ILUẸMHIN 02
Ive Ne Ribhi Baibo Rẹ Mhan Mhọn Iruduba
Ọrebhe bhi ọne agbọn nan mhọn ọnọghọ kẹkẹ nọn re ele lu akhiẹ, nọn re ele kpokpo egbe, la nọn si ọbalọ ji ele. Uwẹ sẹka miẹn ọnọghọ ne sẹnian bhi egbe khẹ? Asabọmiẹn ghe uwẹ khọnmhọn emianmhẹn nọn re uwẹ ha loya, la uwẹ lu akhiẹ ranmhude ọria nọnsẹ yu. Ọnan sabọ re uwẹ ha nọọn egbe ẹ, ‘Ọne iloya nan dẹ fo ghẹdẹ?’ Uwẹ dẹ miẹn ewanniẹn rẹji ọne inọnta nin bhi ẹkẹ Baibo.
1. Be hi iruduba nin Baibo re nin mhan?
Baibo rẹkpa mhan rẹ lẹn ebezẹle nin ọnọghọ kẹkẹ da vuọn ọne agbọn nan ẹlẹnan. Ọ iyi ọnin ọkpa. Ọ da yẹ taman mhan ghe ene ọnọghọ nan rebhe dẹ kẹ si egbe kie. Ive ne ribhi Baibo dẹ rẹkpa uwẹ rẹ ha khuaẹloghe “ẹghe odalo nọn mhẹn.” (Tie Jeremiah 29:11, 12.) Ene ive nan dẹ sabọ rẹkpa mhan ha ziẹngbe ọnọghọ nin mhan ye nian. E dẹ sabọ rẹkpa mhan rẹ ha ghọnghọn bhi ejayenan, yẹ rẹkpa mhan ha khuaẹloghe ẹghe odalo nin mhan ha rẹ ha ghọnghọn rẹ sẹbhi ighegheghe.
2. Be iBaibo yọle ẹghe odalo dẹ diayẹ?
Baibo taman mhan ghe, bhi ẹghe odalo, “uu ida yẹ ha ribhọ, la akhiẹ, la ukpuru eviẹ, la ọbalọ.” (Tie Revelation 21:4.) Emhin rebhe ne rẹ mhan loya ẹlẹnan ki si egbe kie, emhin bọsi, a-bha-miẹn-rẹ-lu, ohiẹn-eku, emianmhẹn, bi uu. Ọne otọ nan ki kiẹn otọ ọfubhegbe. Ẹbho ki ha nyẹnlẹn bhọ bhi ighegheghe.
3. Be uwẹ ha lu nin uwẹ rẹ lẹn si ẹmhọanta ive ne ribhi Baibo gene khin?
Ẹbho ne bunbun guanọ nin emhin esili sunu bhi iẹnlẹn nọnsele. Ọkpakinọn, ele bha sabọ lẹn si emhin dẹ gene de ọbhọ beji ele mun ọkhọle ọi. Ive ne ribhi Baibo bha dia iriọ. Mhan dẹ sabọ mun ọkhọle nyan ele. Nin mhan rẹ sabọ lu iriọ, ọkhẹke nin mhan “gbẹlokotọ nọnsẹn ha fẹ Ebenọnkhiale ghe” nin mhan rẹ lẹn ebi Baibo tale. (Acts 17:11) Beji uwẹ ha rẹ ha luẹ iBaibo, uwẹ ki dọ kere ghe uwẹ dẹ sabọ rẹọ bhi ebi ọ tale rẹji ẹghe odalo.
MANMAN LẸN OTỌLE NỌNSẸN
Fẹ emhin eso nin Baibo tale rẹji ẹghe odalo. Yẹ daghe ebi ive ne ribhi Baibo rẹ re iruduba nin ẹbho yẹ ẹlẹnan.
4. Baibo taman mhan ghe, mhan dẹ sabọ nyẹnlẹn bhi ighegheghe bhi agbọn ọfubhegbe
Fẹ ene ive ne ribhi otọle nan ghe. Enela ti uwẹ bhọ nẹ? Bezẹle nin ene ive da ti uwẹ bhọ?
Tie ene iBaibo nan gbẹn rẹkhan ene ive, bha ha zilo nyan ene inọnta nan:
Ive ne ribhi ene iBaibo nan be re ikhuaẹloghe nin uwẹ? Ene ive nan dẹ be yẹ sabọ re ikhuaẹloghe nin ẹbho eso nin uwẹ lẹnlẹn?
Ria ọle ebi ọ ha diayẹ sade uwẹ nyẹnlẹn bhi agbọn nan ha da miẹn ghe
ỌRIA SOSO IYẸ DA . . . |
ẸBHO REBHE KI . . . |
|---|---|
|
|
|
|
|
|
|
|
|
|
5. Ikhuaẹloghe nin Baibo re nin mhan dẹ sabọ rẹkpa mhan
Ọnọghọ nọn vuọn ọne agbọn nan ẹlẹnan re egbe iẹnlẹn lọ ẹbho eso. Ọ bhọ re ẹkẹ ha khọ eso. Ele wo dọnmhegbe nin ele rẹ fi emhin denọ bhi ọne agbọn nan. Fẹ ebi ive ne ribhi Baibo rẹji ẹghe odalo rẹ rẹkpa ẹbho yẹ ẹlẹnan. Ghe ọne IVIDIO, bha ha zilo nyan ene inọnta nan:
Beji a rẹman bhi ọne ividio, be hi emhin nọn ha kpokpo Rafika bhi ọkhọle?
Be iBaibo rẹ rẹkpa ọle yẹ, arẹmiẹn ghe emhin nọn bha gba nin ọle daghe bha si egbe kie?
Mhan ha rẹọ bhi ive ne ribhi Baibo, ọ dẹ rẹkpa mhan nin egbe iẹnlẹn hẹi lọ mhan. Ọ ki yẹ rẹkpa mhan rẹ ziẹngbe ọnọghọ nin mhan hi ki rẹ miẹn bhi iẹnlẹn. Tie Proverbs 17:22 bi Romans 12:12, bha ha zilo nyan ene inọnta nan:
Uwẹ be riale ghe ebi Baibo tale rẹji ẹghe odalo dẹ sabọ rẹkpa uwẹ bhi iẹnlẹn? Bezẹle nin uwẹ da ta iriọ?
ẸBHO ESO SABỌ YỌLE: “Ebi Baibo tale rẹji ẹghe odalo ida sabọ sunu.”
Bezẹle nọn da khẹke nin uwẹ tobuwẹ guanọ otọle fẹghe si ẹmhọanta Baibo gene ta?
EBI MHAN LUẸLE
Ive ne bunbun rẹji ẹghe odalo ribhi ẹkẹ iBaibo. Ene ive nan dẹ sabọ re eghọnghọn bi ikhuaẹloghe nin mhan.
Uwẹ Be Yẹ Yere?
Bezẹle nọn da khẹke nin ẹbho họn ẹmhọn nọn ha re ikhuaẹloghe nin ele?
Be iBaibo tale rẹji ẹghe odalo?
Be ikhuaẹloghe nin Baibo re nin mhan ha rẹ sabọ rẹkpa uwẹ yẹ nian?
FẸ ENE EMHIN NAN GHE
Luẹ ebi ikhuaẹloghe ha rẹ sabọ rẹkpa uwẹ yẹ sade uwẹ ribhi ọnọghọ.
“Ejela Uwẹ Ha Da Sabọ Miẹn Iruduba Ọsaje?” (Awake!, April 22, 2004)
Luẹ ebi ikhuaẹloghe rẹji ẹghe odalo ha rẹ sabọ rẹkpa uwẹ yẹ sade uwẹ khọnmhọn emianmhẹn nọn bha ka fo.
“Baibo Dẹ Be Sabọ Rẹkpa Uwẹ Sade Uwẹ Khọnmhọn Emianmhẹn Nọn Bha Ka Fo?” (Ebe nọn ribhi jw.org)
Beji uwẹ ha rẹ ha ghe ọne ividio ọsi illo nan, re ọkhọle nọnsẹ ha riale ghe, uwẹ bi azagba-uwa nọnsẹ nyẹnlẹn bhi otọ ọfubhegbe nin Baibo ve ive ọle.
Tie okha ọsi okpea ọkpa, nọn rẹ ha khu ọbhọ nin emhin fidenọ bhi agbọn, nin uwẹ daghe emhin nọn re ọle fi iẹnlẹn nọnsọle denọ.
“Mẹn Ki Dọ Lẹn Ghe Mẹn Ida Sabọ Fi Ọne Agbọn Nan Denọ” (The Watchtower, July 1, 2013)