Iwhowho Uvie A N’iyẹrẹ

Ẹroharo Uvie na Evaọ Namibia

USIUWOMA Uvie Ọghẹnẹ o kaki te Namibia evaọ abọ urere etoke ikpe 1920. No oke oyena ze, udhusoi buobu erọ ahwo udu oruọzewọ a j’owọ kẹ ovuẹ esiwo Ọghẹnẹ no. Iriruo obotọ na i dhesẹ epanọ Jihova o bi ro koko ahwo isiuru enana ziọ uthuru riẹ.—Hagai 2:7.

◻ Isẹri Jihova a kake nyaku Paulus, ọwhẹrẹ nọ ọ be rria ofẹ ẹkpẹlobọ-ovatha-ọre Namibia, okenọ o weze kpohọ Windhoek, okpẹwho-esuo na. U mu Paulus ẹro vẹrẹ vẹrẹ inọ ọ ruẹ uzẹme na no. O te zihe kpo avọ obe na Whọ Sae Ria Bẹdẹ Bẹdẹ eva Aparadase ọ Otọakpọ. Kẹsena, okenọ o kpohọ Rundu, ẹwho nọ ọ mae kẹle nọ Ọgwa Uvie ọ rọ, Paulus ọ tẹ ruẹ Isẹri na ọ tẹ lẹ ae re a weze bru ei.

Rekọ, ugbo na u thabọ hrọ kẹ Isẹri na re a nyaze ti wuhrẹ Ebaibol kugbe Paulus k’oka k’oka. Avọ ithihakọ, Paulus o te mu Ebaibol na họ ewuhrẹ kẹ omobọ riẹ. Fibae, ọ jẹ rọ ọwhọ ta usiuwoma kẹ amọfa kpahe eware nọ o bi wuhrẹ. U kri hi, a te ti wo ẹko uwuhrẹ Ebaibol. Okenọ ẹko ọsese na ọ jọ irediyo yo nnọ a te jọ Rundu ru okokohọ Isẹri Jihova, a tẹ krọkrọ umugho nọ a wo kpobi a tẹ ruẹrẹ oma kpahe kẹ ofa re a ruẹse jọ okokohọ na.

Ẹvẹ o jọ oware isiuru te kẹ ae re a jọ udevie Isẹri Jihova evaọ orọ ọsosuọ! A te ti ru ọruẹrẹfihotọ re inievo nọ i te e hai weze bru utu nana ẹsikpobi. Nẹnẹ na, iwhowho-uvie ezeza e rọ iwhre nọ Paulus ọ be rria na.

◻ Isiuru Johanna rọkẹ odẹ Ọghẹnẹ o kpare okenọ o yo ohwo jọ nọ ọ be ta ikpele eme kpahe Isẹri Jihova. Ọ kareghẹhọ nnọ: “Oke ọsosuọ nọ me yo odẹ na Jihova, o tẹ tamu iroro mẹ, me te je roro kpahe ohwo nọ Jihova ọ rọ. Mẹ jẹ rria kugbe ọzae mẹ kẹle Walvis Bay evaọ unueri Namibia. Ẹdẹjọ ma tẹ nya ruọ ẹwho, mẹ tẹ ruẹ Isẹri jọ nọ e be ghale emagazini Uwou-Eroro Na evaọ iyẹrẹ. Mẹ rehọ ovo jọ mẹ tẹ yare uwuhrẹ Ebaibol, keme me wo enọ buobu. Mẹ viẹ nọ a vuẹ omẹ nọ a sae te nyaze he keme omoto rai ọ raha no. U kri hi ọzae mẹ o te whu, mẹ tẹ kwa kpohọ Keetmanshoop. A vi ọkobaro obọdẹ (ọtausiuwoma oke-kpobi) jọ re ọ jọ obei ruiruo, mẹ tẹ rehọ obe na Uzẹme nọ U re Suohwo kpo Uzuazọ Ebẹdẹbẹdẹ mi ei. No emuhọ ze, me te vuhu uzẹme na mu.

“Uwhremu na, a te zizie omẹ re me w’obọ evaọ iruo ẹta usiuwoma na, rekọ ozodhẹ ahwo o j’omẹ oma. Nọ mẹ jẹ nya n’ẹthẹ ruọ ẹthẹ, mẹ tẹ lẹ se Jihova nọ ọ kuvẹ re me whu viukpenọ ọ rẹ j’omẹ ta usiuwoma. Okenọ mẹ kaki ru isẹri-ise iyẹrẹ, mẹ ko oma mẹ dhere oria jọ, bi rẹro nọ uvumọ ohwo ọ te ruẹ omẹ hẹ. Uwhremu na, mẹ tẹ daoma rọ emagazini ghrẹ ohwo jọ nọ ọ be nyavrẹ, kọ ẹsiẹ ọvo mẹ rọ bọunu. Evaọ ẹdẹ ọyena, avọ obufihọ Jihova, mẹ tẹ ghale ẹruore Ebaibol mẹ kugbe ahwo buobu.

“Nẹnẹ, avọ ikpe 12 nọ e vrẹ no, dede nọ mẹ rọ oyogbere, iruo ọkobaro na e gbẹ rọ omẹ ẹro ghaghae yọ o gbẹ rọ oghọghọ ulogbo kẹ omẹ re mẹ ghale uzẹme Uvie na kugbe amọfa.”