EMỌS
1 Eme Emọs,* ọnọ ọ jọ omọvo ithuru-igodẹ obọ Tekoa,+ enọ a ta kẹe evaọ eruẹaruẹ kpahe Izrẹl evaọ oke Uzayah ovie+ Juda gbe evaọ oke Jeroboam+ ọmọzae Joash+ ovie Izrẹl, ikpe ivẹ taure otọ u te ti nuhu.+ 2 Ọ ta nọ:
“Jihova o ti do enu no Zayọn ze,
Yọ ọ te kpare urru riẹ ta ẹme no obọ Jerusalẹm ze.
Ẹbe ọrọrọ nọ ithuru-igodẹ i re su erao rai nyae re o ti whu no,
Yọ ehru ugbehru Kamẹl ọ te ya fia kakaraka.”+
3 “Enẹ Jihova ọ ta,
‘“Fiki iruthọ* esa Damaskọs, ẹhẹ fiki ene, me ti nwene iei hi,
Keme a guọghọ Giliad gaga wọhọ epanọ a re ru nọ a tẹ be rọ ewẹ ekpala nọ a tehe eyọno fihọ ro si ibi no igbe ekakọ na.+
5 Me ti wiri ekpọ Damaskọs;+
Mẹ te raha ahwo nọ a be rria Bikat-evẹn
Gbe ọnọ o bi su* Bẹt-idẹn;
Yọ ahwo Siria a ti kpohọ igbo evaọ obọ Kiẹ,”+ ere Jihova ọ ta.’
6 Enẹ Jihova ọ ta,
‘“Fiki iruthọ esa Gaza,+ ẹhẹ fiki ene, me ti nwene iei hi,
Keme a mu ogbotu ahwo+ no ẹwho rai re a rehọ ae kẹ Edọm.
7 Fikiere me ti vi erae ruọ ugbẹhẹ Gaza,+
Yọ e te mahe iwou ikpehru riẹ nọ e rẹ bẹ ẹvẹruọ.
8 Mẹ te raha ahwo nọ a be rria Ashdọd,+
Mẹ te wọso Ekrọn,+
Yọ ahwo nọ a kiọkọ evaọ Filistia a ti whu,”+ ere Jihova Olori nọ Ọ Mai Kpehru na ọ ta.’
9 Enẹ Jihova ọ ta,
‘Fiki iruthọ esa Taya,+ ẹhẹ fiki ene, me ti nwene iei hi,
Keme a rehọ ogbotu ahwo nọ a mu kẹ Edọm,
Yọ a kareghẹhọ ọvọ inievo ho.+
10 Fikiere me ti vi erae ruọ ugbẹhẹ Taya,
Yọ e te mahe iwou ikpehru riẹ nọ e rẹ bẹ ẹvẹruọ.’+
11 Enẹ Jihova ọ ta,
‘Fiki iruthọ esa Edọm,+ ẹhẹ fiki ene, me ti nwene iei hi,
Keme ọ rọ ọgbọdọ le oniọvo obọriẹ,+
Yọ ọ re ohrọ oniọvo riẹ hẹ;
Ọ jẹ rehọ ofu za ae ekekẹ,
Yọ o gbe bi mu ofu kẹ ae.+
13 Enẹ Jihova ọ ta,
‘“Fiki iruthọ esa ahwo Ammọn,+ ẹhẹ fiki ene, me ti nwene iei hi,
Keme a bẹre eva eyae Giliad nọ i dihọ re a ruẹsi ru ẹkwotọ rai kẹre.+
14 Fikiere me ti vi erae ruọ ugbẹhẹ Raba,+
Yọ e te mahe iwou ikpehru riẹ nọ e rẹ bẹ ẹvẹruọ no,
Avọ ubo ẹmo evaọ ẹdẹ ẹmo,
Avọ okpofou evaọ ẹdẹ ofou ọwhibo.
15 Yọ ovie rai avọ ikpahwo-esuo riẹ* a ti kpohọ igbo,”+ ere Jihova ọ ta.’
2 “Enẹ Jihova ọ ta,
‘“Fiki iruthọ* esa Moab,+ ẹhẹ fiki ene, me ti nwene iei hi,
Keme ọ mahe igbenwa ovie Edọm re ọ rehọ enwo* no ai ze.
2 Fikiere me ti vi erae ruọ Moab, yọ e te mahe iwou ikpehru Kiriọt+ nọ e rẹ bẹ ẹvẹruọ no;
Moab o ti whu evaọ udevie edo ozighi,
Avọ ubo ẹmo, avọ edo onware.+
4 Enẹ Jihova ọ ta,
‘Fiki iruthọ esa Juda,+ ẹhẹ fiki ene, me ti nwene iei hi,
Keme a siọ uzi* Jihova,
Yọ a koko ijaje riẹ hẹ;+
Rekọ erue evona nọ esẹ-esẹ rai a lele na i su rai thọ no.+
6 Enẹ Jihova ọ ta,
‘Fiki iruthọ esa Izrẹl,+ ẹhẹ fiki ene, me ti nwene iei hi,
Keme a be rọ fiki isiliva zẹ ikiẹrẹe na,
Jẹ be zẹ iyogbe na fiki eviẹ.+
Ọsẹ avọ ọmọzae riẹ a bi lele ọmọtẹ ọvona wezẹ,
Be wha ekela se odẹ ọrẹri mẹ.
8 A be rriẹ oma hotọ kẹle agbada-idhe kpobi+ evaọ ehru iwu nọ ahwo a ro viowa fihọ oware nọ a momo mi ai nọ a kru;+
Yọ idi nọ a be da evaọ uwou* edhọ rai yọ enọ a mi ahwo nọ a ho.’
9 ‘Rekọ mẹ họ ọnọ ọ raha ahwo Amọ kẹ ae,+
Enọ e jọ thethei wọhọ ire sida jẹ jọ gaga wọhọ ire ok;
Mẹ raha ubi riẹ nọ o jọ obehru gbe awọ riẹ nọ ọ jọ obotọ.+
10 Mẹ rehọ owhẹ no ẹkwotọ Ijipti ze,+
Me te ru owhẹ nya evaọ udhude na ikpe udhuvẹ,+
Re whọ rehọ ẹkwotọ ahwo Amọ.
Kọ o gbẹ rrọ ere, O ahwo Izrẹl?’ ere Jihova ọ ta.
12 ‘Rekọ whọ tẹ be hae rọ enwaene kẹ otu Nazaraet na re a da,+
Yọ who jie uzi kẹ eruẹaro na nọ: “Wha rẹ ruẹaro vievie he.”+
13 Fikiere mẹ te whọlọ owhẹ no evaọ oria ra,
Nwane wọhọ epanọ akẹkẹ nọ a kwa ekakọ nọ a bru vọ eva ọ rẹ whọlọ oware kpobi nọ o rrọ otọ riẹ na.
14 Ọgba-ohrẹ na ọ te ruẹ oria ovo dhẹ kpohọ họ,+
Ọgba na o ti gbe wo ogaga ha,
Ọgbaẹmo ọvo ọ te sae dhẹ* vabọ họ.
15 Ọnọ ọ rẹ sa ose na ọ te sai dikihẹ hẹ,
Ọgba-ohrẹ na ọ te sae dhẹ vabọ họ,
Yọ ọdhẹ-anyenya na ọ te sae dhẹ vabọ họ.
16 Makọ ọnọ ọ mae gudu evaọ usu egbaẹmo na dede
Ọ te dhẹ ẹbẹba evaọ ẹdẹ yena,’+ ere Jihova ọ ta.”
3 “Wha yo ẹme nana nọ Jihova ọ ta kpahe owhai na, O ahwo Izrẹl, kpahe uviuwou rai soso nọ mẹ rehọ no ẹkwotọ Ijipti ze:
2 ‘Whai ọvo mẹ riẹ evaọ udevie iviuwou otọakpọ na kpobi.+
Oyejabọ nọ mẹ te rọ rehọ owhai guẹdhọ fiki iruthọ rai kpobi.+
3 Kọ imava a sae nya usu ajokpanọ a ta mu nọ a rẹ ruẹ oma?*
4 Kọ okpohrokpo o re do enu evaọ owhawho nọ ọ gbẹ ruẹ arao nọ o re kpe he?
Kọ okpohrokpo ọgaga* ọ rẹ go evaọ uwou riẹ nọ o gbe mu arao ọvo ho?
5 Kọ ọvra o re kie ẹta evaọ otọ nọ a gbẹ kpahe ẹta ọvo kẹe he?*
Kọ ẹta ọ rẹ vaha no otọ ze nọ o gbe mu oware ovo ho?
6 A te kporo onware evaọ okpẹwho, kọ ozọ u gbe mu ahwo?
Okpẹtu ọ tẹ romavia evaọ okpẹwho, kọ ogbẹrọnọ Jihova ọ jowọ na?
7 Keme Jihova Olori nọ Ọ Mai Kpehru na o re ru oware ovo ho
Ajokpanọ ọ fere eware ididi* riẹ via kẹ idibo riẹ eruẹaro na no.+
8 Okpohrokpo na o do enu no!+ Ono ozọ u re mu hu?
Jihova Olori nọ Ọ Mai Kpehru na ọ ta ẹme no! Ono ọ rẹ ruẹaro ho?’+
9 ‘Whowho iei evaọ iwou ikpehru Ashdọd nọ e rẹ bẹ ẹvẹruọ
Gbe evaọ iwou ikpehru nọ e rẹ bẹ ẹvẹruọ evaọ ẹkwotọ Ijipti.
Ta nọ: “Wha kokohọ rọsuọ igbehru Sameria;+
Rri ozighi nọ ọ rrọ udevie riẹ
Gbe iwhayo nọ a bi fi evaọ eva riẹ.+
10 Keme a riẹ epanọ a re ru oware nọ u kiehọ họ,” ere Jihova ọ ta,
“Enọ i bi koko ozighi gbe ọraha họ evaọ iwou ikpehru rai nọ e rẹ bẹ ẹvẹruọ.”’
11 Fikiere enẹ Jihova Olori nọ Ọ Mai Kpehru na ọ ta,
‘Ọwegrẹ o ti ko ẹkwotọ na họ,+
O ti mi owhẹ ẹgba ra,
Yọ a te kwa eware iwou ikpehru ra nọ e rẹ bẹ ẹvẹruọ na rehọ.’+
12 Enẹ Jihova ọ ta,
‘Nwane wọhọ epanọ othuru-igodẹ o re vo awọ ivẹ hayo ozọ arao no unu okpohrokpo na,
Ere a ti vo ahwo Izrẹl rehọ,
Enọ e be keria ehwa iwowoma gbe egbara ithethei* evaọ Sameria enẹna.’+
13 ‘Yo onana jẹ vẹvẹ uwou Jekọp unu,’* ere Jihova Olori nọ Ọ Mai Kpehru na, Ọghẹnẹ olori egbaẹmo na ọ ta.
14 ‘Keme evaọ ẹdẹ nọ mẹ te rọ Izrẹl guẹdhọ fiki iruthọ* riẹ kpobi,+
Mẹ te rehọ egbada-idhe Bẹtẹl guẹdhọ re;+
A ti bru izei agbada-idhe na kie fihọ otọ.+
15 Me ti kporo uwou ezi ekpahe* na gbe uwou ezi ivo na no.’
4 “Wha yo ẹme nana, whai iruẹ Beshan,
Enọ e rrọ ugbehru Sameria,+
Whai eyae nọ i bi fi iruori na iwhayo,+ je bi thihi iyogbe nyaotọ,
Enọ e be ta kẹ ezae* rai nọ, ‘Kẹ omai udi re ma da!’
2 Jihova Olori nọ Ọ Mai Kpehru na, ọ rehọ ọrẹri nọ ọ rrọ ro duwu iyei no inọ,
‘“Rri! Edẹ e be tha nọ ọwegrẹ rai ọ te rọ rehọ eghọlọ nọ a rẹ jẹhọ erao ro si owhai kpehru
Jẹ rọ eghọlọ iyei si owhai nọ i kiọkọ.
3 Whai omomọvo ọ te rọ eria nọ a kporo evaọ ugbẹhẹ na rọ dhẹ ovavo;
Yọ a ti gbolo owhai fihọ Hamọn,” ere Jihova ọ ta.’
5 Mahe idhe uyere-okẹ orọ ebrẹdi nọ a fi ẹvi họ;+
Whowho ekẹ unevaze ra do via!
Keme oware nọ o rẹ were owhai oye, O ahwo Izrẹl,’ ere Jihova Olori nọ Ọ Mai Kpehru na ọ ta.
6 ‘Me ru nọ emu o gbe ro te owhai akọ họ* evaọ ikpewho rai kpobi
Je ru nọ emu ọ rọ kare iwou rai kpobi;+
Rekọ wha zihe bru omẹ ze he,’+ ere Jihova ọ ta.
7 ‘Me te je ru nọ oso ọ gbẹ rọ rrọ họ evaọ emerae esa taure oke ivuẹvu u te ti te;+
Me je ru oso rrọ evaọ okpẹwho jọ, rekọ ọ jẹ rrọ evaọ okpẹwho ọfa ha.
Oso ọ jẹ rrọ evaọ ẹwẹ-otọ jọ,
Rekọ ẹwẹ-otọ ọfa nọ oso ọ rrọ fihọ họ, ọ vẹ ya fia.
8 Ahwo ikpewho ivẹ hayo esa a je kpo geli geli kpohọ okpẹwho ọvo nyae da ame,+
Yọ a jẹ da eva vọ họ;
Rekọ wha zihe bru omẹ ze he,’+ ere Jihova ọ ta.
9 ‘Mẹ rehọ uvo ogaga gbe izuzu tehe owhai.+
Wha kọ egbọ gbe idhu evaene buobu,
Rekọ ebaka-ẹkpẹ e jẹ re ire ifigi gbe ire olivi rai no;+
Yọ wha zihe bru omẹ ze ghele he,’+ ere Jihova ọ ta.
10 ‘Me vi okpẹyao nọ o re vo ruọ udevie rai wọhọ utionọ u te Ijipti.+
Mẹ rọ ọgbọdọ kpe izoge emezae rai+ je mu enyenya rai+ rehọ.
Me ru ore-ogaga orọ evuẹ rai gbo ruọ ighogho-inwe rai;+
Rekọ wha zihe bru omẹ ze he,’ ere Jihova ọ ta.
11 ‘Mẹ rọ ọraha te owhai
Wọhọ ọraha nọ o te Sọdọm avọ Gomora.+
Wha tẹ wọhọ ete-ure nọ a fru no erae ze;
Rekọ wha zihe bru omẹ ze he,’+ ere Jihova ọ ta.
12 Fikiere ere me ti ru owhai, O Izrẹl.
Keme enẹ me ti ru owhai,
Wha ruẹrẹ oma kpahe re wha rẹriẹ ovao dhe Ọghẹnẹ rai, O Izrẹl.
13 Keme rri! ọye họ Ọnọ ọ ma igbehru+ na jẹ ma ofou+ na;
Ọ rẹ ta iroro riẹ kẹ ohwo-akpọ,
O re zihe oke nọ o ke no ruọ ebi,+
Yọ ọ be nya eria ikpehru otọakpọ na;+
Jihova Ọghẹnẹ olori egbaẹmo họ odẹ riẹ.”
5 “Wha yo ẹme nana nọ mẹ be rọ so ole uweri kpahe owhai na, O uwou Izrẹl:
2 ‘Izrẹl ọmọtẹ-kọkọ na o kie no;
Ọ sae gbẹ kpama ofa ha.
A nyase iẹe ba no evaọ ẹkwotọ obọriẹ;
Ohwo ọvo ọ riẹ nọ ọ te kpare iẹe he.’
3 “Keme enẹ Jihova Olori nọ Ọ Mai Kpehru na ọ ta:
‘Okpẹwho nọ ọ wha odu ahwo kpohọ ẹmo, udhusoi u ti kiọkọ;
Yọ ọnọ ọ wha udhusoi kpohọ ẹmo, ikpe i ti kiọkọ, ere o te via kẹ uwou Izrẹl.’+
4 “Keme enẹ Jihova ọ ta kẹ uwou Izrẹl:
‘Wha gwọlọ omẹ re wha gbẹ jọ uzuazọ.+
Wha kpohọ Gilgal ha+ hayo nyavrẹ kpobọ Biẹ-shiba ha,+
Keme Gilgal o ti kpohọ igbo hrọ,+
Yọ Bẹtẹl ọ te jọ ofofe.*
6 Wha gwọlọ Jihova re wha gbẹ jọ uzuazọ,+
Re o gbe vo mu uwou Josẹf wọhọ erae he,
Nọ e te mahe Bẹtẹl, ababọ ohwo ọvo nọ o ti furie iei.
8 Ọnọ ọ ma ẹko isi Kaema* gbe ẹko isi Kisil,*+
Ọnọ o re zihe ebi ọlala ruọ ohiohiẹ,
Ọnọ o re zihe uvo ruọ ebi aso,+
Ọnọ o re se ame abade kpohọ ehru
Re o ku ei ku otọakpọ na+
—Jihova họ odẹ riẹ.
9 O ti ru re ọraha o te egba na,
Ọ te rọ ọraha te eria nọ a di ogba wariẹ họ.*
10 A mukpahe enọ e be kẹ ọwhọkuo evaọ unuẹthẹ okpẹwho na,
Yọ ahwo nọ a rẹ ta uzẹme a re tu ae oma.+
11 Fikinọ wha bi mi iyogbe osa fihọ udhu*
Yọ wha be rehọ ibi ekakọ riẹ mi ei wọhọ azọhọ,+
Wha gbẹ te rria iwou itho nọ a bru nọ wha bọ na ha+
Hayo da enwaene emamọ egbọ evaene nọ wha kọ họ.+
12 Keme mẹ riẹ epanọ iruthọ* rai i bu te
Gbe epanọ izieraha rai e rro te
—Wha bi kpokpo ikiẹrẹe na,
Wha be re udi,*
Yọ wha bi kienyẹ iyogbe na evaọ unuẹthẹ okpẹwho na.+
13 Fikiere ahwo nọ a wo otoriẹ udidi a ti fibo evaọ oke yena,
Keme o te jọ oke okpẹtu.+
Kẹsena Jihova Ọghẹnẹ olori egbaẹmo na ọ vẹ te jọ kugbe owhai,
Nwane wọhọ epanọ wha ta nọ ọ rrọ kugbe owhai na.+
Ẹsejọhọ Jihova Ọghẹnẹ olori egbaẹmo na
Ọ te re ohrọ erọ Josẹf nọ i kiọkọ.’+
16 “Fikiere enẹ Jihova Ọghẹnẹ olori egbaẹmo na, Jihova, ọ ta:
‘Uweri o te jọ iko-ore na kpobi,
Yọ a te jọ iyẹrẹ na kpobi bo nọ, “Kinọ oja, kinọ oja!”
A te ta kẹ ewhẹrẹ inọ a weri
Gbe ahwo nọ a riẹ kpahe eweri ziezi re a kuenu oviẹ.’
17 ‘Uweri o te jọ ọgbọ evaene kpobi;+
Keme mẹ te nya udevie rai vrẹ,’ ere Jihova ọ ta.
18 ‘Uye u te ahwo nọ a be gwọlọ nọ ẹdẹ Jihova ọ ze!+
Ẹvẹ ẹdẹ Jihova ọ te jọ kẹ owhai?+
O te jọ ebi, orọnikọ elo ho.+
19 O te jọ wọhọ ohwo nọ ọ be dhẹ siọ okpohrokpo ba, adaka o te zere iei,
Yọ nọ ọ ruọ eva uwou riẹ jẹ rọ obọ kpahe ugbẹhẹ, araomuomu ọ tẹ rowo iẹe.
20 Kọ ogbẹrọnọ ebi ẹdẹ Jihova ọ te jọ, orọnikọ elo ho;
Kọ o gbẹ te jọ ebi ọlala orọnikọ elo ho?
21 Me mukpahe ehaa rai, ehaa rai i fioka ha evaọ aro mẹ,+
Yọ me wo evawere ọvo kpahe ore-awere ikokohọ urirẹ rai hi.
22 Wha tẹ maki dhe idhe emahọ kẹ omẹ jẹ kẹ omẹ ekẹ dede,
E te were omẹ hẹ;+
Yọ mẹ te jẹ idhe ọriẹyeri rai erọ erao epoporiẹ rehọ họ.+
23 Wha si edo ọgaga ile rai no aro mẹ;
Mẹ gwọlọ gbe yo edo ekpata-ifi rai hi.+
24 Jọ uvioziẹ u su wọhọ ame,+
Re ẹrẹreokie o je su wọhọ oko-ame nọ o bi kporo ẹkẹre ẹsikpobi.
25 Kọ wha rehọ idheidhe gbe ekẹ se omẹ
Evaọ ikpe udhuvẹ nọ wha rọ jọ udhude na, O uwou Izrẹl?+
26 Obọnana wha te wọ Sakut ovie rai vrẹ gbe Kaewan,*
Emema rai, esi ọghẹnẹ rai, nọ wha ru kẹ omarai,
27 Yọ me ti vi owhai kpohọ igbo thabọ no Damaskọs,’+ ere ọnọ odẹ riẹ o rrọ Jihova Ọghẹnẹ olori egbaẹmo ọ ta.”+
6 “Uye u te ahwo Zayọn nọ a fievahọ omobọ rai,*
Enọ i bi roro nọ oma o fọ rai evaọ ugbehru Sameria,+
Ahwo ologbo orẹwho nọ o mae viodẹ evaọ udevie erẹwho na,
Enọ uwou Izrẹl a be dhẹ bru!
2 Wha fa vrẹ kpobọ Kalnẹ re wha ruẹ.
No etẹe kpohọ Hemat Ologbo na,+
Je kpohọ Gat ọrọ Filistia.
Kọ a woma vi ekwotọ-ivie nana,*
Hayo kọ ẹkwotọ rai ọ rro vi ọnọ wha wo?
4 A bi kiẹzẹ ehwa nọ a rọ akọ-eni ru+ je bi kpeku egbara ithethei,+
Be re igbo nọ e rrọ uthuru na gbe emọ-iruẹ epoporiẹ na;+
5 A bi roro ile so nọ i bi do lele edo akpata,*+
Yọ wọhọ Devidi, a bi ku ekwakwa ikporakporo;+
6 A bi ku enwaene vọ omodhe okokodo da+
Jẹ be rọ idẹ nọ e mai woma ro wholo.
Rekọ a be daezọ* okpẹtu nọ o te Josẹf ho.+
7 Fikiere a te jọ ahwo ọsosuọ evaọ usu enọ i ti kpohọ igbo na,+
Yọ ehaa izizighi ahwo nọ a kpeku na i ti kuhọ.
8 ‘Jihova Olori nọ Ọ Mai Kpehru na ọ rọ omobọ* riẹ duwu iyei no,’+ ere Jihova Ọghẹnẹ olori egbaẹmo na ọ ta,
‘“Omorro Jekọp u bi tu omẹ oma,+
Me mukpahe iwou ikpehru riẹ nọ e rẹ bẹ ẹvẹruọ,+
Mẹ te rehọ okpẹwho na avọ eware nọ e rrọ eva riẹ kẹ amọfa.+
9 “‘“Yọ otẹrọnọ ezae ikpe i kiọkọ uwou ọvo, a ti whu re. 10 Omoni rai* jọ ọ te nyaze te wọ ae ruọ otafe re ọ mahe ae ọvuọvo. Ọ te rehọ igbenwa rai no uwou na ze; kẹsena ọ vẹ ta kẹ ohwo kpobi nọ ọ rrọ ibriwou obeva uwou na nọ, ‘Kọ ejọ e gbẹ rrọ etẹe kugbe owhẹ?’ Ọ vẹ te ta nọ, ‘Ọvuọvo ọ riẹ hẹ!’ Kẹsena ọ vẹ te ta nọ, ‘Fibo! Keme onana o rrọ okenọ a rẹ rọ fodẹ odẹ Jihova ha.’”
12 Kọ enyenya e rẹ dhẹ evaọ ehru ugbehru-utho,
Hayo kọ ohwo ọ rẹ rehọ iruẹ kporo udhu evaọ etẹe?
13 Wha be ghọghọ fiki oware nọ u fioka ha,
Yọ wha be ta nọ, “Kọ ogbẹrọnọ ẹgba obọmai ma ro ru omamai ga* no na?”+
14 Fikiere, O uwou Izrẹl, me ti ru orẹwho jọ wọ bru owhai ze,’+ ere Jihova Ọghẹnẹ olori egbaẹmo na ọ ta,
‘Yọ a ti gboja kẹ owhai no obọ Libo-hemat*+ ze rite obọ Uto* Araba.’”
7 Onana họ oware nọ Jihova Olori nọ Ọ Mai Kpehru na o dhesẹ kẹ omẹ: Rri! Ọ ruẹrẹ owa ebaka-ẹkpẹ họ okenọ ekakọ ezi avọ ivẹ* na e jẹ dhẹ ze. Enana họ ekakọ ezi avọ ivẹ nọ a te bru ẹbe ovie na kẹe no. 2 Nọ ebaka-ẹkpẹ na e re ẹbe otọ na kpobi no, mẹ tẹ ta nọ: “O Jihova Olori nọ Ọ Mai Kpehru na, ivie rọvrẹ rai!+ Ẹvẹ Jekọp ọ sae rọ zọ?* Keme ọ ga ha!”+
3 Fikiere Jihova ọ tẹ wariẹ roro onana.*+ Jihova ọ tẹ ta nọ: “O te via ha.”
4 Onana họ oware nọ Jihova Olori nọ Ọ Mai Kpehru na o dhesẹ kẹ omẹ: Rri! Jihova Olori nọ Ọ Mai Kpehru na ọ ta nọ jọ erae e ze re o wha uye ze. I te ru ame odidi orereghe na kpọ no, jẹ mahe abọjọ otọ na no. 5 Kẹsena mẹ tẹ ta nọ: “O Jihova Olori nọ Ọ Mai Kpehru na, ivie zihe obọ.+ Ẹvẹ Jekọp ọ sae rọ zọ?* Keme ọ ga ha!”+
6 Fikiere Jihova ọ tẹ wariẹ roro onana.*+ Jihova Olori nọ Ọ Mai Kpehru na ọ tẹ ta nọ: “Oyena o te via gbe he.”
7 Onana họ oware nọ o dhesẹ kẹ omẹ: Rri! Jihova o dikihẹ ugbẹhẹ nọ a rehọ ufi nọ a rẹ rọ ma oware sọ o kpọvi rọ ma, yọ ufi nọ a rẹ rọ ma oware sọ o kpọvi o rrọ obọ riẹ. 8 Jihova ọ tẹ ta kẹ omẹ nọ: “Eme whọ be ruẹ, Emọs?” Mẹ tẹ ta nọ: “Ufi nọ a rẹ rọ ma oware sọ o kpọvi.” Kẹsena Jihova ọ tẹ ta nọ: “Me bi fi ufi nọ a rẹ rọ ma oware sọ o kpọvi họ udevie ahwo mẹ Izrẹl. Mẹ te gbẹ rọvrẹ rai hi.+ 9 Eria ikpehru Aiziki+ e te jọ ifofe, a te raha eria aruẹri Izrẹl no;+ yọ mẹ te wọ ọgbọdọ bru uwou Jeroboam ze.”+
10 Amazaya ozerẹ Bẹtẹl+ o te vi uwou nana se Jeroboam+ ovie Izrẹl inọ: “Emọs ọ be gba ẹgwae omuomu kpahe owhẹ evaọ udevie uwou Izrẹl.+ Eme riẹ kpobi e be kẹ ahwo ẹkwotọ na uye.+ 11 Keme enẹ Emọs ọ be ta, ‘Jeroboam o ti whu uwhu ọgbọdọ, yọ Izrẹl o ti no ẹkwotọ riẹ kpohọ igbo hrọ.’”+
12 Kẹsena Amazaya ọ tẹ ta kẹ Emọs nọ: “O ọruẹ-ude, nyavrẹ, dhẹ kpobọ ẹkwotọ Juda, jọ obei gwọlọ emu kẹ omara,* whọ sae ruẹaro evaọ obei.+ 13 Rekọ whọ rẹ gbẹ jọ Bẹtẹl ruẹaro ofa ha,+ keme etenẹ yọ oria aruẹri ovie+ gbe uwou uvie.”
14 Kẹsena Emọs ọ tẹ ta kẹ Amazaya nọ: “Mẹ jọ ọruẹaro ho hayo ọmọzae ọruẹaro ho; rekọ ohwo nọ o re su erao mẹ jọ,+ yọ ire ifigi erọ sikamọ mẹ jẹ rẹrote.* 15 Rekọ Jihova ọ tẹ rehọ omẹ no uthuru erao nọ me je su ze, Jihova ọ tẹ ta kẹ omẹ nọ, ‘Nya re whọ ruẹaro kẹ ahwo mẹ Izrẹl.’+ 16 Fikiere, enẹna yo ẹme nọ Jihova ọ ta: ‘Whọ be ta nọ, “Whọ gbẹ ruẹaro kpahe Izrẹl he,+ yọ whọ gbẹ ta eme+ wọso uwou Aiziki hi.” 17 Fikiere enẹ Jihova ọ ta: “Aye ra o ti zihe ruọ ogberẹ evaọ okpẹwho na, yọ a te rọ ọgbọdọ kpe emezae gbe emetẹ ra. A te rọ ufi nọ a rẹ rọ ma oware rọ ghale otọ ra, yọ whẹ omara who ti whu evaọ ẹkwotọ nọ ọ fo ho; yọ Izrẹl o ti no ẹkwotọ riẹ kpohọ igbo hrọ.”’”+
8 Onana họ oware nọ Jihova Olori nọ Ọ Mai Kpehru na o dhesẹ kẹ omẹ: Rri! Ekete ibi-ire ezi ivo o jọ etẹe. 2 Ọ tẹ ta kẹ omẹ nọ, “Eme whọ be ruẹ, Emọs?” Me te yo nọ, “Ekete ibi-ire ezi ivo.” Jihova ọ tẹ ta kẹ omẹ nọ: “Urere ahwo mẹ Izrẹl o ze no. Mẹ te gbẹ rọvrẹ rai hi.+ 3 ‘Ile etẹmpol na i ti zihe ruọ oviẹ evaọ ẹdẹ yena,’+ ere Jihova Olori nọ Ọ Mai Kpehru na ọ ta. ‘Iri buobu e te vaha vọ oria kpobi, nọ o te whae ze nọ oria kpobi o te rọ jọ rirẹ.’+
4 Wha yo onana, whai enọ i bi thihi iyogbe na nyaotọ
Gbe otu nọ o bi kpe enọ e be romakpotọ evaọ ẹkwotọ na,+
5 Enọ e be ta nọ, ‘Oke vẹ ehaa ọvẹre ọkpokpọ na i ti kuhọ,+ re ma ruẹse zẹ ibi ekakọ mai,
Gbe Ẹdijala na,+ re ma ruẹse rọ ibi ekakọ mai dhe eki?
Re ma ruẹsi ru owawọ ifa* na kawo vi epanọ o rẹ jọ
Je ru owawọ shẹkẹl* na gbẹdẹ vi epanọ o rẹ jọ,
Re ma rehọ iskeli eviẹhọ mai wha ahwo re;+
6 Re ma rehọ isiliva dẹ ahwo nọ akpọ ọ be bẹ
Jẹ rehọ eviẹ dẹ iyogbe,+
Jẹ zẹ ibi ekakọ nọ i fioka ha.’
7 Jihova nọ ọ rrọ Orro Jekọp+ na ọ rehọ omariẹ duwu iyei no inọ,
‘Eware kpobi nọ a ru na e te thọrọ omẹ ẹro vievie he.+
Kọ o gbẹ te vọhọ wọhọ Naele,
O vẹ wọ je kie kpotọ wọhọ Naele obọ Ijipti?’+
9 Enẹ Jihova Olori nọ Ọ Mai Kpehru na ọ ta: ‘Evaọ ẹdẹ yena,
Me ti ru ọre kiediwi evaọ uvo kekeke,
Yọ me ti ru otọ na muebi evaọ uvo gbagbagba.+
10 Me ti zihe ehaa rai ruọ uweri+
Gbe ile rai kpobi ruọ ile uweri.
Mẹ te rehọ ehọ-ekpa* zuo eku kpobi je ru ohwo kpobi fa oko uzou;
Me ti ru ei jọ wọhọ epaọ okenọ a bi weri fiki uwhu ọmọzae ọvo nọ ohwo o yẹ,
Yọ ukuhọ riẹ o te wọhọ ẹdẹ ọyayare.’
11 Jihova Olori nọ Ọ Mai Kpehru na ọ ta nọ: ‘Rri! Edẹ e be tha,
Nọ me ti vi ohọo ruọ ẹkwotọ na,
Orọnikọ ohọo ebrẹdi hi hayo orọ uruame he,
Rekọ orọ eyo eme Jihova.+
12 A ti kpo geli geli no abade te abade
Je no ẹkpẹlobọ ovatha-ọre kpohọ obọ ovatha-ọre.
A ti ghoro kpenẹ avọ enẹ gwọlọ ẹme Jihova, rekọ a ti duku ei hi.
13 Evaọ ẹdẹ yena aro o ti bi emetẹ-kọkọ nọ i wo erru,
Te emoha na re, fiki uruame na;
14 Enọ e be rọ eghẹnẹ erue Sameria*+ duwu iyei, nọ e be ta nọ,
“Nọ ọghẹnẹ ra ọ rrọ uzuazọ na, O Dan!”+
Gbe, “Nọ edhere Biẹ-shiba+ ọ rrọ na!”
A ti kie, yọ a te gbẹ sae kpama ofa ha.’”+
9 Mẹ ruẹ Jihova+ evaọ ehru agbada-idhe na, ọ tẹ ta nọ: “Tehe uzou ipila na, igbẹhẹ na i ve ti nuhu. Bru uzou rai no, mẹ vẹ te rọ ọgbọdọ kpe ai, te ọrọ urere evaọ usu rai. Ọvuọvo nọ ọ be dhẹ nọ ọ te sae dhẹ vabọ ọ rrọ họ, yọ ọvuọvo nọ ọ be daoma vabọ nọ ọ te zọ ọ rrọ họ.+
2 Otẹrọnọ a tọ kokodo kpobọ Uki,*
Obọ mẹ u ti si ai no obei ze;
Yọ a te kpobọ idhiwu na,
Mẹ te rehọ ae no obei ziọ otọ.
3 A te dhere obọ ehru ugbehru Kamẹl,
Mẹ te jọ etẹe gwọlọ ae via jẹ rehọ ae ze.+
A te dhere obotọ abade re ibiaro mẹ e siọ ae ba ẹruẹ,
Mẹ te jọ obei ta kẹ araomuomu re ọ rowo ae.
4 Yọ ewegrẹ rai a te mu ai kpohọ igbo,
Mẹ te jọ obei ta kẹ ọgbọdọ re o kpe ai;+
Me ti fi ẹro mẹ họ ai kẹ eyoma orọnikọ ewoma ha.+
5 Keme Olori nọ Ọ Mai Kpehru na, Jihova olori egbaẹmo na, ọye họ ọnọ o dhobọte otọ* na,
Fikiere o tẹ be va,+ yọ enọ e be rria otọ na kpobi a ti weri;+
Otọ na soso o te vọhọ wọhọ Naele,
Je kie kpotọ wọhọ Naele obọ Ijipti.+
6 ‘Ọnọ ọ bọ oria nọ a rẹ rọ gadiẹ kpobọ uwou riẹ fihọ obọ idhiwu na
Jẹ bọ uwou* riẹ họ ehru otọakpọ na;
Ọnọ o re se ame abade kpohọ ehru,
Re o ku ei ku otọakpọ na+
—Jihova họ odẹ riẹ.’+
7 ‘Kọ wha gbẹ wọhọ emezae ahwo Kush kẹ omẹ, O ahwo Izrẹl?’ ere Jihova ọ ta.
‘Kọ ogbẹrọnọ obọ ẹkwotọ Ijipti+ mẹ rehọ Izrẹl no ze,
Jẹ rehọ ahwo Filistia no obọ Kriti ze,+ jẹ rehọ ahwo Siria no obọ Kiẹ ze?’+
8 ‘Rri! Ibiaro Jihova Olori nọ Ọ Mai Kpehru na i bi rri uvie nọ o be raha izi na,
Yọ ọ te raha iẹe no otọ na no.+
Rekọ mẹ te raha uwou Jekọp muotọ họ,’+ ere Jihova ọ ta.
9 ‘Keme rri! Me bi jie uzi na,
Me ti nuhu uwou Izrẹl evaọ udevie erẹwho na kpobi,+
Nwane wọhọ epanọ ohwo o re nuhu oyẹyẹ,
Nọ ubiutho ovo u re kie fihọ otọ họ na.
10 Ahwo mẹ kpobi nọ a be raha uzi na a ti whu uwhu ọgbọdọ,
Enọ e be ta nọ, “Okpẹtu na o ti fou kẹle omai hi hayo te omai oma ha.”’
11 ‘Evaọ ẹdẹ yena mẹ te kpare uwou-owhre* Devidi+ nọ u kie no na,
Mẹ te ruẹrẹ eria* nọ i kporo na,
Mẹ te wariẹ bọ eria riẹ nọ e raha;
Mẹ te wariẹ bọe wọhọ epaọ oke krẹkri nọ u kpemu,+
12 Re a ruẹse rehọ oware nọ u kiọkọ Edọm,+
Gbe erẹwho kpobi nọ a rọ odẹ mẹ se,’ ere Jihova ọ ta, ọnọ o bi ru oware onana.
13 Enẹ Jihova ọ ta: ‘Rri! Edẹ e be tha,
Nọ ohwo nọ o bi kporo udhu o ti ro mi ọnọ o bi vu aro,
Yọ ọnọ o bi thihi ibi-ire ro ru udi o ti mi ọnọ ọ wọ ibi aro;+
Yọ enwaene ọwewere ọ te jọ igbehru na su,+
14 Me ti koko enọ a mu evaọ udevie ahwo mẹ Izrẹl họ zihe ze,+
A vẹ te wariẹ bọ ikpewho nọ a ru fihọ ifofe na jẹ rria eva rai;+
A te kọ egbọ evaene jẹ da enwaene nọ i no rai ze,+
Yọ a te kọ egbọ jẹ re ibi nọ i no rai ze.’+
15 ‘Mẹ te kọ ae họ otọ rai,
Yọ a ti gbe vi ai no otọ vievie he
No otọ rai nọ mẹ kẹ rai na,’+ ere Jihova Ọghẹnẹ rai ọ ta.”
Otofa riẹ họ “Re A Jọ Owha” hayo “Re A Wọ Owha.”
Hayo “ekparesuọ.”
Evaọ Hibru, “ọnọ o kru ọkpọ-isuẹsu.”
Evaọ Hibru, “ọnọ o kru ọkpọ-isuẹsu.”
Hayo o sae jọ nọ, “emezae-ovie na.”
Hayo “ekparesuọ.”
Hayo “elaemo.”
Evaọ Hibru, “obruoziẹ.”
Hayo “uthubro.”
Hayo “etẹmpol.”
Hayo “rọ uzuazọ riẹ dhẹ.” Evaọ Hibru, “rọ nifẹsh riẹ dhẹ.” Rri oria Otofa Eme.
Hayo “a ruẹ oma fikinọ a ta mu?”
Hayo “okpohrokpo nọ ọ rrọ whẹvu.”
Hayo o sae jọ nọ, “a gbe fi oware nọ u re si ei urru họ iẹe he?”
Hayo “eware idhere.”
Hayo “egbara ithethei Damaskọs.”
Hayo “je se isẹri kpe uwou Jekọp.”
Hayo “ọkparesuọ.”
Hayo “ezi iso.”
Hayo o sae jọ nọ, “Yọ iwou buobu.”
Hayo “ilori.”
Hayo “kpareso.”
Hayo “Mẹ rọwo kẹ owhai emu re he.”
Hayo o sae jọ nọ, “o ti zihe ruọ oria iruẹru ebi.”
Hayo “ẹyayare.”
O sae jọ nọ isi Pleiades nọ e rrọ eva ẹko isi Taurus.
O sae jọ nọ ẹko isi Orion.
Hayo “e rẹ bẹ ẹvẹruọ.”
Hayo “osa-uzou otọ.”
Hayo “ọkparesuọ.”
Hayo “Wha be lẹlẹ mi igho.”
O sae jọ nọ edhọ ivẹ nana nọ a fodẹ na yọ eplanẹte Saturn, onọ a jẹ gọ.
Hayo “nọ a re se oware gboja ha.”
O wọhọ nọ o be ta kpahe uvie Juda gbe orọ Izrẹl.
Evaọ Hibru, “agbara.”
Hayo “akpata-ifi.”
Evaọ Hibru, “mọ ẹyao.”
Evaọ Hibru, “nifẹsh.” Rri oria Otofa Eme.
Evaọ Hibru, “Oniọvo-ọmọzae ọsẹ riẹ.”
Hayo “ẹyayare.”
Evaọ Hibru, “ma rọ rehọ izei kẹ omamai.”
Hayo “oria nọ a rẹ rọ ruọ Hemat.”
Rri oria Otofa Eme.
Koyehọ, evaọ amara Ọvo gbe Ava.
Evaọ Hibru, “kparoma?”
Hayo “o te bruoma kpiroro.”
Evaọ Hibru, “kparoma?”
Hayo “o te bruoma kpiroro.”
Evaọ Hibru, “re ebrẹdi.”
Hayo “yọ mẹ jẹ hai duwu ighogho fihọ ibi-ire ifigi erọ sikamọ.”
Rri Ẹme-Ofiba B14.
Rri Ẹme-Ofiba B14.
Hayo “otọakpọ.”
Hayo “ehọ-ẹkporo.”
Evaọ Hibru, “abe-ọriọ Sameria,” koyehọ oware nọ o be wha abe-ọriọ rai ze, edhọ Sameria.
Hayo “Sheol.” Rri oria Otofa Eme.
Hayo “otọakpọ.”
Hayo “oria ugheghelie.”
Hayo “uwou-udhu; umuwou ebiesa.”
Hayo “eria rai.”
Evaọ Hibru, “Yọ ikpehru na kpobi e te ghra.”