. Bha ji mhan re okpea nọn wo ha sun rẹkhan Devid rẹ munhẹn. Jonatan hi elin ọlẹn. Ọle hi ọmọn nọnsi Sọl nin Ojie, nọn rẹ khẹke nọn ha yi ojie sade aba ọle yu fo. Sokpan, ọ bha ha ye iriọ. Jehova da zẹ Devid nọn ha yi ojie ọsi ibhokhan Izrẹl sade Sọl yu fo. Jonatan da wo re obọ ọbhi emhanmhan ọsi Osẹnobulua. Ọle bha ha mun ikhu da Devid la ha ghe ọle bii oghian. Sokpan, “Jonatan bi Devid da wo kiẹn imọẹ ne manman sikẹ egbe.” Sẹyẹ, ọle da wo ha mun ekpẹn nin Devid bii ojie. (1 Sam. 18:1-4) Ọle da ha lu eka nin ọle sabọ lu rẹ re izebhudu nin Devid. Ọle da wo ha ta ọta esili bhi egbe Devid arẹmiẹn ghe, iẹnlẹn nọnsọle ha ribhi okhẹnan. Jonatan bhọ da taman Devid ghe, Devid ha kiẹn ojie ọsi ibhokhan Izrẹl, ọle ki ha zẹ sikẹ ọle. (1 Sam. 20:30-34; 23:16, 17) Ọnan zẹle nan da miẹn ghe, ẹghe nin Jonatan rẹ yu fo, Devid da wo ha lu akhiẹ rẹ sẹbhọ ghe, ọle da so illo akhiẹ nin ọle rẹ rẹman oyẹẹ nin ọle ha mhọn da Jonatan.—2 Sam. 1:17, 26.
Emhin Oriọn Ne Ghanlẹn
it-1 369 ¶2
Obhio
Ẹbho ne ko kuobọgbe ha khu ọbhi emhin ọkpa dẹ sabọ ha tie egbe “ibhio.” Bhi ọsi ijiẹmhin, Hairam nin Ojie ọsi Taya da tie Solomọn nin Ojie obhio ọle. Ọ iyi ranmhude ihe ọkpa ele ko ha ye zẹle. Sokpan, ranmhude ẹki nin ele veva ko re obọ ọi zẹle. Solomọn da taman ọlẹn ghe, nin ọle ne eran bi emhin nekẹle ji ọle nin ọle rẹ bọn uwa oga. (1Ki 9:13; 5:1-12) Ẹghe nin Devid rẹ yọle: “Sẹ ghe! Ebi ọ rẹ manman mhẹn yẹ, bi ebi ọ rẹ manman niẹnniẹn yẹ, nin ibhio rẹ ha nyẹnlẹn kugbe bhi ọfure,” ọle da rẹman ghe, ọ iyi ibhio-ẹkẹ ọkpa ha sabọ ko ha nyẹnlẹn kugbe bhi ọfure. (Ps 133:1) Bhi ọsi ẹmhọanta, arẹmiẹn Devid bi Jonatan bha ko ha yi ibhio-ẹkẹ, Devid da sẹyẹ tie Jonatan obhio ọle ranmhude, oyẹẹ bi ẹkẹ-ẹjẹjẹ nin ọle mhon da ọle. (2Sa 1:26) Imọẹ ne ko lu emhin bhi uwedẹ ọkpa yẹ khu ọbhi emhin ọkpa, aharẹmiẹn emhin ebe nọn, a dẹ sabọ tie ele ibhio.—Pr 18:9.
MAY 23-29
EMHIN NE GHANLẸN NE RIBHI BAIBO | 2 SAMUEL 4-6
“Ji Ofẹn Ha Mun Uwẹ Rẹ Gbobọrauhi Nọnsi Jehova”
w05 5/15 17 ¶8
Emhin Eso Nan Miẹn Tie bhi Ebe ọsi Samuel Nọnzi Eva
6:1-7. Arẹmiẹn emhin esili Devid ha mhọn bhi ọkhọle nin ọle rẹ mun ọne Ẹkpẹti Akovẹn ọbhi awẹnẹwẹnẹ, ọle wo gbobọrauhi nọnsi Osẹnobulua. Bhiriọ, ọle da miẹn okhẹnan bhọ. (Exodus 25:13, 14; Numbers 4:15, 19; 7:7-9) Uwedẹ nin Ọza rẹ re obọ mun ọne Ẹkpẹti Akovẹn mhọnlẹn yẹ rẹman ghe, emhin esili nin ọria mhọn bhi ọkhọle ida sabọ fi uhi nọnsi Jehova denọ.
w05 2/1 27 ¶20
Ẹghe Rebhe Jehova Wo Rẹ Lu Emhin Nọn Gbale
20 Yere ghe, ọ rẹ khẹke nin Ọza lẹn ebe khẹke. Ọle lẹnmhin ghe, ọne Ẹkpẹti Akovẹn rẹman ghe, Jehova ribhi ẹwẹ ibhokhan Izrẹl. Jehova gbe ọne uhi ghe, nin ọria nọn bha khẹke hẹi re obọ sọ ọle, ọnọn ọria ha lu iriọ, ọle ki yu. (Numbers 4:18-20; 7:89) Bhiriọ, ọ rẹ khẹke nan re obọ rẹkhan ọne uhi nin sade a mun ọne Ẹkpẹti Akovẹn. Obhokhan Livai Ọza ha khin arẹmiẹn ọle bha ha yi ohẹn. Bhiriọ, ọ rẹ khẹke nin ọle lẹn ọne uhi. Rẹ deba ọnin, uwa nọnsi aba ọle, ọle a da mun ọne Ẹkpẹti Akovẹn ya bhi ẹkẹ ikpe ne bunbun. (1 Samuel 6:20–7:1) Ebe sẹbhi ikpe 70 ọne Ẹkpẹti Akovẹn gbe bhi enin, ọkuẹsẹ Devid yọle nan mun ọlẹn sibhi enin re. Bhiriọ, rẹ na bhi egbe obhokhan ha vade, ọle Ọza rẹ lẹn ọne uhi rẹji Ẹkpẹti Akovẹn.
w05 2/1 27 ¶21
Ẹghe Rebhe Jehova Wo Rẹ Lu Emhin Nọn Gbale
21 Beji mhan ka ta, Jehova dẹ sabọ daghe ebe ri ọria bhi ọkhọle. Beji a miẹn ghe, Ọta nọnsi Osẹnobulua yọle ghe emhin akhailu Ọza lu, asabọmiẹn ghe Jehova daghe emhin nọn bha gba bhi ẹkẹ ọkhọle nọnsi Ọza nan bha gbẹn dagbare. Ọria nọn lu gbera eji a yọle nọn ọle lu sẹ Ọza be khin? (Proverbs 11:2) Ọle be ha tẹngbemun ranmhude ọle ke odalo nin Ẹkpẹti Akovẹn nin azagba-uwa nọnsọle ha gbẹloghe? (Proverbs 8:13) Urẹọbhọ nọnsi Ọza be wẹghẹ a sẹbhọ ghe, ọle da ha riale ghe, Jehova ida sabọ gbega ọne Ẹkpẹti Akovẹn nọn rẹman ghe, ọle ribhi ẹwẹ ibhokhan Izrẹl? Ebi ọ hi ki rẹ khin, mhan lẹnmhin ghe, Jehova wo lu emhin nọn gbale. Jehova daghe emhin bhi ẹkẹ ọkhọle nọnsi Ọza nọn zẹle nin ọle da re ẹjẹje gbe ọle a.—Proverbs 21:2.
Emhin Oriọn Ne Ghanlẹn
w96 4/1 29 ¶1
Ha Taman Jehova Ebe Kpokpo Uwẹ bhi Ọkhọle Ẹghe Rebhe
Ranmhude ojie Devid khin, ọ da khẹke nin ọne emhin nan nọn sunu rẹso ọle. Uwedẹ nin Devid rẹ lu emhin rẹman ghe, ẹgheso imọẹ Jehova dẹ sabọ lu emhin ne bha gba sade ele ribhi idia nọn dọnmhẹn urẹọbhọ nọnsele. Ọsi ọhẹnhẹn, ẹkẹ da ha khọ Devid. Akizẹbue, ofẹn da ha mun ọlẹn. (2 Samuel 6:8, 9) Ọne ebe sunu nan da wo dọnmhẹn ebi ikolu nin ọle bi Jehova ko mhọnlẹn ziẹn sẹ yẹ. Bhi ọne ẹghe nan, ranmhude ọle bha re obọ rẹkhan uhi nọnsi Jehova, ọle da rẹman ghe ọle bha mun udu tẹ Jehova. Emhin nọn sẹriọ de be sabọ sunu ji mhan ẹlẹnan? Mhan be mun ọlẹn gbe Jehova ahamiẹn emhin ebe sunu ji mhan ranmhude mhan bha re obọ rẹkhan uhi nọnsọle?—Proverbs 19:3.
MAY 30–JUNE 5
EMHIN NE GHANLẸN NE RIBHI BAIBO | 2 SAMUEL 7-8
“Jehova Da Deba Devid Ve Akovẹn”
w10 4/1 20 ¶3
“Ugbẹloghe Nọnsẹ Dẹ Deziẹn”
Emhin nin Devid bhii Jehovah le, da wo manman ti Jehova bhọ. Ranmhude uwedẹ nin Devid rẹ ha sun rẹkhan Jehova bi ive nin Jehova ka ve khẹ, Jehova da ve akovẹn nin Devid ghe, ọle dẹ zẹ ọria bhi azagba-uwa nọnsọle nọn ha yi ojie. Netan da taman Devid ọta akhasẹ nin Osẹnobulua tale rẹji ọle nọn yọle: “A dẹ gbega uwa nọnsẹ bi ejele nọnsẹ rẹ sẹbhi ighegheghe; a dẹ mun ugbẹloghe nọnsẹ gbọ rẹ sẹbhi ighegheghe.” (2Sa 7:16) Beji ive nin Jehova vele rẹman, họla ọmọn nọnsi Devid nọn ha gbẹloghe rẹ sẹbhi ighegheghe?—Psalm 89:20, 29, 34-36.
w10 4/1 20 ¶4
“Ugbẹloghe Nọnsẹ Dẹ Deziẹn”
Ọmọn nọnsi Devid, ọle Jesu nọn na Nazarẹt vae ha khin. Ẹghe nin ẹhi ọkpa rẹ ha wewe ọne uhọnmhunje ghe, a biẹ Jesu, ọle da yọle: “Osẹnobulua nin Jehova ki mun ojukhuo ọsi David nin aba ọle nanlẹn. Ọ ki le ojie nyan uwa ọsi Jacob rẹ sẹbhi ighegheghe. Ejele nọnsọle ida ha mhọn ọkpẹnlẹn.” (Luke 1:32, 33) Bhiriọ, akovẹn nin Jehova deba Devid ve da munsẹ bhi egbe Jesu Kristi. Ọ iyi eria zẹ Jesu nọn ha gbẹloghe, sokpan Jehova tobọle zẹ Jesu Kristi nọn ha gbẹloghe rẹ sẹbhi ighegheghe. Ọkhẹke nin mhan hẹi yele a ghe, ive rebhe nin Jehova vele dẹ munsẹ.—Isaiah 55:10, 11.
w14 10/15 10 ¶14
Ha Mhọn Urẹọbhọ Nọn Ibeghe da ọne Agbejele
14 Ria eria nyan ive nin Jehova ve nin Devid bhi akovẹn nin ele ko ve. (Tie 2 Samuel 7:12, 16.) Ẹghe nin Devid rẹ ha gbẹloghe bhi Jerusalẹm, ọle Jehova rẹ deba ọle ve ọne akovẹn nan. Ọle da taman ọlẹn ghe, ọkpa bhi imọn nesọle dẹ ha yi Mezaya. (Luke 1:30-33) Akizẹbue, Jehova da manman gbotọ ọne ive fanọn an man Devid. Ọle da taman ọlẹn ghe, ọle dẹ re ahu nin ọmọn nọnsọle rẹ ha gbẹloghe. (Ezek. 21:25-27) Rẹ na obọ Jesu, ọle ugbẹloghe nọnsi Devid ha rẹ ha ribhọ rẹ sẹbhi ighegheghe. Beji Baibo tale, ugbẹloghe ọsi ọmọn nọnsi Devid dẹ ha ribhọ rẹ sẹbhi ighegheghe beji ovuẹnlẹn rẹ ribhọ rẹ sẹbhi ighegheghe. (Ps. 89:34-37) A ida miẹn eku bhi odotọ ugbẹloghe nọnsi Jesu. Sẹyẹ, emhin esili nin ọne ugbẹloghe ha lu dẹ ha ribhọ rẹ sẹbhi ighegheghe!
Emhin Oriọn Ne Ghanlẹn
it-2 206 ¶2
Ikpẹdẹ Ọkike
Ọta Akhasẹ ọsi Belam. Ọkuẹsẹ ibhokhan Izrẹl nabhi otọ nan ve nin ele, Belam nin akhasẹ da taman Belak nin Ojie ọsi Moab yọle: “Vae nin mẹn taman uwẹ ebi ene ẹbho nan ha lu ẹbho nesẹ yẹ bhi ẹghe odalo. . . . Ahiẹnhiẹn dẹ dagbare bhi obọ iJacob, Ọkpọ ọsi ojie dẹ dagbare bhi Izrẹl. Ọle dẹ va ukẹhae ọsi Moab a bi uhọnmhọn ọsi imọn-ikpea nesi ugbele a.” (Nu 24:14-17) Ọne ọta akhasẹ nan rẹ tẹmhọn “ahiẹnhiẹn,” da ka munsẹ bhi egbe Devid nin Ojie nọn khọn ibhokhan Moab miotọ. (2Sa 8:2) Ọne ọta akhasẹ nan rẹ yọle “bhi ẹghe odalo,” da munhẹn ha munsẹ ẹghe nin Devid rẹ kiẹn ojie. Beji a miẹn ghe arẹkhọkhọ ọsi Jesu nin Ojie Devid khin, ọne ọta akhasẹ nan dẹ yẹ munsẹ bhi egbe Jesu bhi ẹghe nin ọle ha rẹ gbe eghian ọlẹn khuelo.—Isa 9:7; Ps 2:8, 9.
JUNE 6-12
EMHIN NE GHANLẸN NE RIBHI BAIBO | 2 SAMUEL 9-10
“Devid Da Re Oyẹẹ Nọn Ibeghe Man”
w06 6/15 14 ¶6
Uwẹ Dẹ Sabọ Miẹn Eghọnghọn
Devid da gbẹn yọle: “Eghọnghọn hi ọsi ọria nọn mhọn itohan da obhioguele. Jehova dẹ miẹn ọlẹn fan bhi ukpẹdẹ nin ọle ha rẹ ha ribhi ọnọghọ. Jehova dẹ gbega ọle yẹ miẹn ọlẹn fan. Eghọnghọn ki ha yi ọsi ọle.” (Psalm 41:1, 2) Devid da rẹman uwedẹ nọn khẹke nin mhan rẹ ha re obọ esili mun ẹbho ne imhọn urẹkpa, bhi uwedẹ nin ọle rẹ re oyẹẹ man Mẹfiboshẹt nin akhun, nin ọmọn nọnsi Jonatan, nin ọmọẹ ọle.—2 Samuel 9:1-13.
w05 5/15 17 ¶12
Emhin Eso Nan Miẹn Tie bhi Ebe ọsi Samuel Nọnzi Eva
9:1, 6, 7. Devid da mun ive nin ọle vele sẹ. Ọ yẹ khẹke nin mhan ha lu rẹkhan ọta nin mhan tale.
w02 2/15 14 ¶10
Ele Da Sabọ Ziẹngbe Ọnọghọ Nin Ele Ye
10 Ikpe eso ki gbera, Devid nin Ojie da re ifuẹkẹ man Mẹfiboshẹt ranmhude oyẹẹ nọn khua nin ọle ha mhọn da Jonatan. Devid da ne emhin uku nesi Sọl rebhe nanlẹn yẹ zẹ Zaiba nin ọguọmhandia nọnsi Sọl nọn ha yi ọnọn ha gbẹloghe ọne emhin uku. Devid da taman Mẹfiboshẹt yọle: “Uwẹ dẹ wo ha deba mẹn le ebale bhi uke itebu nọnsẹmhẹn.” (2 Samuel 9:6-10) Oyẹẹ nin Devid rẹman Mẹfiboshẹt da wo re ikoudure nanlẹn yẹ rẹkpa ọle ziẹngbe idia nin ọle da ke egbe ọle re. Ijiẹmhin esili wo khọnan! Ọ yẹ khẹke nin mhan ha re ifuẹkẹ man ẹbho ne ribhi ọnọghọ.
Emhin Oriọn Ne Ghanlẹn
it-1 266
Eto-agban
Bhi obọ ọsi East bhi ẹghe ẹdẹlẹ rẹ sẹbhi otọ Izrẹl, ẹlo nọn ghanlẹn ẹbho rẹ ha ghe ọria nọn mhọn eto-agban. Ranmhude ọria nọn mhọn eto-agban, ọle ọnọn sẹ okpea bhi ẹlo nọnsele. Bhi uhi nin Osẹnobulua gbe nin ibhokhan Izrẹl, ọle da yọle ghe, nin ele hẹi ha rie eto-agban nọnsele bi eto nọn ribhi adesẹ ẹlo bi ehọ nọnsele. (Le 19:27; 21:5) Ọne uhi nan wo khẹke, ranmhude agbaẹbho eso ne nẹga ele da ha rie eto-agban nọnsele ranmhude ilọnmhọn iga-ẹbo nin ele ha lu.
JUNE 13-19
EMHIN NE GHANLẸN NE RIBHI BAIBO | 2 SAMUEL 11-12
Emhin Oriọn Ne Ghanlẹn
it-1 590 ¶1
Devid
Jehova wo daghe emhin akhailu nin Devid lu, bhiriọ ọle da zẹ ọle egbe dagbare. Sade Jehova re otọ nin eria rẹ talọ ọbhi ebi Devid bi Batshiba ko lu nọn, beji uhi nin Osẹnobulua na bhi obọ Mozis gbe nin ibhokhan Izrẹl tale, a ha rẹ gbe ele veva a. Sẹyẹ, ọne ọmọn nin Batshiba rẹ ha hanmhan, ha rẹ yu nyẹn bhi ẹkẹ inẹn ọlẹn. (De 5:18; 22:22) Sokpan, Jehova tobọle talọ ọbhi ọne ẹmhọn yẹ mhon itohan da Devid ranmhude ive ọsi Ejele nin ọle ve nanlẹn. (2Sa 7:11-16) Emhin ọbhebhe nọn zẹle nin Jehova da mhọn itohan da Devid hi, David yẹ ha mhọn itohan da ẹbho. (1Sa 24:4-7; yẹ fẹ Jas 2:13 ghe) Sẹyẹ, Jehova da daghe ọle ghe, ele veva wo kiọya bhi emhin ebe nin ele lu. (Ps 51:1-4) Sokpan, ele sẹyẹ loya bhi emhin ebe nin ele lu. Jehova da noo Netan nin akhasẹ rẹ taman Devid yọle: “Bhi ẹwẹ ene ribhi uwa nọnsẹ Mẹn ha noo rẹ si ọkakale ji uwẹ.”—2Sa 12:1-12.
JUNE 20-26
EMHIN NE GHANLẸN NE RIBHI BAIBO | 2 SAMUEL 13-14
“Ẹmhọn Egbe Ọle Nin Amnọn Ha Mun Kalo Da Si Ẹmhọn Ji Ọle”
it-1 32
Absalọm
Ebi Amnọn Rẹ Yu Yẹ. Ranmhude Tema nin obhio Absalọm wo manman ha mhọn-ose, ọle da nabhi ẹlo ọsi Amnọn nin obhio ọle, rẹ sẹbhọ ghe ẹmhọn ọlẹn da ha yẹẹ ọle. Amnọn da man ha lu ghe ọle khọnmhọn. Bhiriọ, ọle da taman Tema ghe, nin ọle vae dọ nyẹn ebale nanlẹn bhi uwa nọnsọle. Tema ki sẹbhi enin, Amnọn da re idu-idu nanlẹn nowẹ. Ọle ki lu ọle fo, ẹkẹ Tema da manman ha khọ ọle gbera oyẹẹ nin ọle rẹ ha mhọn da ọle. Bhiriọ, ọle da khu ọle sibhi uwa nọnsọle rẹ. Tema da vinọn ukpọn nọnsọle a nọn rẹ ha rẹman ghe, ọmọn ọsi ojie nọn bha sẹ hẹgẹn ọle khin. Ọle da yẹ zẹ ẹmun ọbhi uhọnmhọn. Ọle ki ha viẹ khian bhi uwedẹ, obhio ọle nin Absalọm da ke ọle re. Absalọm da wo re osukpa lẹn ghe, Amnọn hi ọnọn lu ọne akhailu nan ranmhude uwedẹ nin Amnọn rẹ ka tẹmhọn Tema man ọlẹn khẹ. Absalọm da taman Tema ghe nin ọle hẹi ta ọne ẹmhọn dagbare. Bhiriọ, ọle da re ọle nabhi uwa.—2Sa 13:1-20.
w17.09 5 ¶11
Ha Mun Egbe Ọbhi Ibẹẹ
11 Baibo da re ẹmhọn ẹbho ne bha sabọ mun egbe ọbhi ibẹẹ bhi ẹmhọn inegbenowẹ rẹ sekha nin mhan. Ọ da sẹyẹ tẹmhọn ọbalọ nan miẹn bhi emhin ne sẹ inian. Ahamiẹn ọria ke egbe ọle re bhi idia nọn diabe ọsi Kim, ọkhẹke nin ọle ria eria nyan ebe sunu ji ọne usẹn okpea nọn imhọn ẹwanlẹn nan tẹmhọnlẹn bhi Proverbs uhọnmhọnlẹn 7, yẹ ria ẹmhọn emhin akhailu nin Amnọn lu bi okhẹnan nọn nabhọre. (2 Sam. 13:1, 2, 10-15, 28-32) Ọkhẹke nin ene biẹ imọn rẹkpa imọn nesele rẹ ha luẹ ebi a rẹ mun egbe ọbhi ibẹẹ yẹ, yẹ mhọn ẹwanlẹn bhi ẹmhọn ikolu ọsi okpea bi okhuo, sade ele lu oga azagba-uwa nọnsele. Ele dẹ sabọ noo okha nin mhan tẹmhọnlẹn bhi Baibo rẹ man ele le.
it-1 33 ¶1
Absalọm
Ikpe eva da gbera. Ẹghe nan rẹ lu iluemhin nan rẹ rie ilọn ọsi elanmhẹn a ki ye. Bhi ọne ẹghe nan, Absalọm da mhanmhan illuemhin bhi Beehezọ nọn ribhi obọ ọsi NNE ọsi Jerusalẹm. Rẹ na bhi enin rẹ sẹbhi Jerusalẹm ree sẹbhi ikpọwala 22. Ọle da tie imọn-ikpea nọnsi ojie nekẹle bi Devid nin aba ele vae bhi ọne iluemhin. Aba ọle ki yọle ghe ọle ida miẹn otọ rẹ vae, Absalọm da bhii ọle nọn ji Amnọn nin ọmọndiọn nọnsọle da vae bhi ihe nọnsọle. (Pr 10:18) Ele ki ha ribhi ọne iluemhin, egbe da wo ha mun Amnọn ranmhude anyọn nin ọle da. Bhiriọ, Absalọm da taman eguọmhandia nesọle nin ele dọ gbe ọle a. Imọn-ikpea nekẹle da nẹgbe ha khian Jerusalẹm. Sẹyẹ, Absalọm da nẹgbe ha khian Gẹshọ bhi obọ ọsi East ọsi okpẹdẹ natiọle Sea of Galilee. Ọle da re aba ọle nọn khua nin obhokhan Siria rẹkhan egbe. (2Sa 13:23-38) Ọne “agbada” nin Netan nan akhasẹ tale, da gene nabhi “uwa” ọsi Devid. Ọ dẹ ha ribhi enin bhi ẹdagbọn nọnsọle rebhe.—2Sa 12:10.
Emhin Oriọn Ne Ghanlẹn
g04 12/22 8-9
Ose Nọn Mhẹn Nẹ
Bhi obọ nọnkẹle, bha ji mhan tẹmhọn Absalọm nin ọmọn nọnsi Devid. Arẹmiẹn ọle wo manman ha mhọn-ose, ọle bha ha yi ọria esili. Baibo ki ha tẹmhọn ose nọnsọle, ọ da yọle: “Bhi otọ Izrẹl rebhe, a bha miẹn okpea soso nan gẹn ose nọnsọle bii Absalọm. Rẹ nabhi eto nọn re ọle bhi uhọnmhọn rẹ dọ sẹbhi atata-oẹ nọnsọle, asẹ soso ire ọle bhi egbe.” (2 Samuel 14:25) Ọkpakinọn, emhin ebe nin ọle mhọn bhi ọkhọle da re ọle sọtẹ da aba ọle yẹ miẹn ọle ugbẹloghe. Ọle da ne ọshọ aba ọle nowẹ. Ranmhude ọnan, Jehova da gbe Absalọm an.—2 Samuel 15:10-14; 16:13-22; 17:14; 18:9, 15.
Ẹmhọn Absalọm be yẹẹ uwẹ? Eye. Ẹmhọn ọlẹn wo ha sọnọn ẹbho. Arẹmiẹn ọle wo manman ha mhọn-ose, itẹngbemun bi emhin akhailu, ọle a rẹ lẹn ọlẹn. Ose nọnsọle bha sabọ hinmhin ọlẹn bhi okhẹnan nin ọle si ji egbe ọle. Bhi obọ nọnkẹle, Baibo da tẹmhọn ijiẹmhin ọsi ẹbho ne wanlan yẹ mhọn ikpẹ esili arẹmiẹn ọ bha tẹmhọn ose nọnsele. Ọnan rẹman ghe, ọkhọle esili nin ele mhọnlẹn, ọle ebe lu uhọnmhọn emhin nẹ.
JUNE 27–JULY 3
EMHIN NE GHANLẸN NE RIBHI BAIBO | 2 SAMUEL 15-17
“Okpẹhio ọsi Absalọm Da Re Ọle Sọtẹ”
it-1 860
Ene Ke Odalo
Bhi ẹghe ẹdẹlẹ, ẹbho ribhọ ne ke odalo nin awẹnẹwẹnẹ ọsi ọnojie. Ene ẹbho taman ẹbho ghe ojie vade, yẹ hẹnhẹn otọ khẹ ọle. Ele yẹ rẹkpa ọnojie bhi emhin nekẹle. (1Sa 8:11) Absalọm bi Adonaija da ha mhọn awẹnẹwẹnẹ nọnsele bi ikpea 50 kẹkẹ ne khian ke odalo nin ele beji a da miẹn ghe, ẹbho ki ha mun ekpẹn nin ele bọsi ojie.—2Sa 15:1; 1Ki 1:5; yẹ fẹ uhọnmhọn-ọta natiọle RUNNERS ghe.
w12 7/15 13 ¶5
Ga Osẹnobulua Nọn Re Isẹhoa Nin Ọria
5 Baibo wo tẹmhọn ijiẹmhin ọsi ẹbho ne bunbun ne bha lu nọnsẹn, nọn bha khẹke nin mhan re egbe khọkhọ. Ọkpa bhi ẹwẹ ele hi Absalọm nin ọmọn nọnsi Devid nin Ojie. Okpea nọn manman mhọn-ose Absalọm ha khin. Ọkpakinọn akizẹbue, ọle da ha lu bọsi Esu. Ọle da ji ẹlobhọ da jẹre bhi ọkhọle nọnsọle. Ọle da guanọ nin ọle miẹn aba ọle ugbẹloghe nọn bha khẹke ọle. Nin ọle rẹ sabọ lu ọnan, ọle da man ha re ẹkẹ-ẹjẹjẹ man ibhokhan Izrẹl ne dọ guiẹzọ man ọnojie, yẹ ha ta ọta nọn ha re ele rẹọbhọ ghe, ọle hi ọnọn ha sabọ bhohiẹn nọn gbale nin ele, ọ iyi ọnojie. Beji Esu lu bhi ẹkẹ ogba ọsi Eden, iriọ Absalọm wo lu tee. Ọle da man ha lu bọsi ghe, ọle rẹkpa ẹbho, sẹyẹ, ọle da ha rẹ riia elin ọsi aba ọle a.—2 Sam. 15:1-5.
it-1 1083-1084
Hibrọn
Ikpe eso ki gbera, Absalọm nin ọmọn nọnsi Devid da fikie vae bhi Hibrọn. Bhi enin, ọle da rẹ ha guanọ nin ọle miẹn aba ọle ugbẹloghe. Sokpan, ọ bha fo ọle. (2Sa 15:7-10) Asabọmiẹn ghe, ranmhude Hibrọn ka yi agbaẹbho kpataki nan da ha gbẹloghe bhi otọ Juda, bi ranmhude enin ọle na vae, ọle zẹle nin Absalọm da zẹ Hibrọn nọn ha yi agbaẹbho nin ọle ha da munhẹn ha hiẹ ẹbho nin ele rẹ sọtẹ da aba ọle yẹ miẹn ọle ugbẹloghe. Akizẹbue, Rehoboam nin Ojie, nin eyẹ nọnsi Devid, da kie bọn Hibrọn. (2Ch 11:5-10) Ẹghe nin ibhokhan Babilọn rẹ dunmhun otọ iJuda fo, bi ẹghe nin ibhokhan Ju rẹ fikiere bhi imun, eso bhi ene Ju ne fikiere da debhi Hibrọn (Kiriat-aba) an.—Ne 11:25.