Uwa Oga Ne Kẹ Mhan Rẹ Bọn Ọkuẹsẹ Emianmhẹn IKorona Munhẹn

Ranmhude ẹbho ne mianmẹn ukpe-ukpe wo ha bun ọbhọ, ọ da khẹke nin mhan bọn ba uwa oga kẹkẹ nesẹmhan. Ranmhude ọnan, Ene mhọn obọ bhi uwa nan bọn bhi ije kẹkẹ bhi otọ agbọn nan rebhe, natiọle LDC, da lu emhanmhan nin ele rẹ bọn la hẹnhẹn iKindọn Họọ ne bun sẹbhi iyisẹn ihinlọn nyan uli eva (2,700) bhi ukpe iwẹnna oga ọsi 2020.a

Ọkpakinọn, emianmhẹn iKorona da dẹ idobolo ọbhi ọne emhanmhan nan. Nan rẹ gbega ibhio mhan, yẹ rẹ re obọ rẹkhan uhi ọsi ene gbẹloghe, Otu Nọn Mhọn Obọ bhi Ebe Nan Ne Dagbare da yọle nan zobọ bhi eso bhi ene ẹsọn nan fo. Ọrẹyiriọ, bhi ukpe iwẹnna oga ọsi 2020, uwa oga ne bun sẹbhi iyisẹn ihinlọn nyan uli ọkpa (1,700), ele a bọn yẹ hẹnhẹn ọkuẹsẹ emianmhẹn Corona munhẹn. Rẹ deba ọnin, Bẹtẹ bi uwa kẹkẹ nan da lu iwẹnna oga nesẹmhan ne bun gbera iyisẹn ọkpa (100), ele a rẹ sotọ. Mhan fẹ ebi ẹbho rẹ miẹn elele yẹ bhi eva bhi ene uwa nan bọn nan.

Bẹtẹ nọn ribhi Cameroon. Bẹtẹ nọn ka ribhi enan khẹ bhi eji a tiọle Douala bha kpọnọ hiehie, ọ da yẹ khẹke nan fi emhin ne bunbun denọ bhọ. Otu Nọn Ne Ebe Dagbare da rẹ ha riale ghe, nan hẹnhẹn ọne iBẹtẹ. Ọkpakinọn, igho nan ha rẹ hẹnhẹn ọlen bhọ kpọnọ gbera ọne uwa tobọle. Ele da yẹ fẹghe sa dẹ sabọ bọn iBẹtẹ ọsọgbọn, la nan dẹ uwa yẹ hẹnhẹn ọlẹn, ọkpakinọn esoso bha wẹnna.

Bhi ọne ẹghe nan, ibhio mhan da họn ghe, ene gbẹloghe bhi Douala ho nin ele lu ukho gbera bhi eji Assembly Họọ ọkpa nọnsẹmhan ye. Ele ha lu ọne ukhuo nan, ọ ki re enin taan ẹlo a. Emhin ne khẹke bọsi amẹn, ukpa bi itanẹti ki sabọ sẹbhi enin. Ọnan hi emhin nan wọ gene ha guanọ. Bhiriọ, Otu Nọn Sun Oga da re obọ bhọ nan rẹ bọn iBẹtẹ ọsọgbọn bhi ijanlẹn ọkpa bhi ọne Asẹmbli Họọ.

Ibhio mhan bi ẹbho nan haya ne re bhi ole, da kuobọ kugbe bhi ọne iwẹnna. Ranmhude ọnan, a da sabọ tee ẹghe bi igho, bhiriọ, igho nin mhan rẹ miẹn ọne ẹsọn nan sotọ bha gbera ₦800,000,000. Ọ bha yẹ kpọnọ sẹ beji mhan rẹ ha ria ọle le. Ele da sabọ ne emhin nabhi ọne iBẹtẹ ọsọgbọn nan ọkuẹsẹ emianmhẹn iKorona munhẹn.

Ibhio mhan ne ga bhi Bẹtẹ nọn ribhi Cameroon ki mhọn eje fu ele bhi egbe nin ele da nyẹnlẹn yẹ wẹnna. Ele rẹọbhọ ghe, ẹsele nọn na obọ Osẹnobulua vae, ọle ọne iBẹtẹ ọsọgbọn nan khin. Okhuo bi ọdọ ọkpa da yọle, “Mhan wo guanọ nin mhan manman ha wẹnna, nin mhan rẹ rẹman ghe, ọne ẹsele nan ti mhan bhọ.”

Ọfisi Nan Da Zedu Ebe Nesẹmhan Diọbhi Urolo ọsi Tojolabal bhi Mexico. Bhi ẹkẹ ikpe ne bunbun, Bẹtẹ ọsi Central America, ọle a da zedu ebe nesẹmhan diọbhi urolo ọsi Tojolabal. Egbe Mexico City ọne iBẹtẹ nan yẹ. Eji a tiọle Altamirano bi Las Margaritas, ọle a da manman zẹ ọne urolo nan. Rẹ na bhi enan rẹ sẹbhi eji ọne iBẹtẹ ye ree sẹbhi ikpọwala 1,000. Ranmhude eji ene ibhio mhan nan ye wọ manman ree bhi eji a da zẹ ọne urolo nan, ele bha sabọ lẹn emhin eso nan a fidenọ bhi ọne urolo. Ọ bha yẹ lẹkhe nan rẹ miẹn ibhio mhan nin ikpea bi ikhuo ne ha rẹkpa ha zedu ebe bi vidio nesẹmhan diọbhi urolo ọsi Tojolabal, la ene ha rẹkpa ha rẹkọd ele

Ranmhude ọnan, Otu Nọn Mhọn Obọ bhi Ebe Nan Gbẹn da ha guanọ nin ene ibhio mhan ne zedu ọne urolo nan diọbhi eji a da zẹ ọne urolo. Nan rẹ sabọ lu ọnan, agbotu da lu emhanmhan nan rẹ dẹ uwa yẹ hẹnhẹn ọlẹn, ranmhude, ọnan ha lo nẹ nan rẹ dọ ha bọn uwa la dọ mun uwa bhi haya.

Obhio mhan ọkpa nọn zedu ebe da tẹmhọn ebi ọnan rẹ rẹkpa ọle yẹ. Ọ da yọle: “Bhi ẹkẹ ikpe igbe nin mẹn rẹ wẹnna bhi Bẹtẹ ọsi Central America, ẹdẹ bha ha ribhọ nin mẹn rẹ miẹn ọria nọn zẹ urolo nọnsẹmhẹn. Eji a da wo zẹ urolo ọsi Tojolabal tee, ọle ọfisi nọnsẹmhan ki ye nian. Mẹn wo ne ibhio mhan ne zẹ ọne urolo nan zilo ẹdẹdẹ. Ọnan wo rẹkpa mẹn rẹ manman ha zẹ ọne urolo nọnsẹn, ọ yẹ wo rẹkpa mẹn bhi iwẹnna nọnsẹmhẹn.”

Emhin Nan Mhanmhan Nan Lu bhi Ukpe Iwẹnna Oga ọsi 2021

Bhi ukpe iwẹnna oga ọsi 2021, ahamiẹn emhin wọ dia nọnsẹn, mhan mhanmhanlẹn nin mhan rẹ wẹnna bhi eji a da zedu ebe nesẹmhan ne bun sẹbhi 75, bi uwa kẹkẹ nan da do isiku ọsi agbotu. A dẹ yẹ wẹnna bhi Bẹtẹ elẹnlẹn, deba iwẹnna nin Bẹtẹ nọn kokhun nẹ lu bhi Ramapo, bhi New York. A ki yẹ mun Bẹtẹ nọn ribhi Argentina bi Italy ha khian eje ebhebhe. Yẹ rẹ deba ọnin, ọkhẹke nan bọn iKindọn Họọ nọn bun sẹbhi 1,000. Eji ibhio mhan ka noo khẹ rẹ do ikolo oga ne bun sẹbhi 6,000, ọle ọkhẹke nan kie bọn, ranmhude, e bha yẹ de ọbhọ nọnsẹn. Deba enan, Kindọn Họọ ne bun sẹbhi 4,000, ele ọkhẹke nan hẹnhẹn.

Ejela a da miẹn igho rẹ miẹn ene ẹsọn nan rebhe? Obhio mhan nin Lázaro González, nọn yi ọkpa bhi ene sun iBẹtẹ ọsi Central America da wanniẹn ọne inọnta nan, bhi ẹghe nin ọle rẹ ha tẹmhọn ọfisi nan bọn nin ibhio mhan ne zedu ebe nesẹmhan diọ bhi Tojolabal. Ọle da yọle: “Bhi agbaẹbhọ nọnsẹmhan, mhan imanman mhọn igho, sade ọ iyi urẹkpa ọsi ibhio mhan bhi otọ agbọn nan rebhe, mhan irẹ miẹn igho rẹ bọn ọfisi nin ibhio mhan, nin ele miẹn ha noo rẹ zedu ebe nesẹmhan diọbhi urolo kẹkẹ. Igho nin ibhio mhan bhi otọ agbọn nan rebhe re re, ọle a miẹn noo rẹ bọn ọfisi nin ibhio mhan bhi eji a da zẹ urolo nọnsele. Mhan wo khuẹnmhẹn ibhio mhan bhi otọ agbọn rebhe, bhi uwedẹ nin ele rẹ zẹ emhin bhi obọ. Ranmhude iyobọ nin bha re re bhi iwẹnna itẹmhọn Osẹnobulua nan lu bhi otọ agbọn nan rebhe, ọle zẹle mhan sabọ miẹn ene ẹsọn nan rebhe. Eso bhi ene iyobọ nan, donate.jw.org bha rẹ re re.