“Bha Bu Mẹn Re, . . . Mẹn Dẹ Re Ọfubhegbe Nin Bha”

1. Ọta ikoudure nela iJesu ta bhi Matthew 11:28-30?

JESU da ta ọta ikoudure man ẹbho ne ka ọle ehọ. Ọle da taman ele yọle: “Bha bu mẹn re, . . . mẹn dẹ re ọfubhegbe nin bha.” (Tie Matthew 11:28-30.) Jesu bha gheghe ta ọne ọta nan man ele. Bhi ọsi ijiẹmhin, ria ẹmhọn ebi Jesu lu nin ọne okhuo nọn ha khọnmhọn emianmhẹn ọbe.

2. Be iJesu rẹ rẹkpa okhuo ọkpa nọn khọnmhọn yẹ?

² Ọne okhuo wo ha guanọ urẹkpa. Ọle da bu idọkitọ kẹkẹ nin ele hinmhin ọlẹn. Ikpe 12 rẹ gbera, ọle bha miẹn ọnọn sabọ hinmhin ọlẹn. Uhi nin Jehova na bhi obọ iMoses gbe nin ibhokhan Izrẹl rẹman ghe ọria nọn dia inian bha khia. (Lev. 15:25) Ẹghe nin ọle ki rẹ họn ghe Jesu sabọ hinmhin ẹbho ne loya, ọle da bu ọle. Ọle ki sẹbhi enin, ọle da re obọ so ehọ-ukpọn nọnsi Jesu. Bhi ọne ẹghe nin, egbe da wo daan ọlẹn! Jesu bha wo gheghe mun ọle egbe daan, ọle da yẹ re oyẹẹ bi ekpẹn nanlẹn lu emhin. Bhi ọsi ijiẹmhin, ẹghe nin ọle rẹ ha ne ọne okhuo talọ, Jesu da re oyẹẹ bi ekpẹn rẹ tiọle “ọmọn.” Egbe da wo fu ọne okhuo re!—Luke 8:43-48.

3. Inọnta nela mhan ha wanniẹn bhi ọne uhọnmhọn-ọta nan?

³ Uwẹ be daghe ọle ghe ọne okhuo bha mundia nin Jesu bu ọle re? Ọle hi ọnọn bu iJesu re. Iriọ yẹ nọn ẹlẹnan. Mhan la bu iJesu re. Arẹmiẹn Jesu ire uwedẹ ọhan-ilo mun mhan egbe daan ẹlẹnan, ọle sẹyẹ tie mhan yọle: “Bha bu mẹn re, . . . mẹn dẹ re ọfubhegbe nin bha.” Bhi ọne uhọnmhọn-ọta nan, mhan dẹ wanniẹn ene inọnta isẹn nan: Be imhan ha rẹ bu iJesu re yẹ? Be iJesu re ọle ta nan rẹ mun oran nọnsọle nan rẹ mun ihẹ? Be imhan ha sabọ luẹ bhi obọ iJesu? Bezẹle nin mhan ha da sabọ miẹn ọfubhegbe bhi iwẹnna nin ọle mun nin mhan? Be imhan ha lu nin ọfubhegbe nin Jesu re nin mhan hẹi fo?

“BHA BU MẸN RE”

4-5. Uwedẹ eso nela mhan ha rẹ sabọ bu iJesu re?

⁴ Uwedẹ ọkpa nin mhan ha rẹ bu iJesu re hi, mhan ki ha luẹ emhin nin ọle tale bi emhin nin ọle lu. (Luke 1:1-4) Ọ iyi ọria la rẹkpa mhan lu ọnan. Mhan la tobọmhan luẹ ele. Uwedẹ ọbhebhe nin mhan ha rẹ bu iJesu re hi, mhan ki zegbere mianmẹn yẹ kiẹn odibo nọnsọle.

⁵ Jesu mhan bu re sade mhan bu ewanlẹn bhi agbotu nin ele rẹkpa mhan ahamiẹn mhan guanọ urẹkpa. Ele Jesu noo rẹ gbẹloghe ẹbho nesọle. (Eph. 4:7, 8, 11; John 21:16; 1 Pet. 5:1-3) Ọkhẹke nin mhan dọnmhegbe ha bu ele sade mhan guanọ urẹkpa. Ene ewanlẹn ida sabọ lẹn ebe re imhan bhi ọkhọle beji ele ha da sabọ lẹn urẹkpa nọn khẹke mhan. Obhio mhan natiọle Julian da yọle: “Ranmhude emianmhẹn, mẹn da sibhi Bẹtẹ re. Ọmọẹ mẹn ọkpa da taman mẹn ghe nin mẹn datie ene ewanlẹn nin ele re ẹnẹ ji mẹn. Bhi ọsi ọhẹnhẹn, mẹn da ha riale ghe, ọne ẹnẹ imhọn eji ọ ha da rẹkpa mẹn. Akizẹbue mẹn da taman ele nin ele dọ rẹkpa mẹn. Ẹnẹ nin ele rẹ ji mẹn da kiẹn ọkpa bhi ẹsele nọn khua nin mẹn sẹ miẹn bhi iẹnlẹn.” Beji ewanlẹn eva ne re ẹnẹ ji Julian rẹman, ewanlẹn ne ribhi ẹkẹ agbotu dẹ sabọ rẹkpa mhan lẹn uwedẹ nin Jesu rẹ ria eria. Ele ki yẹ rekpa mhan ha re egbe khọkhọ ọle. (1 Cor. 2:16; 1 Pet. 2:21) Ọnan deba ẹsele nọn mhẹn nẹ nin ele ha sabọ re nin mhan.

“BHA MUN ORAN NỌNSẸMHẸN NAN RẸ MUN IHẸ RỌ NYAN EGBE BHA”

6. Ẹghe nin Jesu rẹ yọle: “Bha mun oran nọnsẹmhẹn nan rẹ mun ihẹ rọ nyan egbe bha,” be ọle ha tẹmhọnlẹn?

⁶ Ẹghe nin Jesu rẹ yọle: “Bha mun oran nọnsẹmhẹn nan rẹ mun ihẹ rọ nyan egbe bha,” asabọmiẹn ebi ọle ha ta hi, “Bha lu rẹkhan ebi mẹn ta,” la “Bha vae dọ deba mẹn mun ọne ihẹ nan, nin mhan kugbe ha wẹnna nin Jehova.” Ọnọn hi ki rẹ khin, ebi Jesu tẹmhọnlẹn hi, mhan dẹ deba wẹnna nin Jehova.

7. Beji Matthew 28:18-20 rẹman, iwẹnna nela iJesu mun nin mhan? Emhin nela mhan rẹọ?

⁷ Ahamiẹn mhan re egbe guẹ nin Jehova yẹ mianmẹn, ọ yẹ rẹman ghe mhan bu iJesu re. Ọrebhe iJesu datie nin ele bu ọle re. Ọle ida sua ọria soso fia nọn muegbe rẹ dọ ga Osẹnobulua. (John 6:37, 38) Jesu re isẹhoa nin ọrebhe ne rẹkhan ọlẹn rẹ deba ha lu iwẹnna nin Jehova mun nanlẹn. Mhan rẹọbhọ ghe, Jesu ida zobọ bhọ rẹ ha rẹkpa mhan lu ọne iwẹnna nan.—Tie Matthew 28:18-20.

“BHA LUẸ BHI OBỌ MẸN”

8-9. Bezẹle nọn da lẹkhẹ nin ẹbho ne mhọn idegbere rẹ ha sikẹ iJesu? Inọnta nela ọkhẹke nin mhan nọọn egbe mhan le?

⁸ Eria ne mhọn idegbere wo sabọ ha sikẹ iJesu. (Matt. 19:13, 14; Luke 7:37, 38) Bezẹle? Ria ẹmhọn ikẹkẹ nọn ribhi ẹwẹ iJesu bi ekhẹn iPharisee. Ene ekhẹn iPharisee izẹwẹ mhọn oyẹẹ da ọria soso. Ele wo ha mhọn okpẹhio. (Matt. 12:9-14) Ọkpakinọn, Jesu wo ha mhọn oyẹẹ bi idegbere. Ene ekhẹn iPharisee wo ha guanọ nan ha hẹnmhọn ele bhi ije rebhe. Jesu bha re obọ ọbhi iẹnlẹn nọn dia inian. Ọle da taman edibọ nesọle nin ele ha mhọn idegbere yẹ rẹkpa ẹbho. (Matt. 23:2, 6-11) Ene ekhẹn iPharisee wo ha denyẹnyẹn ene ẹbho yẹ gbe ofẹn ele bhi ẹkẹ. (John 9:13, 22) Jesu wo ha re ọta bi emhin nin ọle lu rẹ re ikoudure nin ẹbho.

⁹ Uwẹ be re egbe khọkhọ iJesu? Nin uwẹ rẹ sabọ wanniẹn ọne inọnta nan, ọkhẹke nin uwẹ nọọn egbe ẹ: ‘Ẹbho be ghe mẹn bii ọria nọn mhọn ifuẹkẹ nọn yẹ degbere? Imẹn be muegbe rẹ ha lu iwẹnna ne khere-khere rẹ rẹkpa ẹbho? Imẹn be miẹn ẹbho ọbhi egbe?’

10. Be ene rẹkhan Jesu sabọ ha mhọnlẹn ranmhude uwedẹ nin Jesu rẹ deba ele ha lu emhin?

¹⁰ Uwedẹ nin Jesu rẹ ha deba ene rẹkhan ọlẹn lu emhin da wo re ele ha ghọnghọn yẹ mhọn ọkhọle nọn fure. Ọ wo ha ti ọle bhọ rẹ ha man ele emhin. (Luke 10:1, 19-21) Ọle wo ha taman edibo nesọle nin ele ha taan ọkhọle a man ọlẹn. Ọle da yẹ wo ha ka ele ehọ sade ele talọ. (Matt. 16:13-16) Beji emhin nan kọle bhi egbe ẹdẹ rẹ lu nọnsẹn aharẹmiẹn ẹghe okai a ye, iriọ edibo nesi Jesu yẹ rẹ ha lu nọnsẹn. Ele da ne emhin rebhe nin Jesu man ele ọbhi ọkhọle. Ọnan da wo re ele ha mọn ikpẹ nọn mhẹn.

11. Inọnta nela ọkhẹke nin mhan nọọn egbe mhan?

¹¹ Uwẹ be mhọn ihe nin uwẹ ye? Ahamiẹn uwẹ mhọnmhin, nọọn egbe ẹ: ‘Be imẹn rẹ ne ẹbho lu emhin yẹ bhi isi iwẹnna la bhi uwa? Uwedẹ nin mẹn rẹ ne ele lu emhin be re ele sọnyẹnmhẹn? Imẹn be re otọ nin ele rẹ ha nọọn ọta? Imẹn be re ọkhọle rebhe rẹ ka ele ehọ sade ele talọ?’ Ọ bha khẹke nin mhan diabe ekhẹn iPharisee. Ahamiẹn ọta nin ele ta bha mun ẹbho ẹlo kore, ele ki ha khọ ẹkẹ. Ahamiẹn ebi ẹbho mhọn bhi ọkhọle dikẹ bhi ebi ele ta, ele ki ha kpokpo ene ẹbho.—Mark 3:1-6; John 9:29-34.

“BHA KI MIẸN ỌFUBHEGBE”

12-14. Bezẹle nin iwẹnna nin Jesu mun nin mhan da yi emhin nọn fu mhan bhi egbe?

¹² Bezẹlẹ nin mhan da sabọ miẹn ọfubhegbe bhi ẹsọn nin Jesu mun nin mhan? Emhin ne bunbun zẹle. Bha ji mhan zilo nyan ea.

¹³ Ebeanlẹn ne mhẹn nẹ, ele dia mhan bhi ọne iwẹnna nan. Arẹmiẹn Jehova hi Ebeanlẹn nọn Kokhun Nẹ, ọle ito mun mhan. Ọle khuẹnmhẹn mhan bhi emhin nin mhan sabọ lu nanlẹn. (Heb. 6:10) Ọle yẹ re ahu nin mhan rẹ sabọ miẹnsọn nọn khẹke mhan. (2 Cor. 4:7; Gal. 6:5, ftn.) Jesu nin Ojie nọnsẹmhan wo re ijiẹmhin esili ọbhi otọ nin mhan ha re egbe khọkhọ. (John 13:15) Ene ewanlẹn bhi agbotu ne gbẹloghe mhan dọnmhegbe rẹ re egbe khọkhọ iJesu bhi uwedẹ nin ele rẹ gbẹloghe mhan. (Heb. 13:20; 1 Pet. 5:2) Ele re ifuẹkẹ bi izebhudu rẹ re ebale oriọn nin mhan yẹ gbega mhan.

¹⁴ Imọẹ ne mhẹn nẹ, ele mhan mhọn. Ọria soso iribhi ọne otọ nan nọn mhọn imọẹ esili bi iwẹnna esili nọn sẹ bii ọsẹmhan. Riale: Ibhio mhan nin mhan deba wẹnna mhọn ikpẹ esili. Ọrẹyiriọ, ele iriale ghe ele mhẹn gbera ẹbho nekẹle. Arẹmiẹn ele manman lẹn emhin, ele ire ọle dẹgbọ. Ele ire ẹlo gbe ẹbho nekẹle a. Ele si mhan kẹ egbe bii imọẹ. Ele manman hoẹmhọn mhan sẹbhọ ghe, ele muegbe rẹ yu nin mhan!

15. Be iwẹnna nin mhan lu dia mhan yẹ bhi egbe?

¹⁵ Iwẹnna nọn mhẹn nẹ, ọle mhan mhọn. Mhan man ẹbho ẹmhọanta rẹji Jehova, yẹ rẹkpa ele daghe ohoghe nọnsi Esu. (John 8:44) Ohoghe nin Esu noo rẹ denyẹnyẹn ẹbho re ele riale ghe, ele iyẹ mhọn emhin soso bhi iẹnlẹn nin ele khuaẹloghe. Bhi ọsi ijiẹmhin, ọle guanọ nin mhan rẹọbhọ ghe Jehova ida rẹhunmhan olukhọ nesẹmhan, ghe mhan iyi eria nan ha sabọ hoẹmhọnlẹn. Udede okhẹnan ene ohoghe nan si ji eria, ọ yẹ re egbe iẹnlẹn lọ ele. Ọkpakinọn, mhan ha bu iJesu re, ọle ki rẹhunmhan olukhọ nesẹmhan. Bhi ọsi ẹmhọanta, Jehova manman hoẹmhọn mhan rebhe. (Rom. 8:32, 38, 39) Emhin eghọnghọn nọn, sade mhan sabọ rẹkpa ẹbho ha mun udu tẹ iJehova yẹ lu re alo bhi iẹnlẹn nọnsele.

HẸI JI ỌFUBHEGBE NIN UWẸ MIẸN BHI OBỌ IJESU FO

16. Be ihẹ nin Jesu yọle nin mhan mun rẹ dikẹ bhi ihẹ nekẹle nin mhan mun bhi iẹnlẹn yẹ?

¹⁶ Ihẹ nin Jesu yọle nin mhan dọ mun dikẹ bhi ihẹ nekẹle nin mhan mun bhi iẹnlẹn. Bhi ọsi ijiẹmhin, ahamiẹn mhan zobọ bhi iwẹnna ukpẹdẹ nọnsẹmhan, egbe ki wo manman lọ mhan. Asabọmiẹn mhan bhọ ida miẹn eghọnghọn bhi ọne iwẹnna. Ọkpakinọn, iwẹnna oga iyi iriọ. Iwẹnna oga nin mhan lu re imhan ghọnghọn. Ẹgheso, mhan ha zobọ bhi ilọnmhọn ukpẹdẹ, idu-idu mhan rẹ yo ikolo oga aharẹmiẹn egbe lọ mhan. Ọkpakinọn, mhan ha ki nin ọne ikolo vae, ahu ki wo do mhan bhọ. Iriọ ọ yẹ dia sade mhan yo itẹmhọn Osẹnobulua la sade mhan dọnmhegbe luẹ iBaibo. Ọ manman re ahu do mhan bhọ yẹ re mhan ghọnghọn!

17. Emhin nela ọkhẹke nin mhan lẹn? Bezẹle nọn da khẹke nin mhan ha gbẹlokotọ?

¹⁷ Bhi ọsi ẹmhọanta, ọkhẹke nin mhan lẹn ghe, ọdeọde bhi ẹwẹ mhan mhọn eka nin ọle ha sabọ lu sẹ. Bhiriọ, ọkhẹke nin mhan gbẹlokotọ nin mhan hẹi ne abọ ọbhi iwẹnna nin ahu mhan ida sabọ gbe. Bhi ọsi ijiẹmhin, mhan dẹ sabọ ha ria ẹghe bi ahu nọnsẹmhan an, sade ẹfe mhan re iẹnlẹn nọnsẹmhan khu ọi. Ria ẹmhọn ebi Jesu taman ọne okpea nọn fe ẹghe nin ọne ọkpea rẹ nọọn ọlẹn yọle: “Be imẹn ha lu nin mẹn da sabọ miẹn aribhọ ọsi ighegheghe?” Ọne okpea wo ha lu rẹkhan ebi ọne Uhi tale. Asabọmiẹn ọria esili ọle khin, ranmhude, Baibo taman mhan ghe, ẹmhọn ọlẹn da wo ha ti Jesu bhọ. Bhiriọ, Jesu da taman ọlẹn yọle: “Akhian, dọ khiẹn emhin nin uwẹ mhọn, . . . uwẹ ha vae dọ ha rẹkhan mẹn.” Ọnan da re egbe lọ ọne okpea. Ọle rẹ ha guanọ nin ọle ha rẹkhan iJesu, sokpan, ọle bha ho nin ọle zẹ ene emhin nin ọle mhọnlẹn obọ. (Mark 10:17-22) Ranmhude ọnan, ọle bha ka mun ihẹ nọnsi Jesu. Ọle da sẹyẹ wo dọ ha re iẹnlẹn nọnsọle khu ọbhi ẹfe bọsi igbọn. (Matt. 6:24) Sade uwẹ nọn, be uwẹ ha rẹ lu yẹ?

18. Be ọkhẹke nin mhan ha lu ẹghe rẹ sẹ ẹghe? Bezẹle?

¹⁸ Ẹghe rẹ sẹ ẹghe, ọkhẹke nin mhan ha fẹghe emhin nin mhan re iẹnlẹn khu ọi. Bezẹle? Nin mhan da sabọ ha dia iẹnlẹn nọnsẹmhan rẹ khu emhin ne khẹke. Usẹn obhokhan ọkpa natiọle Mark da yọle: “Rẹ na bhi ikpe ne bunbun, mẹn da ha riale ghe ọria nọn de obọ re bhi iẹnlẹn mẹn khin. Arẹmiẹn mẹn lu iwẹnna ọkanẹfan, igho bi ebi mẹn ha rẹ manman ha sọnyẹnmhẹn bhi iẹnlẹn yẹ mẹn wo ha ria ẹmhọnlẹn ẹghe rebhe. Ọ da wo han mẹn ilo ebezẹle nin iẹnlẹn da wo ha nọghọ mẹn. Mẹn da dọ kere ghe ebezẹle hi, ọsi egbe mẹn, ọle mẹn mun kalo bhi iẹnlẹn. Ahu bi ẹghe nin mẹn noo kẹre, ọle mẹn rẹ ha khu ọsi Jehova.” Mark da fi uwedẹ nin ọle rẹ ha ria eria denọ. Ọle da yẹ fi uwedẹ iẹnlẹn nọnsọle denọ, yẹ zegbere ha lu eka ne bunbun bhi oga. Mark da yọle: “Ẹghe eso, mẹn ki ha kpokpo egbe ba ẹmhọn igho. Ọkpakinọn, Jehova bi Jesu wo rẹkpa mẹn, bhiriọ, mẹn wo denọ ẹlo ọbhi oga.”

19. Bezẹle nọn da khẹke nin mhan ha ghe emhin bhi uwedẹ nọn gbale?

¹⁹ Ahamiẹn mhan lu ene emhin ea nan, ọfubhegbe nin mhan miẹn bhi iwẹnna nin Jesu mun nin mhan ida fo. Ọhẹnhẹn, ha ghe emhin bhi uwedẹ nọn gbale. Iwẹnna nọnsi Jehova mhan lu. Bhiriọ, ọkhẹke nin mhan ha lu ọle bhi uwedẹ nin Jehova guanọ. Jehova hi Ebeanlẹn nọn nyan ọne iwẹnna. Mhan hi ene wẹnna nanlẹn. (Luke 17:10) Ahamiẹn mhan ho nin mhan lu iwẹnna nọnsọle beji ọ rẹ ghọn mhan, ọne ẹsọn ki ha nọghọ mhan. Ẹmena nan rẹ wẹnna bhi ugbo sabọ rẹ kuan la ahu sabọ rẹ fo ọle bhọ, ahamiẹn ọle bha ha lu diọbhi eji ọnọn nyan ọlẹn dia ọle diọ. Ahamiẹn mhan lu iwẹnna nọnsi Jehova beji ọle guanọ, mhan ki sabọ ha lu emhin nin mhan bha rẹ riale ghe mhan dẹ sabọ lu. Mhan ki yẹ sabọ khọn ọnọghọ nin mhan miẹn miotọ. Yere ghe ọria soso iribhọ nọn ha sabọ lu ọle nin iho nọnsi Jehova hẹi munsẹ!—Rom. 8:31; 1 John 4:4.

20. Ọkhọle nela ọkhẹke nin mhan ha mhọnlẹn beji mhan rẹ wẹnna rẹkhan iJesu?

²⁰ Ozeva, ha re ọkhọle esili rẹ lu iwẹnna oga. Emhin ọkpa nọn zẹle nin mhan da lu iwẹnna oga hi, mhan ho nin mhan re ogẹn ji Aba mhan nin Jehova. Bhi ore nin ọhẹnhẹn, ẹbho eso ne ha rẹkhan iJesu da ha khu ọbhi ọsi egbe ele. Ranmhude ọnan, ele bha ha ghọnghọn. Bhiriọ, ele da zobọ bhọ rẹ ha rẹkhan iJesu. (John 6:25-27, 51, 60, 66; Phil. 3:18, 19) Ọkpakinọn, ẹbho ne manman hoẹmhọn Osẹnobulua bi idiake nọnsele da wo re eghọnghọn wẹnna rẹkhan iJesu rẹ sẹbhi ukpẹdẹ uu nọnsele. Ele mhọn ikhuaẹloghe ghe, ele dẹ dọ deba iJesu ha gbẹloghe bhi okhun. Ahamiẹn mhan re egbe khọkhọ ele yẹ re ọkhọle esili wẹnna rẹkhan iJesu, ọfubhegbe nin mhan miẹn bhi obọ ọle ida fo.

21. Beji Matthew 6:31-33 rẹman, be ọkhẹke nin mhan ha mhọn bhi ọkhọle?

²¹ Ọzea, ha mhọnlẹn bhi ọkhọle ghe Jehova dẹ ne uwẹ dia. Imhan tobọmhan zẹ ghe mhan dẹ re ẹdagbọn nọnsẹmhan ha lu iwẹnna nin Jehova bi Jesu mun nin mhan. Jesu ji mhan lẹn ghe mhan dẹ miẹn ekpokpo beji mhan ha rẹ ha lu ọne iwẹnna. Ọkpakinọn, mhan mhọnlẹn bhi ọkhọle ghe, Jehova dẹ re ọne ahu nin mhan rẹ ziẹngbe ọnọghọ nọn hi ki rẹ khin. Beji mhan ha rẹ ha ziẹngbe ọnọghọ, iriọ ahu nọnsẹmhan ha rẹ ha do ọbhọ. (Jas. 1:2-4) Ọkhẹke nin mhan yẹ ha mhọnlẹn bhi ọkhọle ghe Jehova dẹ re emhin nin mhan guanọ nin mhan, Jesu dẹ ha gbẹloghe mhan, ibhio mhan nin mhan ko ga dẹ ha re izẹbhudu nin mhan. (Tie Matthew 6:31-33; John 10:14; 1 Thess. 5:11) Mhan mhọn emhin rebhe ne ha rẹkpa mhan ha ziẹngbe ọnọghọ nọn hi ki rẹ khin!

22. Emhin nela ti mhan bhọ?

²² Edandan iribhọ ghe, ọne okhuo nọn ha khọnmhọn emianmhẹn ọbe wo miẹn ọfure ọne ukpẹdẹ nin Jesu re egbe daan ọlẹn. Ọkpakinọn, ahamiẹn ọle zegbere ha re ọkhọle esili wẹnna rẹkhan iJesu, ọne ọfure nin ọle miẹn ọne ukpẹdẹ nin ki ha yi ọsi ighegheghe. Uwẹ be riale ghe ọle gene rẹkhan iJesu? Ahamiẹn ọle zegbere dọ kiẹn odibo nọnsi Jesu, elele nọn khua ki sẹ ọle obọ! Ọle dẹ dọ deba iJesu ha gbẹloghe bhi okhun. Elele nin ọle ha miẹn dẹ manman kpọnọ gbera emhin nọn hi ki rẹ khin nin ọle fi ikeke gbe nin ọle da sabọ ha rẹkhan iJesu. Aharẹmiẹn okhun mhan ha da nyẹnlẹn bhi ighegheghe la ọne otọ nan nọn, ọ ti mhan bhọ ghe Jesu tie mhan nin mhan bu ọle re!