Esio ‘Ame Odidi’

ITẸ Ebaibol jọ o ta nọ: “Iroro nọ e rọ eva ohwo e wọhọ edidi ame, rekọ ohwo nọ ọ rẹ riẹ otọ oware ọ rẹ rehọ iroro na via.” (Itẹ 20:5) Evaọ oke Ebaibol, o mae jọ bẹbẹ re a vo ame vi epanọ o rọ evaọ ekuotọ buobu nẹnẹ. Okenọ Jesu o lele aye ohwo Sameria t’ẹme, o je si ame no ozae Jekọp ze, ozae nọ u di te irula 75!—Jọn 4:5-15.

Wọhọ epanọ Itẹ 20:5 u dhesẹ, orimuo nọ a gwọlọ re a riẹ iroro udu gbe isiuru nọ o rọ ohwo eva o wọhọ omodawọ nọ a re ro si ame no ozae ze. Onana o rọ uzẹme evaọ abọ buobu uzuazọ. Wọhọ oriruo, ẹsejọhọ whọ riẹ ahwo nọ i wo eriariẹ gbe ereghẹ buobu no evaọ ikpe enana kpobi. Otẹrọnọ ahwo nana a gwọlọ rehọ udu obọ rai kẹ ohrẹ hẹ, koyehọ u fo nọ who re si ai lahwe. Ẹkwoma edhesẹ isiuru, ẹnọ enọ, jẹ rehọ areghẹ nya kodo, o rẹ jọ epaọ ẹsenọ who gbolo ubokiti ra fihọ ozae odidi areghẹ.

Ohrẹ Itẹ 20:5 o rọ uzẹme re evaọ uviuwou. Ẹsibuobu ma re yo eyae nọ e rẹ ta nọ: “Ọzae mẹ ọ rẹ ta iroro eva riẹ k’omẹ hẹ!” Ọzae ọ rẹ sae ta nọ: “Aye mẹ o re vu omẹ wa!” Evaọ otọ iyero itieye na, ma gwọlọ orimuo re ma si iroro ididi nọ e rọ udu ọzae hayo aye mai lahwe. Enọ ereghẹ wọhọ (Kọ iruo ra e jọ bẹbẹ nẹnẹ? Eme ọ via? Ẹvẹ mẹ sai ro fiobọhọ?) e rẹ sai ru ohwo na rovie eva. Edhesẹ orimuo otiọye na o rẹ sai ru ọgbakugbe orọo na ga viere, avọ erere kẹ ọzae gbe aye na.