Eme ọ Eruẹaruẹ Ọghẹnẹ Kpobi I Ti Rugba!
1 Isẹri Jihova a wo isiuru ẹsikpobi kpahe eruẹaruẹ Ebaibol. Fikiere eva e were omai okenọ ma ruẹ nọ uzoẹme okokohọ ubrotọ ọrọ 1999/2000 na o te jọ “Ẹme Eruẹaruẹ Ọghẹnẹ.” Oma o jẹ kpakpa omai re ma riẹ oware nọ Jihova o wo k’omai wọhọ ‘emuore evaọ ẹruoke.’ (Mat. 24:45) U fi rie abọ kie he.
2 Igogo Eme Okokohọ Na: Ẹme ọsogba ọrọ Edisoi-Oka na, “Kezọ kẹ Ẹme Eruẹaruẹ Ọghẹnẹ,” o wo ẹmeọta ọjaja ọrọ ikuigbe ẹrẹriẹ na. (Mat. 17:1-9) U fiẹgbahọ iẹe nnọ obọnana ma rrọ unuẹthẹ ọ obọdẹ oke keme ma nya kodo ruọ oke urere na gaga no, avọ uyerakpọ ọkpokpọ na nọ o nwane rọ obaro! Obọdẹ edhere jọ nọ ma rẹ rọ kezọ kẹ Ẹme Ọghẹnẹ họ ẹkwoma ese riẹ ẹsikpobi. Ẹme ọzọhọkugbe-eriariẹ na “Wo Isiuru kẹ Isase Ẹme Ọghẹnẹ” ọ k’omai uvi ẹjiroro nọ ma re ro ru isase Ebaibol mai jọ avọ erere gbe isiuru viere.
3 Evaọ uvo Ẹdẹ-Ọmaha, ma kiẹ ẹjiroro jọ nọ ma ro wo imuẹro nnọ ma be rria evaọ edẹ urere na riwi. Kọ whọ sae kareghẹhọ enana kpobi? Evaọ ohiohiẹ Ẹdoka, eruẹaruẹ Habakuk e jọ kpokpọ kpokpọ nọ ma ruẹ nnọ edẹ mai na i tho edẹ riẹ gaga jegbe nnọ ikpeware e te via kẹle na evaọ okenọ Jihova ọ te raha irumuomu na je siwi ikiẹrẹe na. Kọ who wo otoriẹ edrama Ebaibol na kpahe Jekọp avọ Esọ? Ma rẹ rọ ẹgba mai kpobi le eghale nọ i re no obọ Jihova ze, whaha ẹzi ababọ osegboja gbe ababọ-isiuru.
4 Obe Okpokpọ Isiuru: Ẹvẹ oma o were omai te nọ obe okpokpọ na u t’omai obọ, Kezọ kẹ Eruẹaruẹ Daniẹl! Ababọ avro who mu obe isiuru nana họ ese no. Oruẹme nọ o siobọ noi na ọ ta nọ: “U te no umutho jọ no, eruẹaruẹ nọ e rrọ obe Daniẹl na kpobi i rugba no.” Kọ oyena u gbe dhesẹ epanọ oke mai na o kpata te?
5 Eme okokohọ na i ru imuẹro mai ga viere no inọ eyaa Ọghẹnẹ kpobi nọ i ri rugba ha i ti rugba. Oma o be kpakpa omai re ma gbe whowho ẹme eruẹaruẹ Ọghẹnẹ kẹ amọfa!