Jọ Ogbẹnyusu Ọghẹnẹ Bẹdẹ Bẹdẹ!

O rẹ rehọ omodawọ re a mu ogbẹnyusu; o rẹ rehọ omodawọ re a yọrọ ogbẹnyusu na. A te ghale omodawọ nọ who bi ro mu jẹ yọrọ usu kugbe Ọghẹnẹ na gaga. Jesu ọ ta kẹ enọ e rọwo riẹ nọ: “Uzẹme na u re ti ru owhai emuyẹ.” (Jọn 8:32) Eme oyena u dhesẹ?

Whọ rẹ sae reawere ufuoma enẹna. Whọ rẹ sai wo ufuoma rono iwuhrẹ erue gbe erue nọ Setan ọ vaha na. Whọ rẹ sai wo ufuoma rono ababọ-ẹruore nọ ọ vọ izuazọ imaa ahwo buobu nọ a riẹ Jihova ha na. (Ahwo Rom 8:22) Egbẹnyusu Ọghẹnẹ a tube wo ufuoma rono “ozọ uwhu.”​—Ahwo Hibru 2:14, 15.

Whọ rẹ sae reawere ufuoma evaọ akpọ ọkpokpọ Ọghẹnẹ. Didi ufuoma ugbunu whọ sae te reawere riẹ evaọ obaro! Evaọ Aparadase otọakpọ na, ufuoma rono ẹmo, ẹyao, gbe egbulegbu o te jariẹ. Ufuoma rono uvuhu gbe ohọo. Ufuoma rono ikpe owho gbe uwhu. Ufuoma rono ozọ, okienyẹ, gbe oziẹbro-okienyẹ. Ebaibol na ọ ta kpahe Ọghẹnẹ nọ: “Who rovie abọ ra, who te bi ru ẹgwọlọ eware nọ i wo uzuazọ kpobi rọ kẹ ae.”​—Olezi 145:16.

Egbẹnyusu Ọghẹnẹ e te rria bẹdẹ bẹdẹ. Uzuazọ ebẹdẹ bẹdẹ yọ okẹ oghaghae nọ Ọghẹnẹ ọ te rọ kẹ ahwo nọ a be gwọlọ usu riẹ kpobi. (Ahwo Rom 6:23) Dai roro oware nọ uzuazọ ebẹdẹ bẹdẹ o te jọ k’owhẹ!

Who ti wo oke nọ who re ro ru eware buobu. Ẹsejọhọ whọ te gwọlọ wuhrẹ oghẹrẹ nọ a re kporo okwakwa ile jọ. Hayo ẹsejọhọ whọ gwọlọ wuhrẹ oghẹrẹ nọ a rẹ rọ ralọ iwoho hayo re whọ jọ ọwena. Whọ sae gwọlọ wuhrẹ kpahe erao hayo ekakọ. Hayo whọ sae gwọlọ kpohọ erẹ re whọ ruẹ ekwotọ gbe ahwo sa-sa. Ewo uzuazọ ebẹdẹ bẹdẹ u ti ru eware enana kpobi lọhọ!

Who ti wo oke nọ who re ro mu egbẹnyusu buobu. Ẹrria ebẹdẹ bẹdẹ u ti ru ei lọhọ re whọ riẹ amọfa buobu nọ i zihero egbẹnyusu Ọghẹnẹ no. Whọ te riẹ ona gbe ekwakwa obọdẹ rai, yọ a te jọ egbẹnyusu ra re. Who ti you rai, a ve je you owhẹ. (1 Ahwo Kọrint 13:8) Ewo uzuazọ nọ u wo oba ha o te k’owhẹ oke nọ whọ te rọ jọ ogbẹnyusu ohwo kpobi evaọ otọakpọ na! Mai woma kpaobọ, usu ra kugbe Jihova o te rro ga viere nọ ikpe udhusoi buobu e te vrẹ na. Ajọ owhẹ jọ ogbẹnyusu Ọghẹnẹ bẹdẹ bẹdẹ!