Ọta Nin Eria Ne Tie Ebe Nesẹmhan Nọọn

Beji a biẹ Jesu fo, bezẹle nin Josẹf bi Meri bha da fikie ha khian isele bhi Nazarẹt nin ele da debhi Bẹtilẹhẹm an?

Baibo bha taman mhan. Ọkpakinọn, ọ tẹmhọn emhin eso ne ha sabọ zẹ nin ele bha da fikie.

Ẹhi da taman Meri ghe ọle dẹ hanmhan yẹ biẹ. Ẹghe nin ọne ẹhi rẹ dọ ta ọne uhọnmhunje nan man Meri, eji a tiọle Galili bhi Nazarẹt nin Josẹf na vae Meri bi Josẹf da ha nyẹnlẹn. (Luke 1:26-31; 2:4) Akizẹbue beji ele fikiere bhi otọ Ijipt, ele da gbo ha khian Nazarẹt. Enin Jesu da wanre, bhiriọ, ọle da kiẹn ọmọn-otọ bhi enin. (Matt. 2:19-23) Ọnan zẹle nin mhan da kẹ riale ghe Nazarẹt Jesu, Meri bi Josẹf na vae.

Meri mhọn obhio natiọle Ẹlizabẹt nọn ha nyẹnlẹn bhi Juda. Ẹlizabẹt da ha yi amhẹn Zẹkaraya nin ohẹn. Ọle yẹ hi inẹn Joni nọn gbẹbhoruẹ bhi amẹn. (Luke 1:5, 9, 13, 36) Meri da rẹnẹ ji Ẹlizabẹt yẹ deba ọle gbe uki ea bhi Juda. Akizẹbue, ọle da fikie ha khian Nazarẹt. (Luke 1:39, 40, 56) Ọnan zẹle nin Meri da sabọ lẹn otọ bhi Juda.

Akizẹbue, Josẹf da dọ gbẹn elin ọbhi otọ beji ọria nọn gbẹloghe tale. Bhiriọ Josẹf da na bhi Nazarẹt ha khian Bẹtilẹhẹm nọn yi agbaẹbho ọsi Devid, agbaẹbho nan ka ta ọbhi otọ ghe, a ha da biẹ Jesu. (Luke 2:3, 4; 1 Sam. 17:15; 20:6; Mic. 5:2) Beji Meri biẹ Jesu fo bhi Bẹtilẹhẹm, Josẹf bha ha riale ghe Meri dẹ re obhi ọmọn nin ele la biẹ na bhi uwedẹ ha khian Nazarẹt. Ele da debhi Bẹtilẹhẹm an. Rẹ na bhi Bẹtilẹhẹm rẹ sẹbhi Jerusalẹm dẹ ree sẹbhi ikpọwala 6. Ọnan ki wo re ọle lẹkhẹ nin ele rẹ re ọne ọmọn nin ele la bie diọbhi uwa oga dọ zọese ji Jehova bhi enin.—Lev. 12:2, 6-8; Luke 2:22-24.

Ẹhi nọnsi Osẹnobulua ka taman Meri ghe, ọmọn nọnsọle dẹ le ojukhuo nọnsi Devid bhi uku, yẹ gbẹloghe bii Ojie. Asabọmiẹn ghe, ọ dẹ wo manman lu uhọnmhọn emhin rẹji Josẹf bi Meri ghe a biẹ Jesu bhi agbaẹbho ọsi Devid. (Luke 1:32, 33; 2:11, 17) Asabọmiẹn ele da ha riale ghe emhin ẹwanlẹn nọn nin ele rẹ debhi enin an ha khẹ ebi Osẹnobulua ha gbo taman ele.

Mhan bha lẹn ebe ele bue sẹ yẹ bhi Bẹtilẹhẹm ọkuẹsẹ ene ikpea ne tie ahiẹnhiẹn vae. Bhi ọne ẹghe nan, uwa bhi Bẹtilẹhẹm ele ki da ha nyẹnlẹn, ọ iyi eji a da biẹ Jesu tee. Sẹyẹ, ọne ọmọn iyẹ yi ọmọn-obọ. (Matt. 2:11) Ọ diabe ghe nin ele rẹ fikie diọbhi Nazarẹt, ele da fẹkẹ debhi Bẹtilẹhẹm an ha nyẹnlẹn bhi enin.

Hẹrọd da yọle ghe nan gbono imọn-ikpea rebhe a ne ha ribhi Bẹtilẹhẹm, rẹ na bhi ikpe eva rẹ sẹbhi enan la biẹ. (Matt. 2:16) Ẹhi nọnsi Osẹnobulua da ji Josẹf lẹn ebe vade. Bhiriọ, ọle bi Meri da re Jesu nẹgbe ha khian otọ Ijipt. Ele da debhi enin an rẹ dọ sẹbhi ẹghe nin Hẹrọd rẹ yu. Akizẹbue, Josẹf da ne azagba-uwa nọnsọle diọbhi Nazarẹt. Bezẹle nin ele bha da fikie ha khian Bẹtilẹhẹm? Ranmhude bhi ọne ẹghe nan, ọmọn okpea ọsi Hẹrọd natiọle Akeleyọs nọn izẹwẹ mhẹn hiehie ki ha gbẹloghe. Sẹyẹ, ẹhi nọnsi Osẹnobulua da yẹ taman Josẹf okhẹnan nin ọle da miẹn sade ọle fikie. Ele dẹ sabọ bẹẹ Jesu wanre bhi Nazarẹt nin ele ye.—Matt. 2:19-22; 13:55; Luke 2:39, 52.

Josẹf yu fo ọkuẹsẹ Jesu tuje ọne uwedẹ a nin ẹbho rẹ dọ gbẹloghe bhi okhun. Bhiriọ, ọne otọ nan ọle ha da nyẹnlẹn sade a riọ ọle kpanọ. Ebho ne bunbun dẹ miẹn ọlẹn, yẹ luẹ emhin ne bunbun bhi obọ ọle rẹji ebezẹle nin ọle bi Meri da fẹkẹ debhi Bẹtilẹhẹm an beji a biẹ Jesu fo.