Hulda Da Mun Emhanmhan Nọnsọle Sẹ
BHI ikpe eso ne gbera, ibhio mhan nin ikhuo ea da ha nyẹnlẹn bhi agọ natiọle Sangir Besar bhi eji ẹdẹ nẹga bhi agbaẹbho ọsi Indonesia. Ẹbho wo manman lẹn ele bhi enin ranmhude uwedẹ nin ele rẹ tẹmhọn Osẹnobulua yẹ rẹkpa ẹbho rẹ lẹn otọ Baibo. Ọkpakinọn, ele yẹ mhọn iwẹnna ọbhebhe nin ele ko lu bhi egbegbe ẹdẹ.
Eji ẹdẹ nẹga bhi Sangir Besar bhi obọ ọsi north, bhi agbaẹbho ọsi Indonesia
Ele ha sẹbhi enin, ele ki nabhi ẹkẹ ẹdẹ dọ muno udo dagbare. Eso bhi ene udo dẹ kpọnọ sẹ bii bọlu. Ele ha ki lu ọnin fo, ele ki re ijoko dotua fẹkẹ ha re umọnmọn guọghọ ene udo a, rẹ sẹbhọ ghe, ele ki khere nẹ ẹkẹn-ọkhọ. Ele ha ki lu ọnin fo, ele ki ne ele ọbhi ẹkẹ bọkẹti, yẹ mun ọlẹn na bhi oke ha khian uwa. Ele ha ki sẹbhi uwa, ele ki ne ele ọbhi ẹkẹ ẹkpa nan ha sabọ muno ọbhi ẹkẹ imoto ne khua nan rẹ mun ihẹ. A noo ene udo nan rẹ lu ukhuo.
Hulda rọ udo bhi egbegbe ẹdẹ
Hulda a tie ọkpa bhi ene ikhuo nan. Ọle miẹn ẹghe rẹ ha lu ọne iwẹnna nan gbera ene ikhuo nekẹle. Igho nin ọle miẹn bhọ ọle rẹ gbẹloghe azagba-uwa nọnsọle. Ọkpakinọn, bhi ọne ẹghe nan, emhin ọbhebhe ọle ha guanọ nin ọle re ọne igho lu. Ọle da ha guanọ nin ọle dẹ ifoni ne khua, beji ọle ha da sabọ re ọle ha nabhi JW Library®. Hulda lẹnmhin ghe, ividio bi emhin kẹkẹ ne ribhi JW Library dẹ sabọ rẹkpa ọle bhi inẹbho. Ọ dẹ yẹ rẹkpa ọle rẹ manman ha luẹ Baibo dinmhin.
Hulda da ha noo uriagogo eva ọsewewiẹ bhi ukpẹdẹ-ukpẹdẹ rẹ lu ọne iwẹnna nan, deba ẹghe nin ọle ka noo khẹ. Bhi ẹkẹ uki ọkpa bi ukhiọnmhẹn, ọle da sabọ guọghọ udo nọn ha vuọn obhi imoto nan rẹ mun ihẹ. Iriọ ọle rẹ miẹn igho rẹ dẹ ọne ifoni.
Hulda mun ifoni mhọn
Hulda da yọle, “Arẹmiẹn egbe wo manman lọ mẹn, sẹyẹ egbe nọnsẹmhẹn dunmhun an ranmhude nin mẹn rẹ ha guọghọ udo, mẹn bha yẹ ha tẹmhọn ọnin ẹghe nin mẹn ki rẹ munhẹn ha noo ọne foni bhi inẹbho, yẹ re ọle muegbe ikolo oga.” Ọle da yẹ yọle ghe, ọne ifoni yẹ wo rẹkpa ọle bhi ẹghe nin emianmhẹn KOVID-19 rẹ munhẹn, bhi ẹghe nan ki rẹ ha noo ifoni rẹ do ikolo oga. Ọ wo ti mhan bhọ ghe Hulda sabọ mun emhanmhan nọnsọle sẹ.