Emhin Esili Nọn Sunu Ranmhude Ojiẹ!

BHI Philippines, ikhuo eva da ko ha khian nẹga bhi agọ nọn manman do natiọle Baguio. Ele da daghe eji ibhio mhan da ne ebe wa bhi enin. Sokpan, ele bha sẹbhi eji ele ye. Obhio mhan natiọle Helen nọn ribhi eji a da re ọne ebe wa, da jiẹ ghe ene ikhuo. Ene ikhuo da sẹyẹ ha khian eji ele khian. Sokpan, uwedẹ nin Helen rẹ jiẹ ghe ele da wo ha ti ele bhọ.

Akizẹbue, ene ikhuo ki na ọbhi moto ha khian uwa, ele da daghe jw.org nan gbẹn ọbhi egbe-uwa ọsi iKindọn Họọ ọkpa. Ele da yere ghe, jw.org a yẹ gbẹn ọbhi emhin nin Helen rẹ re ebe nesẹmhan wa. Ele veva da huẹnre bhi ọne moto, ele da khian diọbhi ọne igeti ọsi ọne iKindọn Họọ nin ele fẹghe ẹdẹ nan rẹ dọ ikolo oga bhi enin. Bhi igeti ọsi ọne iKindọn Họọ, a gbẹn ẹdẹ nin agbotu kẹkẹ ne noo ọne iKindọn Họọ rẹ do ikolo oga dagbare.

Bha be lẹn ọria nin ele daghe ẹghe nin ele rẹ vae bhi ikolo oga bhi ọne iKindọn Họọ? iHelen! Ele da wo yere ghe, ọle hi ọria nọn jiẹ ghe ele bhi ẹdẹ nin ele ka daghe ọle. Helen da yọle: “Ẹghe nin ele ki rẹ khian bu mẹn re, ofẹn da ha mun mẹn ranmhude mẹn bha lẹn ebezẹle nin ele da khian bu mẹn re.” Sokpan, ene ikhuo da gbotọle fanọn an man Helen ghe, ele ka daghe ọle bhi eji ọle da re ebe wa.

Ene ikhuo da wo manman sọnyẹnmhẹn bhi ọne ikolo oga. Ọ da wo dia ele bhi egbe ghe, ele bi ibhio mhan nin ele kere ka wo lẹn egbe khẹ. Ele ki daghe ibhio mhan gbọnọ iKindọn Họọ beji a do ọne ikolo fo, ele da nọọn si ele yẹ dọ deba. Ọkpa bhi ene ikhuo iyẹ nyẹnlẹn bhi Philippines. Sokpan, ọne okhuo nọnkẹle wo vae bhi ikolo oga ẹghe rebhe. Ọle bhọ yẹ munhẹn ha luẹ iBaibo. Ojiẹ, ọle re enan rebhe sunu.