ILUẸMHIN 45
Be Imhan Ha Rẹ Rẹman Yẹ Ghe Mhan Bha Deba Ibo Soso bhi ọne Agbọn Nan?
Jesu taman edibo nesọle nin ele hẹi deba “ibo ọsi ọne agbọn nan.” (John 15:19) Ebi ọle re ọnan ta hi, nin ele hẹi deba bhi okhọn la ilọnmhọn ahinmhin-ibo. Ọ iyi emhin nọn lẹkhẹ nin mhan rẹ re egbe sibhi ibo ọsi ọne agbọn nan re. Ẹbho bhọ sabọ ha zuọzuọ mhan. Be imhan ha rẹ rẹman yẹ ghe mhan bha deba ibo soso bhi ọne agbọn nan?
1. Ẹlo nela iKristiẹn ọsaje rẹ ghe ene gbẹloghe?
Ikristiẹn ọsaje mun ekpẹn nin ene gbẹloghe. Mhan manman dọnmhegbe nin mhan rẹ ‘ne emhin nesi Caesar nin Caesar,’ beji Jesu yọle nin mhan ha lu. Mhan re obọ rẹkhan uhi ọsi ene gbẹloghe. Mhan yẹ ha igho uhọnmhọn. (Mark 12:17) Baibo rẹkpa mhan rẹ lẹn ghe, Jehova hi ọnọn re otọ nin ene gọvamẹti rẹ ha gbẹloghe. (Romans 13:1) Bhiriọ, ahu nọnsi Jehova kpọnọ nẹ ọsi ele. Mhan lẹnmhin ghe Agbejele nọnsi Osẹnobulua ọkpa ha sabọ re ọkpẹnlẹn ọbhi ọnọghọ nọn ribhi ọne agbọn nan.
2. Be imhan ha rẹ rẹman yẹ ghe mhan bha deba ibo soso bhi ọne agbọn nan?
Bọsi Jesu, mhan ideba otu ahinmhin-ibo. Ẹghe nin Jesu rẹ ha ribhi ọne otọ nan, ẹbho ne daghe emhin ọhan-ilo nin ọle lu da rẹ ha guanọ nin ele re ọle kiẹn ojie. Ọkpakinọn, Jesu bha ka. (John 6:15) Bezẹle nin ọle bha da ka? Ranmhude, beji ọle tale, ‘Agbejele nọnsọle bha deba ọsi ọne agbọn nan.’ (John 18:36) Bọsi Jesu, mhan wo rẹman bhi uwedẹ kẹkẹ ghe, mhan bha deba ibo soso bhi ọne agbọn nan. Bhi ọsi ijiẹmhin, mhan iyo okhọn. (Tie Micah 4:3.) Mhan iyẹ tuẹ iflagi. (1 John 5:21) Sẹyẹ, mhan ideba otu ahinmhin-ibo soso. Mhan ha re obọ sibhi ene emhin nan re, bi emhin nekẹle ne dia inian, mhan ki rẹman ghe Agbejele nọnsi Osẹnobulua, ọle mhan re obọ ba.
MANMAN LẸN OTỌLE NỌNSẸN
Fẹ idia eso ghe, nọn ha da nọghọ mhan rẹ rẹman ghe mhan bha deba ibo ọsi ọne agbọn nan. Yẹ luẹ ebe ha rẹkpa uwẹ rẹ lu emhin nọn ha yẹẹ iJehova bhi ene idia nan.
3. Kristiẹn ọsaje ideba ibo soso bhi ọne agbọn nan
Jesu bi edibo nesọle re ijiẹmhin esili ọbhi otọ nin mhan. Tie Romans 13:1, 5-7 bi 1 Peter 2:13, 14. Bha ha tie ọle fo, ghe ọne IVIDIO, bha ha yẹ zilo nyan ene inọnta nan:
Bezẹle nọn da khẹke nin mhan ha mun ekpẹn nin ene gbẹloghe?
Be hi uwedẹ eso nin mhan ha rẹ rẹman ghe mhan mun ekpẹn nin ele?
Bhi ẹghe okhọnlẹn, agbaẹbho eso ki ha yọle ghe ele bha deba ibo soso bhi ọne okhọnlẹn. Ọkpakinọn, ele ki ha re emhin bọsi igho bi emhin okhọnlẹn rẹ re iyobọ nin ene usun ne khọnlẹn. Be ọria ha rẹ gene rẹman yẹ ghe ọle bha deba ibo soso? Tie John 17:16. Bha ha tie ọle fo, ghe ọne IVIDIO, bha ha yẹ zilo nyan ọne inọnta nan:
Uwedẹ nela mhan rẹ rẹman ghe, mhan bha deba ibo soso bhi ọne agbọn nan?
Ene gbẹloghe ha ki yọle nin mhan lu emhin nin Baibo bha re obọ i kii? Tie Acts 5:28, 29. Bha ha tie ọle fo, ghe ọne IVIDIO, bha ha yẹ zilo nyan ene inọnta nan:
Ahamiẹn ene gbẹloghe yọle nin mhan lu emhin nin Osẹnobulua yọle nin mhan hẹi lu, họla mhan ha hẹnmhọn nan?
Be hi emhin eso nin Kristiẹn ida lu, aharẹmiẹn ene gbẹloghe yọle nin ele lu ọle?
4. Ji ebi uwẹ ria bhi ọkhọle, bi ebi uwẹ lu rẹman ghe uwẹ bha deba ibo soso
Tie 1 John 5:21. Bha ha tie ọle fo, ghe ọne IVIDIO, bha ha zilo nyan ene inọnta nan:
Beji a rẹman bhi ọne ividio, bezẹle nin Ayenge bha da tuẹ iflagi, la deba otu efinẹfi?
Uwẹ be riale emhin nọn gbale ọle lu?
Be hi idia ebhebhe ne ha sabọ rẹ mhan deba ibo ọsi ọne agbọn nan? Ghe ọne IVIDIO, bha ha zilo nyan ene inọnta nan:
Be imhan ha rẹ rẹman yẹ ghe mhan bha deba ibo soso sade agbaẹbho kẹkẹ ko ha gbe igemu?
Be imhan ha rẹ rẹman yẹ ghe mhan bha deba ibo soso aharẹmiẹn ghe emhanmhan ọsi ekhẹn ahinmhin-ibo rẹso mhan?
Be ẹmhọn nin mhan họn bhi niuz bi ẹbho nin mhan ne muobọ ha rẹ sabọ rẹ mhan ha zẹ ibo yẹ?
Idia nela iKristiẹn ha da rẹman bhi emhin nin ele ria bhi ọkhọle bi emhin nin ele lu ghe ele bha deba ibo soso?
ỌRIA SABỌ NỌỌN UWẸ YỌLE: “Bezẹle nin uwẹ ida tuẹ iflagi, la so illo nan rẹ gẹn agbaẹbho?”
Be uwẹ ha rẹ wanniẹn ọlẹn yẹ?
EBI MHAN LUẸLE
Ọkhẹke nin Kristiẹn ọsaje manman dọnmhegbe nin ele rẹ rẹman ghe ele bha deba ibo soso bhi ọne agbọn nan. Ọkhẹke nin ele re ọle man bhi ọta nin ele ta, emhin nin ele ria bhi ọkhọle, bi emhin nin ele lu.
Uwẹ Be Yẹ Yere?
Ẹlo nela ọkhẹke nin mhan rẹ ha ghe ene gbẹloghe?
Bezẹle nin mhan ida deba ibo soso bhi ọne agbọn nan?
Be hi idia eso nọn ha da nọghọ imhan rẹ rẹman ghe mhan bha deba ibo soso?
FẸ ENE EMHIN NAN GHE
Be hi ọnọghọ eso nin mhan ha sabọ miẹn bhi egbe, ranmhude mhan bha deba ibo soso bhi ọne agbọn nan?
Be azagba-uwa ha rẹ muegbe ọbhi otọ yẹ ọkuẹsẹ ele ke egbe ele re bhi idia nọn ha sabọ re ele deba ibo?
Rẹman Ghe Uwẹ Bha Deba Ibo Soso Sade Uwẹ Ribhi Iluemhin Nan Lu bhi Ogbakha (4:25)
Ẹbho eso riale ghe, nin ọria rẹ khọn nin agbaẹbho nọnsọle, ọle hi ekpẹn nọn ke okhun nẹ nin ọria ha sabọ ha mhọnlẹn. Fẹghe ebezẹle nọn ida yi ẹmhọanta.
Luẹ ebi ọkhẹke nin mhan ria ẹmhọnlẹn sade mhan zẹ iwẹnna nin mhan ha lu, beji a ha da miẹn mhan bha deba ibo soso bhi ọne agbọn nan.
“Ọdeọde Dẹ Mun Ihẹ Nọnsọle” (The Watchtower, March 15, 2006)