ILUẸMHIN 38
Rẹman Ghe Iẹnlẹn Manman Ti Uwẹ Bhọ
Ọ manman ti mhan bhọ ghe, mhan ribhi agbọn. Aharẹmiẹn ghe mhan miẹn ọnọghọ bhi iẹnlẹn, emhin eso sẹyẹ ribhi ọne agbọn nan ne ha re iẹnlẹn ha ti mhan bhọ. Be imhan ha rẹ rẹman iJehova yẹ ghe, iẹnlẹn nin ọle rẹ lu ẹsele nin mhan ti mhan bhọ? Be hi emhin kpataki nọn zẹle nọn da khẹke nin mhan rẹman ghe iẹnlẹn ghan bhi ẹlo nọnsẹmhan?
1. Bezẹle nọn da khẹke nin iẹnlẹn ha yi emhin nọn ghanlẹn bhi ẹlo nọnsẹmhan?
Ọkhẹke nin iẹnlẹn ha yi emhin nọn ghanlẹn bhi ẹlo nọnsẹmhan, ranmhude, ẹsele nọn na bhi obọ iJehova vae, ọle iẹnlẹn khin. Jehova hi ọnọn man emhin ne nyẹnlẹn rebhe. ‘Obọ nọnsọle iẹnlẹn na vae.’ (Psalm 36:9) “Ọle bhọ hi ọnọn re iẹnlẹn bi ohiẹnhiẹn nin emhin rebhe.” (Acts 17:25, 28) Jehova hi ọnọn ne emhin rebhe ne khẹke nin mhan, nin mhan da sabọ ha nyẹnlẹn. Ọle da yẹ ne emhin esili ne bunbun nin mhan, nin mhan rẹ ha sọnyẹnmhẹn bhi iẹnlẹn.—Tie Acts 14:17.
2. Be imhan ha rẹ rẹman iJehova yẹ ghe, iẹnlẹn nin ọle rẹ nin mhan ti mhan bhọ?
Rẹ na bhi ẹghe nin mhan rẹ ha ribhi ẹkẹ ọsi inẹn mhan, ọle iJehova rẹ munhẹn ha gbẹlokotọ bhi egbe mhan. Ẹghe nin David rẹ ha nan erọnmhọn ji Jehova, ọle da yọle: “Ẹlo nọnsẹ daghe mẹn ẹghe nin mẹn rẹ ha ribhi ẹkẹ ẹkpọmọn ọsi inẹn mẹn.” (Psalm 139:16) Ọnan rẹman ghe iẹnlẹn nọnsẹ ghan bhi ẹlo nọnsi Jehova. (Tie Matthew 10:29-31.) Ọ dẹ manman ba iJehova bhi egbe sade ọria gbe egbe ọle a, la ọ gbe ọria ọbhebhe a.a (Exodus 20:13) Ọ dẹ yẹ ba ọle bhi egbe sade mhan mun iẹnlẹn nọnsẹmhan la ọsi eria ebhebhe ọbhi okhẹnan. Ahamiẹn ghe mhan gbega iẹnlẹn nọnsẹmhan bi ọsi eria ebhebhe, mhan ki rẹman Jehova ghe ẹlo nọn ghanlẹn mhan rẹ ghe iẹnlẹn.
MANMAN LẸN OTỌLE NỌNSẸN
Luẹ uwedẹ eso nin uwẹ ha rẹ rẹman ghe, iẹnlẹn nin Jehova rẹ nin uwẹ ti uwẹ bhọ.
3. Ha gbẹloghe egbe
Ẹghe nin mhan rẹ re egbe mhan guẹ nin Jehova, mhan da ve nanlẹn ghe, mhan dẹ re iẹnlẹn nọnsẹmhan rebhe ha ga ọle. Mhan da mun egbe mhan rebhe nin Jehova bọsi izọese. Tie Romans 12:1, 2, bha ha zilo nyan ene inọnta nan:
Be hi emhin nọn zẹle nin uwẹ ha da ha gbẹloghe egbe?
Be uwẹ ha rẹ ha gbẹloghe egbe yẹ?
4. Ha gbega egbe ẹ bi eria ebhebhe
Baibo rẹkpa mhan rẹ lẹn ghe, ọkhẹke nin mhan rẹban emhin nọn ha sabọ si ikuan-egbe ji mhan la eria ebhebhe. Ghe ọne IVIDIO nin uwẹ lẹn emhin eso nin uwẹ ha lu nin uwẹ rẹ gbega egbe ẹ bi eria ebhebhe.
Tie Proverbs 22:3, bha ha zilo nyan ebi uwẹ ha rẹ ha gbega egbe ẹ bi eria ebhebhe yẹ . . .
sade bha ribhi uwa.
sade bha ribhi isi iwẹnna.
sade bha sasa egbe.
sade uwẹ hẹn imoto la emhin ọbhebhe nan rẹ khian, la uwẹ deba ene nabhọ.
5. Ji iẹnlẹn ọsi ọmọn nọn ribhi ẹkẹ ghan bhi ẹlo nọnsẹ
Ẹmhọn nin David ta bhi ebe nọnsi Psalm da rẹkpa mhan rẹ lẹn ghe, iẹnlẹn ọsi ọmọn nan bha sẹ biẹ manman ghan bhi ẹlo nọnsi Jehova. Tie Psalm 139:13-17, bha ha zilo nyan ene inọnta nan:
Bhi ẹlo nọnsi Jehova, ẹghela iẹnlẹn ọsi ọria rẹ munhẹn? Ẹghe nan rẹ biẹ ọle be nọn, la ẹghe nan rẹ munhẹn ha hanmhan ọlẹn?
Bhi ẹwẹ uhi nin Jehova gbe nin ibhokhan Izrẹl, ọle da gbe uhi nọn ha gbega okhuo nọn hanmhan bi ọmọn nin ọle hanmhan. Tie Exodus 21:22, 23, bha ha zilo nyan ene inọnta nan:
Ẹlo nela Jehova rẹ ghe ọria nọn dobọ gbe ọmọn nọn ribhi ẹkẹ a?
Be uwẹ riale ọ dẹ dia iJehova bhi egbe yẹ, sade ọria taan ẹlo a gbe ọmọn nọn ribhi ẹkẹ a?b
Be ọ dia uwẹ bhi egbe yẹ nin uwẹ rẹ lẹn ẹlo nin Jehova rẹ ghe ọria nọn riia ọmọn an?
Idia eso sabọ re okhuo nọn re ẹlo nọn ghanlẹn rẹ ghe iẹnlẹn ha riale ghe, ọkhẹke nin ọle riia ọmọn an. Tie Isaiah 41:10, bha ha zilo nyan ene inọnta nan:
Ahamiẹn ẹbho sua okhuo nọn hanmhan ọbhọ, nin ọle riia ọmọn an, obọ ọria nela ọle ha da guanọ urẹkpa? Bezẹle?
ẸBHO ESO SABỌ YỌLE: “Okhuo nọn hanmhan ha tobọle zẹ si ọle dẹ riia ẹkẹ a, la si ọle ida riia ẹkẹ a; egbe nọnsọle nọn.”
Be re uwẹ rẹọbhọ ghe, iẹnlẹn ọsi okhuọ nọn hanmhan bi ọmọn nọn re ọle bhi ẹkẹ manman ghan bhi ẹlo nọnsi Jehova?
EBI MHAN LUẸLE
Baibo rẹkpa mhan rẹ lẹn ghe, ẹsele nọn na obọ iJehova vae, ọle iẹnlẹn nọnsẹmhan bi iẹnlẹn ọsi ẹbho ebhebhe khin. Ọkhẹke nin mhan rẹ ẹlo nọn ghanlẹn ha ghe ọle, yẹ ha gbega ọle.
Uwẹ Be Yẹ Yere?
Bezẹle nin iẹnlẹn ọsi eria da yi emhin nọn ghanlẹn bhi ẹlo nọnsi Jehova?
Be ọ dia iJehova bhi egbe yẹ, ahamiẹn ọria taan ẹlo a gbe ọria a?
Bezẹle nin iẹnlẹn nin Jehova re nin uwẹ da manman ti uwẹ bhọ?
FẸ ENE EMHIN NAN GHE
Be bhọ mhan ha lu, nin mhan rẹ khuẹnmhẹn iJehova bhi iẹnlẹn nin ọle rẹ nin mhan?
Osẹnobulua dẹ be rẹhunmhan okhuo nọn ka riia ọmọn an? Tie ọne ebe nan nin uwẹ rẹ lẹn.
“Be IBaibo Tale bhi Ẹmhọn Iriia-ọmọn An?” (Ebe nọn ribhi jw.org)
Fẹghe ebi ẹlo nin Jehova rẹ ghe iẹnlẹn ha rẹ sabọ rẹso uwedẹ nin mhan rẹ re egbe re ahoho yẹ.
“Ọ Be Khẹke Nin Mẹn Deba bhi Isasa-egbe Nin Okhẹnan Ye?” (Awake!, October 8, 2000)
Fẹghe ebi Baibo ha rẹ sabọ rẹkpa ọria nọn guanọ nin ọle gbe egbe ọle a yẹ.
“Baibo Dẹ Be Sabọ Rẹkpa Ọria Nọn Guanọ Nin Ọle Yu?” (Ebe nọn ribhi jw.org)
a Ẹmhọn eria nin egbe iẹnlẹn lọle manman rẹtẹ iJehova. (Psalm 34:18) Ọle lẹn ebi emhin dia ele yẹ bhi egbe nọn zẹle nin ele da guanọ nin ele gbe egbe a. Ọle guanọ nin ọle rẹkpa ele. Nin uwẹ rẹ daghe ebi ọle rẹ rẹkpa eria ne ribhi idia nọn sẹnian yẹ, tie ọne uhọnmhọn-ọta nọn yọle “Baibo Dẹ Be Sabọ Rẹkpa Ọria Nọn Guanọ Nin Ọle Yu?” Ọne uhọnmhọn-ọta deba emhin ne ribhi obọ natiọle “Fẹ Ene Emhin Nan Ghe” bhi ọne iluẹmhin nan.
b Ọ bha khẹke nin ẹbho ne ka riia ọmọn an khẹ ha riale ghe, Jehova ida sabọ rẹhunmhan ele. Jehova dẹ sabọ rẹhunmhan ele. Nin uwẹ rẹ manman luẹ ẹmhọn ọnan, tie uhọnmhọn-ọta nọn yọle “Be IBaibo Tale bhi Ẹmhọn Iriia-ọmọn An” Ọne uhọnmhọn-ọta nan deba emhin ne ribhi obọ natiọle “Fẹ Ene Emhin Nan Ghe” bhi ọne iluẹmhin nan.