ILUẸMHIN 2

Ebi A Rẹ Ko Zilo Yẹ

2 Corinthians 2:17

EBI UWẸ HA LU: Ha talọ bhi uwedẹ nin uwẹ rẹ talọ ẹdẹdẹ. Talọ bhi uwedẹ nọn ha gene rẹman ebi ọta nin uwẹ tẹmhọn ọlẹn, bi ẹmhọn eria nin uwẹ ne zilo gene dia uwẹ yẹ bhi egbe.

EBI A RẸ LU ỌLE YẸ:

Bhii Jehova nọn rẹkpa uwẹ, uwẹ ha yẹ muegbe nọnsẹn. Bhii ji Jehova nin ọle rẹkpa uwẹ rẹ denọ ẹlo ọbhi ọne uhọnmhunje, ọiyi egbe nọnsẹ. Ne ọta kpataki nin uwẹ ho nin uwẹ rẹman ọbhi ọkhọle nọnsẹ. Ji ebi uwẹ ta ha na bhi ọkhọle nọnsẹ vae, hẹi wo ha tie ebi a gbẹn ọbhi ebe beji a rẹ gbẹn ọlẹn.

Ahamiẹn uwẹ dẹ tie iBaibo la ebe ọbhebhe, ọkheke nin uwẹ manman luẹ eji uwẹ ho nin uwẹ tie, beji uwẹ ha da sabọ tie ọle nọnsẹn. Tie ọta nin eria tale beji ọ ha rẹ sabọ rẹman ebi emhin dia ene eria ne tale yẹ bhi egbe. Hẹi re asin bi umhẹn ọbhọ, tie ọle beji a rẹ talọ ẹdẹdẹ.
Ji ebi uwẹ ta ha na ọkhọle nọnsẹ vae. Ria eria nyan ebezẹle nọn da khẹke nin ene uwẹ ne talọ họn ọne uhọnmhunje nin uwẹ ho nin uwẹ taman ele. Ha mhọn ele bhi ọkhọle ẹghe rebhe. Bhiriọ, uwedẹ nin uwẹ ha rẹ mundia, bi beji uwẹ ha rẹ re ẹlo bi egbe rebhe ha talọ, ki rẹman ele ghe, ẹmhọanta uwẹ ta, ghe uwẹ hoẹmhọn ele.

Nin uwẹ rẹ talọ bhi uwedẹ nin uwẹ rẹ talọ khẹ ẹdẹdẹ bha rẹman ghe uwẹ dẹ ha mun-unun-fia beji uwẹ sabọ. Ji ọta nin uwẹ ta bi uwedẹ nin uwẹ rẹ tale rẹman ghe, uwẹ mun ekpẹn nin ọne uhọnmhunje nin uwẹ rẹman.
Ha ghe ene uwẹ ne talọ. Ahamiẹn bhi eji uwẹ da nyenlẹn, nan rẹ ha ghe eria bhi ẹkẹ ẹlo ida re ẹmhọn re, ha ghe ene uwẹ ne talọ ẹlo. Ahamiẹn uwẹ re ọta ogbakha man, hẹi wo ha ghe ẹbho rebhe bọsi usun, la tuabe ghe ọdeọde nẹga. Ha re ẹghe re ghe ọdeọde bhi ẹwẹ eria nin uwẹ ne talọ.