Ọta Nin Eria Ne Tie Ebe Nesẹmhan Nọọn
Devid be riale ghe ọle ida sabọ yu ghẹdẹ ẹghe nin ọle rẹ yọle ghe ọle dẹ gẹn elin nọnsi Osẹnobulua rẹ sẹbhi “ighegheghe” bhi Psalm 61:8?
Eye. Ẹmhọanta ebi ọle gbẹn wo khin.
Bha ji mhan fẹ ebi ọle gbẹn ọbhi ọne ulọnlẹn nin, bi ulọnlẹn ne khọ ọle ghe. Ọle da yọle: “Mẹn ki ha so illo rẹ gẹn elin nọnsẹ rẹ sẹbhi ighegheghe, beji mẹn ha rẹ ha mun ive nin mẹn vele sẹ ukpẹdẹ-ukpẹdẹ.” “Eo Jehova nin Osẹnobulua nọnsẹmhẹn, imẹn re ọkhọle rebhe rẹ gẹn uwẹ. Imẹn dẹ re uyi nin elin nọnsẹ rẹ sẹbhi ighegheghe.”—Ps. 61:8; 86:12; 145:1, 2.
Ẹghe nin Devid rẹ gbẹn ene ọta nin, ọle bha ha riale ghe ọle ida yu ghẹdẹ. Ọle lẹnmhin Jehova tale ghe, eria dẹ yu ranmhude olukhọ nọnsele. Sẹyẹ, Devid yẹ lẹnmhin ghe ọria olukhọ ọle khin. (Gen. 3:3, 17-19; Ps. 51:4, 5) Ọle bhọ lẹnmhin ghe, ikpea ne sun-rẹkhan Osẹnobulua bọsi Ebraham, Aizik, bi Jekọp bhọ yu. Sẹyẹ, Devid lẹnmhin ghe ọle tobọle dẹ yẹ yu. (Ps. 37:25; 39:4) Ọkpakinọn, ene ọta nin ọle tale bhi Psalm 61:8 rẹman ọhubhudu nin ọle mhọn nin ọle rẹ gẹn Osẹnobulua rẹ sẹbhi ighegheghe, ọnin hi, rẹ sẹbhi ẹghe nin Devid ha nyẹnlẹn sẹ.—2 Sam. 7:12.
Devid kẹ tẹmhọn emhin ne sunu bhi iẹnlen nọnsọle, beji mhan ha sabọ daghe bhi emhin nan gbẹn ọbhi okhun Psalms 18, 51, bi 52. Bhi Psalm 23, Devid da tie Jehova ọsun-ohuan nọn re ugbega bi ọfubhegbe nin ihuan nesọle, yẹ dia ele. Ọsun-ohuan nọn sẹ inian Devid ha khin. Sẹyẹ, ọle da ha guanọ nin ọle re “ẹdagbọn [nọnsọle] rebhe” rẹ ga Osẹnobulua.—Ps. 23:6.
Yẹ yere ghe, Jehova taman Devid emhin rebhe nin ọle gbẹn. Ọta akhasẹ kẹkẹ rẹji emhin ne da sunu bhi ẹghe odalo deba emhin nin ọle gbẹn. Bhi ọsi ijiẹmhin, bhi Psalm 110, Devid da gbẹn emhin rẹji ẹghe nin Ebeanlẹn ọlẹn ha rẹ “dotua bhi obera [nọnsi Osẹnobulua]” bhi okhun, yẹ miẹn ahu nọn khua. Be ọle ha re ọne ahu lu? Nin ọle rẹ fuẹn eghian nesi Osẹnobulua a, yẹ mun ibhohiẹn bu agbaẹbho ne ribhi ọne otọ nan. Aba odede ọsi Jesu Devid ha khin nọn yi ọne Mezaya. Ọne Mezaya dẹ na bhi okhun gbẹloghe, yẹ ha yi ohẹn rẹ sẹbhi ighegheghe. (Ps. 110:1-6) Jesu da yọle ghe, ọne ọta akhasẹ nọn ribhi Psalm 110, ọle a re ọle talọ je, sẹyẹ, ọ dẹ munsẹ bhi ẹghe odalo.—Matt. 22:41-45.
Jehova da taman Devid nin ọle gbẹn emhin ne sunu bhi ẹghe nọnsọle, bi emhin ne ha yẹ sunu bhi ẹghe odalo ẹghe nan ha rẹ riọ ọle kpanọ, yẹ ha mhọn ọne isẹhoa rẹ ha gẹn Jehova rẹ sẹbhi ighegheghe. Bhiriọ, ebi a gbẹn ọbhi Psalm 37:10, 11, 29 dẹ sabọ ha yi emhin ne sunu ẹghe nan rẹ gbẹn ọlẹn, bi emhin ne ha yẹ sunu bhi ẹghe odalo. Ene ulọnlẹn nin munsẹ bhi ẹghe ẹdẹlẹ bhi otọ Izrẹl. Sẹyẹ, ọ dẹ yẹ munsẹ bhi ẹghe odalo ẹghe nin Osẹnobulua ha rẹ mun ive nesọle sẹ.—Fẹ uduọle nọnzi 8 ghe bhi ọne uhọnmhọn-ọta nọn yọle “Uwẹ Dẹ Deba Mẹn Ha Ribhi Agbọn Ọfubhegbe” bhi ọne ebe nan.
Ẹmhọn nan gbẹn ọbhi Psalm 61:8, bi ulọnlẹn nekẹle ne yẹ khọ ọle rẹman ghe, Devid guanọ nin ọle gẹn Jehova bhi otọ Izrẹl sẹbhi ukpẹdẹ nin ọle ha yu. Sẹyẹ, ele rẹman ebi Devid ha lu bhi ẹghe odalo ẹghe nin Jehova ha rẹ riọ ọle kpanọ bhi uu.