Kọ Whọ Sae Hẹriẹ Uwoma No Uyoma?

“Mẹ wha riẹ ze nọ a ro kpe ahwo 25. . . . Mẹ rẹ kareghẹhọ iẹ k’aso k’aso, kẹdẹ kẹdẹ. Mẹ rẹ wezẹ ikpere ewezẹ. . . . Ẹsejọ me te kpohọ eria jọ mẹ vẹ ruẹ ovao ohwo nọ o rẹ kareghẹhọ omẹ ahwo nọ me kpe na. Mẹ sae ruẹ e riẹ vevẹ, epaọ ẹsenọ o via nẹnẹ, obọnana. . . . Mẹ sae rehọ eware nọ me ru na vrẹ oma mẹ hẹ.”—V.S.

“A gbomẹ họ re mẹ nya kpohọ etẹe re me kpe ọwegrẹ na. . . . Me du kerria re me roro sọ ahwo na ezae, eyae gbe emaha ha. . . . Dede o jomẹ oma oke oyena gbe enẹna inọ oware nọ a ta k’omẹ me ru, yọ me ru onọ a ta k’omẹ ababọ udu nọ u bru kp’omẹ.”—W.C.

EVAỌ March 16, 1968, ezae ivẹ nọ e jọ obehru t’ẹme na a te w’abọ evaọ oware nọ a te jọ obaro se egbulegbu ẹmo omovuọ. Ae, te isoja rai, a rueva iwhre Vietnam jọ a te kpe ahwo gheghe udhusoi buobu—te eyae, emọ, gbe ekpako. Rekọ muẹrohọ epanọ oware nọ o via na u duobọhọ isoja ivẹ enana. Osoja ọsosuọ na ọ be vioja fiki oware nọ o ru na. Ọrọ avivẹ na o roro nọ oware nọ o ru na u kiehọ. Ẹvẹ imava i je wo iroro ivẹ nọ e hẹrioma tere kpahe oware ovo nọ a ru?

Uyo na u w’obọ kpahe iroro-oziẹobro—ẹgba nọ Ọghẹnẹ ọ rọ kẹ re u fiobọhọ k’omai kiẹ oma mai riwi ziezi. Iroro-oziẹobro họ ẹgba eva mai nọ ma rẹ rọ riẹ onọ u woma je yoma.

Nọ a tẹ be j’iroro, ahwo jọ a vẹ wariẹ eme na, “Jọ iroro-oziẹobro ra o kpọ owhẹ.” Rekọ, avọ uweri, oke kpobi a re fievahọ iroro-oziẹobro na ha. Evaọ uzẹme, ahwo buobu a kuvẹ hayo ru eware nọ i yoma thesiwa no, rekọ iroro-oziẹobro rai u kpokpo i rai hi. (Jọn 16:2; Iruẹru 8:1) Wọhọ epanọ okere Oyibo na Samuel Butler o muẹrohọ okejọ, iroro-oziẹobro “na u ve ti whu no kẹ ahwo nọ a be kezọ riẹ hẹ.”

Kọ whọ sai fievahọ iroro-oziẹobro ra? Uyo na o roma hwa epanọ a wuhrẹ i rie woma te, wọhọ epanọ uzoẹme n’otha na u ti dhesẹ.

[Picture Credit Line on page 3]

Oria ẹmo obehru na: Ifoto U.S. Signal Corps