ZẸKARAYA
1 Evaọ amara avọ eree evaọ ukpe avọ ivẹ Dariọs,+ ẹme Jihova o te bru Zẹkaraya*+ ọruẹaro na ze, ọmọzae Bẹrekaya ọmọzae Idọ, inọ: 2 “Jihova ọ dha eva kẹ esẹ rai gaga.+
3 “Ta kẹ ae nọ, ‘Enẹ Jihova olori egbaẹmo ọ ta: “‘Wha zihe bru omẹ ze,’ ere Jihova olori egbaẹmo ọ ta, ‘me ti zihe bru owhai ze,’+ ere Jihova olori egbaẹmo ọ ta.”’
4 “‘Wha jọ wọhọ esẹ rai hi, enọ eruẹaro ọsosuọ a whowho kẹ nọ: “Enẹ Jihova olori egbaẹmo ọ ta, ‘Ivie wha kurẹriẹ* no idhere imuomu rai jegbe iruẹru imuomu rai.’”’+
“‘Rekọ a gaviezọ họ, yọ a yoẹme kẹ omẹ hẹ,’+ ere Jihova ọ ta.
5 “‘Diẹse esẹ rai a rrọ enẹna? Kọ eruẹaro na e rria bẹdẹ bẹdẹ? 6 Rekọ, ẹme mẹ gbe ijaje nọ me jie kẹ idibo mẹ, eruẹaro na, i rugba evaọ oma esẹ rai, o gbẹ rrọ ere?’+ Fikiere a te zihe bru omẹ ze, a tẹ ta nọ: ‘Jihova olori egbaẹmo ọ kẹ omai uye fiki oghẹrẹ uzuazọ nọ ma yeri gbe iruẹru mai, nwane wọhọ epanọ ọ jiroro nọ o ti ru.’”+
7 Evaọ ẹdẹ avọ udhegbene amara avọ ikpegbọvo, koyehọ, amara Shibat,* evaọ ukpe avọ ivẹ Dariọs,+ ẹme Jihova o te bru Zẹkaraya ọruẹaro na ze, ọmọzae Bẹrekaya ọmọzae Idọ, inọ: 8 “Mẹ ruẹ eruẹaruẹ jọ evaọ aso. Mẹ ruẹ ọzae jọ nọ ọ jẹ dhẹ anyenya ọwawae, o te dikihẹ oria ovo evaọ udevie ire idodo nọ e rrọ ukiekpotọ na; yọ enyenya ewawae, erọ ogorurẹ, gbe efuafo e rrọ emu riẹ.”
9 Mẹ tẹ nọ nọ: “Olori mẹ, nọ amono?”
Ukọ-odhiwu nọ ọ jẹ ta ẹme kẹ omẹ na ọ tẹ kpahe kẹ omẹ nọ: “Mẹ te vuẹ owhẹ ahwo nọ a rrọ.”
10 Kẹsena ọzae nọ o dikihẹ udevie ire idodo na ọ tẹ ta nọ: “Ahwo nana họ enọ Jihova o vi re a nya otọakpọ na wariẹ.” 11 A tẹ ta kẹ ukọ-odhiwu Jihova nọ o dikihẹ udevie ire idodo na nọ: “Ma nya otọakpọ na wariẹ no, yọ otọakpọ na soso o rrọ rirẹ ababọ ukpokpoma.”+
12 Fikiere ukọ-odhiwu Jihova ọ tẹ ta nọ: “O Jihova olori egbaẹmo, ẹvẹ u re kri te re whọ tẹ re ohrọ Jerusalẹm gbe ikpewho Juda,+ enọ whọ be dha eva kẹ anwọ ikpe udhosa-gbikpe na?”+
13 Jihova ọ tẹ rehọ eme iwowou nọ e rẹ sasa oma kẹ ukọ-odhiwu nọ o je lele omẹ ta ẹme na uyo. 14 Kẹsena ukọ-odhiwu nọ o je lele omẹ ta ẹme na ọ tẹ ta kẹ omẹ nọ: “Bo via, ‘Enẹ Jihova olori egbaẹmo ọ ta: “Me wo ajọwha ọgaga kẹ Jerusalẹm gbe Zayọn.+ 15 Me bi mu ofu gaga kẹ erẹwho nọ i wo omofọwẹ,+ keme omofu me mu kẹ ae vẹre,+ rekọ a te fiba okpẹtu na.”’+
16 “Fikiere enẹ Jihova ọ ta: ‘“Me ti zihe bru Jerusalẹm avọ ohrọ-oriọ,+ a vẹ te bọ uwou mẹ họ eva riẹ,”+ ere Jihova olori egbaẹmo ọ ta, “yọ a te rriẹ ufi nọ a rẹ rọ ma eware fihọ Jerusalẹm soso.”’+
17 “Wariẹ bo via re whọ ta nọ, ‘Enẹ Jihova olori egbaẹmo ọ ta: “Ewoma ọ te wariẹ da ikpewho mẹ fia; yọ Jihova ọ te wariẹ sasa Zayọn oma,+ jẹ wariẹ salọ Jerusalẹm.”’”+
18 Kẹsena me te rri ehru, mẹ tẹ ruẹ izei ene.+ 19 Mẹ tẹ nọ ukọ-odhiwu nọ o je lele omẹ ta ẹme na nọ: “Nọ eme na?” Ọ tẹ za kẹ omẹ nọ: “Izei nana họ enọ e vaha Juda,+ Izrẹl,+ gbe Jerusalẹm.”+
20 Kẹsena Jihova o te dhesẹ ewena ene kẹ omẹ. 21 Mẹ tẹ nọ nọ: “Eme enana e be nyaze ti ru?”
Ọ tẹ ta nọ: “Izei nana họ enọ e vaha Juda te epanọ ohwo ọvo ọ jẹ sae rọ kpare uzou riẹ hẹ. Enana nọ i kiọkọ na e te nyaze ti ru ozọ mu ai gaga, re a gele izei erẹwho na fihọ otọ, enọ e kpare izei rai rọsuọ ẹkwotọ Juda, re a ruẹse vaha iẹe.”
2 Me te rri ehru, mẹ tẹ ruẹ ọzae nọ o kru ufi nọ a rẹ rọ ma oware+ họ obọ. 2 Fikiere mẹ tẹ nọe nọ: “Bovẹ whọ be nya?”
O te yo kẹ omẹ nọ: “Mẹ be nyae ma Jerusalẹm re mẹ riẹ okẹkẹe riẹ gbe uthethei riẹ.”+
3 Rri! ukọ-odhiwu nọ o je lele omẹ ta ẹme na ọ tẹ nyavrẹ, ukọ-odhiwu ọfa ọ tẹ nyabru ei ze. 4 Ọ tẹ ta kẹe nọ: “Dhẹ kpohọ obei na re whọ ta kẹ ọmoha yena nọ, ‘“Ahwo a te rria Jerusalẹm+ wọhọ iwhre nọ o kpefihọ,* keme ahwo gbe erao nọ e riẹe eva e te jọ buobu.+ 5 Mẹ te jọ ugbẹhẹ nọ erae e wariẹ họ kẹe,”+ ere Jihova ọ ta, “oruaro mẹ o vẹ te vọ eva riẹ.”’”+
6 “Nyaze! Nyaze! Dhẹ no ẹkwotọ ẹkpẹlobọ ovatha-ọre na,”+ ere Jihova ọ ta.
“Keme mẹ vaha owhai fihọ ifou ene idhiwu na no,”+ ere Jihova ọ ta.
7 “Nyaze Zayọn! Wha dhẹ vabọ, whai enọ e be rria kugbe ọmọtẹ Babilọn.+ 8 Keme enẹ Jihova olori egbaẹmo ọ ta, ọnọ evaọ okenọ a kẹe oruaro no, o vi omẹ bru erẹwho nọ e jẹ kwa eware rai rehọ,+ inọ: ‘Ohwo kpobi nọ o dhobọte owhai yọ o bi dhobọte ọmọ-ẹro mẹ.*+ 9 Enẹna mẹ te kpare obọ mẹ wọso ae, a ve ti zihe ruọ enọ erigbo obọrai e te kwa eware rai rehọ.’+ Wha vẹ te ginẹ riẹ nọ Jihova olori egbaẹmo o vi omẹ.
10 “O ọmọtẹ Zayọn, bo ubo oghọghọ;+ keme mẹ be nyaze,+ mẹ vẹ te rria eva ra,”+ ere Jihova ọ ta. 11 “Erẹwho buobu i ti kuomagbe Jihova evaọ ẹdẹ yena,+ a vẹ te jọ ahwo mẹ; yọ mẹ te rria eva ra.” Wha vẹ te riẹ nọ Jihova olori egbaẹmo o vi omẹ bru owhai ze. 12 Jihova ọ te rehọ Juda kẹ omariẹ re o jọ ẹkẹ riẹ evaọ otọ ọrẹri na, ọ vẹ te wariẹ salọ Jerusalẹm.+ 13 Whai uwo* kpobi, wha fibo evaọ aro Jihova, keme ọ be jowọ no oria ọrẹri nọ ọ be rria ze.
3 O te dhesẹ Joshua+ ozerẹ okpehru na kẹ omẹ nọ o dikihẹ aro ukọ-odhiwu Jihova, yọ Setan+ o dikihẹ obọze Joshua re ọ zae họ. 2 Kẹsena ukọ-odhiwu Jihova ọ tẹ ta kẹ Setan nọ: “Jọ Jihova ọ whọku owhẹ, O Setan,+ ẹhẹ, jọ Jihova nọ ọ salọ Jerusalẹm+ no na ọ whọku owhẹ! Kọ ọzae nana ọ gbẹ rrọ ete-ure nọ ọ be to nọ a fru no erae ze?”
3 Whaọ Joshua o fi iwu igbegbe họ, yọ o dikihẹ aro ukọ-odhiwu na. 4 Ukọ-odhiwu na ọ tẹ ta kẹ enọ i dikihẹ aro riẹ nọ, “Wha ba iwu igbegbe riẹ na noi oma.” Kẹsena ọ tẹ ta kẹe nọ, “Rri, me si oruthọ* ra no owhẹ oma no, yọ a re ti ku emamọ iwu* họ owhẹ oma.”+
5 Mẹ tẹ ta nọ: “Jọ a rọ etu-udhọfọ nọ ọ fo tu uzou riẹ.”+ A tẹ rọ etu-udhọfọ nọ ọ fo tu uzou riẹ je ku iwu họ iẹe oma; yọ ukọ-odhiwu Jihova o dikihẹ kẹle etẹe. 6 Ukọ-odhiwu Jihova ọ tẹ ta kẹ Joshua nọ: 7 “Enẹ Jihova olori egbaẹmo ọ ta, ‘Otẹrọnọ whọ tẹ nya evaọ idhere mẹ je ru iruo nọ mẹ kẹ owhẹ, whọ te jọ obruoziẹ evaọ uwou mẹ+ jẹ rẹrote* ighẹ mẹ; mẹ te jẹ kẹ owhẹ uvẹ nọ whọ sae rọ ziọ aro mẹ lọlọhọ kugbe enana nọ i dikihẹ etenẹ na.’
8 “‘Ivie gaviezọ, O Joshua Ozerẹ Okpehru na, whẹ avọ egbẹnyusu ra nọ e keria aro ra, keme whae ezae nana yọ oka; rri! mẹ be rehọ odibo mẹ ze,+ ọnọ a re se Okakọ nọ O Dhẹ Ze!+ 9 Rri utho nọ me fihọ aro Joshua! Ibiaro ihrẹ e rrọ utho ovo nana; yọ mẹ be kare ẹme jọ fihọ iẹe,’ ere Jihova olori egbaẹmo ọ ta, ‘yọ me ti si abe-ọriọ ẹkwotọ yena no evaọ ẹdẹ ọvo.’+
10 “‘Evaọ ẹdẹ yena,’ ere Jihova olori egbaẹmo ọ ta, ‘whai omomọvo o ti zizie ọrivẹ riẹ inọ ọ nyaze otọ ure evaene riẹ gbe otọ ure ifigi riẹ.’”+
4 Ukọ-odhiwu nọ o je lele omẹ ta ẹme na o te zihe ze, ọ tẹ rọwo omẹ, wọhọ epaọ ẹsenọ a be rọwo ohwo no owezẹ ze. 2 Kẹsena ọ tẹ nọ omẹ nọ: “Eme whọ be ruẹ?”
Mẹ tẹ ta nọ: “Mẹ be ruẹ ọkpọ-edada ukpẹ nọ a rọ igoru ru oma riẹ soso,+ nọ omodhe okokodo ọ rrọ ehru riẹ. Ikpẹ ihrẹ e rrọ ehru ọkpọ-edada na,+ ẹhẹ ihrẹ, yọ ikpẹ nọ e rrọ ehru riẹ na i wo ekpọ* ihrẹ. 3 Yọ ire olivi ivẹ e rrọ akotọ riẹ,+ ọjọ ọ rrọ obọze omodhe okokodo na, ọdekọ ọ tẹ rrọ ẹkpẹlobọ riẹ.”
4 Kẹsena mẹ tẹ nọ ukọ-odhiwu nọ o je lele omẹ ta ẹme na nọ: “Eme họ otọ eware nana, olori mẹ?” 5 Ukọ-odhiwu nọ o je lele omẹ ta ẹme na ọ tẹ nọ omẹ nọ: “Kọ whọ riẹ otọ eware nana?”
Me te yo nọ: “Ijo, olori mẹ.”
6 Kẹsena ọ tẹ ta kẹ omẹ nọ: “Enẹ Jihova ọ ta kẹ Zerubabẹl: ‘“Orọnọ ẹkwoma egbaẹmo, hayo ogaga ha,+ rekọ ẹkwoma ẹzi mẹ+ eware nana kpobi e te rọ via,” ere Jihova olori egbaẹmo ọ ta. 7 Ono họ owhẹ, O ugbehru ulogbo? Zerubabẹl+ o ti zihe owhẹ ruọ otọ opraprara.+ Ọ te rehọ utho obehru na lahwe evaọ udevie enọ i bi bo nọ: “U woma kẹhẹ! U woma kẹhẹ!”’”
8 Ẹme Jihova ọ tẹ wariẹ bru omẹ ze, inọ: 9 “Zerubabẹl họ ọnọ ọ rehọ abọ riẹ wọ otọhotọ uwou nana họ,+ yọ ọ te rehọ abọ riẹ bọe re.+ Wha vẹ te riẹ nọ Jihova olori egbaẹmo o vi omẹ bru owhai ze. 10 Kọ ono o re rri ẹdẹ nọ eware i ro muhọ omomoto* vo?+ Keme a te ghọghọ jẹ jọ obọ Zerubabẹl ruẹ ufi* nọ a rẹ rọ ma oware sọ o kpọvi na. Ikpẹ ihrẹ nana yọ ibiaro Jihova nọ i bi rri oria kpobi evaọ otọakpọ na.”+
11 Kẹsena mẹ tẹ nọe nọ: “Eme ire olivi ivẹ nana nọ e rrọ obọze gbe ẹkpẹlobọ ọkpọ-edada ukpẹ na i dikihẹ kẹ?”+ 12 Mẹ tẹ nọe orọ avọ isiava nọ: “Eme egha* ire olivi ivẹ nọ i bi ku ewhri igoru fihọ ipiopio* igoru ivẹ na i dikihẹ kẹ?”
13 Fikiere ọ tẹ nọ omẹ nọ: “Kọ whọ riẹ otọ eware nana?”
Me te yo nọ: “Ijo, olori mẹ.”
14 Ọ tẹ ta nọ: “Enana họ imava nọ a wholo na nọ i dikihẹ abotọ Olori otọakpọ na soso.”+
5 Mẹ tẹ wariẹ rri ehru, mẹ tẹ ruẹ uko-obe nọ o be rra. 2 Ọ tẹ nọ omẹ nọ: “Eme whọ be ruẹ?”
Me te yo nọ: “Mẹ be ruẹ uko-obe nọ o be rra, nọ u theri te ikiubiti* udhe yọ o kẹre te ikiubiti ikpe.”
3 Kẹsena ọ tẹ ta kẹ omẹ nọ: “Onana họ uye nọ o be nyaruọ otọakpọ na soso, keme a be kẹ ohwo nọ o tho uji uye he+ wọhọ epanọ a kere fihọ abọjọ uko-obe na; yọ a be kẹ ohwo nọ o duwu iyei ọrue uye he+ wọhọ epanọ a kere fihọ abọdekọ riẹ. 4 ‘Me vi rie vrẹ no,’ ere Jihova olori egbaẹmo ọ ta, ‘yọ o te ruọ eva uwou oji na gbe uwou ọnọ ọ rehọ odẹ mẹ duwu iyei ọrue na; o vẹ te jọ eva uwou yena, o vẹ te raha iẹe no, te ire riẹ te itho riẹ.’”
5 Kẹsena ukọ-odhiwu nọ o je lele omẹ ta ẹme na ọ tẹ nya lahwe, ọ tẹ ta kẹ omẹ nọ: “Ivie, rri ehru re whọ ruẹ oware nọ o be nyavrẹ na.”
6 Mẹ tẹ nọe nọ: “Eme ọye?”
O te yo nọ: “Nọ odhe* nọ a rẹ rọ wawọ eware nọ o be nyavrẹ.” Ọ tẹ jẹ ta nọ: “Enẹ oma rai o rrọ evaọ otọakpọ na soso.” 7 Mẹ tẹ ruẹ nọ a rovie ururu elẹdi ogheghelie nọ a ro ruru odhe na, yọ aye jọ ọ keria eva odhe na. 8 Ọ tẹ ta nọ: “Aye nana họ Umuomu.” Kẹsena o te gele iei zihe fihọ odhe na, ọ tẹ rọ ururu elẹdi na ruru unu odhe na.
9 Kẹsena me te rri ehru, mẹ tẹ ruẹ eyae ivẹ nọ e be tha, yọ a jẹ rra lele ofou na. A wo ibekpe nọ e wọhọ ibekpe ogbodu. A tẹ wọ odhe na kpohọ udevie otọakpọ avọ odhiwu na. 10 Fikiere mẹ tẹ nọ ukọ-odhiwu nọ o je lele omẹ ta ẹme na nọ: “Bovẹ a be wọ odhe na kpohọ?”
11 O te yo kẹ omẹ nọ: “A be wọe kpohọ ẹkwotọ Shaena,*+ re a jọ obei bọ uwou kẹe; nọ a tẹ bọe re no, a vẹ wọe fihọ etẹe, oria nọ u fo nọ ọ rẹ jọ.”
6 Kẹsena mẹ tẹ wariẹ rri ehru, mẹ tẹ ruẹ ekẹkẹ ene nọ i bi no udevie igbehru ivẹ ze, yọ igbehru na igbehru ekọpa. 2 Akẹkẹ ọsosuọ o wo enyenya ewawae nọ i bi si rie, yọ akẹkẹ avọ ivẹ o wo enyenya ibiebi nọ i bi si rie.+ 3 Akẹkẹ avọ esa o wo enyenya efuafo nọ i bi si rie, akẹkẹ avọ ene kọ enyenya ikekeri avọ enọ e rrọ ipipe.+
4 Mẹ tẹ nọ ukọ-odhiwu nọ o je lele omẹ ta ẹme na nọ: “Enana nọ eme, olori mẹ?”
5 Ukọ-odhiwu na ọ tẹ kẹ omẹ uyo nọ: “Enana họ emama ẹzi ene+ obọ idhiwu na nọ e be nyavrẹ evaọ okenọ a dikihẹ aro Olori otọakpọ na soso no.+ 6 Akẹkẹ nọ enyenya ibiebi i bi si na o bi kpobọ ẹkwotọ ẹkpẹlobọ ovatha-ọre;+ efuafo na e be nyavrẹ abade na; ikekeri na i te bi kpobọ ẹkwotọ obọze ovatha-ọre. 7 Yọ oma o jẹ kpakpa enọ e rrọ ipipe na re a nya lahwe re a nya kpenẹ avọ enẹ evaọ otọakpọ na.” Kẹsena ọ tẹ ta nọ: “Wha nya, wha nya kpenẹ avọ enẹ evaọ otọakpọ na.” A te muhọ ẹnya kpenẹ avọ enẹ evaọ otọakpọ na.
8 Kẹsena o te se omẹ, ọ tẹ ta nọ: “Rri, enọ i bi kpobọ ẹkwotọ ẹkpẹlobọ ovatha-ọre na i ru nọ ẹzi Jihova ọ rọ rrọ ẹkwotọ ẹkpẹlobọ ovatha-ọre na.”
9 Ẹme Jihova ọ tẹ wariẹ bru omẹ ze, inọ: 10 “Mi Hẹldae, Tobaejah, gbe Jedeya eware nọ a wha no obọ ahwo nọ a rrọ igbo ze na; yọ evaọ ẹdẹ yena, who re kpobọ uwou Josaya ọmọzae Zẹfanaya hrọ, whẹ avọ ahwo nana nọ a no obọ Babilọn ze na. 11 Whọ rẹ rehọ isiliva gbe igoru, who ve ru etu-uvie,* who ve ku ei họ uzou Joshua+ ọmọzae Jehozadak, ozerẹ okpehru na. 12 Whọ vẹ ta kẹe nọ,
“‘Enẹ Jihova olori egbaẹmo ọ ta: “Ọzae nọ a re se Okakọ nọ O Dhẹ Ze na ọna.+ Ọ te dhẹ no oria obọriẹ ze, ọ vẹ te bọ etẹmpol Jihova.+ 13 Ọye ọ te bọ etẹmpol Jihova, yọ ọye o ti wo oruaro na. Ọ te keria agbara-uvie riẹ o ve ti su, ọ te jọ ozerẹ re evaọ agbara-uvie riẹ,+ yọ ọtamuo udhedhẹ ọ te jọ udevie ekwa ivẹ na.* 14 Etu-uvie* na o te jọ ekareghẹhọ kẹ Hilẹm, Tobaejah, Jedeya,+ gbe Hẹn ọmọzae Zẹfanaya, evaọ etẹmpol Jihova. 15 Yọ ahwo nọ a rrọ ugbothabọ a te nyaze, a ve ti kuomagbe ebabọ etẹmpol Jihova.” Wha vẹ te riẹ nọ Jihova olori egbaẹmo o vi omẹ bru owhai ze. Yọ ere o te via, otẹrọnọ wha gbẹ ghẹmeeyo kẹ urru Jihova Ọghẹnẹ rai hi.’”
7 Evaọ ukpe avọ ene Dariọs ovie na, ẹme Jihova o te bru Zẹkaraya+ ze evaọ ẹdẹ avọ ene amara avọ izii, koyehọ amara Kislẹv.* 2 Ahwo Bẹtẹl a te vi Shariza avọ Rigẹm-mẹlẹk gbe ahwo riẹ nyae lẹ Jihova inọ o wo aruoriwo kẹ ae,* 3 be nọ izerẹ uwou* Jihova olori egbaẹmo jegbe eruẹaro na nọ: “Kọ u fo re mẹ viẹ evaọ amara avọ isoi+ jẹ siọ emuọriọ ba wọhọ epanọ me bi ru anwọ ikpe buobu ze na?”
4 Ẹme Jihova olori egbaẹmo ọ tẹ wariẹ bru omẹ ze, inọ: 5 “Ta kẹ ahwo ẹkwotọ na kpobi gbe izerẹ na nọ, ‘Nọ wha jẹ siọ emuọriọ ba jẹ viẹ evaọ amara avọ isoi gbe evaọ amara avọ ihrẹ+ evaọ ikpe udhosa-gbikpe na,+ kọ fiki mẹ wha jẹ ginẹ rọ siọ emuọriọ ba? 6 Nọ wha jẹ da jẹ re, kọ ogbẹrọnọ omobọ rai wha jẹ re jẹ da kẹ? 7 Kọ u gbe fo re wha ru lele eme nọ Jihova ọ rehọ eruẹaro ọsosuọ na ta,+ evaọ okenọ ahwo a jẹ rria Jerusalẹm gbe ikpewho nọ e wariẹ e riẹ họ avọ udhedhẹ, gbe okenọ ahwo a jẹ rria Negẹb* na gbe Shefila* na?’”
8 Ẹme Jihova ọ tẹ wariẹ bru Zẹkaraya ze, inọ: 9 “Enẹ Jihova olori egbaẹmo ọ ta, ‘Wha bru uvioziẹ evaọ ẹdhọ rai,+ jẹ rehọ uyoyou nọ o rẹ hiẹ hẹ+ gbe ohrọ lele ohwohwo yeri. 10 Wha fi aye-uku hayo ọmọ nọ o wo ọsẹ hẹ*+ iwhayo ho, te ohwo orẹwho ọfa+ hayo oyogbe;+ yọ wha jọ udu rai ma omaa umuomu kpahe ohwohwo ho.’+ 11 Rekọ a jẹ rọwo kezọ họ,+ a tẹ rọ udu ogaga kiukeku ai,+ a tẹ jẹ tehe ezọ rai di re a seba eyo.+ 12 A ru udu rai gaga wọhọ edaemọno,*+ yọ a je koko uzi* na ha, gbe eme nọ Jihova olori egbaẹmo ọ rehọ ẹkwoma ẹzi riẹ vi se eruẹaro ọsosuọ na inọ a vuẹ ae.+ Fikiere Jihova olori egbaẹmo o te mu ofu ọgaga kẹ ae.”+
13 “‘Nwane wọhọ epanọ a gaviezọ họ evaọ okenọ me* ro se na,+ ere ọvona mẹ gaviezọ họ okenọ a se,’+ ere Jihova olori egbaẹmo ọ ta. 14 ‘Mẹ tẹ rehọ okpofou vaha ae fihọ erẹwho kpobi nọ a riẹ vẹre he,+ a tẹ nyasiọ ẹkwotọ na ba ofofe, ohwo ọvo ọ gbẹ jẹ nyae vrẹ hayo zihe ruọ ẹe eva ha;+ keme a ru ẹkwotọ owowoma na zihe ruọ oware idudu no.’”
8 Ẹme Jihova olori egbaẹmo ọ tẹ wariẹ bru omẹ ze, inọ: 2 “Enẹ Jihova olori egbaẹmo ọ ta: ‘Mẹ te rọ ajọwha ọgaga thọ Zayọn,+ yọ avọ ofu ọgaga mẹ te rọ thọe.’”
3 “Enẹ Jihova ọ ta, ‘Me ti zihe bru Zayọn,+ mẹ vẹ te rria Jerusalẹm;+ a re ti se Jerusalẹm okpẹwho uzẹme,*+ a ve ti se ugbehru Jihova olori egbaẹmo ugbehru ọrẹri.’”+
4 “Enẹ Jihova olori egbaẹmo ọ ta, ‘Ekpọkuezae gbe ekpọkueyae a te wariẹ mu oko-ore Jerusalẹm họ ẹkeria, yọ ọvuọ ubiọkpọ riẹ o ti kru fikinọ a who gaga no.*+ 5 Oko-ore okpẹwho na ọ te vọ avọ emezae gbe emetẹ nọ e be jariẹ zaharo.’”+
6 “Enẹ Jihova olori egbaẹmo ọ ta, ‘Dede nọ o sae jọ wọhọ oware nọ o rrọ bẹbẹ gaga kẹ enọ i kiọkọ evaọ usu ahwo nana evaọ edẹ yena, kọ o rẹ jọ wọhọ oware nọ o rrọ bẹbẹ gaga kẹ omẹ re?’ ere Jihova olori egbaẹmo ọ ta.”
7 “Enẹ Jihova olori egbaẹmo ọ ta, ‘Rri, mẹ te rehọ ahwo mẹ nọ a rrọ obọ ekwotọ ovatha-ọre gbe ukiediwo-ọre na tha.+ 8 Mẹ te rehọ ae ze, a vẹ te rria Jerusalẹm;+ a vẹ te jọ ahwo mẹ, mẹ vẹ te jọ Ọghẹnẹ rai+ evaọ uzẹme* gbe evaọ ẹrẹreokie.’”
9 “Enẹ Jihova olori egbaẹmo ọ ta, ‘Wha kru obọ ga,*+ whae enọ e be jọ unu eruẹaro na yo eme nana enẹna,+ eme evona nọ a ta evaọ ẹdẹ nọ a rọ wọ otọhotọ uwou Jihova olori egbaẹmo họ re a bọ etẹmpol na. 10 Keme taure oke yena u te ti te, a jẹ hwa uvumọ osa fiki ohwo hayo arao ho;+ yọ ozọ o jẹ jọ ahwo ruọ ẹwho na hayo noi hi fiki ọwegrẹ na, keme me ru nọ ahwo na kpobi a jẹ rọ wọso ohwohwo.’
11 “‘Rekọ enẹna, me ti gbe ru enọ i kiọkọ evaọ usu ahwo nana wọhọ epanọ me ru oke ẹdẹ hẹ,’+ ere Jihova olori egbaẹmo ọ ta. 12 ‘Keme a te kọ ubi udhedhẹ; ure evaene o te mọ ibi, otọ na u ti wou ekakọ,+ igrigri i ti kie no obọ ehru ze; yọ me ti ru enọ i kiọkọ evaọ usu ahwo nana reuku eware nana kpobi.+ 13 Yọ, nwane wọhọ epanọ wha zihe ruọ oware ekela evaọ udevie erẹwho na,+ O uwou Juda gbe uwou Izrẹl, ere me ti siwi owhai, wha ve ti zihe ruọ oghale.+ Jọ ozọ u mu owhai hi!+ Wha kru obọ ga.’*+
14 “Keme enẹ Jihova olori egbaẹmo ọ ta, ‘“Nwane wọhọ epanọ mẹ jiroro oke ẹdẹ inọ mẹ rẹ siọ okpẹtu ba erote owhai hi fikinọ esẹ-esẹ rai i ru eva dha omẹ na,” ere Jihova olori egbaẹmo ọ ta, “yọ o da omẹ hẹ na,+ 15 ere ọvona mẹ jiroro no enẹna inọ me re ru ewoma kẹ Jerusalẹm gbe uwou Juda.+ Jọ ozọ u mu owhai hi!”’+
16 “‘Enana họ eware nọ wha re ru: Wha ta uzẹme kẹ ohwohwo,+ re wha jẹ jọ inuethẹ ewho rai bruoziẹ uzẹme nọ o rẹ wha udhedhẹ ze.+ 17 Wha jọ udu rai ma omaa okpẹtu kpahe ohwohwo ho,+ wha you iyei iduwu ọrue he;+ keme me mukpahe eware nana kpobi,’+ ere Jihova ọ ta.”
18 Ẹme Jihova olori egbaẹmo ọ tẹ wariẹ bru omẹ ze, inọ: 19 “Enẹ Jihova olori egbaẹmo ọ ta, ‘Emuọriọ-ọseba amara avọ ene,+ gbe emuọriọ-ọseba amara avọ isoi,+ te emuọriọ-ọseba amara avọ ihrẹ,+ jegbe emuọriọ-ọseba amara avọ ikpe+ e te jọ oke evawere gbe oghọghọ rọkẹ uwou Juda—oke ehaa oghọghọ.+ Fikiere wha you uzẹme gbe udhedhẹ.’
20 “Enẹ Jihova olori egbaẹmo ọ ta, ‘Oke o be tha nọ ogbotu ahwo gbe ahwo nọ a be rria ikpewho buobu a te nyaze; 21 yọ ahwo okpẹwho jọ a te nyabru ahwo okpẹwho ọfa, a vẹ te ta nọ: “Joma rọ ọwhọ nyae lẹ Jihova inọ o wo aruoriwo kẹ omai,* re ma jẹ gwọlọ Jihova olori egbaẹmo. Mẹ be nya re.”+ 22 Ahwo buobu gbe erẹwho egaga e te nyaze te gwọlọ Jihova olori egbaẹmo evaọ Jerusalẹm,+ re a jẹ lẹ Jihova inọ o wo aruoriwo kẹ ae.’*
23 “Enẹ Jihova olori egbaẹmo ọ ta, ‘Evaọ edẹ yena ezae ikpe evaọ evẹrẹ erẹwho na kpobi+ a rẹ te jabọ kru, ẹhẹ, a te zaza abọ mu ewu othethei* ohwo Ju,* yọ a be ta nọ: “Ma gwọlọ lele owhai,+ keme ma yo nọ Ọghẹnẹ ọ rrọ kugbe owhai.”’”+
9 Enẹ Ọghẹnẹ o whowho via:
“Ẹme Jihova ọ rọsuọ ẹkwotọ Hedrak,
—Keme ubiẹro Jihova u bi rri ahwo-akpọ+
Jegbe erua Izrẹl kpobi—
2 Ẹme na ọ tẹ jẹ rọsuọ Hemat,+ ọnọ a gbẹ rrọ uwhru,
3 Taya ọ ma ogba* wariẹ oma riẹ họ.
koko isiliva họ wọhọ uwẹkpẹ
Jegbe igoru wọhọ erara nọ e rrọ iyẹrẹ.+
4 Rri! Jihova ọ te rehọ ekwakwa riẹ vrẹ,
O ve ti kpe egbaẹmo riẹ fihọ abade;*+
Erae e vẹ te mahe iẹe muotọ.+
5 Ashkelọn ọ te ruẹ e riẹ, ozọ u ve ti mu ei;
Edada egaga e te jọ Gaza oma,
Ere o te jọ kẹ Ekrọn re, keme a kpomovuọ họ ẹruore riẹ oma no.
Ovie ọ gbẹ te jọ Gaza ha,
Yọ a gbẹ te rria Ashkelọn ho.+
6 Ọmọzae nọ ọsẹ hayo oni riẹ ọ rrọ ohwo orẹwho ọfa ọ rẹ te rria Ashdọd,
Yọ me ti si omoya ohwo Filistia na no.+
7 Me ti si eware nọ azẹ o wholo na no unu riẹ
Je si emu ọtọtọ na no ibiakọ riẹ,
Ahwo nọ a kiọkọ eva riẹ a vẹ te jọ kẹ Ọghẹnẹ;
Ọ vẹ te jọ wọhọ oletu-orua evaọ Juda,+
Ekrọn ọ vẹ te jọ wọhọ ohwo Jebus.+
8 Mẹ te bọ umuwou jọ fihọ otafe, mẹ vẹ jọ etẹe rou* uwou mẹ,+
Re ohwo ọvo ọ gbẹ nyaruọ ẹe hayo noi hi;
Yọ ohwo ọvo nọ ọ rẹ gba ae họ ru iruo* ọ gbẹ te nyaruọ ẹe he,+
Keme ibiaro mẹ e ruẹ oware nọ o be via* kẹ ae no.
9 Ghọghọ gaga, O ọmọtẹ Zayọn.
Bo ubo obokparọ, O ọmọtẹ Jerusalẹm.
Rri! Ovie ra ọ be nyabru owhẹ ze,+
10 Me ti si akẹkẹ ẹmo no Ifremu
Je si anyenya no Jerusalẹm.
A te tọlọ uze nọ a re ro fi ẹmo vrẹ.
Yọ o ti whowho udhedhẹ kẹ erẹwho na;+
Isuẹsu riẹ i ti no abade rite abade
11 Rọkẹ owhẹ, O aye,* fiki azẹ ọvọ nọ mẹ avọ owhẹ a re,
Me ti si ahwo ra nọ a rrọ uwou-odi evaọ ọgọdọ nọ ame ọ rrọ họ na ze.+
12 Zihe kpohọ oria omofọwẹ na, whai enọ e rrọ uwou-odi nọ i wo ẹruore.+
13 Mẹ te vẹ* Juda wọhọ uze mẹ.
Ifremu me ti fihọ uze na.*
Mẹ te rọwo emezae ra ze, O Zayọn,
Rọsuọ emezae ra, O Grisi,
Yọ me ti ru owhẹ jọ wọhọ ọgbọdọ ọgbaẹmo.’
14 A te ruẹ nọ Jihova ọ rrọ kugbe ae,
Yọ ose riẹ o te rra vrẹ wọhọ elo agbrara.
Jihova Olori nọ Ọ Mai Kpehru na o ti kporo onware na,+
Ọ vẹ te wọ lahwe wọhọ ifou ọwhibo obọze ovatha-ọre.
15 Jihova olori egbaẹmo ọ te thọ ae,
A vẹ te raha je thihi ibitho nọ a re fihọ udeme nyaotọ.+
A te da je ru edo wọhọ ẹsenọ a be da enwaene;
Eva e te vọ ae wọhọ omodhe okokodo nọ a jẹ vọ,
Wọhọ ibienẹ agbada-idhe.+
16 Jihova Ọghẹnẹ rai o ti siwi ai evaọ ẹdẹ yena
Keme uthuru ahwo riẹ a rrọ;+
A te jọ wọhọ itho eghaghae nọ e rrọ etu-uvie* nọ o bi lo nwranwranwra mu otọ riẹ.+
17 Ewoma riẹ o wo umuo ho,+
A rẹ ruẹ obọ erru riẹ hẹ!
Emu o ti ru izoge emezae na jọ gaga,
Ere ọvona enwaene ọkpokpọ u ti ru emetẹ-kọkọ na jọ re.”+
10 “Wha yare Jihova re oso ọ rrọ evaọ oke iso obọ ekuhọ okiewhru.
Jihova họ ọnọ o re ru ehru na bi,
Ọye o re ru oso rrọ kẹ ahwo,+
Je ru ẹbe gbe ekakọ dhẹ ze evaọ idhu rọkẹ ohwo kpobi.
A be ta ewezẹ nọ i fioka ha,
Yọ a be daoma kẹ omosasọ ufofe.
Fikioye a ti ro ghoro wọhọ igodẹ.
A te ruẹ uye, keme othuru-igodẹ ọ riẹ hẹ.
3 Eva ithuru-igodẹ na e be dha omẹ gaga,
Mẹ te rehọ isu okienyẹ* na guẹdhọ;
Keme Jihova olori egbaẹmo o zihe bru uthuru riẹ no,+ uwou Juda,
Yọ o ru rai nọ a rọ wọhọ anyenya ọgaga riẹ nọ ọ rrọ ẹmo.
4 Obọ riẹ osu* na o no ze,
Obọ riẹ osu nọ ọ rrọ ethabọ* na o no ze,
Obọ riẹ uze nọ a ro fi ẹmo na o no ze;
Obọ riẹ ohwo kpobi nọ ọ rrọ ọsẹro* o no ze, aikpobi na obọ riẹ a no ze.
5 A te jọ wọhọ egbaẹmo
Nọ i bi thihi ọloho iyẹrẹ na vrẹ evaọ ẹmo.
6 Me ti ru uwou Juda ga obọ vi amọfa kpobi,
Me ve ti siwi uwou Josẹf.+
Me ti zihe ae ze,
Keme mẹ te re ae ohrọ;+
A vẹ te jọ wọhọ ẹsenọ me gbolo i rai kufiẹ vẹre vievie he;+
Keme mẹ họ Jihova Ọghẹnẹ rai, yọ me ti yo kẹ ae.
7 Ahwo Ifremu a te jọ wọhọ ọgbaẹmo ọgaga hrọ,
Oghọghọ o te jọ udu rai wọhọ ẹsenọ a be da enwaene.+
8 ‘Mẹ te rehọ oviọlọ se ae je koko ae họ;
Keme mẹ te ta ai no igbo,+ a vẹ te jọ buobu,
Yọ a ti dhe ebuebu.
9 Dede nọ mẹ vaha e rai wọhọ ibi fihọ udevie ahwo na,
A te kareghẹhọ omẹ evaọ ugbothabọ nọ a rrọ;
Te ai te emọ rai a ti dhidhi aro vi, a ve ti zihe ze.
10 Mẹ te rehọ ai zihe no ẹkwotọ Ijipti ze
Je koko ae họ no obọ Asiria ze;+
Mẹ te rehọ ae ziọ ẹkwotọ Giliad+ gbe Lebanọn,
Yọ a ti bu te epanọ otọ na o gbẹ te rọ gba ae he.+
11 Ọ te wha ẹvohẹ họ abade na hrọ nọ ọ te nyae vrẹ;
Ẹkporo ọ tẹ be zai dhe, ọ te tehe iẹe fihọ otọ;+
Ame Ethẹ Naele na soso ọ te kpọ no.
A ti hrẹ omoya Asiria kpotọ,
Ọkpọ-isuẹsu Ijipti ọ gbẹ te jariẹ hẹ.+
12 Mẹ Jihova, me ti ru ae ga obọ vi amọfa kpobi,+
Yọ a te nya kpenẹ avọ enẹ evaọ odẹ mẹ,’+ ere Jihova ọ ta.”
11 “O Lebanọn, rovie ethẹ ra,
Re erae e mahe ire sida ra no.
2 Kuenu oviẹ, whẹ ure junipa, keme ure sida na u kie no;
A raha ire ilogbo na no!
Kuenu oviẹ, whai ire ok obọ Beshan,
Keme a kpe owhawho na fihọ otọ no!
3 Gaviezọ! Ithuru-igodẹ i bi kuenu oviẹ,
Keme a raha oruaro rai no.
Gaviezọ! Ikpohrokpo egaga* i bi do enu,
Keme a kpe ewhawho nọ e rrọ akotọ Jọdan na no.
4 “Enẹ Jihova Ọghẹnẹ mẹ ọ ta, ‘Rẹrote igodẹ nọ a ti kpe na,+ 5 enọ ahwo nọ a dẹ rai a te kpe ai,+ a re brukpe ai hi. Yọ enọ e be zẹ ae e be ta nọ,+ “Jọ ujiro u te Jihova, keme me ti fe.” Enọ e be rẹrote ai i wo ọdawẹ kẹ ae he.’+
6 “‘Me ti gbe dhesẹ ọdawẹ kẹ ahwo nọ a be rria ẹkwotọ na ha,’ ere Jihova ọ ta. ‘Fikiere me ti ru omomọvo re o kie ruọ obọ ọrivẹ riẹ gbe ovie riẹ; a te raha ẹkwotọ na, yọ me ti siwi ai no obọ rai hi.’”
7 Me te mu ẹro họ erote igodẹ nọ a ti kpe na,+ fiki rai, O whai enọ e be reoja evaọ uthuru na. Mẹ tẹ tọlọ ekpọ ivẹ, me te se ọjọ Omaweromẹ, me te se ọdekọ Okugbe,+ me te mu ẹro họ erote igodẹ na. 8 Me si ithuru-igodẹ esa no iruo evaọ amara ọvo, fikinọ a vẹso omẹ no, yọ a mukpahe omẹ gaga. 9 Mẹ tẹ ta nọ: “Mẹ te gbẹ rẹrote owhai hi. Jọ ọnọ o bi whu o whu, jọ ọnọ o bi vru o vru. Jọ enọ i kiọkọ e re uwo-oma ohwohwo no.” 10 Fikiere mẹ tẹ tọlọ ọkpọ mẹ nọ a re se Omaweromẹ,+ mẹ tẹ gbẹre iẹe ibribro ro dhesẹ nọ mẹ raha ọvọ nọ mẹ re kugbe ahwo na kpobi no. 11 Ere ọ rọ raha no evaọ ẹdẹ yena, yọ enọ e be reoja evaọ uthuru na nọ i je rri omẹ a riẹ nọ ere Jihova ọ ta.
12 Kẹsena mẹ tẹ ta kẹ ae nọ: “Otẹrọnọ o were owhai, wha kẹ omẹ osa mẹ; rekọ otẹrọnọ o were owhai hi, wha kru ei.” A tẹ hwa osa mẹ,* ewẹ isiliva ọgba.+
13 Kẹsena Jihova ọ tẹ ta kẹ omẹ nọ: “Gbolo iei fihọ oria ekwakwa-aghae na—unuigho nọ o mai bu nọ a rri nọ mẹ ghare te na.”+ Fikiere mẹ tẹ tọlọ ewẹ isiliva ọgba na, me te gbolo ai fihọ oria ekwakwa-aghae nọ o rrọ uwou Jihova na.+
14 Kẹsena mẹ tẹ gbẹre ọkpọ avọ ivẹ mẹ nọ a re se Okugbe+ na ibribro, onọ u dhesẹ nọ mẹ raha okugbe-inievo nọ o rrọ udevie Juda avọ Izrẹl no.+
15 Jihova ọ tẹ ta kẹ omẹ nọ: “Enẹna, tọlọ okwakwa othuru-igodẹ nọ o fioka ha.+ 16 Keme mẹ be kẹ othuru-igodẹ jọ uvẹ re o mu via evaọ ẹkwotọ na. Ọ te rẹrote igodẹ nọ i bi whu no ho;+ ọ te gwọlọ esese na lahwe he hayo siwi enọ e nwoma ha.+ Yọ enọ oma rai o ga, ọ te kuọ ae he. Ukpoye, ọ te re uwo-oma ọnọ ọ rrọ poriẹ poriẹ no,+ je wolo ekothawọ igodẹ na no.+
17 Uye u te othuru-igodẹ mẹ nọ o fioka ha,+ ọnọ o bi gbabọkẹ uthuru na!+
Ọgbọdọ o ti duwu ugbobọ riẹ gbe ubiẹro obọze riẹ.
Ugbobọ riẹ o te ko no riẹriẹriẹ,
Yọ ubiẹro obọze riẹ u ti tu* no riẹriẹriẹ.”
12 Enẹ Ọghẹnẹ o whowho via:
“Nọ ẹme Jihova kpahe Izrẹl,” ere Jihova ọ ta,
Ọnọ ọ rriẹ idhiwu na fihọ,+
Ọnọ ọ wọ otọhotọ otọakpọ na họ,+
Ọnọ ọ ma ẹzi* nọ ọ rrọ oma ohwo.
2 “Me bi ru Jerusalẹm fihọ egho* nọ o ti ru ahwo kpobi nọ a wariẹ e riẹ họ kpo geli geli; yọ a ti ko Juda gbe Jerusalẹm họ.+ 3 Evaọ ẹdẹ yena, me ti ru Jerusalẹm họ utho ogbẹgbẹdẹ kẹ ahwo na kpobi. Ahwo kpobi nọ a te kpare iẹe a te nwoma gaga;+ yọ erẹwho otọakpọ na kpobi i ti kokohọ rọsuọ ẹe.+ 4 Evaọ ẹdẹ yena,” ere Jihova ọ ta, “mẹ te whẹ ozọ họ anyenya kpobi oma, je fou enọ e be dhẹ ae họ oruẹ. Mẹ te tẹrovi jẹ sẹro uwou Juda, rekọ me ti ru enyenya ahwo na kpobi tuaro. 5 Iletu-orua Juda a te jọ udu rai ta nọ, ‘Ahwo nọ a be rria Jerusalẹm a ru omai wo ogaga no ẹkwoma Jihova olori egbaẹmo, Ọghẹnẹ rai.’+ 6 Evaọ ẹdẹ yena, me ti ru iletu-orua Juda jọ wọhọ uwho nọ o be ware erae evaọ udevie ire jẹ wọhọ umure-erae nọ o be ware evaọ udevie uhie eka nọ a bru fihọ otọ,+ a rẹ te mahe ahwo kpobi nọ a wariẹ e rai họ no, te enọ e rrọ obọze gbe ẹkpẹlobọ;+ ahwo a vẹ te wariẹ mu Jerusalẹm họ ẹria evaọ oria riẹ,* evaọ Jerusalẹm.+
7 “Jihova ọ te kaki siwi iwou-udhu Juda, re erru* uwou Devidi jegbe erru* ahwo nọ a be rria Jerusalẹm o gbe vi orọ Juda ha. 8 Evaọ ẹdẹ yena, Jihova ọ te thọ ahwo nọ a be rria Jerusalẹm;+ evaọ ẹdẹ yena, ọnọ o zoruẹ* evaọ usu rai ọ te jọ wọhọ Devidi, yọ uwou Devidi o te jọ wọhọ Ọghẹnẹ, wọhọ ukọ-odhiwu Jihova nọ ọ be karo kẹ ae.+ 9 Yọ evaọ ẹdẹ yena, mẹ te siọ erẹwho kpobi nọ e be rọsuọ Jerusalẹm ba ẹraha ha.+
10 “Me ti ku ẹzi aruoriwo gbe ẹzi olẹ ayare-ọgaga ku uwou Devidi avọ ahwo nọ a be rria Jerusalẹm, a ve ti rri ọnọ a duwu na,+ a vẹ te viẹ gaga fiki riẹ wọhọ epanọ a rẹ viẹ nọ ọmọzae ọvo nọ ohwo o yẹ o te whu; a ve ti je weri gaga fiki riẹ wọhọ epanọ a re weri nọ ọmọzae ọsosuọ nọ ohwo o yẹ o te whu. 11 Evaọ ẹdẹ yena, oviẹ nọ o te jọ Jerusalẹm o te jọ gaga, wọhọ epanọ a jẹ viẹ evaọ Hedadrimọn nọ o rrọ Otọ Opraprara Mẹgido.+ 12 Oviẹ o te jọ ẹkwotọ na soso, unuwou kpobi o te jọ oria riẹ sa viẹ; unuwou Devidi evaọ oria riẹ sa, eyae rai evaọ oria rai sa; unuwou Netan+ evaọ oria riẹ sa, eyae rai evaọ oria rai sa; 13 unuwou Livae+ evaọ oria riẹ sa, eyae rai evaọ oria rai sa; unuwou Shimia+ evaọ oria riẹ sa, eyae rai evaọ oria rai sa; 14 yọ inuwou efa kpobi nọ i kiọkọ e te jọ ọvuọ unuwou riẹ viẹ, eyae rai e te jọ oria rai sa viẹ re.
13 “Evaọ ẹdẹ yena, a te tọ oza kẹ unuwou Devidi gbe ahwo nọ a be rria Jerusalẹm nọ a ti ro ru ai fo no uzioraha gbe egbegbe rai.”+
2 “Evaọ ẹdẹ yena,” ere Jihova olori egbaẹmo ọ ta, “me ti voro edẹ emedhọ na no ẹkwotọ na,+ a gbẹ te kareghẹhọ ae vievie he; yọ me ti si eruẹaro+ gbe ẹzi egbegbe no ẹkwotọ na. 3 Otẹrọnọ ọzae jọ ọ be wariẹ ruẹaro, ọsẹ gbe oni nọ i yẹ riẹ a te ta kẹe nọ, ‘Who ti whu, keme whọ rehọ odẹ Jihova ta ọrue.’ Ọsẹ riẹ gbe oni riẹ nọ a yẹ riẹ a ve ti duwu iei lafi fiki aruọruẹ riẹ.+
4 “Evaọ ẹdẹ yena, nọ ọruẹaro ọ tẹ be ruẹaro, oma eware nọ ọ be ta e te vuọ ẹe; yọ a ti gbe ku ewu eto*+ họ họ re a rọ viẹ ahwo họ. 5 Ọ te ta nọ, ‘Mẹ yọ ọruẹaro ho. Mẹ yọ ọwhẹrẹ,* keme ohwo jọ ọ dẹ omẹ okenọ mẹ jọ ọmaha.’ 6 Yọ otẹrọnọ ohwo jọ ọ nọ riẹ nọ, ‘Kinọ ela vẹ e rrọ owhẹ oma na?’* o ti yo nọ, ‘Nọ oma nọ mẹ nwa evaọ obọ uwou egbẹnyusu mẹ.’”*
7 “O ọgbọdọ, rọwo no owezẹ ze rọsuọ othuru-igodẹ mẹ,+
Jẹ rọsuọ ọzae nọ ọ rrọ ogbẹnyusu mẹ,” ere Jihova olori egbaẹmo ọ ta.
8 “Evaọ ẹkwotọ na soso,” ere Jihova ọ ta,
“A te rehọ abava ahwo nọ a rrọ eva riẹ vrẹ, a ve ti whu;
Abọ avọ esa na o ve ti kiọkọ eva riẹ.
9 Me ti fi abọ avọ esa na họ erae;
Me ve ti ru ai fo wọhọ epanọ a re ru isiliva fo na,
Jẹ dawo ae wọhọ epanọ a rẹ dawo igoru.+
A ti se odẹ mẹ,
Me ve ti yo kẹ ae.
Mẹ te ta nọ, ‘Ahwo mẹ a rrọ,’+
A vẹ te ta nọ, ‘Jihova họ Ọghẹnẹ mai.’”
14 “Rri! Ẹdẹ na ọ be tha, ẹdẹ nọ ọ rrọ rọkẹ Jihova, nọ a te rọ jọ eva ra* ghale egbo-ẹmo nọ a jọ eva ra kwa. 2 Me ti koko erẹwho na kpobi họ rọsuọ Jerusalẹm rọkẹ ẹmo na; yọ a ti fi okpẹwho na kparobọ, a vẹ te kwa eware nọ e rrọ iwou na rehọ jẹ gba eyae na du. Abọvo ahwo okpẹwho na a ti kpohọ igbo, rekọ a te rehọ ahwo nọ a kiọkọ no okpẹwho na ha.
3 “Jihova ọ te wọ lahwe, o ve lele erẹwho yena+ fi ẹmo wọhọ epanọ ọ rẹ họre evaọ ẹdẹ ẹmo.+ 4 Evaọ ẹdẹ yena, awọ riẹ o ti dikihẹ ehru Ugbehru Olivi,+ onọ o rẹriẹ ovao ku Jerusalẹm evaọ ofẹ ovatha-ọre; Ugbehru Olivi na o vẹ te hẹriẹ kpohọ abava, no ovatha-ọre rite ukiediwo-ọre,* u ve ti ru ukiekpotọ ulogbo romavia; abọjọ ugbehru na u ti go kpohọ ẹkpẹlobọ ovatha-ọre, abọdekọ riẹ u ve ti go kpohọ obọze ovatha-ọre. 5 Wha te dhẹ kpohọ ukiekpotọ igbehru mẹ, keme ukiekpotọ igbehru na o te kẹre te ugbo obọ Ezẹl. Wha te dhẹ, nwane wọhọ epanọ wha dhẹ fiki otọ nọ u nuhu evaọ edẹ Uzaya ovie Juda.+ Jihova Ọghẹnẹ mẹ ọ te nyaze, yọ erẹri na kpobi e te jọ kugbei.+
6 “Evaọ ẹdẹ yena, elo ọnwranwra ọvo ọ te jariẹ hẹ+—eware i ti dhẹmu.* 7 O te jọ ẹdẹ ọvo nọ a riẹ nọ ọ rrọ rọkẹ Jihova.+ O te jọ uvo ho, o te jọ aso gbe he; yọ evaọ owọwọ elo ọ te jariẹ. 8 Evaọ ẹdẹ yena, ame uzuazọ+ o ti su no Jerusalẹm vrẹ,+ abọvo ame na o ti su rri ofẹ abade ovatha-ọre na,*+ abọ nọ o kiọkọ o ve ti su rri ofẹ abade ukiediwo-ọre na.*+ Onana o te via evaọ ezi ivo gbe ezi ekpahe. 9 Jihova ọ vẹ te jọ Ovie nọ o bi su otọakpọ na soso.+ Evaọ ẹdẹ yena Jihova ọ te jọ ọvo,+ yọ odẹ riẹ o te jọ ọvo.+
10 “Ẹkwotọ na soso ọ te jọ wọhọ Araba*+ na, no Giba+ rite Rimọn+ nọ o rrọ obọze ovatha-ọre Jerusalẹm; yọ ọ te vatha evaọ oria riẹ,+ a vẹ te rriae eva, no Unuẹthẹ Bẹnjamin+ rite obonọ Unuẹthẹ Ọsosuọ na o rrọ, rite ugbo obọ Unuẹthẹ Ubienẹ na, je no Uwou Ukpehru Hananẹl+ rite ugbo obọ eria udi-uruo* ovie na. 11 Ahwo a te rria eva riẹ; yọ a gbẹ te wariẹ bọwo okpẹwho nana ehao vievie he, onọ o rẹ wha ọraha ze,+ ahwo a vẹ te rria Jerusalẹm avọ omofọwẹ.+
12 “Onana họ uye nọ Jihova ọ te kẹ ahwo kpobi nọ a wọ ẹmo bru Jerusalẹm ze:+ Uwo-oma rai u ti gbo no evaọ epanọ a ro dikihẹ na, ibiaro rai i ti gbo no evaọ ighogho-ibiaro rai, yọ ẹrọo rai o ti gbo no evaọ unu rai.
13 “Evaọ ẹdẹ yena, Jihova ọ te whẹ ozighi ologbo họ udevie rai; yọ omomọvo rai ọ te jabọ kru obọ ọrivẹ riẹ, obọ riẹ o vẹ te rọsuọ obọ ọrivẹ riẹ.*+ 14 Juda o ti wobọ re evaọ ẹmo Jerusalẹm na; yọ a ti koko ekwakwa efe erẹwho nọ e wariẹ e rai kpobi họ, igoru avọ isiliva gbe iwu buobu.+
15 “Yọ oghẹrẹ uye yena u ti te enyenya, isi,* ekamẹle, eketekete, gbe erao kpobi nọ e rrọ ivuẹ yena re.
16 “Ohwo kpobi nọ o kiọkọ evaọ erẹwho nọ e wọ ẹmo bru Jerusalẹm na ọ te nya kpobọ Jerusalẹm kukpe kukpe+ re o guzou kpotọ kẹ* Ovie na, Jihova olori egbaẹmo,+ o ve je ru Ehaa Iwou-Owhre na.*+ 17 Rekọ otẹrọnọ ohwo jọ evaọ inuwou otọakpọ na o gbe kpobọ Jerusalẹm nyai guzou kpotọ kẹ Ovie na, Jihova olori egbaẹmo ho, oso ọ te rrọ kẹ ae he.+ 18 Yọ otẹrọnọ unuwou Ijipti o gbẹ nyaze jẹ ruọ eva okpẹwho na ha, oso ọ te rrọ kẹ ae he. Ukpoye, a ti wo oghẹrẹ uye nọ Jihova ọ te kẹ erẹwho nọ e nyaze ti ru Ehaa Iwou-Owhre na ha. 19 Onana họ uye nọ o te romavia fiki uzioraha Ijipti gbe uzioraha erẹwho kpobi nọ e nyaze ti ru Ehaa Iwou-Owhre na ha.
20 “Evaọ ẹdẹ yena a ti kere ẹme na ‘Jihova họ ọrẹri’+ fihọ igogo nọ a thuru si enyenya na. Yọ iwho*+ nọ e rrọ uwou Jihova e te jọ wọhọ imidhe ikokodo+ nọ e rrọ aro agbada-idhe na. 21 Uwho* kpobi nọ o rrọ Jerusalẹm gbe Juda o te jọ ọrẹri, yọ o te jọ rọkẹ Jihova olori egbaẹmo. Ahwo kpobi nọ a bi dhe idhe a te ruọ eva, a vẹ rehọ ejọ rai there emu. Evaọ ẹdẹ yena, ohwo Kenan* ọ te gbẹ jọ uwou Jihova olori egbaẹmo ho.”+
Otofa riẹ họ “Jihova Ọ Kareghẹhọ No.”
Hayo “zihe.”
Rri Ẹme-Ofiba B15.
Koyehọ, a ma igbẹhẹ wariẹe họ họ.
Hayo “ubiẹro mẹ.”
Hayo “ahwo-akpọ.”
Hayo “abe-ọriọ.”
Hayo “iwu ithethei nọ a re ro ru ehaa.”
Hayo “wuzou; rou.”
Hayo “ihosu.”
Hayo “eware esese.”
Evaọ Hibru, “utho na, ugbogbo na.”
Koyehọ, egha nọ ibi i thuru vọ evaọ ure na.
Hayo “egbagana.”
Ikiubiti o theri te 44.5 cm (17.5 in.). Rri Ẹme-Ofiba B14.
Evaọ Hibru, “ifa.” Ifa nọ a jọ etenẹ fodẹ na yọ odhe hayo ebaskẹte nọ o rrọ owawọ ifa. Yọ ilita 22 (20 dry qt) e rẹ vọ ifa. Rri Ẹme-Ofiba B14.
Koyehọ, Babilonia.
Hayo “etu-uvie ologbo.”
Koyehọ, udevie ọkwa osu avọ ozerẹ nọ ọ rrọ na.
Hayo “Etu-uvie ologbo.”
Rri Ẹme-Ofiba B15.
Hayo “re ovao riẹ o ghariẹ.”
Hayo “etẹmpol.”
Hayo “obọze ovatha-ọre.”
Hayo “otọ ukpokpotọ.”
Hayo “ọmọ nọ o wo ọsẹgboni hi.”
Hayo o sae jọ nọ, “utho ọgaga,” wọhọ utho ẹmari.
Hayo “ru lele uthubro.”
Evaọ Hibru, “o.”
Hayo “ọtẹruo.”
Evaọ Hibru, “fikinọ a rria edẹ buobu no.”
Hayo “ọtẹruo.”
Hayo “Wha kru udu ga.”
Hayo “Wha kru udu ga.”
Hayo “re ovao riẹ o ghariẹ.”
Hayo “re ovao riẹ o ghariẹ.”
Hayo “obotọ ewu.”
Evaọ Hibru, “ọzae ohwo Ju.”
Evaọ Hibru, “Damaskọs họ oria eriosehọ riẹ.”
Hayo “ugbuhru; oria adhẹzọ.”
Hayo o sae jọ nọ, “evaọ abade.”
Hayo “rroro.”
Hayo “ohwo nọ o re kienyẹ ahwo.”
O wọhọ nọ o be ta kpahe oja nọ ahwo riẹ a be re.
Hayo “ọ kparobọ; je wo esiwo.”
Hayo “eketekete ọzae.”
Koyehọ, “Yufretis.”
Koyehọ, “Zayọn hayo Jerusalẹm.”
Koyehọ, “Zayọn hayo Jerusalẹm.”
Evaọ Hibru, “Me ti thihi.”
Koyehọ, wọhọ ose.
Hayo “etu-ọkwa.”
Hayo “edhọ uviuwou; emedhọ.” Rri oria Otofa Eme.
Hayo “eme nọ a sae riẹ otọ rai hi.”
Evaọ Hibru, “ikri.”
Evaọ Hibru, “uwou ukpehru ubienẹ,” u dhesẹ ohwo nọ o wuzou; ichifi.
Evaọ Hibru, “ubioja hayo ọkpọ,” u dhesẹ ọnọ ọ rrọ ethabọ; osu.
Hayo “ọnọ o re dhe iruo kẹ ahwo.”
Hayo “udu.”
Hayo “Ikpohrokpo nọ e rrọ whẹvu.”
Evaọ Hibru, “wawọ osa mẹ ze.”
Evaọ Hibru, “dhe.”
Hayo “ẹwẹ.”
Hayo “omodhe okokodo.”
Hayo “oria riẹ nọ u fo.”
“oruaro.”
Hayo “oruaro.”
Hayo “ọnọ oma o lọhọ kpobi no.”
Hayo “ewu ọruẹaro.”
Hayo “ohwo nọ o re kporo udhu.”
Evaọ Hibru, “udevie abọ ra na?” Koyehọ, evaọ udu hayo uke.
Hayo “enọ i you omẹ.”
Hayo “igodẹ na e.”
Koyehọ, okpẹwho nọ a jọ owọ avọ 2 fodẹ na.
Evaọ Hibru, “abade na.”
Hayo “i ti no oria ovo ho,” wọhọ ẹsenọ e ghọ no fiki edhedhẹ.
Koyehọ, Abade Owhuowhu na.
Koyehọ, Abade Mediterenia.
Hayo “udhude opraprara.”
Hayo “egọdọ udi-uruo.”
“a vẹ te họre ohwohwo.”
Arao nọ anyenya avọ eketekete a re yẹ nọ a tẹ wezẹ kugbe.
Hayo “re ọ gọ.”
Hayo “Imiwou Ubroke.”
Hayo “iwho nọ enu rai ọ rrọ kẹkẹe.”
Hayo “Uwho nọ enu riẹ ọ rrọ kẹkẹe.”
Hayo o sae jọ nọ, “ọthueki.”