ILUẸMHIN 52
Ebezẹle Nọn Da Khẹke Nin Mhan Ha Muegbe Nọnsẹn
Ọ manman yẹẹ mhan rẹ tobọmhan zẹ ukpọn nin mhan ha yọ bi uwedẹ nin mhan ha rẹ muegbe. Ahamiẹn mhan re obọ rẹkhan adia ne ribhi Baibo, mhan dẹ sabọ muegbe bhi uwedẹ nọn ha ti mhan bhọ yẹ re ogẹn ji Jehova. Ji mhan fẹ eso bhi ene adia nan ghe.
1. Adia nela ha rẹkpa mhan rẹ ha muegbe nọnsẹn?
Baibo yọle nin mhan ha re ‘ukpọn nọn mhẹn rẹ muegbe, nin mhan ha muegbe ọbhi oleghe, yẹ ha noo ẹwanlẹn nọn gbale.’ Ọ da yẹ yọle ghe, ọkhẹke nin emhin rebhe nin mhan rẹ muegbe khiakhia. Ọnan ki rẹman ghe, ‘ẹbho ne ga Osẹnobulua mhan khin.’ (1 Timothy 2:9, 10) Ji mhan fẹghe ebi a re ene adia enẹn ne ribhi ọne Baibo nan ta: (1) Ọkhẹke nin mhan re “ukpọn nọn mhẹn rẹ muegbe.” Asabọmiẹn uwẹ daghe ọle ghe, ukpọn kẹkẹ bi uwedẹ kẹkẹ, ọle Esali Jehova rẹ muegbe vae bhi ikolo oga. Ọrẹyiriọ, ele rebhe muegbe bhi uwedẹ nọn ha re ogẹn ji Osẹnobulua. (2) Ọkhẹke ‘nin mhan ha muegbe ọbhi oleghe.’ Ọnan rẹman ghe, mhan ida ha muegbe bhi uwedẹ ọsi nan ba daghe mẹn, la uwedẹ nọn ha re ẹbho ha ria emhin ne bha gba bhi ọkhọle. (3) Ọkhẹke nin mhan ha ‘noo ẹwanlẹn nọn gbale.’ Ebi a re ọnan ta hi, mhan ida wo ha muegbe bhi uwedẹ nin ẹbho rẹ muegbe ranmhude ọle ki sẹ wo titi. (4) Ọkhẹke nin mhan ha muegbe bhi uwedẹ nọn khiakhia nọn ha rẹman ẹbho ne daghe mhan ghe, ‘ẹbho ne ga Osẹnobulua mhan khin.’—1 Corinthians 10:31.
2. Bezẹle nọn da khẹke nin mhan ria ẹmhọn ebi uwedẹ nin mhan rẹ muegbe ha rẹ rẹso ibhio mhan yẹ?
Ẹmhọanta nọn ghe, mhan dẹ sabọ muegbe bhi uwedẹ nọn yẹẹ mhan. Ọkpakinọn, ọkhẹke nin mhan ria ẹmhọn ebi uwedẹ nin mhan rẹ muegbe ha rẹ rẹso eria ebhebhe yẹ. Mhan bha guanọ nin uwedẹ nin mhan rẹ muegbe ha yi idobolo rẹji ọria soso. Bhiriọ, mhan manman dọnmhegbe rẹ ‘lu emhin nọn ha ti ibo mhan bhọ, yẹ ha bọn ele okhun.’—Tie Romans 15:1, 2.
3. Be uwedẹ nin mhan rẹ muegbe ha rẹ re ọle ha ti ẹbho bhọ yẹ nin ele rẹ dọ ga iJehova?
Mhan manman dọnmhegbe nin mhan rẹ ha muegbe nọnsẹn ẹghe rebhe. Ọkpakinọn, uwedẹ ikẹ, ọle mhan rẹ gbẹlokotọ bhi ukpọn nin mhan yọ sade mhan khian ikolo oga la iwẹnna itẹmhọn Osẹnobulua. Bezẹle? Ranmhude, mhan bha guanọ nin uwedẹ nin mhan rẹ muegbe re okan ji Osẹnobulua. Mhan guanọ nin uwedẹ nin mhan rẹ muegbe “re iman-emhin nọnsi Osẹnobulua manman ha mhọn-ose.”—Titus 2:10.
MANMAN LẸN OTỌLE NỌNSẸN
Luẹ ebe ha rẹkpa uwẹ rẹ ha muegbe bhi uwedẹ nọn ha rẹman ẹbho ghe, ọria nọn ga Osẹnobulua uwẹ khin.
Uwedẹ nin mhan rẹ muegbe dẹ sabọ rẹman si mhan mun ekpẹn nin ẹbho ne ribhi ihe. Arẹmiẹn ọkhọle Jehova ghe, uwedẹ nin mhan rẹ muegbe dẹ sabọ rẹman si mhan mun ekpẹn nanlẹn
4. Mhan ha muegbe nọnsẹn, ọ ki rẹman ghe mhan mun ekpẹn nin Jehova
Bezẹle nọn da manman khẹke nin mhan ha gbẹlokotọ bhi uwedẹ nin mhan rẹ muegbe? Tie Psalm 47:2, bha ha zilo nyan ene inọnta nan:
Ranmhude uwedẹ nin mhan rẹ muegbe dẹ rẹso elin nọnsi Jehova, be ọkhẹke nin mhan rẹ ha muegbe yẹ?
Ọ be gene khẹke nin mhan ha gbẹlokotọ bhi uwedẹ nin mhan rẹ muegbe sade mhan khian ikolo oga la iwẹnna itẹmhọn Osẹnobulua? Bezẹle?
5. Ebe ha rẹkpa mhan rẹ ha muegbe nọnsẹn
Aharẹmiẹn ukpọn ọsi obhioguele mhan mhọnlẹn, ọ sẹyẹ khẹke nin ọne ukpọn khiakhia, yẹ ha mhẹn bhi ẹlo. Ọ ki ha yi ukpọn nọn khẹke nin mhan yọ bhi ẹghe nin mhan rẹ yọ ọle. Tie 1 Corinthians 10:24 bi 1 Timothy 2:9, 10. Bha ha tie ele fo, zilo nyan ebezẹle nọn bha da khẹke nin mhan ha yọ . . .
ukpọn ne zubu-zubu bi ukpọn ne bha khẹke eji mhan khian.
ukpọn ne toman egbe, ukpọn ne re egbe man, bi ukpọn nọn ha re ẹbho ha ria eria ne bha gba sade ele daghe mhan.
Arẹmiẹn Kristiẹn iyẹ ribhi odotọ uhi nin Jehova gbe nin ibhokhan Izrẹl, ene uhi nin dẹ sabọ rẹkpa mhan rẹ lẹn ẹlo nin Jehova rẹ ghe emhin. Tie Deuteronomy 22:5, bha ha zilo nyan ọne inọnta nan:
Ahamiẹn okhuo uwẹ khin, bezẹle nọn da khẹke nin uwẹ rẹban ukpọn bi emhin ebhebhe nan rẹ muegbe ne ha sabọ re uwẹ diabe okpea? La, ahamiẹn okpea uwẹ khin, bezẹle nọn da khẹke nin uwẹ rẹban ukpọn bi emhin ebhebhe nan rẹ muegbe ne ha sabọ re uwẹ diabe okhuo?
Tie 1 Corinthians 10:32, 33 bi 1 John 2:15, 16, bha ha zilo nyan ene inọnta nan:
Bezẹle nọn da khẹke nin mhan ria ẹmhọn ẹlo nin ẹbho ne ribhi idunmhun nọnsẹmhan la agbotu nọnsẹmhan rẹ ghe uwedẹ nin mhan rẹ muegbe?
Uwedẹ nela ẹbho rẹ muegbe bhi eji uwẹ da nyẹnlẹn?
Eso be ribhi ene uwedẹ nan nin Kristiẹn ha rẹban? Bezẹle?
Mhan dẹ sabọ muegbe bhi uwedẹ kẹkẹ nọn ha ti Jehova bhọ
ẸBHO ESO SABỌ YỌLE: “Ebe ghọn mẹn mẹn ha yọ, ọ bha rẹtẹ ọria soso.”
Ẹmhọanta be khọnin? Bezẹle nin uwẹ da ta iriọ?
EBI MHAN LUẸLE
Ahamiẹn mhan muegbe nọnsẹn, mhan ki rẹman ghe mhan mun ekpẹn nin Jehova bi eria ebhebhe.
Uwẹ Be Yẹ Yere?
Bezẹle nin uwedẹ nin mhan rẹ muegbe da rẹtẹ iJehova?
Be hi adia eso bhi Baibo ne ha rẹkpa mhan rẹ ha muegbe nọnsẹn?
Be uwedẹ nin mhan rẹ muegbe ha rẹ sabọ rẹso ẹbho nin mhan tẹmhọn Osẹnobulua man yẹ?
FẸ ENE EMHIN NAN GHE
Ẹlo nela ẹbho ha sabọ rẹ ha ghe mhan, ranmhude uwedẹ nin mhan rẹ muegbe?
Fẹghe ebezẹle nọn da khẹke nin uwẹ riale nọnsẹn fo ọkuẹsẹ uwẹ gbẹnẹn emhin ọbhi egbe.
“Be IBaibo Tayẹ bhi Ẹmhọn Emhin Nan Gbenẹn Ọbhi Egbe?” (Ebe nọn ribhi jw.org)
Luẹ adia ebhebhe bhi Baibo, ne ha rẹkpa uwẹ rẹ ha muegbe nọnsẹn.
“Uwedẹ Nin Uwẹ Rẹ Muegbe Be Re Ogẹn ji Osẹnobulua?” (The Watchtower, September 2016)
Be re okhuo ọkpa dọ rẹọbhọ ghe, ẹbho ne ga iJehova dẹ sabọ muegbe bhi uwedẹ kẹkẹ nọn yẹẹ ele, nọn ha sẹyẹ ti Jehova bhọ?
“Uwedẹ Nin Ẹbho Ebhebhe Rẹ Muegbe Da Rẹ Kiẹn Idobolo ji Mẹn” (Awake!, December 22, 2003)